បណ្ឌិតសភាចារ្យ សុខប្រធានរាជបណ្ឌិត្យសភាកម្ពុជា ទូចសសើ ចិនដែលចាក់ភាសាចូលមកកម្ពុជា
06-June-2026 / សុខភាពនិងកីឡា
ភ្នំពេញ៖ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងជាសហប្រធានក្រុមប្រឹក្សាភិបាលវិទ្យាស្ថានខុងជឺ បានចាត់ទុក ភាសាគឺជាស្ពានចម្លងវប្បធម៌មួយទៅវប្បធម៌មួយ ។
នៅក្នុងឱកាសអបអរសាទរខួប២០ឆ្នាំ នៃការបង្កើតវិទ្យាស្ថានខុងជឺ និងខួប១៥ឆ្នាំ នៃការបង្កើត «វិទ្យាស្ថានខុងជឺនៃរាជបណ្ឌិត្យសភាកម្ពុជា» នាថ្ងៃទី២២ ខែធ្នូ ឆ្នាំ២០២៤ នៅរាជបណ្ឌិត្យសភាកម្ពុជាលោកបណ្ឌិត្យសភាចារ្យ សុខ ទូច បានថ្លែងថា៖ «ភាសា មិនត្រឹមតែជាស្ពាននោះទេ ប៉ុន្តែភាសា ក៏ជាកញ្ចក់ឆ្លុះបេះដូង ភាសាអាចធ្វើឱ្យមនុស្សរន្ធត់ ភាសាអាចធ្វើឱ្យមនុស្សស្រក់ទឹកភ្នែក ភាសាក៏អាចធ្វើឱ្យមនុស្សក្លាហាន ហើយភាសាក៏អាចធ្វើឱ្យមនុស្សរីករាយ ដូច្នេះនេះភាសាសំខាន់ខ្លាំងណាស់»។
ដោយឈរលើចំណុចចាប់ផ្ដើមក្នុងប្រវត្តិសាស្ត្រថ្មី វិទ្យាស្ថានខុងជឺនៃរាជបណ្ឌិត្យសភាកម្ពុជានឹងនៅតែបន្ដខិតខំ ចាក់បញ្ចូលកម្លាំងរស់រវើកជាច្រើនបន្ថែមទៀត ដល់ការអភិវឌ្ឍវិស័យអប់រំភាសាចិននៅក្នុងប្រទេសកម្ពុជា និងធ្វើជា «ស្ពាន» ដ៏រឹងមាំ សម្រាប់តភ្ជាប់ការផ្លាស់ប្ដូរវប្បធម៌កម្ពុជា-ចិន។ នាពេលអនាគត វិទ្យាស្ថានខុងជឺនៃរាជបណ្ឌិត្យសភាកម្ពុជា នឹងខិតខំអភិវឌ្ឍប្រព័ន្ធសិក្សា ឱ្យកាន់តែល្អប្រសើរថែមមួយកម្រិតទៀត តាមរយៈការនិពន្ធសៀវភៅសិក្សាភាសាចិន ដែលសមស្របទៅនឹងទិដ្ឋភាពរបស់ប្រទេសកម្ពុជា ស្របពេលដែលពង្រឹងការអភិវឌ្ឍធនធានគ្រូបង្រៀន និងទំនាក់ទំនងជាមួយសាកលវិទ្យាល័យជីវជាំង ព្រមទាំងស្ថាប័នដៃគូផ្សេងៗទៀតផងដែរ សំដៅរួមគ្នាជំរុញកិច្ចអភិវឌ្ឍក្នុងវិស័យអប់រំភាសាចិន ប្រកបដោយគុណភាព។ នេះបើតាមការបញ្ជាក់ពីលោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា។
សូមជម្រាបថា កាលពី១៥ឆ្នាំមុន លោក ស៊ី ជីនភីង ក្នុងតំណែងជាអនុប្រធានាធិបតីនៃប្រទេសចិន និងសម្ដេចវិបុលបញ្ហា សុខ អាន ដែលពេលនោះជាទេសរដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានអញ្ជើញមករាជបណ្ឌិត្យសភាកម្ពុជា ដើម្បីសម្ពោធផ្លាក «វិទ្យាស្ថានខុងជឺនៃរាជបណ្ឌិត្យសភាកម្ពុជា» ដោយផ្ទាល់ ដែលជាការសម្ពោធវិទ្យាស្ថានខុងជឺទី១ នៅក្នុងប្រទេសកម្ពុជា បានបើកទំព័រថ្មី នៃការផ្លាស់ប្ដូររវាងប្រជាជនកម្ពុជា និងប្រជាជនចិន។
លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងជាសហប្រធានក្រុមប្រឹក្សាភិបាលវិទ្យាស្ថានខុងជឺ បានបញ្ជាក់ថា ក្នុងរយៈពេល១៥ឆ្នាំនេះ វិទ្យាស្ថានខុងជឺបានទទួលពានរង្វាន់ «វិទ្យាស្ថានខុងជឺឆ្នើមទូទាំងពិភពលោក» ចំនួន៣លើក និងពានរង្វាន់ «ពន្លឺនៃវិទ្យាស្ថានខុងជឺ» ចំនួន១លើក សមិទ្ធផលទាំងអស់នេះ គឺកើតចេញពីការខិតខំប្រឹងប្រែង និងការលះបង់ ពីអតីតថ្នាក់ដឹកនាំ លោកគ្រូ អ្នកគ្រូ និងក្រុមការងារទាំងអស់។
លោក វ៉ាង វិនពីន ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំកម្ពុជា ដែលចូលរួមបានថ្លែងថា ការទទួលបានពានរង្វាន់ «ពន្លឺនៃវិទ្យាស្ថានខុងជឺ» របស់លោកបណ្ឌិតសភាចារ្យ សុខ ទូច មិនតែជាកិត្តិយសផ្ទាល់ទេ ប៉ុន្តែក៏ជាការទទួលស្គាល់ចំពោះកិច្ចការងាររបស់វិទ្យាស្ថានខុងជឺផងដែរ។ឯកអគ្គរដ្ឋទូត វ៉ាង វិនពីន ថា៖ «នៅពេលថ្មីៗនេះ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានទទួលពានរង្វាន់ «ពន្លឺនៃវិទ្យាស្ថានខុងជឺ» ក្នុងមហាសន្និបាទភាសាចិនពិភពលោកលើកទី២០។ នេះមិនត្រឹមតែជាកិត្តិយសផ្ទាល់ខ្លួនរបស់លោកបណ្ឌិតសភាចារ្យប៉ុណ្ណោះទេ ប៉ុន្តែក៏ជាសក្ខីភាពនៃការទទួលស្គាល់ចំពោះកិច្ចការងាររបស់វិទ្យាស្ថានខុងជឺផងដែរ»។
បើគិតមកទល់ពេលនេះ វិទ្យាស្ថានខុងជឺមានសិក្ខាកាមដែលបញ្ចប់ការសិក្សាប្រមាណ៩ម៉ឺននាក់ ហើយពួកគាត់បានក្លាយជាប្រេសិតក្នុងការជំរុញទំនាក់ទំនងកម្ពុជា-ចិន។បច្ចុប្បន្ននេះ វិទ្យាស្ថានខុងជឺមានទីតាំងបង្រៀនចំនួន២៥ ក្នុងនោះ មានដេប៉ាតឺម៉ង់ភាសាចិននៅគ្រឹះស្ថានឧត្តមសិក្សាចំនួន១ ថ្នាក់រៀនខុងជឺចំនួន២ និងមជ្ឈមណ្ឌលភាសាចិនចំនួន២២ ដែលមានសិក្ខាកាមប្រមាណ១៣ម៉ឺនាក់ បានចុះឈ្មោះចូលរៀន៕
