សម្តេចធិបតី ឌឺពួកប្រឆាំងថា ឆ្នាំ១៩៩៩ នៅរដ្ឋសភា មានបក្សច្រើន រួមទាំងបក្ស សម រង្ស៉ី ដែរ ហេតុអ្វីមិនតវ៉ារឿងកិច្ចសហប្រតិបត្តិការតំបន់អភិវឌ្ឍន៍ត្រីកោណ?
21-September-2026 / ផ្សេងៗ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងឌឹពួកប្រឆាំងថា ឆ្នាំ១៩៩៩ នៅរដ្ឋសភា មិនមែនមានតែគណបក្សប្រជាជនកម្ពុជានោះទេ គឺមានបក្សច្រើនរួមទាំងបក្ស សម រង្ស៊ី ផងដែរ ហេតុអ្វីមិនតវ៉ារឿងកិច្ចសហប្រតិបត្តិការតំបន់អភិវឌ្ឍន៍ត្រីកោណ ចាំបាច់អីបានជានៅពេលចរន្តចាប់ផ្តើមឡើងបានដុតបន្ថែម ចុះពេលដែលខ្លួននៅជាសមាជិកសភា មាន៥៥កៅអី ក្នុងសភា ម៉េចក៏មិននិយាយរឿងនេះ។
សម្តេចមហាបវរធិបតី ហ៊ុន ម៉ាណែត បានថ្លែងចោទសួរទៅកាន់ក្រុមប្រឆាំងដូចនេះនាព្រឹកថ្ងៃទី១៥ ខែសីហា ឆ្នាំ២០២៤ នាឱកាសដែលអញ្ជើញសំណេះសំណាលជាមួយអាចារ្យ-អាចារិនីចំនួន ១ពាន់នាក់ នៅវិទ្យាស្ថានជាតិអប់រំ។សម្តេចធិបតី ថា «ខ្ញុំសួរដូចឆោត កិច្ចព្រមព្រៀងកិច្ចសហប្រតិបត្តិការនេះមានតាំងពីឆ្នាំ១៩៩៩ គណបក្សប្រជាជនមិនមែនជាគណបក្សដែលដឹកនាំសភាម្នាក់ឯងទេ ពីឆ្នាំ១៩៩៩ មាន ៣គណបក្ស ២០០៣ គណបក្សរបស់លោកនឹង (បក្ស សម រង្ស៊ី) ក៏មាននៅក្នុងសភាដែរ ម៉េចក៏មិនតវ៉ាជំទាស់ពេលនោះ ស្ងាត់ម្លេះបានន័យថា អស់លោកក៏យល់ថា កិច្ចព្រមព្រៀងនេះមិនគ្រោះថ្នាក់ ទើបឯងឥលូវឃើញចាប់ផ្តើមបំផុស ឃើញចរន្តចាប់ផ្តើមដុតបន្ថែម ចុះពេលដែលនៅសមាជិកសភា គណបក្សមាន ៥៥កៅអី ក្នុងសភា មិចក៏មិននិយាយរឿងនឹង?»។
សម្តេចធិបតី ហ៊ុន ម៉ាណែត បានបន្ថែមថា ជាធម្មតាបក្សប្រឆាំងនៅពេលឃើញរាជរដ្ឋាភិបាលធ្វើអីគ្រោះថ្នាក់ គេយកតែឱកាសនោះដើម្បីវ៉ៃប្រហារ ហើយខ្លាំងបំផុតនៅក្នុងសភា ខណៈពេលដែលខ្លួនមាននៅក្នុងសភា ៥៥កៅអី ហើយកាលនឹងមានរហូតដល់ ៣បក្ស ហេតុអីក៏មិននិយាយថាកិច្ចសហប្រតិបត្តិការតំបន់អភិវឌ្ឍន៍ត្រីកោណ វាខុសទៅ។សម្តេចធិបតី ហ៊ុន ម៉ាណែត ក៏បានចោទសួរទៅកាន់យុវជនជំនាន់ក្រោយ ដែលបានស្តាប់តាមការញុះញ៉ង់ និងសុំសួរឱ្យច្បាស់ថាតើហេតុអីបានជាពីមុន លោកអ៊ំ លោកតា លោកវីរបុរសខ្លួន មិនតវ៉ាពេលដែលខ្លួននៅក្នុងសភា ខណៈដែលសភាមានអាណត្តិ ៥ឆ្នាំ ហើយខ្លួនបាននៅតាំងពីឆ្នាំ១៩៩៨ រហូតដល់ឆ្នាំ២០១៧ មានរយៈពេលជិត ២០ឆ្នាំ ហើយហេតុអីបានជាមិនជំទាស់ពេលនោះឱ្យហើយ ឫគិតថាកិច្ចព្រមព្រៀងនេះត្រូវដែរ? ហើយមកដល់ពេលនេះ នៅពេលដែលឃើញចរន្តតវ៉ា ទើបចេញមកដុតបន្ថែម ហើយឱ្យក្មេងៗមកធ្វើសកម្មភាពគ្រោះថ្នាក់។
សម្តេចធិបតី ហ៊ុន ម៉ាណែត បានបន្ថែមដែរថា មានអ្នកដែលស្រែកខ្លាំងជាងគេ គឺកំពុងនៅប្រទេសជប៉ុន ខណៈដែលខ្លួនឯងទើបតែបានធ្វើលិខិតធានាយកឱពុកម្តាយទៅនៅជាមួយ ហើយបែជាមកបំផុសឱ្យគេមកប្រឈមជាមួយរដ្ឋអំណាចទៅវិញ ដែលបានសុទ្ធតែរៀបចំគោលដៅចាប់ផ្តើមនៅទីលាន ហើយបន្តដើរតាមស្ថានទូត និងត្រៀមទប់ទល់ជាមួយអាជ្ញាធរជាបន្តបន្ទាប់ផងដែរ។
សម្តេចធិបតី ហ៊ុន ម៉ាណែត ក៏បានចោទសួរទៅកាន់ប្រជាពលរដ្ឋ និងអ្នកដែលបានស្តាប់តាមការញុះញ៉ង់ពីក្រៅប្រទេសមកនោះ ថា «តើអំពើដែលបានរៀបចំទាំងគ្រាប់បែក រៀបចំទាំងដបសាំង រៀបចំដំបង រៀបចំជំពាម តើនេះឫការត្រៀមរៀបចំឧបករណ៍សម្ភារសម្រាប់ធ្វើបាតុកម្មអហឹង្សា? ទី២ ផែនការគោលគំនិតចេញច្បាស់លាស់ហើយ គឺផ្តួលរំលំរដ្ឋាភិបាល មិនមែនត្រឹម ដក ឫមិនដក ពី CLV នោះទេ»។
សម្តេចធិបតី បានបន្ថែមថាសូមបងប្អូនសួរមើលក្រែងខ្លាចបាត់ប្រទេស ក្នុងពេល ២៥ឆ្នាំ ឫ ៥០ឆ្នាំ តើចាំបាច់ឈានទៅដល់ការបែកបាក់ទឹកដី និងអស្ថេរភាពពីថ្ងៃនេះធ្វើអី? ព្រោះបើធ្វើតែដូចនេះគឺនឹងធ្វើឱ្យខ្មែរកាន់តែខ្សោយ និងឈាន់ដល់ការបាត់បង់ទឹកដីដោយស្វ័យប្រវត្តិ បាត់បង់ការពឹងផ្អែកទៅលើកម្លាំងខ្លួនឯង។សម្តេចធិបតី ហ៊ុន ម៉ាណែត បានលើកឡើងថា រឿងតំបន់អភិវឌ្ឍន៍ត្រីកោណកម្ពុជា-ឡាវ-វៀតណាម មានមនុស្សចំនួន ៣ក្រុម ដែលមានទស្សនៈផ្សេងគ្នា។ សម្តេចធិបតី បានអះអាងថា ក្រុមទី១ ជាក្រុមអ្នកកង្វល់ និងថាឲ្យដកចេញពីគម្រោងនោះវិញ, ក្រុមទី២ ជាក្រុមយល់ពីតម្លៃ និងឲ្យអភិវឌ្ឍ និងក្រុមទី៣ ជាក្រុមស្ងាត់ស្ងៀម ប៉ុន្តែជាក្រុមធំបំផុត ដែលនៅកណ្តាល ហើយចង់បានការធានាចំនួន ៤គឺ៖ ទី១ ខេត្តទាំង៤ មិនបាត់បង់ទឹកដី, ទី២ កម្ពុជាមិនបាត់បង់អធិបតេយ្យភាព, ទី៣ ធានាអភិវឌ្ឍខេត្តទាំង៤ និងទី៤ មិនចង់ឃើញជាតិខ្មែរបែកបាក់។
សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «រឿង CLV - DTA ប្រជាពលរដ្ឋខ្លះថា យើងមិនស្តាប់គាត់។ រាជរដ្ឋាភិបាលស្តាប់ហើយ ពីកង្វល់រួមគ្នាមិនថាពីអ្នកគាំទ្រ និងមិនគាំទ្រ ប៉ុន្តែសំណួរសួរថា ជាប្រជាពលរដ្ឋក្រុមណា។ យើងមានប្រជាពលរដ្ឋ ៣ក្រុម។ ក្រុមទី១ គឺក្រុមអ្នកកង្វល់ ថាឲ្យដកចេញវិញមក, ក្រុមទី២ គឺក្រុមយល់ពីតម្លៃ និងឲ្យអភិវឌ្ឍ។ ឥលូវយើងស្តាប់ក្រុមណា (បើពួកគាត់សុទ្ធតែជាប្រជាពលរដ្ឋដូចគ្នា)? សំខាន់ក្រុមទី៣ ជាក្រុមស្ងាត់ស្ងៀម ប៉ុន្តែជាក្រុមធំបំផុត គឺក្រុមអ្នកនៅកណ្តាល បានន័យថា រឿងហ្នឹងចេញមិនចេញក៏ហីទៅ ប៉ុន្តែធានាឲ្យខ្ញុំ៖ ទី១ ខេត្តទាំង៤ មិនបាត់បង់ទឹកដី, ទី២ យើងមិនបាត់បង់អធិបតេយ្យភាព, ទី៣ ធានាអភិវឌ្ឍខេត្តទាំង៤ និងទី៤ ខ្ញុំមិនចង់ឃើញខ្មែរបែកបាក់ រញ៉ែរញ៉ៃសង្គមជាតិនោះទេ»។
សម្តេចធិបតី ហ៊ុន ម៉ាណែត បានបន្តថា «ក្រុមទី៣ ធំជាងគេ។ បើសិនយើងដក តែបើមានចេតនាធ្វើឲ្យបាត់ វាគង់តែបាត់បង់ដូចគ្នា វាមិនមែនរឿងកិច្ចសហប្រតិបត្តិការហ្នឹងទេ។ អាស៊ាន យើងចូលតាំងពីឆ្នាំ១៩៩៩ ហើយ ១០ប្រទេស មិនទាន់បាត់មួយកន្លែងណាផង មានតែធ្វើកិច្ចសហប្រតិបត្តិការជាមួយគ្នា និងបោះបង្គោលព្រំដែនបន្ថែម ពង្រឹងរៀងៗខ្លួន។ អ្នកដែលចង់គាំទ្រ គាត់ថា អាហ្នឹងល្អសម្រាប់ខេត្តខ្ញុំ វាដាច់ស្រយាលជាងគេ អីចឹងអ្វីក៏ដោយ ក្របខ័ណ្ឌរបស់ជាតិ ក្របខ័ណ្ឌតំបន់ ជប៉ុនមកជួយ ធ្វើទៅ ខ្ញុំនៅហ្នឹងខ្ញុំការពារ»។
បើតាមប្រសាសន៍ សម្តេចធិបតី ហ៊ុន ម៉ាណែត ចំណុចទី៤ ក្នុងទស្សនៈរបស់មនុស្សក្រុមទី៣ គឺការមិនចង់ឃើញប្រទេសបែកបាក់ និងរក្សាបានស្ថិរភាព ដូច្នេះត្រូវតែឆ្លើយតបឱ្យបាន ជូនប្រជាពលរដ្ឋសម្រាប់បំណងនេះ។ ជាមួយគ្នានេះ សម្តេចធិបតី ហ៊ុន ម៉ាណែត បានប្រកាសប្តេជ្ញាធ្វើឱ្យបាននូវការការពារទឹកដី អធិបតេយ្យក្នុងខេត្តទាំង៤ នៅភាគឦសាន និងបន្តជំរុញឱ្យកិច្ចអភិវឌ្ឍន៍ឱ្យកាន់តែរីកចម្រើន សម្រាប់កូនខ្មែរជំនាន់ក្រោយ។សម្តេចធិបតី ហ៊ុន ម៉ាណែត បានថ្លែងថា ដើម្បីកិច្ចការពារបូរណភាពទឹកដី និងអធិបតេយ្យជាតិឱ្យរឹងមាំ គឺត្រូវរួមគ្នាអភិវឌ្ឍ និងលើកកម្ពស់ជីវភាពពលរដ្ឋខ្មែរ នៅភាគឦសាន ឱ្យកាន់តែរីកចម្រើន។ ពាក់ព័ន្ធនឹងតំបន់អភិវឌ្ឍន៍ត្រីកោណកម្ពុជា-ឡាវ-វៀតណាម សម្តេចធិបតី ស្នើឲ្យមានការបញ្ចេញទស្សនៈប្រកបដោយភាពថ្លៃថ្នូរផងដែរ។
តាមរយៈសារពិសេសមួយ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ដែលជាអ្នកផ្តួចផ្តើមគំនិតគម្រោងអភិវឌ្ឍន៍តំបន់ត្រីកោណនេះ បានបញ្ជាក់យ៉ាងច្បាស់ថា កម្ពុជាមិនបានដាក់ដីទាំង ៤ខេត្ត រួមមាន ស្ទឹងត្រែង ក្រចេះ មណ្ឌលគិរី និងរតនគិរី ទៅក្នុងការអភិវឌ្ឍរួមជាមួយវៀតណាម និងឡាវ នោះទេ គ្រាន់តែជាកម្រិតកិច្ចសហប្រតិបត្តិការ ដែលប្រទេសទាំង៣ មានជាមួយគ្នាប៉ុណ្ណោះ។ ទឹកដីរបស់កម្ពុជា គឺកម្ពុជាអភិវឌ្ឍដោយទឹកប្រាក់របស់ខ្លួន ចំណែកនៅដីវៀតណាម និងឡាវក៏ដូចគ្នា ពួកគេអភិវឌ្ឍដោយប្រាក់របស់ពួកគេ គឺគ្មានការចែកផលរួមនោះឡើយ៕
