នៅ ខេត្តកំពង់ឆ្នាំងសារមន្ទីរតាំងវត្ថុបុរាណមានតម្លៃមហាសាលដែលខ្មែរនិងបរទេសមិនគួររំលង
21-September-2026 / ទេសចរណ៏និងវប្បធម៌
កំពង់ឆ្នាំង៖សារមន្ទីរខេត្តកំពង់ឆ្នាំង បាននិងកំពុងបើកទ្វារចាំទទួលភ្ញៀវជាតិ និងអន្តរជាតិ ជារៀងរាល់ថ្ងៃ និងរៀងរាល់ម៉ោងធ្វើការ គឺក្នុងគោលបំណងឲ្យភ្ញៀវជាតិ ពិសេសអ្នកខេត្តកំពង់ឆ្នាំង បានចូលទស្សនានូវវត្ថុបុរាណដែលមានតម្លៃមហាសាល មានដូចជាប្រតិមាកុលាលភាជន៍ និងសមុច្ច័យធ្វើអំពីលោហៈផ្សេងៗ ជាស្នា ដៃរបស់បុព្វបុរសយើងដែលកូនចៅខ្មែរជំនាន់ក្រោយខ្លះពុំដែលបានឃើញនិងបានស្គាល់។
លោក ប៊ុនថន សុខាណារិទ្ធ ប្រធានស្តីទី នៃមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានឱ្យដឹងថា សារមន្ទីរ បានបើកទ្វារជាយូរណាស់មកហើយ ប៉ុន្តហាក់ដូចជានៅឆ្ងាយពីការចាប់អារម្មណ៍ ពីសំណាក់ភ្ញៀវទេសចរណ៍ជាតិនិងអន្តរជាតិ ។តែរយៈពេលជិត ៣ខែកន្លងមកនេះចាប់តាំងពីលោកចូលមកបម្រើការ នៅទីនេះ លោកបានធ្វើការរៀបចំសារមន្ទីរ ខេត្តកំពង់ឆ្នាំង ដើម្បីឲ្យវាក្លាយទៅជាទីតាំងមួយជាទីចាប់អារម្មណ៍សម្រាប់ប្រជាពលរដ្ឋនៅក្នុងប្រទេសកម្ពុជានេះបើនិយាយជារួម និយាយដោយឡែក គឺសម្រាប់ប្រជាពលរដ្ឋនៅក្នុងខេត្តកំពង់ឆ្នាំងតែម្តង។
លោកបានបញ្ជាក់ទៀតថា សារមន្ទីរគឺជាឃ្លាំងនៃការផ្ទុកសមុច្ច័យទាំងឡាយមានជាប្រភេទថ្មភួក កុលាលភាជន៍ លោហៈ កែវ ស្ត្រាស្លឹករឹ ត ឈើ ប្រមរ និងជ័រ ក្នុងចំណោមវត្ថុធាតុទាំងអស់សមុច្ច័យធ្វើអំពីលោហៈធាតុ គឺមានច្រើនជាងគេ។ដោយឡែកវត្ថុបូរាណទាំងអស់នៅក្នុងសារមន្ទីរនៅខេត្តកំពង់ឆ្នាំងមានជាច្រើនប្រភេទ ប្រសិនបើយើងនិយាយអំពីរូបប្រតិមា ដែលបានដាក់តាំងនៅក្នុងសារមន្ទីររបស់យើងនេះ គឺមានតម្លៃមហាសាលមិនអាចកាត់ថ្លៃបាន និងជាភស្តុតាងជាប្រវត្តិសាស្ត្រដែលដូនតាបានបន្សល់ទុក គឺមានតម្លៃខាងប្រវត្តិសាស្ត្រតម្លៃខាងសិល្បៈ តម្លៃខាងវប្បធម៌ និងមានតម្លៃខាងសាសនា។
ប្រសិនបើបានចូលទស្សនានៅទីនេះ យើងអាចដឹងអំពីជំនឿ នឹងអាចដឹងអំពីរបបនៃការគោរពអំពីជំនឿផ្នែកសាសនា មានតម្លៃផ្នែកសង្គមកិច្ច យើងអាចដឹងពីរបៀបរបបនៃកា ររស់នៅពីមួយជំនាន់ទៅមួយជំនាន់ បើនិយាយអំពីតម្លៃនៃសិល្បៈវិញតាមរយៈនៃវត្ថុទាំងអស់នៅទីនេះ គឺសុទ្ធសឹងជាសិល្បៈដែលចេញពីភាពច្នៃប្រឌិតរបស់ដូនតាខ្មែរដែលបានបន្សល់ទុកឱ្យកូនចៅជំនាន់ក្រោយបានឃើញ និងបានស្គាល់។លោកប្រធានស្ដីទី ក៏សូមធ្វើការសំណូមពរដល់ប្រជាពលរដ្ឋក្នុងខេត្តកំពង់ឆ្នាំងទាំងអស់ ពិសេសគឺផ្ដើមចេញពីមន្ត្រីរាជការ និងកងកម្លាំងប្រដាប់អាវុធនៅក្នុងខេត្ត សូមមេត្តាចូលរួម និងចូលទស្សនាស្វែងយល់ អំពីសមុច្ច័យធ្វើអំពីលោហៈ កុលាលភាជន៍ និងប្រតិមាផ្សេងៗដែលប្រជាពលរដ្ឋ និងមន្ត្រីរាជការមួយចំនួនពុំទាន់បានស្គាល់អំពីវត្ថុបុរាណដ៏មានតម្លៃទាំងអស់នេះ ។
ចូលទស្សនាដើម្បីស្វែងយល់ឱ្យបានស្គាល់ខ្លួនឯងផង និងជួយផ្សព្វផ្សាយដល់មន្ត្រីរាជការក្រោមឱវាទ និងជួយផ្សព្វផ្សាយដល់ប្រជាពលរដ្ឋក្នុងខេត្ត ជាពិសេសគឺជួយផ្សព្វផ្សាយដល់ភ្ញៀវទេសចរណ៍ជាតិ និងអន្តរជាតិផង ដើម្បីឲ្យពួកគាត់បានចូលទស្សនាសារមន្ទីរ នៃមន្ទីរវប្បធម៌ខេត្តកំពង់ឆ្នាំង ឲ្យបានផុលផុស និងច្រើនកុះករ ដើម្បីជាការជួយលើកទឹកចិត្ត និងផ្ដល់កម្លាំងចិត្តដល់មន្ត្រីនៃមន្ទីរវប្បធម៌ដែលបានប្រឹងប្រែងរៀបចំ និងរង់ចាំទទួលភ្ញៀវចូលទស្សនា។
លោក សន ចាន់ធឿន ប្រធានការិយាល័យសារមន្ទីរនៃមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានឲ្យដឹងផងដែរថា សារមន្ទីរខេត្តកំពង់ឆ្នាំង មានសមុច្ច័យសរុបជាង៤០០ដុំ បំណែក ប្រភេទសមុច្ច័យ និងវត្ថុបុរាណនៅក្នុងសារមន្ទីរនេះ មានជាប្រភេទថ្មភួក ប្រភេទកុលាលភា ជន៍ ប្រភេទកែវ ប្រភេទស្ត្រាស្លឹករឹត ប្រភេទឈើ និងក៏មានប្រភេទផ្សេងទៀតជាច្រើនផងដែរ។ វត្ថុបុរាណដែលមានដាក់តាំងនៅក្នុងសារមន្ទីរខេត្តកំពង់ឆ្នាំងនេះគឺមានចាប់ តាំងពីសម័យបុរេសម័យមុនអង្គរ សម័យក្រោយអង្គរ និងសម័យបច្ចុប្បន្នផងដែរ។
