ព្រះមហាក្សត្រនិងហ្លួងម៉ែ ប្រទានព្រះរាជសារអបអរសាទរដល់ សម្តេចតេជោ ហ៊ុន សែន ដែលទទួលបាន សញ្ញាបត្របណ្ឌិតកិត្តិយសផ្នែក «ភាពជាអ្នកដឹកនាំ និងការកសាងសន្តិភាព» ពីសាធារណរដ្ឋកូរ៉េ
ភ្នំពេញ៖ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា បានប្រទានព្រះរាជសារជូនពរដល់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃកម្ពុជា ក្នុងឱកាសប្រកបដោយមហាកិត្តិយសដ៏ឧត្តុង្គឧត្តមដែល សម្តេចទទួលបានសញ្ញាបត្របណ្ឌិតកិត្តិយសផ្នែក «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យ Dongguk University WISE ខេត្តស្យុងសាងបុកដូ នៃសាធារណរដ្ឋកូរ៉េ។
តាមរយៈព្រះរាជសារនេះ ព្រះមហាក្សត្រ បានមានព្រះបន្ទូលដូចតទៅ៖សម្តេចអគ្គមហាសេនាបតីតេជោ ជាទីរាប់អានដ៏ខ្ពង់ខ្ពស់ និងស្រឡាញ់ដ៏ជ្រាលជ្រៅបំផុតខ្ញុំមានសេចក្តីសោមនស្សរីករាយ ដោយបានទទួលដំណឹងដ៏ល្អប្រពៃស្តីពី សម្តេចអគ្គ មហាសេនាបតីតេជោ បានទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាង សន្តិភាព» ពីសាកលវិទ្យាល័យដុងហ្គូកវ៉ាយស៍ (Dongguk University WISE) នៃសាធារណរដ្ឋកូរ៉េ នៅថ្ងៃទី១២ ខែកញ្ញា ឆ្នាំ២០២៤ ក្នុងឳកាសអញ្ជើញទៅចូលរួមក្នុងវេទិកាចំណេះដឹងពិភពលោក លើកទី២៥ នៅសាធារណរដ្ឋកូរ៉េ។
ខ្ញុំសូមអបអរសាទរ ចំពោះដំណឹងដ៏ល្អប្រពៃខាងលើនេះ និងសូមកោតសរសើរដ៏កក់ក្តៅ ចំពោះ សម្តេចអគ្គមហាសេនាបតីតេជោ ដែលមានគុណបំណាច់ដ៏ថ្លៃថ្លា វីរភាពដ៏ឧត្តុង្គឧត្តម និង ជាអគ្គមគ្គទេសក៍ដឹកនាំប្រទេសប្រកបដោយគតិបណ្ឌិត ឈ្លាសវៃ ប៉ិនប្រសប់ ដ៏ឆ្នើម ធ្វើឱ្យព្រះរាជា ណាចក្រកម្ពុជា មានសុខសន្តិភាព ស្ថិរភាពសង្គម និងការអភិវឌ្ឍជាតិ រីកចម្រើនលើគ្រប់វិស័យ ដែលទទួលបាននូវភាពល្បីរន្ទឺនៅលើឆាកអន្តរជាតិ ជាពិសេសបានចូលរួមចំណែកកសាងទំនាក់ ទំនង និងជួយរក្សាសុខសន្តិភាពនៅក្នុងតំបន់ និងលើពិភពលោកផងដែរ។
ខ្ញុំសូមជូនពរ សម្តេចអគ្គមហាសេនាបតីតេជោ និងសម្តេចកិត្តិព្រឹទ្ធបណ្ឌិត ព្រមទាំងក្រុម គ្រួសារ សូមទទួលបាននូវមហាជោគជ័យថ្មីៗថែមទៀត ដើម្បីជាឧត្តមប្រយោជន៍ជូនប្រជាជាតិ និងប្រជារាស្ត្រកម្ពុជា និងសូមបានប្រកបតែនឹងព្រះពុទ្ធពរគឺ អាយុ វណ្ណៈ សុខៈ ពលៈ កុំបីឃ្លៀង ឃ្លាតឡើយ ។សូម សម្តេចអគ្គមហាសេនាបតីតេជោ ទទួលនូវសេចក្តីស្រឡាញ់ដ៏ជ្រាលជ្រៅបំផុត និងរាប់អានដ៏ខ្ពង់ខ្ពស់បំផុត អំពីខ្ញុំ».។
ដោយឡែកសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ បានប្រទានព្រះរាជសារជូនពរដល់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃកម្ពុជា ក្នុងឱកាសប្រកបដោយមហាកិត្តិយសដ៏ឧត្តុង្គឧត្តមដែល សម្តេចទទួលបានសញ្ញាបត្របណ្ឌិតកិត្តិយសផ្នែក «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យ Dongguk University WISE ខេត្តស្យុងសាងបុកដូ នៃសាធារណរដ្ឋកូរ៉េផងដែរ។
ថ្លែងក្នុងឱកាសទទួលបានសញ្ញាបត្របណ្ឌិតកិត្តិយសផ្នែក «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យដុងហ្គុកវ៉ាយស៍ ប្រទេសកូរ៉េខាងត្បូង នៅថ្ងៃទី១២ ខែកញ្ញា ឆ្នាំ២០២៤ សម្តេចតេជោ ហ៊ុន សែន បានតបថា ដល់ពេលនេះ សម្តេចមានសញ្ញាបត្រកិត្តិយស ពីបរទេសជាង ១០សញ្ញាបត្រ ដោយចាប់ផ្តើមពីសាកលវិទ្យាល័យពីរ នៅសហរដ្ឋអាមេរិក។ សម្រាប់នៅកូរ៉េខាងត្បូងវិញ នេះជាសញ្ញបត្រទី៣ ខណៈសហគមន៍អឺរ៉ុប ក៏គ្រោងផ្តល់សញ្ញាបត្រកិត្តិយសជូនសម្តេចដែរ។
សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «ខ្ញុំចង់បើករង្វង់ក្រចក ដើម្បីធ្វើការឆ្លើយតបទៅនឹងបញ្ហាលើកឡើងថ្មីៗ ដែលថា តើលោក ហ៊ុន សែន សមស្របទទួលយកនូវសញ្ញាបត្រ ពីសាកលវិទ្យាល័យនៅកូរ៉េ ឬអត់។ ខ្ញុំបានចូលទៅ Comment (ផ្តល់មតិ) នៅ TikTok ដែលបាននិយាយពីទីក្រុងបាងកក នៅសហរដ្ឋអាមេរិក ដែលថា តើលោក ហ៊ុន សែន មានលក្ខណៈសម្បត្តិសមស្រប ដើម្បីទទួលយកសញ្ញាបត្រកិត្តិយស ពីកូរ៉េ ឬអត់»។
សម្តេចតេជោ ហ៊ុន សែន បានបន្តថា «ខ្ញុំគ្រាន់តែឆ្លើយ។ អម្បាញ់មិញ លោកសាស្ត្រាចារ្យ ក៏បានអានសុន្ទរកថារបស់ខ្ញុំ។ ខ្ញុំមកដល់ពេលនេះ មានសញ្ញាបត្រកិត្តិយសជាង១០ ដោយចាប់ផ្តើមពីសាកលវិទ្យាល័យ២ នៅសហរដ្ឋអាមេរិក គឺ Southern California University ខាងវិទ្យាសាស្ត្រនយោបាយ និង IOWA ខាងច្បាប់។ ឯនៅសាធារណរដ្ឋកូរ៉េនេះ ជាសាកលវិទ្យាល័យកិត្តិយសទី៣ ដែលខ្ញុំបានទទួល ដូច្នេះវា ៥សញ្ញាបត្រ នៅថៃផ្តល់ឲ្យ២ នៅម៉ាឡេស៊ីផ្តល់ឲ្យ១ នៅចិនផ្តល់ឲ្យ២ នៅឥណ្ឌូនេស៊ី១ ដែលមិនទាន់បានទទួល ហើយនៅមានផ្សេងទៀត តាំងពីសហគមន៍អឺរ៉ុបឯណោះ ដូច្នេះខ្ញុំមានច្រើនណាស់។ ប៉ុន្តែ អ្នកដែលលើកសំណួរនេះ សូមកុំសួរកូរ៉េអី សួរអាមេរិកវិញ។ ហេតុអ្វី បានជាអាមេរិកឲ្យសញ្ញាបត្របណ្ឌិតកិត្តយស មកដល់ ហ៊ុន សែន»។
បើតាមប្រសាសន៍សម្តេចតេជោ ហ៊ុន សែន នេះជាការបកស្រាយ ដើម្បីឆ្លើយតបភ្លាមៗ កុំឲ្យខូចឈ្មោះសាកលវិទ្យាល័យដុងហ្គុកវ៉ាយស៍ របស់កូរ៉េខាងត្បូង។សូមជម្រាបថា សម្តេចតេជោ ហ៊ុន សែន ត្រូវបានសាកលវិទ្យាល័យដុងហ្គុកវ៉ាយស៍ (Dongguk University WISE) នៅខេត្តឃ្យុងសាងបុកដូ ប្រទេសកូរ៉េខាងត្បូង ផ្តល់សញ្ញាបត្របណ្ឌិតកិត្តិយសលើផ្នែក «ភាពជាអ្នកដឹកនាំ និងការកសាងសន្តិភាព»។ ពិធីប្រគល់ និងទទួលសញ្ញាបត្របណ្ឌិតកិត្តិយសរបស់សម្តេចតេជោ ត្រូវបានធ្វើឡើងនៅខេត្តឃ្យុងសាងបុកដូ ប្រទេសកូរ៉េខាងត្បូង នាឱកាសសម្តេចតេជោ អញ្ជើញធ្វើបាឋកថា ស្តីពី «បទពិសោធន៍របស់កម្ពុជា ក្នុងការរំដោះជាតិ ការកសាងសន្តិភាព ការផ្សះផ្សារ និងកសាងជាតិឡើងវិញ»។
ការផ្តល់សញ្ញាបត្របណ្ឌិតកិត្តិយស គឺជាការទទួលស្គាល់ចំពោះស្នាដៃដ៏ចំណានរបស់សម្តេចតេជោ ហ៊ុន សែន ក្នុងការដឹកនាំ កសាងសន្តិភាព និងអភិវឌ្ឍសង្គមកម្ពុជា ឱ្យមានភាពចម្រើនលូតលាស់ ហើយប្រជាពលរដ្ឋរស់នៅក្នុងវិបុលភាព៕ខាងក្រោមនេះជាព្រះរាជសារព្រះមហាក្សត្រ៖
.jpg&h=97&w=146)
