រដ្ឋមន្ត្រីក្រសួងព័ត៌មាន៖ «ធម្មនុញ្ញវិជ្ជាជីវៈសារព័ត៌មាន» មានគោលដៅមើលការប្រព្រឹត្តរបស់ក្រុម MMO ដែលនាំឱ្យពលរដ្ឋបាត់បង់ទំនុកចិត្តនិងលើកកំពស់លើវិស័យព័ត៌មានវិជ្ជាជីវៈ !
ភ្នំពេញ៖ ក្នុងសិក្ខាសាលាពិគ្រោះយោបល់លើសេចក្តីព្រាង «ធម្មនុញ្ញវិជ្ជាជីវៈសារព័ត៌មាន» ដោយមានការចូលរួមពីបណ្ដាសមាគមន៍សារព័ត៌មាន ចាងហ្វាងកាសែត និងអ្នកសារព័ត៌មានមកពីស្ថាប័នផ្សេងៗជាច្រើនរូបលោក នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងថាធម្មនុញ្ញវិជ្ជាជីវៈសារព័ត៌មាន នឹងរឹតត្បិតការប្រព្រឹត្តរបស់ក្រុម MMO (Make Money Online) ដែលក្រុមនេះបច្ចុប្បន្ននាំឱ្យប្រជាពលរដ្ឋបាត់បង់ទំនុកចិត្តមកលើវិស័យព័ត៌មានវិជ្ជាជីវៈទាំងមូល។
លោករដ្ឋមន្ត្រី បានលើកឡើងថា ក្រៅអំពីប្រព័ន្ធផ្សព្វផ្សាយបុរាណ ប្រព័ន្ធផ្សព្វផ្សាយទំនើប មានប្រព័ន្ធផ្សព្វផ្សាយច្រើនប្រភេទទៀតដូចជាអ្នកកាសែតអនឡាញ, អ្នកប្រើប្រាស់បណ្ដាញទំនាក់ទំនងសង្គម, អ្នកកាសែតពលរដ្ឋ, អ្នកផលិតផលមាតិកាក្នុងបណ្ដាញសង្គម, អ្នកដែលមានឥទ្ធិពល (Key Opinion Leader) ហើយយើងក៏និយាយអំពី MMO ដែលជាជនមួយចំនួនមិនមែនជាអ្នកសារព័ត៌មាន ប៉ុន្តែប្រើប្រាស់នូវវិធីសាស្ត្រ មធ្យោបាយផ្សេងៗដើម្បីរកលុយ។
រដ្ឋមន្ត្រីក្រសួងព័ត៌មាន បានលើកឡើងថា៖ «ក្រុម MMO កំពុងតែបង្កបញ្ហាច្រើន ដោយសារតែពួកគាត់មិនគិតពីមូលដ្ឋានគ្រឹះនៃក្រមសីលធម៌វិជ្ជាជីវៈអ្នកសារព័ត៌មានជាធំទេ ប៉ុន្តែពួកគាត់គិតពីការ Like, Share និង Comment ដើម្បីទទួលបានលុយពី Youtube, Facebook, TikTok នេះជាចំណុចមួយដែលបង្កើតឱ្យប្រជាពលរដ្ឋរបស់យើង មានជំនឿទុកចិត្តធ្លាក់ចុះមកលើវិស័យព័ត៌មាន។ អ៊ីចឹងហើយបានជានៅក្នុងក្របខ័ណ្ឌនេះ ដែលយើងត្រូវចាំបាច់ក្នុងការរួមគ្នាគិត រួមគ្នាមើល រួមគ្នាទទួលខុសត្រូវ ទៅលើអាជីពរបស់យើង ដើម្បីធានាបាននូវប្រសិទ្ធភាព គុណភាពព័ត៌មាន ជូនដល់ប្រជាពលរដ្ឋ»។ លោករដ្ឋមន្ត្រីបានបន្តថា គឺជាបញ្ហារួមដែលត្រូវគិត ដើម្បីកែប្រែរៀបចំសណ្ដាប់ធ្នាប់វិស័យសារព័ត៌មានឱ្យបានល្អ ខណៈបច្ចុប្បន្ននេះវិស័យព័ត៌មាននៅមិនទាន់មានសណ្ដាប់ធ្នាប់ល្អនៅឡើយ បើទោះបីមានបរិមាណច្រើនក៏មិនប្រាកដថាមានគុណភាពនោះដែរ ដែលនេះជាការចាំបាច់ត្រូវប្រែក្លាយពីបរិមាណ ដោយគិតពីគុណភាពវិញ។
លោក នេត្រ ភក្ត្រា រដ្ឋមន្ត្រីក្រសួងព័ត៌មាន ដែលដឹកនាំកិច្ចពិភាក្សា បានឲ្យដឹងថាយោងតាមសេចក្តីព្រាង «ធម្មនុញ្ញវិជ្ជាជីវៈសារព័ត៌មាន» ដែលបានប្រមូលធាតុចូលកន្លងមកនេះ បានកត់ត្រានូវក្របខណ្ឌនៃការងារប្រចាំថ្ងៃរបស់ខ្លួន ដែលអ្នកសារព័ត៌មានត្រូវអនុវត្តសកម្មភាពក្នុងវិស័យសារព័ត៌មាននិងសោតទស្សន៍ ត្រូវប្រកាន់ខ្ជាប់នូវការប្រតិបត្តិកាតព្វកិច្ច និងការទទួលខុសត្រូវដូចខាងក្រោម៖
*ទី១៖ ទំនួលខុសត្រូវសង្គម បេសកកម្មក្នុងការផ្តល់ព័ត៌មានផ្សារភ្ជាប់ជាមួយសិទ្ធិ កាតព្វកិច្ច និងការទទួលខុសត្រូវសង្គម។ ការផ្សាយព័ត៌មានត្រូវធានាការគោរពឯកជនភាព សេចក្តីថ្លៃថ្នូរបុគ្គលក្នុងសង្គម ហើយមិនត្រូវប៉ះពាល់ដល់សិទ្ធិអ្នកដទៃ ឬតម្លៃវិជ្ជាជីវៈ ដើម្បីការពារប្រយោជន៍ និងទំនុកចិត្តសង្គមមកលើតួអង្គក្នុងវិស័យព័ត៌មាន និងចូលរួមក្នុងការអភិវឌ្ឍប្រកបដោយបរិយាបន្ន។
ទី២៖ ទំនួលខុសត្រូវវិជ្ជាជីវៈ៖ កំហុសវិជ្ជាជីវៈត្រូវស្ថិតក្រោមការអនុវត្តច្បាប់ស្តីពីរបបសារព័ត៌មាន។ ការអនុវត្តសកម្មភាពក្នុងវិស័យព័ត៌មាន និងសោតទស្សន៍ មិនត្រូវស្ថិតក្រោមគំនាប ឬឥទ្ធិពលរបស់ភាគីណាមួយឡើយ លើកលែងតែការតម្រង់ទិស ឬភារកិច្ចដែលប្រធានអង្គភាព ស្ថាប័នផ្តល់ឱ្យសម្រាប់ករណីអ្នកសារព័ត៌មានអាជីព ដែលជាការទទួលខុសត្រូវវិជ្ជាជីវៈ។ ទោះជាយ៉ាងណាក៏ដោយ ការតម្រង់ទិស ឬភារកិច្ចដែលប្រធានអង្គភាព ស្ថាប័នផ្តល់ឱ្យនោះ មិនត្រូវមានចរិកផ្ទុយនឹងច្បាប់ និងលិខិតបទដ្ឋានគតិយុត្តជាធរមាននៃព្រះរាជាណាចក្រកម្ពុជា ឬប្រាសចាកពីគន្លងនៃធម្មនុញ្ញវិជ្ជាជីវៈសារព័ត៌មាននេះឡើយ។
ទី៣៖ ទំនួលខុសត្រូវរដ្ឋប្បវេណី និងព្រហ្មទណ្ឌ៖ អ្នកអនុវត្តសកម្មភាពក្នុងវិស័យព័ត៌មាន និងសោតទស្សន៍ ត្រូវគោរពច្បាប់ជាធរមាននៃព្រះរាជាណាចក្រកម្ពុជា។ ទង្វើបំពានត្រូវប្រឈមនឹងផលវិបាកផ្នែករដ្ឋប្បវេណី និងព្រហ្មទណ្ឌ ដូចមានចែកក្នុងច្បាប់ និងលិខិតបទដ្ឋានគតិយុត្តជាធរមាន។ ទង្វើបំពានប្រភេទទាំងនេះមិនស្ថិតក្នុងក្របខណ្ឌនៃសេរីភាពខាងការបញ្ចេញមតិ និងសេរីភាពខាងសារព័ត៌មានឡើយ។
មានសមាគមអ្នកសារព័ត៌មានចំនួន៧ បានចូលរួមផ្លាស់ប្តូរមតិយោបល់ ទៅលើសេចក្តីព្រាងនោះដែលមកពី៖ តំណាងអង្គការយូណេស្កូ, ក្លឹបអ្នកកាសែតកម្ពុជា (CCJ), សមាគមសម្ព័ន្ធអ្នកសារព័ត៌មានកម្ពុជា (Camboja), សមាគមសារព័ត៌មានកម្ពុជា-ចិន សមាគមសារព័ត៌មានអភិវឌ្ឍវិជ្ជាជីវៈសារព័ត៌មាន, សមាគមសារព័ត៌មានអេឡិចត្រូនិច អឹម អេស ជេ (MSJ) និងមជ្ឈមណ្ឌលព័ត៌មានមូស្លីមកម្ពុជា បានអញ្ជើញចូលរួម។
សូមបញ្ជាក់បន្ថែមទៀតថា សេចក្តីព្រៀងធម្មនុញ្ញវិជ្ជាជីវៈសារព័ត៌មានដែលក្រសួងព័ត៌មានកំពុងតែប្រឹងប្រែងបង្កើតឡើងនេះមាន៦ជំពូក៖ជំពូកទី១៖ បទប្បញ្ញតិ្តទូទៅជំពូកទី២៖ គោលការណ៍គ្រឹះជាមូលដ្ឋាននៃវិជ្ជាជីវៈសារព័ត៌មាន និងការផ្សព្វផ្សាយព័ត៌មានជំពូកទី៣៖ សិទ្ធិ ករណីយកិច្ច និងការគាំពារជំពូកទី៤៖ ការទទួលខុសត្រូវជំពូកទី៥៖ យន្តការតាមដាន វាយតម្លៃ និងលើកទឹកចិត្តចំពោះការអនុវត្តជំពូកទី៦៖ អវសានប្បញ្ញត្តិ។
បើតាមក្រសួង គោលបំណងនៃការបង្កើតធម្មនុញ្ញវិជ្ជាជីវៈសារព័ត៌មាននៅកម្ពុជានេះ គឺដើម្បីរួមចំណែកគាំទ្រការលើកកម្ពស់សេរីភាពសារព័ត៌មាននៅកម្ពុជា តាមរយៈការពង្រឹងគុណភាព និងសមត្ថភាពជំនាញ ពង្រឹងការគោរពក្រមសីលធម៌វិជ្ជាជីវៈ និងគ្រប់គ្រងសណ្តាប់ធ្នាប់ក្នុងវិស័យព័ត៌មាន។ក្រសួងព័ត៌មានសង្ឃឹមថា ក្រោយពេលដែលធម្មនុញ្ញវិជ្ជាជីវៈសារព័ត៌មាននេះ ត្រូវបានបង្កើតឡើង និងប្រកាសដាក់ឱ្យប្រើប្រាស់ហើយ នោះនិងធ្វើអោយបរិយាកាសអំណោយផលសម្រាប់ការអនុវត្តប្រកបដោយប្រសិទ្ធភាព និងទំនួលខុសត្រូវវិជ្ជាជីវៈ នូវសេរីភាពសារព័ត៌មាន និងសេរីភាពបញ្ចេញមតិនៅកម្ពុជាព្រមទាំងធានាបានលំហ និងសន្តិសុខព័ត៌មាននៅប្រទេសកម្ពុជា។
លោក នេត្រ ភក្ត្រា បានគូសបញ្ជាក់ថា ចំពោះបញ្ហាទទួលបានព័ត៌មានក្លែងក្លាយនេះ គឺមិនមែនតែកម្ពុជានោះ ប៉ុន្តែបណ្តាប្រទេសទាំងអស់នៅលើពិភពលោក សុទ្ធតែបានជួបប្រទះទាំងអស់។ បន្ថែមសម្រាប់ការទទួលបានដំណឹងក្លែងក្លាយ និងព័ត៌មានក្លែងក្លាយ វាមិនមែនទើបនឹងកើតឡើងនៅក្នុងបរិបទរីកចម្រើនផ្នែកបច្ចេកវិទ្យានេះទេ គឺមានតាំងពីយូរណាស់មកហើយ។រដ្ឋមន្ត្រីក្រសួងព័ត៌មាន បានសង្ឃឹមថាធម្មនុញ្ញវិជ្ជាជីវៈសារព័ត៌មាននឹងក្លាយទៅជាស្តង់ដាប្រតិបត្តិក្រមសីលធម៌វិជ្ជាជីវៈរបស់ជាតិសម្រាប់គ្រប់តួអង្គពាក់ព័ន្ធគោរពនិងប្រតិបត្តិតាម ដើម្បីរួមចំណែកអភិវឌ្ឍឱ្យកាន់តែប្រសើរនូវប្រព័ន្ធប្រជាធិបតេយ្យ តាមរយៈបន្តអនុវត្តប្រកបដោយប្រសិទ្ធភាព និងទំនួលខុសត្រូវវិជ្ជាជីវៈនូវសិទ្ធិសេរីភាពសារព័ត៌មាន និងសេរីភាពបញ្ចេញមតិនៅកម្ពុជា។
.jpg&h=97&w=146)
.jpg&h=97&w=146)
