អាមេរិកកំពុងតាមដានឯទីប្រឹក្សាលោក ហ្សេលេនស្គី ថារុស្ស៊ីគួរតែត្រូវបានបង្ខំឱ្យចូលរួម កិច្ចចរចាសន្តិភាព
21-September-2026 / ព័ត៌មានអន្តរជាតិ
អ៊ុយក្រែន៖ លោកមីខៃឡូប៉ូដូលីអាក( Mykhailo Podolyak) ទីប្រឹក្សារបស់ប្រធានាធិបតីអ៊ុយក្រែនកាលពីថ្ងៃអង្គារសប្តាហ៍នេះ បាននិយាយ ថា រុស្ស៊ីគួរតែត្រូវបានបង្ខំឱ្យចូលរួមក្នុងកិច្ចប្រជុំកំពូលស្តីពីសន្តិភាព ព្រោះរុស្ស៊ីនឹងមិនមានឆន្ទៈចូលរួមទេ។ ទីភ្នាក់ងារសារព័ត៌មាន Reuters នៅថ្ងៃពុធ ទី១៤ ខែសីហា ឆ្នាំ២០២៤បានឲ្យដឹងថា៖លោក Podolyak បានប្រាប់ទូរទស្សន៍ជាតិថា វិធីសាស្ត្របង្ខិតបង្ខំមួយ នោះគឺជាសកម្មភាពនៅសមរភូមិ ដោយសំដៅលើការវាយលុកឆ្លងព្រំដែន មិនធ្លាប់មានរបស់អ៊ុយក្រែន ចូលទៅ ក្នុងតំបន់ Kursk របស់រុស្ស៊ី។ លោក Podolyak គូសបញ្ជាក់ថា «ការអញ្ជើញតាមធម្មតាទៅកាន់ប្រទេសរុស្ស៊ីមិនដំណើរការទេ ដូចនេះមានតែបង្ខំ រួមទាំងការដាក់សម្ពាធសេដ្ឋកិច្ច និងផ្នែកការទូតផងដែរ»។
តាមលោក Podolyak ថាប្រតិបត្តិការយោធានៅតំបន់ព្រំដែនរុស្ស៊ី គឺអ៊ុយក្រែនកំពុងដោះស្រាយបញ្ហាចម្បងនៃសន្តិសុខរបស់ខ្លួន។ បន្ទាប់ពីការវាយលុកឆ្លងព្រំដែនបានមួយសប្តាហ៍ អ៊ុយក្រែនអះអាងថាបាននិងកំពុងកាន់កាប់ ៧៤ទីតាំងក្នុងតំបន់ Kursk របស់រុស្ស៉ី ហើយបន្តការរុលទៅមុខទៀត។ទាក់ទង់រឿងនេះប្រធានាធិបតីអាមេរិក លោក ចូ បៃដិន បានវាយតម្លៃថាការវាយលុករបស់អ៊ុយក្រែនចូលទឹកដីរុស្ស៉ី បានបង្កើតជាស្ថានការណ៍ដ៏លំបាកមួយសម្រាប់ លោកប្រធានាធិបតី វ្ល៉ាឌីមៀ ពូទីន ខណៈក្រុមមន្ត្រីអាមេរិកកំពុងរក្សាទំនាក់ទំនងជាប្រចាំជាមួយអ៊ុយក្រែនជុំវិញការវាយលុកនេះ។
តាមការចេញផ្សាយដោយទីភ្នាក់ងារសារព័ត៌មាន Reutersកងទ័ពអ៊ុយក្រែនប្រហែលជា ១០០០នាក់ អមជាមួយរថក្រោះ និងរថពាសដែកបានវាយសម្រុកឆ្លងដែនចូលក្នុងតំបន់ Kursk កាលពីថ្ងៃទី៦ ខែសីហា។ ជុំវិញការវាយចូល ទឹកដីរុស្ស៊ីរបស់អ៊ុយក្រែនផងដែរ លោក បៃដិន និយាយប្រាប់ក្រុមអ្នកសារព័ត៌មានក្នុងទីក្រុង New Orleans កាលពីថ្ងៃអង្គារ ទី១៤ ខែសីហាថាលោកទទួលបាន ព័ត៌មានជារៀងរាល់ ៤ទៅ៥ម៉ោងម្ដង ក្នុងរយៈពេល៦ ទៅ៨ថ្ងៃចុងក្រោយនេះស្ដីពីការវាយលុករបស់អ៊ុយក្រែនចូលក្នុងទឹកដីរុស្ស៊ី។
គួរបញ្ជាក់ថា អ៊ុយក្រែន កាលពីថ្ងៃទី១២ ខែសីហា បានអះអាងថាប្រតិបត្តិការវាយលុកឆ្លងដែនរបស់ខ្លួន បានដណ្ដើមគ្រប់គ្រងទឹកដីបាន ១០០០គីឡូម៉ែត្រក្រឡា នៃតំបន់ Kursk របស់ រុស្ស៊ី។
សម្រាប់រុស្ស៊ីវិញបានធ្វើការរិះគន់ដល់ក្រុមប្រទេសលោកខាងលិចចំពោះការបន្តស្ងៀមស្ងាត់មិនព្រមថ្កោលទោសប្រតិបត្តិការលុកលុយរបស់អ៊ុយក្រែននៅក្នុងតំបន់ ឃើស (Kursk) ភាគខាងលិចប្រទេសរុស្ស៊ី ។
នៅក្នុងជំនួបក្រុមប្រឹក្សាសន្តិសុខសហប្រជាជាតិដែលបានធើ្វឡើងក្រោមការកោះអញ្ជើញជាបន្ទាន់របស់រុស្ស៊ី ឯកអគ្គរដ្ឋទូតរងរុស្ស៊ីប្រចាំអង្គការសហប្រជាជាតិ លោកឌីមីទ្រី ប៉ូលីយ៉ានស្គី (Dmitry Polyanskiy) បាននិយាយចោទប្រកាន់ត្រង់ៗទៅកាន់សហរដ្ឋអាម៉េរិក បារាំង និងអង់គ្លេស ថាជាអ្នកដែលបានផ្តល់លទ្ធភាពឱ្យអ៊ុយក្រែនបើកការវាយប្រហារចូលទៅក្នុងទឹកដីរបស់រុស្ស៊ី តាមរយៈការគាំទ្រទាំងផ្នែកសព្វាវុធនិងចារកិច្ច។
រដ្ឋជាសមាជិកក្រុមប្រឹក្សាសន្តិសុខភាគច្រើនបានបង្ហាញជំហរព្រងើយកន្តើយចំពោះការត្អួញត្អែររបស់រុស្ស៊ី ដោយក្នុងនោះអ្នកតំណាងរបស់ប្រទេសស្លូវេនីមួយរូប បានចាត់ទុកការកោះប្រជុំក្រុមប្រឹក្សាសន្តិសុខពីសំណាក់រុស្ស៊ីនេះ ថាជារឿងអត់បានការនិងខាតបង់ពេលវេលា។ បន្ថែមពីនេះ បណ្តាសមាជិកដទៃទៀតក៏បានរិះគន់ត្រឡប់ទៅកាន់ប្រទេសរុស្ស៊ី ថាកំពុងព្យាយាមដើរតួជាជនរងគ្រោះចំពោះបញ្ហាសង្គ្រាមដែលខ្លួនជាអ្នកបង្កឡើង។
គិតមកដល់ពេលនេះគឺមានរយៈពេលប្រមាណ ១០ថ្ងៃមកហើយ ស្របពេលយោធាអ៊ុយក្រែនបានអះអាងថា គេបានវាយដណ្តើមកាន់កាប់ទឹកដីសរុបប្រមាណជាង ១,០០០គីឡូម៉ែត្រការ៉េពីរុស្ស៊ី។ ប្រធានាធិបតីរុស្ស៊ីលោកពុទីនបានព្រមានថានឹងធើ្វការឆ្លើយតបឱ្យកាន់តែធ្ងន់ធ្ងរទ្វេដងទៅលើអ៊ុយក្រែន ដោយបានព្រមានថានឹងបង្កើនការវាយប្រហារតាមផ្លូវអាកាសទៅលើទីក្រុងសំខាន់ៗរបស់អ៊ុយក្រែន រួមនិងប្តេជ្ញាចិត្តវាយកម្ទេចកងកម្លាំងឈ្លានពានរបស់អ៊ុយក្រែនឱ្យអស់ពីទឹកដីរបស់ខ្លួនផងដែរ។លោក ពូទីន ៖ ឥឡូវ គ្មានអ្វីគួរឲ្យមន្ទិលឡើយ ភារកិច្ចចម្បងនៃ ក្រសួងការពារ ជាតិ គឺ “បណ្តេញសត្រូវ ចេញពីដែនដីយើង !
សម្រាប់ កងទ័ពរុស្ស៊ីវិញ ជាច្រើនខែ ជាប់មកហើយបន្តរុលទៅមុខជាដរាប នៅលើសមរភូមិប៉ែកខាងកើតអ៊ុយក្រែន កកេរយកបានដែនដីនេះ បន្តិចម្តងៗ ប៉ុន្តែមិនអាចបុកទម្លាយយ៉ាងគំហុក ខ្សែការពាររបស់កងទ័ពអ៊ុយក្រែនឡើយ។ក្នុងដំណាក់កាលឥឡូវ ទីប្រជុំជន ២៨ កន្លែងនៃខេត្ត Koursk បានធ្លាក់ទៅនៅក្រោមការត្រួតត្រា របស់ទ័ពអ៊ុយក្រែន - នេះជាការទទួលស្គាល់ របស់អភិបាលស្តីទីនៃខេត្តនេះ លោក Alexei Smirnov នៅក្នុងវីដេអូសន្និសីទជាមួយលោកពូទីន ។ មិនតែប៉ុណ្ណោះ លោកអភិបាលនេះ ក៏លំអិតថា ប្រតិបត្តិការលុកលុយពីខាងអ៊ុយក្រែន វាតលើ ដែនដីនៅតាមបណ្តោយព្រំដែន ប្រវែងដល់ ៤០ គីឡូម៉ែត្រ និង ចូលជ្រៅទៅក្នុងដែនដីរុស្ស៊ី ដល់១២ គីឡូម៉ែត្រ។វា ក៏ជាការលុកចូលនៃ កងទ័ពបរទេសធំបំផុត មកក្នុងទឹកដីរុស្ស៊ី បើគិតតាំងពី សង្គ្រាមលោកលើកទី២មក។
តាមមេដឹកនាំខេត្ត Koursk យ៉ាងហោចមានជនស៊ីវិល ១២ នាក់ បានធ្លាក់ខ្លួនស្លាប់ និង របួស ១២១ នាក់ ដែលក្នុងនោះ មានកុមារ ១០ នាក់ បណ្តាលមកពី ការលុកចូលនៃកងទ័ពអ៊ុយក្រែន។
នៅពីមុខស្ថានការណ៍ដ៏លំបាកនេះ អាជ្ញាធររុស្ស៊ី ថ្ងៃចន្ទ បានបញ្ជា ឲ្យជម្លៀស តទៅទៀតបណ្តាជនស៊ីវិល ចេញពីខេត្ត Koursk ក៏ដូចជាចេញពីខេត្ត Belgorod ជិតខាង ដែលខេត្តទាំងពីរ សុទ្ធតែស្ថិតនៅជាប់នឹងព្រំដែនអ៊ុយក្រែន។ គិតមកទល់ថ្ងៃនេះ អាជ្ញាធររុស្ស៊ីបានជម្លៀសមនុស្ស ១២ម៉ឹន១ពាន់នាក់ចេញពីខេត្ត Koursk។ នេះបើតាមលោក Smirnov លំអិត។ក្នុងខេត្ត Belgorod ទោះបីគ្មានការបាញ់គ្នា ដូចក្នុងខេត្ត Koursk នៅជិតខាងក្តី ក៏ ស្ថានការណ៍ត្រូវចាត់ ទុកថា” អាសន្ន" រហូតធ្វើឲ្យអាជ្ញាធរខេត្តនោះ សម្រេចចិត្តប្រកាសទៅហើយ អំពីភាពចាំបាច់ត្រូវតែ ជម្លៀស បណ្តាជនចេញពីស្រុក Krasnoyarouski ដើម្បីធានាសុវត្ថិភាពគេ៕
