នាយករដ្ឋមន្ត្រីនិងក្រសួង-ស្ថាប័នពាក់ព័ន្ធជួបសហព័ន្ធស្រូវអង្ករកម្ពុជា ដើម្បីជំរុញការនាំចេញទៅកាន់ទីផ្សារអន្តរជាតិនិងត្រៀមរៀបចំសន្និសីទស្រូវអង្ករពិភពលោក ឆ្នាំ២០២៥
21-September-2026 / សេដ្ឋកិច្ច
ភ្នំពេញ៖សម្ដេចបវរធិបតី ហ៊ុន ម៉ាណែត បានលើកទឹកចិត្តឱ្យសហព័ន្ធស្រូវអង្ករកម្ពុជា បន្តសហការឱ្យកាន់តែជិតស្និទ្ធិថែមទៀតជាមួយក្រសួង-ស្ថាប័នពាក់ព័ន្ធនៃរាជរដ្ឋាភិបាល ដើម្បីជំរុញការនាំចេញផ្ទាល់ឱ្យកាន់តែទូលំទូលាយទៅកាន់ទីផ្សារអន្តរជាតិ ក៏ដូចជាការចូលរួមផ្តល់ការបណ្ដុះបណ្ដាលជំនាញបច្ចេកទេសដល់ប្រជាកសិករ សំដៅលើកកម្ពស់គុណភាពផលិតផល និងបង្កើនផលិតភាព ព្រមទាំង ជំរុញ ការផ្សព្វផ្សាយអំពី ការ វិវឌ្ឍ រីកចម្រើន នៃផលិត កម្ម ស្រូវ អង្ករ កម្ពុជា ឱ្យបានទូលំទូលាយ។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា នាព្រឹកថ្ងៃទី០៨ ខែមករា ឆ្នាំ២០២៥បានអនុញ្ញាតឱ្យប្រតិភូសហព័ន្ធស្រូវអង្ករកម្ពុជា ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព ។
អ្នកឧកញ៉ា ហ៊ុន ឡាក់ ប្រធានក្រុមប្រឹក្សាភិបាលគោលនយោបាយស្រូវអង្ករ នៃសហព័ន្ធស្រូវអង្ករកម្ពុជា បានគោរពជម្រាបជូនសម្តេចបវរធិបតី អំពីវឌ្ឍនភាព និងសកម្មភាពការងាររបស់សហព័ន្ធស្រូវអង្ករកម្ពុជា ក្នុងការចូលរួមចំណែកជំរុញការនាំចេញស្រូវអង្ករកម្ពុជា ទៅកាន់ទីផ្សារអន្តរជាតិ។ អ្នកឧកញ៉ាក៏បានលើកឡើងអំពីកិច្ចខិតខំប្រឹងប្រែង និងការយកចិត្តទុកដាក់លើគុណភាពស្រូវអង្ករកម្ពុជា, ការប្រមូលទិញស្រូវពីប្រជាកសិករ, ការរៀបចំសម្ងួត, ការស្ដុកទុក និងការនាំចេញស្រូវអង្ករទៅកាន់ទីផ្សារអន្តរជាតិ។
សម្ដេចបវរធិបតីបានសង្កត់ធ្ងន់ថា រាជរដ្ឋាភិបាលនៅតែផ្ដល់អាទិភាពលើដំណាំស្រូវ ដែលជាដំណាំយុទ្ធសាស្ត្រ យូរអង្វែងរបស់កម្ពុជា និងបានគូសបញ្ជាក់អំពីការដាក់ចេញគោលនយោបាយចាំបាច់ ដើម្បីគាំទ្រដំណាំស្រូវ និងធានាបាននូវភាពប្រកួតប្រជែងរបស់វិស័យស្រូវអង្ករកម្ពុជា តាមរយ:ការកសាងហេដ្ឋារចនាសម្ព័ន្ធតភ្ជាប់, ការសម្រួលការដឹកជញ្ជូន និងការកាត់បន្ថយថ្លៃដើមផលិតកម្ម ក៏ដូចជាជំរុញភាពម្ចាស់ការលើខ្សែច្រវាក់ផ្គត់ផ្គង់ក្នុងស្រុក និងការនាំចេញទៅកាន់ទីផ្សារអន្តរជាតិ។
មានការកត់សម្គាល់ថាជំនួបនាយករដ្ឋមន្ត្រីជាមួយសហគមន៍ស្រូវអង្គរកម្ពុជានេះបានកើតឡើងបន្ទាប់ពីប៉ុន្មានថ្ងៃនេះមានប្រតិកម្មពីប្រជាកសិករអំពីបញ្ហាស្រូវចុះថោកដែលធ្វើឲ្យកសិករមានការខាតបង់បន្ទាប់ពីបានចំណាយកម្លាំងនិងធនធានដើម្បីផលិត។ប្រភពពីមន្ត្រីជានខ្ពសដ់ក្រសួងកសិកម្មបានឲ្យដឹងថាឆ្នាំ២០២៤កម្ពុជាផលិតស្រូវបានជាង១៤លានតោន។ចំនួននេះលើសពីតម្រូវការផ្គត់ផ្គង់ក្នុងស្រុកដែលទាមទារការលក់ចេញ។ទៅបីយ៉ាងណាទីផ្សារស្រូវអង្គរដែលសំខាន់តែប្រទេសជិតខាងកំពុងមានបញ្ហាដោយសារទំហំនៃការប្រមូលទិញហាក់បីដូចជាធ្លាក់ចុះ។អ្នកស្រី ថាង រស្មី កសិករធ្វើស្រែប្រាំងបានប្រាប់ថា តម្លៃស្រូវបច្ចុប្បន្នធ្លាក់ចុះមកនៅត្រឹមជាង ៦០០ រៀល ក្នុងមួយគីឡូក្រាម ដែលមិនអាចទូទាត់ជាមួយតម្លៃជី ប្រេង ថ្នាំ និងកម្លាំងពលកម្ម។
លោក ឈឹម វជិរ៉ា ប្រធានមន្ទីរកសិកម្ម រុក្ខា ប្រមាញ់ និងនេសាទ ខេត្តបាត់ដំបងប្រាប់កាសែត នៅថ្ងៃទី ០៨ ខែមករា ឆ្នាំ ២០២៥ ថា តម្លៃស្រូវនាងខុន បានប្រមូលផលចាប់តាំងពីដំណាខែធ្នូ ឆ្នាំ ២០២៤ ដែលឆ្នាំ កន្លងមក វៀតណាមមានការប្រមូលទិញស្រូវច្រើនដើម្បីបង្គ្រប់ស្ដុក រួមផ្សំនឹងការបំពេញតម្រូវការក្នុងស្រុកផង ហើយការនាំចេញធ្វើកិច្ចសន្យាកុងត្រានាំចេញទៅក្រៅប្រទេសផង ដូច្នេះគេប្រមូលទិញពីស្រុកខ្មែរ ទៅទាំងអស់ដោយមិនគិតទៅលើគុណភាពស្រូវ។
លោក ឈឹម វជិរ៉ា បន្តថា៖ «ឆ្នាំនេះ ស្រូវនាងខុន លក់ពីដំបូងបានចន្លោះពី ៨០០ រៀល ទៅ ៨០៨០ រៀលក្នុងមួយគីឡូក្រាម ហើយបន្ទាប់មកវាធ្លាក់រហូត ហើយមានតែរោងម៉ាស៊ីនតូចៗ ទេ ព្រោះគាត់ទិញឥឡូវនេះ គាត់ទិញនៅពេលដែលគាត់កិនជាអង្កទៅនៅក្នុងខែ ៧ ខែ ៨ ម្យ៉ាងទៀតរោងម៉ាស៊ីនធំៗភាគច្រើន កែច្នៃស្រូក្រអូប ផ្កាម្លិះ ផ្ការដួល ស្រងែ ឬសែនក្រអូប ដោយឡែកស្រូវ អូអឹម ឬនាងខុន គាត់អត់ដែលទិញទេ ហើយឆ្នាំនេះ វៀតណាមក៏មិនទិញ ហើយតម្រូវការយើងប្រើប្រាស់ក្នុងស្រុកតិចតួច ហើយរោងម៉ាស៊ីនបានសម្រុកទិញរដូវវស្សាឆ្នាំ ២០២៤ កន្លងមក គឺយើងប្រមូលទិញទុកច្រើន មកដល់ម៉ោងនេះ ការបញ្ចេញអង្ករលក់ទៅក្រៅប្រទេសបានតិចតួច អញ្ចឹងបានជាស្រូវនៅឃ្លាំងធំៗពេញធ្វើឱ្យគាត់ចាល់»។
សូមបញ្ជាក់ថាប្រទេសកម្ពុជា បានឈ្នះពានរង្វាន់អង្ករល្អបំផុតរបស់ពិភពលោក កាលពីខែវិច្ឆិកា ឆ្នាំ២០២៤ នាទីក្រុងម៉ានិល ប្រទេសហ្វីលីពីន។ លោកប្រធានក្រុមហ៊ុន និងជានាយកប្រតិបត្តិ The Rice Trader (TRT) និងជាស្ថាបនិក World Rice Conference (WRC) បានសម្ដែង នូវការអបអរសាទរនិង បានបង្ហាញអំពីការគាំទ្រដល់កម្ពុជានៅក្នុងការធ្វើជាម្ចាស់ផ្ទះរៀបចំសន្និសីទស្រូវអង្ករពិភពលោក សម្រាប់ឆ្នាំ២០២៥ នេះផងដែរ។ ការគាំទ្រនេះក្នុងឱកាសដែលសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យ លោក Jeremy Zwinger ប្រធានក្រុមហ៊ុន និងជានាយកប្រតិបត្តិ The Rice Trader (TRT) និងជាស្ថាបនិក World Rice Conference (WRC) ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព នារសៀលថ្ងៃទី៨ ខែមករា ឆ្នាំ២០២៥។
សម្ដេចបវរធិបតីបានគូសបញ្ជាក់ជូនលោកលោកប្រធានក្រុមហ៊ុន និងជានាយកប្រតិបត្តិ The Rice Trader (TRT) និងជាស្ថាបនិក World Rice Conference (WRC អំពីការដាក់ចេញគោលនយោបាយចាំបាច់នានារបស់រាជរដ្ឋាភិបាល នៅក្នុងការគាំទ្រទៅដល់ផលិតកម្មស្រូវអង្កររបស់កម្ពុជា ដើម្បីធានាឱ្យបាននូវភាពប្រកួតប្រជែង ក៏ដូចជាការអភិវឌ្ឍហេដ្ឋារចនាសម្ព័ន្ធ និងឡូជីស្ទីក សំដៅសម្រួលទៅដល់ការដឹកជញ្ជូន និងកាត់បន្ថយថ្លៃដើមផងដែរ៕
