លោក ហ្សេលេនស្គី មិនដឹងពីអ្វីដែលមាន ក្នុងផែនការបញ្ចប់សង្គ្រាមរុស្ស៉ី-អ៊ុយក្រែន របស់លោក ត្រាំក្នុងពេលរុស្សីក៏ប្រកាសមិនចោលផែនការរបស់ខ្លួនដែរ!
21-September-2026 / ព័ត៌មានអន្តរជាតិ
អ៊ុយក្រែន៖ ប្រធានាធិបតីអ៊ុយក្រែន លោក Volodymyr Zelenskiy មានប្រសាសន៍ថា កងទ័ពកូរ៉េខាងជើង បានបាត់បង់អាយុជីវិត និងទទួលរងរបួសនៅក្នុងការប្រយុទ្ធជាមួយកងកម្លាំងរបស់រដ្ឋធានីគីវ (Kyiv) ដោយលោកបានបន្ថែមថា ទាហានមួយចំនួនក្នុងចំណោមកងកម្លាំងចំនួន ១១,០០០ នាក់ ដែលកូរ៉េខាងជើង បានបញ្ជូនទៅតំបន់ឃើស (Kursk) របស់រុស្ស៊ី បានចូលរួមនៅក្នុងការប្រយុទ្ធនេះ ។
នៅក្នុងសន្និសីទសារព័ត៌មាននៅឯកិច្ចប្រជុំកំពូលសហគមន៍នយោបាយអឺរ៉ុប នៅទីក្រុងប៊ូដាប៉េស (Budapest) ប្រទេសហុងគ្រីនាថ្ងៃព្រហស្បតិ៍ មេដឹកនាំអ៊ុយក្រែន បានរៀបរាប់ថា លោកជឿជាក់ថា ទាហានកូរ៉េខាងជើងបន្ថែមទៀត នឹងបន្តដាក់ពង្រាយដើម្បីចូលរួមប្រយុទ្ធគាំទ្រជាមួយរុស្ស៊ី រហូតទាល់តែមានវិធានការទប់ស្កាត់ ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និយាយថា លោកមិនបានដឹងនោះទេ អំពីអ្វីដែលមានក្នុងផែនការរបស់ លោក ដូណាល់ ត្រាំ ប្រធានាធិបតីជាប់ឆ្នោតសហរដ្ឋអាមេរិក ដែលថាអាចបិទបញ្ចប់សង្គ្រាម ជាមួយរុស្ស៉ី បានភ្លាមៗ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៨ ខែវិច្ឆិកា ឆ្នាំ ២០២៤។
លោក ហ្សេលេនស្គី ប្រាប់ដល់បណ្តាមេដឹកនាំអឺរ៉ុប នៅឯកិច្ចប្រជុំកំពូលក្នុងប្រទេសហុងគ្រីថា លោកជឿថា លោក ត្រាំ អាចជួយបញ្ចប់សង្គ្រាមជាមួយរុស្ស៉ី បានលឿន ប៉ុន្តែលោក ត្រាំ មិនទាន់ពិភាក្សាអំពីផែនការបញ្ចប់នោះ ជាមួយរូបលោកនៅឡើយទេ។ លោកគូសបញ្ជាក់ដូច្នេះថា «ប្រសិនបើវាលឿន មានន័យថាអ៊ុយក្រែនត្រូវខាតបង់។ តែខ្ញុំទាន់ដឹងទេថាវាបែបណា។ ខ្ញុំជឿថា លោក ត្រាំ ចង់បានការសម្រេចមួយដ៏ឆាប់រហ័ស ប៉ុន្តែការចង់បាន មិនមែនមានន័យថាវាអាចទៅរួច តាមចិត្តនោះទេ»។
លោក Zelenskiy រៀបរាប់ថា «រាល់ការពិភាក្សាអំពីបទឈប់បាញ់ ដោយមិនមានការធានាជាមុននូវសន្តិសុខសម្រាប់អ៊ុយក្រែន នោះវានឹងនាំឱ្យមានការបំផ្លិចបំផ្លាញចំពោះឯករាជ្យភាព និងអធិបតេយ្យភាពរបស់យើង» ។លោកបានប្រាប់ប្រព័ន្ធផ្សព្វផ្សាយ ជាបន្តទៀតថា "នៅពេល បទឈប់បាញ់ធ្វើឡើងដោយគ្មានការធានាសន្តិសុខច្បាស់លាស់ មានន័យថា គឺជារៀបចំទឹកដីអ៊ុយក្រែន សម្រាប់ត្រៀមឱ្យរុស្ស៊ីកាន់កាប់ជាបន្តតែប៉ុណ្ណោះ" ។ទោះជាបែបណាក្តី មេដឹកនាំអ៊ុយក្រែន បានបង្ហាញជំនឿជាក់ថា លោកត្រាំ ចង់បញ្ចប់សង្គ្រាមឱ្យបានឆាប់រហ័ស ប៉ុន្តែលោក គ្រាន់តែក្រើនរម្លឹកថា ជំនឿជាក់នេះ មិនមានន័យថា វាអាចនឹងកើតឡើងនោះទេ ។
ទាក់ទងបញ្ហានេះដែរវិមានក្រឹមឡាំង បានបញ្ជាក់នៅថ្ងៃសុក្រនេះថា ប្រធានាធិបតីរុស្ស៊ី លោក វ្ល៉ាឌីមៀ ពូទីន ត្រៀមខ្លួនជាស្រេច ដើម្បីពិភាក្សាអំពីបញ្ហាអ៊ុយក្រែន ជាមួយលោក ដូណាល់ ត្រាំ ប្រធានាធិបតីអាមេរិកដែលទើបជាប់ឆ្នោតថ្មី។ ទោះជាយ៉ាងណា រុស្ស៊ីនៅតែរក្សាទស្សនៈរបស់ខ្លួន ចំពោះបញ្ហាអ៊ុយក្រែន ដោយមិនមានការផ្លាស់ប្តូរអ្វីឡើយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៨ ខែវិច្ឆិកា ឆ្នាំ ២០២៤។
អ្នកនាំពាក្យវិមានក្រឹមឡាំង លោក Dmitry Peskov បានធ្វើការកត់សម្គាល់បែបនេះ បន្ទាប់ពីត្រូវបានសួរនៅក្នុងសន្និសីទប្រចាំថ្ងៃរបស់ខ្លួន ថា «តើការត្រៀមខ្លួនរបស់លោក ពូទីន ក្នុងការជួបពិភាក្សាជាមួយប្រធានាធិបតីអាមេរិកថ្មី មានន័យថា រុស្ស៊ីនឹងផ្លាស់ប្តូរទស្សនៈរបស់ខ្លួនលើអ៊ុយក្រែនដែរឬទេ?»លោក Peskov បានឆ្លើយតបថា លោក ពូទីន មិនដែលនិយាយថា រុស្ស៊ីនឹងផ្លាស់ប្តូរគោលដៅនៃប្រតិបត្តិការយោធានៅអ៊ុយក្រែននោះទេ។ ផ្ទុយទៅវិញ លោក ពូទីន បានបញ្ជាក់ច្បាស់ថា គោលដៅនៃប្រតិបត្តិការយោធាពិសេសរបស់រុស្ស៊ីនៅអ៊ុយក្រែន នៅតែមិនផ្លាស់ប្តូរ ហើយរុស្ស៊ីនឹងបន្តការពារផលប្រយោជន៍សន្តិសុខរបស់ខ្លួន។
គួរបញ្ជាក់ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន ធ្លាប់បានកំណត់លក្ខខណ្ឌសម្រាប់ការបញ្ចប់សង្គ្រាម ដោយទាមទារឱ្យអ៊ុយក្រែន បោះបង់ចោលផែនការចូលរួមអង្គការណាតូ និងដកទ័ពចេញពីតំបន់ដែលរុស្ស៊ីបានទាមទារ។ ប៉ុន្តែ អ៊ុយក្រែនបានបដិសេធ ហើយប្រធានាធិបតីអ៊ុយក្រែន លោក Volodymyr Zelenskiy បានស្នើសុំជំនួយយោធាបន្ថែមពីលោកខាងលិច។
លោក ត្រាំក្នុងយុទ្ធនាការបោះឆ្នោត ធ្លាប់និយាយថា នឹងបញ្ចប់សង្គ្រាមនៅអ៊ុយក្រែន ត្រឹមរយៈពេល ២៤ម៉ោងប៉ុណ្ណោះ ប្រសិនបើលោកជាប់ឆ្នោតជាថ្មី។ ជ័យជម្នះរបស់លោកក្នុងសប្តាហ៍នេះ បាននាំមកនូវភាពមិនប្រាកដប្រជា ចំពោះការតស៊ូរបស់អ៊ុយក្រែន ចំពេលដ៏គ្រោះថ្នាក់មួយ ខណៈកងទ័ពរុស្ស៉ីកំពុងជឿនលឿនទៅមុខ ហើយកងទ័ពកូរ៉េខាងជើង ក៏ត្រូវបានដាក់ពង្រាយដល់តំបន់ Kursk របស់រុស្ស៉ីផងដែរ៕
