ការបំផុសផែនការចលាចលរបស់ក្រុមលោកសមរង្ស៊ីដើម្បីផ្តួលរំលំ បរាជ័យទាំងក្នុង និងក្រៅស្រុក
21-September-2026 / សន្តិសុខសង្គម
ភ្នំពេញ៖ អំពើប៉ុនប៉ងរបស់លោកសមរង្ស៊ី(ទណ្ឌិត)ដែលចង់ឆ្លៀតឱកាសយកថ្ងៃរៀបចំបុណ្យអុំទូកថ្ងៃ១៧សីហា ក្នុងសហគមន៍ខ្មែរក្នុងក្រុង Lowell រដ្ឋម៉ាសាឈូសិត សហរដ្ឋអាមរិក ដើម្បីបំផុសកំហឹងមនុស្សបង្កឱ្យមានការថ្កោលទោសប្រឆាំងនឹងគម្រោងអភិវឌ្ឍន៍តំបន់ត្រីកោណ កម្ពុជា វៀតណាម និងឡាវ ត្រូវបានគេរាយការណ៍ថាត្រូវបានបរាជ័យទាំងស្រុង។
លោកសម រង្ស៊ី(ណ្ឌិត) ជាមួយនិងភរិយា និងមនុស្សហែរហមបួនដប់នាក់ រំពឹងថាថ្ងៃបុណ្យអុំទូកទី១៧សីហា ដែលតែងមានពលរដ្ឋខ្មែរច្រើនម៉ឺននាក់មកពីបណ្តារដ្ឋផ្សេងៗធ្វើដំណើរមកចូលរួមនៅសហគមន៍ខ្មែរក្រុងឡូវ៉ែល ក្នុងមួយឆ្នាំៗ នោះ បានព្យាយាមចាប់ឱកាសថ្ងៃនេះ ដើម្បីផ្សព្វផ្សាយព័ត៌មាន ដែលពួកគេបាននិយាយប្រឌិតថា គម្រោងអភិវឌ្ឍន៍តំបន់ត្រីកោណដែលមានខេត្តខ្មែរចំនួនបួនគឺខេត្ត ក្រចេះ ស្ទឹងត្រែង រតនគិរី និងខេត្តមណ្ឌលគិរី គឺជាគម្រោងដែលរាជរដ្ឋាភិបាលបានកាត់ខេត្តខ្មែរទាំងបួននោះទៅឱ្យវៀតណាម ជាថ្នូរនៃការកាន់កាប់អំណាចមិនទទយួលបានជោគជ័យឡើយ។
សាក្សីបានរាយការណ៍ថា លោកសម រង្ស៊ី បានរៀបចំការជួបជុំក្រុមអ្នកគាំទ្ររបស់ខ្លួនច្រើនសិបនាក់ នៅមុខភោជនីយ៍ដ្ឋានប៉ៃលិន ក្នុងក្រុងឡូវ៉ែល។
សកម្មជនម្នាក់ឈ្មោះ សុភណ្ឌ ឡារី ត្រូវបានគេឃើញប្រឹងប្រែងនិយាយប៉បាច់ប៉ប៉ោច ជាមួយការប្រើសម្តីប្រមាថមាក់ងាយ រហូតដល់ការប៉ុនប៉ងចង់ផ្តួលរំលំការដឹកនាំរាជរដ្ឋាភិបាល តាមវិធីហិង្សាខុសពីដំណើរការប្រជាធិបតេយ្យ។ក្រោយការជួបជុំគ្នានៅមុខភោជនីយ៍ដ្ឋានប៉ៃលិន នោះរួចមកក្រុមធ្វើនយោបាយប្រឆាំង បានបំបែកគ្នាយ៉ាងហោចចំនួនបីក្រុម។ ក្រុមទាំងបីនោះ មួយក្រុមធ្វើដំណើរជាមួយ សម រង្ស៊ី មួយក្រុមធ្វើដំណើរជាមួយសង្ឃ ប៊ុត ប៊ុនតិញ និង សេង រតនា និងមួយក្រុមទៀត ធ្វើដំណើរជាមួយឈ្មោះ អ៊ុង ឫទ្ធី និងឈ្មោះ វាសនា នួន ដែលមុខព្រួញ គឺបម្រុងបំបែកផ្លូវផ្សេងៗគ្នា ចូលផ្សព្វផ្សាយព័ត៌មានក្លែងក្លាយ អំពីការកាត់ទឹកដីខ្មែរនៃខេត្តទាំងបួននោះ នៅក្នុងពិធីបុណ្យអុំទូក ដែលមានមនុស្សចូលរួមច្រើនកុះករ។
សេចក្តីរាយការណ៍ឲ្យដឹងថាទណ្ឌិត សម រង្ស៊ី និងភរិយា ជាមួយអ្នកហែរហមរួមមានឈ្មោះ អេង ឆៃអ៊ាង, ឡុង រី, និង នុត រំដួល ត្រូវគេឃើញថាបានព្យាយាមទៅក្រវែល នៅក្បែរបរិវេណទីតាំងម៉ៃក្រូដែលមានការរៀបចំពិធី ដើម្បីរង់ចាំឱកាស ក្រែងមានការអញ្ជើញណាមួយឱ្យជនក្បត់ជាតិនេះ អាចឡើងនិយាយចាប់អារម្មណ៍ ។ប៉ុន្តែសាក្សីបាននិយាយថា បើទោះបីជាគេឃើញ សម រង្ស៊ី ដើរក្រវែល ឬ ទៅអង្គុយលើវាលស្មៅក្បែរនោះ ដើម្បីការរង់ចាំឱកាសក៏ដោយ គេបានមិនឃើញថាមានអ្នករៀបចំណាម្នាក់បានចាប់អាម្មណ៍ចំពោះវត្តមានទណ្ឌិតក្បត់ជាតិបីជំនាន់នេះឡើយ។សាក្សីបាននិយាយបន្តថា ក្រោយវត្តមាន សម រង្ស៊ី មិនទទួលបានការស្វាគមន៍នៅក្នុងពិធីបុណ្យអុំទូកនោះហើយ មនុស្ស២ក្រុមទៀត ក្នុងនោះរួមទាំងសង្ឃ ប៊ុត ប៊ុនតិញ ផងមិនបានបង្ហាញវត្តមានក្នុងហ្វូងមនុស្សនៃពិធីបុណ្យអុំទូកនោះឡើយ ដោយពួកគេបាននាំគ្នាបង្ហួសទៅជួបជុំនៅក្នុងវត្តមួយវិញ។
ការបរាជ័យនេះ គឺជាការបង្ហាញថា ពលរដ្ឋខ្មែរក្នុងទសវត្សឆ្នាំ២០២០ មិនមែនជាពលរដ្ឋដែល សម រង្ស៊ី អាចធ្លាប់និយាយបោកប្រាស់កុហកដូចពីអតីតកាលបានឡើយ។ពលរដ្ឋខ្មែររស់នៅក្រៅស្រុកជាពិសេសអ្នកដែលមានបងប្អូនរបស់គេរស់នៅក្នុងតំបន់ក្នុងខេត្តទាំងបួន សុទ្ធបានដឹងច្បាស់ថា បើគ្មានចក្ខុវិស័យនៃគម្រោងអភិវឌ្ឍន៍ត្រីកោណនោះទេ ម្ល៉េះខេត្តភាគឦសានប្រទេសនាពេលបច្ចុប្បន្ន និងមិនមានផ្លូវថ្នល់ខ្វែងខ្វាត់ មានបណ្តាញអគ្គីសនី មានបណ្តាញទឹកស្អាត និងមានការអភិវឌ្ឍន៍ក្នុងមូលដ្ឋានរបស់ខ្លួននោះដែរ។
គំនិតផ្តួចផ្តើមអភិវឌ្ឍន៍តំបន់ត្រីកោណក្នុងខេត្តបួននាភាគឦសានប្រទេស មិនមែនទើបតែមានក្នុងពេលនេះទេ។ ចក្ខុវិស័យនេះ បានកើតឡើងក្នុងឆ្នាំ១៩៩៩ គឺក្នុងឆ្នាំដែលកម្ពុជា បានក្លាយជាសមាជិករបស់អាស៊ាន និងជាច្រើនខែ បន្ទាប់ពីយុទ្ធសាស្ត្រDIFID នៃនយោបាយឈ្នះ-ឈ្នះ របស់សម្តេចតេជោ ហ៊ុនសែន បានពន្លត់ភ្លើងសង្គ្រាមស៊ីវិលរយៈពេលជិត៣០ឆ្នាំ ដែលជានយោបាយអច្ឆរិយៈ របស់ឥស្សរជនខ្មែរដ៏កំពូលនាចុងសតវត្សទី២០ ដោយមិនត្រឹមតែធ្វើឱ្យកម្ពុជា មានសន្តិភាពពិតប្រាកដលើទឹកដីខ្មែរនោះទេ ប៉ុន្តែថែមទាំងជានយោបាយបញ្ចប់ ការធ្វើអបគមន៍របស់ក្រុមប្រឆាំងខ្មែរនានាទាំងឡាយ មិនធ្លាប់កើតមានក្នុងប្រវត្តិសាស្ត្រ ៥០០ឆ្នាំកន្លងមកនេះផងទៀត។
ក្នុងរយៈពេល២៥ឆ្នាំមកនេះ ខេត្តទាំងបួនភាគឦសានប្រទេសដែលស្ថិតក្នុងគម្រោងអភិវឌ្ឍន៍ ត្រីកោណ បានប្រែប្រួលមុខមាត់ជាខ្លាំង និងខុសពីអ្វីដែលក្រុមធ្វើនយោបាយប្រឆាំងបានចោទប្រកាន់ថា ជាគម្រោងកាត់ទឹកដីខ្មែរឱ្យបរទេស ឬ ជាការបាត់បង់ទឹកដីខ្មែរទៅឱ្យបរទេសនោះ។ ការបង្កើតព័ត៌មានក្លែងក្លាយ ក្នុងគោលបំណងញុះញង់ និងជាព័ត៌មានផ្ទុយពីការពិត ទាំងស្រុងនោះហើយ បានធ្វើឱ្យ ឧបាយកល សម រង្ស៊ី មួយនេះទៀតបានបរាជ័យទាំងស្រុង។
នៅក្នុងប្រទេសកម្ពុជានេះវិញ បន្ទាប់ពីភាពបរាជ័យរបស់ក្រុមប្រឆាំងនៅក្រៅស្រុក ការចង់បំផុសឱ្យសកម្មជនរបស់ខ្លួនក្នុងប្រទេសធ្វើការបះបោរប្រឆាំងនៅថ្ងៃទី១៨ ខែសីហា ក្នុងរូបភាពប្រឆាំងដដែលនោះ បានបរាជ័យថែមទៀត។ នៅថ្ងៃទី១៨ ខែសីហានោះ មិនមានការធ្វើបាតុកម្មណាមួយដូចក្រុមប្រឆាំងបានគ្រោងទុកនោះឡើយ។ កងកម្លាំងប្រដាប់អាវុធដែលមានកិច្ច សហការជាមួយនឹងប្រជាពលរដ្ឋ ថែមទាំងបានឃាត់ខ្លួនជនសង្ស័យ៣១នាក់ថែមទៀត ជាមួយនឹងការដកហូតវត្ថុតាងមួយចំនួន ដូចជា ដបសាំង កាំបិតស្នៀត ស្នាប់ដៃ ដំបង ចំពាមកៅស៊ូ និងគ្រាប់ដែកជាដើម។ ជនសង្ស័យនិងវត្ថុតាង ត្រូវបានបញ្ជួនទៅតុលាការ ដើម្បីធ្វើការវិនិច្ឆ័យទោសតាមច្បាប់។
មានវិធីតែមួយគត់ ដែលចង់ផ្លាស់ប្តូរ គឺការបោះឆ្នោតរយៈពេល៥ឆ្នាំម្តង តាមគន្លងលទ្ធិប្រជាធិបតេយ្យ។ ដូច្នេះបើសិនជាចង់យកឈ្នះលើគណបក្សប្រជាជនកម្ពុជា ដែលកាន់អំណាចត្រូវរង់ចាំដល់ខែកក្កដា ឆ្នាំ២០២៨ ដែលនឹងមានការបោះឆ្នោតសកលសាជាថ្មី។ វិធីហិង្សាដោយផ្លូវកាត់ណាមួយ គឺជាការនាំទុក្ខទោសវិញដល់ក្រុមបំពានច្បាប់តែប៉ុណ្ណោះ និងវិធីផ្លូវកាត់មិនស្របតាមបែបលទ្ធិប្រជាធិបតេយ្យនោះ នឹងមិនអាចកើតទៅរួចបានឡើយ តាមរយៈចលនាជាតិរបស់ខ្មែរក្នុងស្រុក ដែលពង្រឹងកិច្ចសហការជាមួយ និងរាជរដ្ឋាភិបាលអាណ្ណត្តិទី៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត និងក្រោមម្លប់សន្តិភាពដែលត្រួសត្រាយរកបានដោយសម្តេចអគ្គមហាសេនាបតីតេជោហ៊ុនសែន។
ទាក់ទងនិងបញ្ហាបំផុសការធ្វើកុប្បកម្មនៅក្នុងប្រទេសវិញអ្នកនាំពាក្យអគ្គស្នងការដ្ឋាននគរបាលជាតិបានបញ្ជាក់ថា ផែនការកុបកម្មរបស់ក្រុមអគតិប្រឆាំងជ្រុលនិយម ត្រូវបានបំផ្លាញតាមរយៈកិច្ចសហការចាត់វិធានការយ៉ាងតឹងរ៉ឹងប្រកបដោយស្មារតីប្រុងប្រយ័ត្ន មានភាពបត់បែនរស់រវើក និងស្របតាមច្បាប់ ដោយមិនបណ្តោយឲ្យក្រុមទុច្ចរិតទាំងនោះធ្វើសកម្មភាពបំផ្លាញភាពសុខសាន្តរបស់សង្គមជាតិ។ ជាក់ស្តែង តាមរយៈការអនុវត្តផែនការប្រឆាំងអំពើកុបកម្មរបស់ក្រុមប្រឆាំងជ្រុលនិយម ដែលកំណត់ធ្វើសកម្មភាពនៅថ្ងៃទី១៨ ខែសីហា ឆ្នាំ២០២៤នេះ សមត្ថកិច្ចធ្វើការត្រួតពិនិត្យ ឆែកឆេរ និងឃាត់ខ្លួនសមាជិក សកម្មជននៃក្រុមកុបកម្មចំនួន ៣១នាក់ (ស្រី ២នាក់) ដែលបានធ្វើសកម្មភាពតាមផែនការរបស់ពួកគេក្នុងការប្រមូលកម្លាំងនៅតាមគោលដៅដែលបានកំណត់ និងដកហូតបាននូវសម្ភារ វត្ថុតាងមួយចំនួន (ដបសាំង កាំបិតស្នៀត ស្នាប់ដៃ ដំបង ជំពាមកៅស៊ូនិងគ្រាប់ដែក) សម្រាប់ធ្វើសកម្មភាពប្រឆាំងតបតជាមួយសមត្ថកិច្ច។ ជនទាំងនោះ កំពុងស្ថិតក្នុងការគ្រប់គ្រងរបស់សមត្ថកិច្ច និងកំពុងរៀបចំនីតិវិធីបញ្ជូនទៅតុលាការ ដើម្បីចាត់ការតាមផ្លូវច្បាប់។
អគ្គស្នងការដ្ឋាននគរបាលជាតិ ក៏សូមអំពាវនាវដល់ប្រជាពលរដ្ឋនៅគ្រប់មជ្ឈដ្ឋាន ទាំងក្នុង និងក្រៅប្រទេស សូមកុំចាញ់បោកនូវឧបាយកលនយោបាយទុច្ចរិតរបស់ពួកប្រឆាំងជ្រុលនិយម ដែលតែងតែយកប្រជាពលរដ្ឋមកធ្វើជាឧបករណ៍ ដោយមិនគិតពីអាយុជីវិត ការលំបាករបស់ប្រជាពលរដ្ឋ បម្រើឲ្យមហិច្ឆិតាខ្មៅកខ្វក់របស់ក្រុមបក្ខពួកខ្លួន ដើម្បីដណ្តើមអំណាចផ្ទុយពីគោលការណ៍លទ្ធិប្រជាធិបតេយ្យ៕
