ការចុះឈ្មោះធ្វើបច្ចុប្បន្នភាពបញ្ជីបោះឆ្នោតគឺជាការងារចាំបាច់ដែល គ.ជ.ប. ត្រូវយកចិត្តទុកដាក់អនុវត្តជាប្រចាំ
ភ្នំពេញ៖ ការពិនិត្យបញ្ជីឈ្មោះ និងការចុះ ឈ្មោះបោះឆ្នោត ជារៀងរាល់ឆ្នាំ ការធ្វើបច្ចុប្បន្នភាពទិន្នន័យអ្នកមានឈ្មោះក្នុងបញ្ជីបោះឆ្នោតបានធ្វើការកែតម្រូវទិន្នន័យរបស់អ្នកបោះឆ្នោតដែលប្រែប្រួលស្ថាន ភាព ដូចជាករណីស្លាប់ ផ្លាស់ប្តូរអាសយដ្ឋាន កែតម្រូវករណីខុសឈ្មោះ (អក្ខរាវិរុទ្ធ) ភេទ ឬថ្ងៃខែឆ្នាំកំណើត ករណីផ្លាស់ប្តូរឯកសារចុះឈ្មោះបោះឆ្នោតរបស់អ្នកបោះ ឆ្នោតតាមឯកសារថ្មី ឯចំពោះករណីអ្នក មានឈ្មោះក្នុងបញ្ជីបោះឆ្នោតដែលផ្លាស់ទីលំនៅចូលទៅឃុំ សង្កាត់ថ្មី គឺត្រូវលុប ឈ្មោះ ចេញពីបញ្ជីបោះឆ្នោតនៅឃុំ- សង្កាត់ចាស់ ហើយផ្ទេរទិន្នន័យទៅឃុំ- សង្កាត់ថ្មី និងតម្រូវឱ្យថតរូប និងផ្ដល់ស្នាមម្រាមដៃជាថ្មី ប៉ុន្តែក្នុងការពិនិត្យបញ្ជីឈ្មោះ និងការចុះឈ្មោះបោះឆ្នោតកន្លងមកគ.ជ.ប.ពុំបានធ្វើបច្ចុប្បន្នភាពទិន្នន័យជីវ មាត្ររបស់អ្នកមានឈ្មោះក្នុងបញ្ជីបោះ ឆ្នោត ដែលបានចុះឈ្មោះជាយូរមក ហើយនោះទេ ។
បើតាមការគណនា បញ្ជីបោះឆ្នោតឆ្នាំ២០២៣ មានអ្នកបោះ ឆ្នោតប្រមាណជាង ៦៦% បានចុះឈ្មោះបោះឆ្នោតកាលពីឆ្នាំ២០១៦ ដែលជាធម្ម ជាតិ រយៈពេលជាង ៨ឆ្នាំកន្លងមកនេះ ភិនភាគរបស់អ្នកទាំងនោះមានការប្រែ ប្រួលខុសពីទិន្ន័យជីវមាត្ររបស់គាត់ដែលមានក្នុងបញ្ជីបោះឆ្នោត ដូចជារូបថត និងស្នាមម្រាមដៃ (រូបពិតចាស់ជារូបថតឬសឹកខ្ចៅដៃ)។ការពង្រឹងបច្ចុប្បន្នភាពបញ្ជីបោះឆ្នោតគឺជាការងារចាំបាច់ដែល គ.ជ.ប. ត្រូវយកចិត្តទុកដាក់អនុវត្ត ជាប្រចាំ ពិសេសពាក់ព័ន្ធនឹងការប្រែប្រួលនៃសញ្ញាដៅសម្គាល់របស់អ្នកបោះឆ្នោត ដែលនាំឱ្យខុសទិន្នន័យជីវមាត្ររបស់គាត់ក្នុងបញ្ជីបោះឆ្នោត និងដែលអាចមានផលប៉ះពាល់ដល់សិទ្ធិបោះឆ្នោតរបស់គាត់។ ដូចនេះ សម្រាប់ការធ្វើបច្ចុប្បន្នភាពទិន្នន័យជីវ មាត្រ ចាំបាច់ត្រូវធ្វើរួមគ្នាជាមួយនឹងការធ្វើបច្ចុប្បន្នភាពបញ្ជីបោះឆ្នោតប្រចាំឆ្នាំ ដោយកំណត់អនុវត្តចាប់ពីឆ្នាំ២០២៥ តទៅ ដើម្បីរៀបចំបញ្ជីបោះឆ្នោតសម្រាប់ប្រើ ប្រាស់ក្នុងការបោះឆ្នោតជ្រើសរើសក្រុម ប្រឹក្សាឃុំ -សង្កាត់ ឆ្នាំ២០២៧ និងការ បោះឆ្នោតជ្រើសតាំងតំណាងរាស្ត្រ ឆ្នាំ ២០២៨ និងការបោះឆ្នោតជាសកលនៅឆ្នាំជាបន្ត បន្ទាប់ទៀត។
នេះជាប្រសាសន៍លោក ទេព នីថា អគ្គលេខា ធិការគ ជ.ប. នៅក្នុងឱកាសបិទវគ្គបណ្តុះ បណ្តាលស្តីពី “ ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៤ ”នាថ្ងៃទី១៧ ខែ សីហា ឆ្នាំ២០២៤។លោក ទេព នីថា អគ្គលេខា ធិការគ.ជ.ប. បានបញ្ជាក់ទៀត ថា បញ្ជីបោះ ឆ្នោតផ្លូវការរបស់ គ.ជ.ប. តែងតែត្រូវបានអង្គការ ខុមហ្វ្រែល ធ្វើសវនកម្មជារៀង រាល់ឆ្នាំ ហើយផ្អែកតាមលទ្ធផលនៃការសិក្សារយៈ ពេលពីរឆ្នាំ ចុងក្រោយនេះ អង្គការខុមហ្វ្រែលបានវាយតម្លៃថា បញ្ជីបោះឆ្នោតផ្លូវការឆ្នាំ២០២១មាន ភាពពេញលេញ ៩៨.៦៧% ហើយបញ្ជីបោះឆ្នោតផ្លូវការឆ្នាំ២០២២ ដែលប្រើក្នុងការបោះឆ្នោត ជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ កន្លងមក គឺអាចទទួលយកបាន ។
លោកថា ក្នុងដំណើរការរៀបចំការបោះឆ្នោត ការចុះឈ្មោះបោះឆ្នោត គឺជាដំណាក់កាលដំបូង និងមានសារៈសំខាន់ណាស់ ព្រោះបញ្ជីបោះឆ្នោត គឺជាតម្រូវការចាំបាច់ដែលមិនអាច ខ្វះបាន ហេតុនេះហើយ ទើប គ.ជ.ប. ត្រូវយកចិត្តទុកដាក់អនុវត្តការងារនេះឱ្យបានល្អ ដើម្បីធានាសិទ្ធិបោះឆ្នោតជូនដល់ប្រជាពលរដ្ឋខ្មែរ ដូចមានចែងក្នុងរដ្ឋធម្មនុញ្ញនៃ ព្រះរាជាណាចក្រកម្ពុជា និងច្បាប់បោះឆ្នោតជាធរមាន ។
លោកអគ្គលេខាធិការ គ.ជ.ប. បញ្ជាក់ទៀតថា បន្ទាប់ពីវគ្គបណ្តុះបណ្តាលនេះទៅ សូម លធ.ខប ទាំងអស់ត្រូវត្រៀមរៀបចំសម្ភារឧបទ្ទេស និងត្រៀមលក្ខណៈដើម្បីធ្វើការបណ្តុះបណ្តាលបន្តទៅមន្ត្រី លធ.ខប ក្រុមចុះឈ្មោះ បោះឆ្នោត និងភាគីពាក់ព័ន្ធផ្សេងទៀតក្នុងក្របខ័ណ្ឌរាជធានី ខេត្តរបស់ខ្លួន ស្របតាមផែនការ និងប្រតិទិនដែលបានកំណត់ តាមគោល ការណ៍ណែនាំរបស់ គ.ជ.ប. និងឯកសារតាមមេរៀនដែលទទួលបានពីវគ្គបណ្តុះ បណ្តាលនាពេលនេះ ។ទន្ទឹមនឹងនេះ លោកអគ្គលេខាធិការ សូមស្នើសុំទៅភាគីពាក់ព័ន្ធទាំងអស់ មេត្តាផ្តល់សហការអនុវត្តតាមតួនាទី និងភារកិច្ចរៀងៗខ្លួន ក្នុងដំណើរ ការពិនិត្យបញ្ជីឈ្មោះ និងការចុះ ឈ្មោះបោះ ឆ្នោត ឆ្នាំ២០២៤តាមច្បាប់ បទបញ្ជា និងនីតិវិធីរបស់ គ.ជ.ប. សំដៅធានាឱ្យការ ពិនិត្យបញ្ជីឈ្មោះ និងការចុះឈ្មោះបោះ ឆ្នោត ឆ្នាំ២០២៤ សម្រេចបានជោគជ័យ ដើម្បីរៀបចំបញ្ជីបោះឆ្នោតឱ្យកាន់តែមានភាពពេញលេញ ត្រឹមត្រូវ និងមានបច្ចុប្បន្ន ភាព សម្រាប់បម្រើឱ្យការបោះឆ្នោតជាសកលនាពេលខាងមុខទៀត៕អត្ថបទលោក៖វង សុភ័ក្ត្រ
