វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1070 នាក់
ម្សិលមិញ 5168 នាក់
សរុប 16013204 នាក់
ភ្នំពេញ៖ក្រសួងការបរទេសហ្វីលីពីនបានឲ្យដឹងថា ស្ដ្រីហ្វីលីពីនដែលស៊ីឈ្នួលពពោះទាំង១៣នាក់ដែលកម្ពុជាចាប់ខ្លួនត្រូវបានរដ្ឋាភិបាលកម្ពុជាលើកលែងទោសហើយ បានទៅដល់ទីក្រុងម៉ានីលដោយសុវត្ថិភាពហើយ នៅថ្ងៃទី ២៩ធ្នូនេះ។ ព្រះមហាក្សត្រក៏បានចេញព្រះរាជក្រឹត្យលើកលែងទោស នៅថ្ងៃទី ២៦ធ្នូ តបតាមសំណើរបស់ក្រសួងការបរទេស ស្ថានទូតហ្វីលីពីន និងក្រុមប្រឹក្សាអន្តរទីភ្នាក់ងារប្រឆាំងការជួញដូរមនុស្សហ្វីលីពីនដែលស្នើមកកម្ពុជា។
ក្រសួងការបរទេសហ្វីលីពីន បានចាត់ទុកការសម្រេចរបស់ភាគីកម្ពុជាថា ជាសក្ខីភាពមួយបញ្ជាក់ទំនាក់ទំនងមិត្តភាពដ៏យូរអង្វែងរវាងហ្វីលីពីន និងកម្ពុជា។ ស្ថានទូតហ្វីលីពីនបន្ថែមថា នេះជាការប្តេជ្ញាចិត្តរួមគ្នាមួយរបស់រដ្ឋាភិបាលនៃប្រទេសទាំងពីរ ក្នុងការប្រយុទ្ធប្រឆាំងនឹងអំពើជួញដូរមនុស្ស និងឧក្រិដ្ឋកម្មឆ្លងដែន។ក្រសួងការបរទេសហ្វីលីពីនបាន ក្រើនរំលឹកដល់សាធារណជនហ្វីលីពីនថា ការពពោះជំនួសត្រូវបានហាមឃាត់នៅក្នុងប្រទេសកម្ពុជា ហើយថា បើជនណាហ៊ានបំពាននឹងត្រូវទទួលទោសតាមច្បាប់កម្ពុជា។
ទាក់ទងនិងបទល្មើស ពពោះស្ត្រីហ្វីលីពីននេះ លោក អំ សំអាត នាយកប្រតិបត្តិរបស់អង្គការសិទ្ធិមនុស្សលីកាដូបានលើកឡើងថា ពាក់ព័ន្ធករណីនេះ កម្ពុជា និងហ្វីលីពីនគួរតែធ្វើកិច្ចសហប្រតិបត្តិការជាមួយគ្នាបន្តទៀត ដើម្បីស្វែងរកជន ឬក្រុមដែលធ្វើអាជីវកម្មលើការជួញដូរមនុស្ស តាមរយៈការពពោះជំនួសនេះ។ លោកបញ្ជាក់ថា ការបន្ដកិច្ចសហប្រតិបត្តិការ ជាការអនុវត្តច្បាប់របស់កម្ពុជាផង និងជាការទប់ស្កាត់មិនឱ្យមានបាតុភាពបែបនេះកើតឡើងទៀតនៅក្នុងតំបន់។
លោកស្រី ជូ ប៊ុនអេង អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងនឹងអំពើជួញដូរមនុស្សកម្ពុជាធ្លាប់បានលើកឡើងថា រឿងកើតឡើងលើទឹកដីកម្ពុជា កម្ពុជាត្រូវតែដោះស្រាយតាមនីតិវិធីច្បាប់ និងថា កម្ពុជាស្វាគមការសហការជាមួយភាគីហ្វីលីពីន ក្នុងការស្វែងរកអ្នកពាក់ព័ន្ធទាំងអស់ក្នុងករណីជួលមនុស្សឱ្យពពោះជំនួសនេះ។ស្ត្រីហ្វីលីពីនទាំង១៣នាក់ ត្រូវបានអាជ្ញាធរកម្ពុជារកឃើញ និងជួយសង្គ្រោះនៅខេត្តកណ្ដាល តាំងពីខែកញ្ញា ឆ្នាំ២០២៤ ហើយនៅថ្ងៃទី ២ធ្នូ តុលាការខេត្តកណ្ដាលបានកាត់ទោសឱ្យស្ដ្រីទាំង១៣នាក់នោះឲ្យជាប់ពន្ធនាគារ ៤ឆ្នាំ ពីបទប៉ុនប៉ងក្នុងអំពើលក់ដូរមនុស្សសម្រាប់នាំឆ្លងដែន។
យោងតាមសេចក្ដីប្រកាសព័ត៌មានរបស់តុលាការខេត្តកណ្ដាល ស្ដ្រីហ្វីលីពីនទាំង១៣នាក់ មានចេតនាពពោះជំនួស ដើម្បីបង្កើតទារកក្នុងគោលបំណងលក់ដូរទៅឱ្យអ្នកទី៣ ជាថ្នូរនឹងទឹកប្រាក់ ដែលអំពើនេះត្រូវបានកំណត់ថា ជាបទល្មើសលក់ដូរមនុស្ស។ បទល្មើសនេះ បានប៉ះពាល់ដល់សន្តិសុខ សណ្តាប់ធ្នាប់សាធារណៈ ពិសេសប៉ះពាល់ធ្ងន់ធ្ងរដល់សិទ្ធិជាមនុស្សរបស់ទារក និងកុមារ ដែលត្រូវគាំពារដោយច្បាប់ជាតិ និងច្បាប់អន្តរជាតិ។សូមរម្លឹកថា កាលពីថ្ងៃទី២៣ ខែកញ្ញា អាជ្ញាធរកម្ពុជាបានជួយសង្គ្រោះស្ត្រីពពោះជំនួសខុសច្បាប់ជាជនជាតិហ្វីលីពីនចំនួន២០នាក់នៅក្នុងខេត្តកណ្តាល។ ស្ត្រីទាំង២០នាក់នោះបានចាញ់បោកជនមិនស្គាល់អត្តសញ្ញាណតាមអ៊ីនធ័រនែតនាំចេញទៅកាន់តំបន់អាស៊ីអាគ្នេយ៍ និងនៅទីបំផុតបានមកដល់ប្រទេសកម្ពុជា។