បញ្ហាដាក់កូតាបុគ្គលឹករដ្ឋឲ្យកូនមន្ត្រីជាអ្នកតស៊ូគឺជាប្រភពដែលនាំឲ្យមានបាតុកម្មស្លាប់មនុស្សនៅបង់ក្លាដេស!
30-March-2025 / ព័ត៌មានអន្តរជាតិ
បង់ក្លាដេស៖ ក្រសួងការបរទេសសហរដ្ឋអាមេរិក កាលពីថ្ងៃទី២០ ខែកក្កដា (ម៉ោងនៅវ៉ាស៊ីនតោន) បានដំឡើងកម្រិតសេចក្ដីណែនាំនៃការធ្វើដំណើរទៅកាន់ប្រទេសបង់ក្លាដែស ដល់កម្រិតទី៤ ជាមួយការជំរុញឱ្យពលរដ្ឋរបស់ខ្លួន ចៀសវាងការធ្វើដំណើរទៅកាន់ប្រទេសក្នុងតំបន់អាស៊ីខាងត្បូងមួយនេះដោយសារភាពចលាចល ចំពោះមុខកុបកម្មតវ៉ាដ៏ហិង្សា។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters។ប្រទេសកាណាដានិងសឹង្ហបុរីក៏ចេញសេចក្តីណែនាំដូចអាមេរិកផងដែរ។
គួរបញ្ជាក់ថា បង់ក្លាដែស បានរងនូវការតវ៉ាយ៉ាងខ្លាំងក្លាក្នុងសប្តាហ៍នេះ ជុំវិញកូតាលើវិស័យការងារសាធារណៈ ដែលរួមមានទាំងការកំណត់ប្រព័ន្ធកូតាការងារ ៣០% សម្រាប់ចំនួនកូនចៅជំនាន់ក្រោយ របស់ក្រុមអ្នកតស៊ូដើម្បីសេរីភាពសម័យសង្គ្រាមឆ្នាំ ១៩៧១ ដែលបង់ក្លាដែសទទួលបានឯករាជ្យពីប៉ាគីស្ថាន។ ការណ៍នេះ បានបង្កការខឹងសម្បារ ដល់សិស្សនិស្សិត ដែលកំពុងប្រឈមមុខនឹង អត្រាអត់ការងារធ្វើខ្ពស់ក្នុងចំណោមយុវជន ខណៈយុវជនបង់ក្លាដែសជិត ៣១លាននាក់មិនមានការងារធ្វើ ឬស្ថិតនៅក្រៅប្រព័ន្ធអប់រំ ក្នុងចំណោមប្រជាជនសរុប ១៧០លាននាក់។
រយៈពេល ៥ថ្ងៃមកនេះ ប៉ូលិសបានបាញ់ឧស្ម័នបង្ហូរទឹកភ្នែក និងគ្រាប់បែកផ្សែងដើម្បីបំបែកការតវ៉ា ខណៈក្រុមបាតុករបានប៉ះទង្គិចជាមួយបុគ្គលិកសន្តិសុខ ដោយគប់ដុំថ្ម និងដុតរថយន្ត។ គិតត្រឹម កាលពីថ្ងៃទី២០ ខែកក្កដា ចំនួនអ្នកស្លាប់នៅក្នុងការប៉ះទង្គិចគ្នារវាងកុបករ និងប៉ូលិសបានកើនដល់ ១១៤នាក់។សេវាអ៊ិនធឺណិត និងសារជាអក្សរនៅលើទូរសព្ទ បានជួបប្រទះនូវភាពរអាក់រអួលចាប់តាំងពីថ្ងៃព្រហស្បតិ៍ ដោយសារតែការកាត់ផ្តាច់ចេញពីពិភពលោកដោយមិនឱ្យដំណើរការជាបណ្តោះអាសន្ន ស្របពេលមន្ត្រីនគរបាលបានបង្ក្រាបនូវរាល់ការតវ៉ាដែលបានបន្តកើតមានជាហូរហែ បើទោះបីជាមានបម្រាមហាមឃាត់ចំពោះការជួបជុំជាសាធារណៈបែបណាក៏ដោយ ។
ការហៅទូរសព្ទទៅក្រៅប្រទេស ភាគច្រើនមិនអាចតភ្ជាប់បានឡើយ ខណៈគេហទំព័ររបស់ស្ថាប័នប្រព័ន្ធផ្សព្វផ្សាយដែលមានមូលដ្ឋាននៅប្រទេសបង់ក្លាដែស មិនបានធ្វើបច្ចុប្បន្នភាពអ្វីទាំងអស់ ហើយប្រព័ន្ធបណ្តាញសង្គមក្នុងប្រទេសនេះ នៅតែបន្តអសកម្ម ។មន្ត្រីនគរបាលកុបកម្ម បានបាញ់ឧស្ម័នបង្ហូរទឹកភ្នែក និងគប់គ្រាប់បែកដៃ ដើម្បីបំបែកក្រុមបាតុករ ខណៈដែលក្រុមបាតុករ បានប៉ះទង្គិចជាមួយបុគ្គលិកសន្តិសុខ ដោយគប់ដុំឥដ្ឋ និងដុតកម្ទេចរថយន្តជាដើម ។
គួររំឮកថា ចាប់តាំងពីលោកស្រី Sheikh Hasina បានបន្តជាប់ឆ្នោតសម្រាប់ដឹកនាំប្រទេសក្នុងអាណត្តិទី៤ បាតុកម្ម ក៏បានកើតមានឡើងជាបន្តបន្ទាប់ ដែលជំរុញដោយភាពគ្មានការងារធ្វើខ្ពស់ ក្នុងចំណោមយុវជនជិតមួយភាគប្រាំនៃប្រជាជនសរុបទាំង ១៧០ លាននាក់របស់ប្រទេសស្ថិតនៅក្នុងតំបន់អាស៊ីខាងត្បូងមួយនេះ ។បង់ក្លាដែស បានរំដោះប្រទេសរើខ្លួនបំបែកចេញពីប៉ាគីស្ថាននៅឆ្នាំ១៩៧១។ ឥស្សរជនទាមទារឯករាជ្យដែលគេចាត់ទុកថាជាអ្នកតស៊ូនិងមានគុណបំណាច បានផ្តល់ឲ្យកូនចៅរបស់ពួកគេ នូវសិទ្ធិពិសេស ដើម្បីបន្តវេនចូលកាន់មុខងាររដ្ឋការ។ កៅអីការងាររដ្ឋ ចំនួន៣០% នៃចំនួនការជ្រើសរើសមន្ត្រីសាធារណៈ ត្រូវរក្សាទុកសម្រាប់ពួកកូនចៅវីរជនទាំងនោះ។ ចំណុចនេះហើយ ដែលជាក្តីខឹងសម្បាររបស់និស្សិតបាតុករ។ ក្រោមសម្ពាធបាតុកម្មច្រើនឡើង តុលាការកំពូលបង់ក្លាដែស បានសម្រេចព្យួរច្បាប់នេះ១ខែ តែបាតុករនៅតែមិនសុខចិត្ត។
ប្រឈមនឹងស្ថានភាពកាន់តែដុនដាបនៅក្នុងស្រុក លោកស្រីនាយករដ្ឋមន្ត្រី ឆេក ហាស៊ីណា បានលុបចោលដំណើរទស្សនកិច្ចទៅអេស្ប៉ាញនិងប្រេស៊ីល។ ប្រមុខរដ្ឋាភិបាលរូបនេះ ក៏បានដាក់បំរាមគោរចរដែលចូលជាធរមានភ្លាម នៅយប់ថ្ងៃសុក្រឈានចូលថ្ងៃសៅរ៍ ហើយដែលតម្រូវឲ្យដាក់ពង្រាយកងកម្លាំងយោធា។បន្ទាប់ពីមានបាតុកម្មមានមនុស្សស្លាប់ជាច្រើនាក់ តុលាការកំពូលប្រទេសបង់ក្លាដេសបានកម្តល់សម្រេច ព្រមបញ្ចុះកូតានៃការជ្រើសរើសបុគ្គលិកចូលក្របខ័ណ្ឌរដ្ឋពី៣០ មកនៅត្រឹម៥% សម្រាប់កូនចៅរបស់អ្នកនយោបាយដែលបានតស៊ូដើម្បីឯករាជ្យជាតិ និង២% សម្រាប់កូតាផ្សេងៗ។ ជាសរុប ប៉ុស្តិ៍ការងាររដ្ឋចំនួន៩៣% នឹងបើកចំហឱ្យគ្រប់ប្រជាពលរដ្ឋមានសមត្ថភាពនិងដោយគ្មានតូកាទេ។ នេះជាការលម្អិតរបស់រដ្ឋអាជ្ញានៃតុលាការកំពូលដដែល។ តុលាការកំពូលក៏បានបង្គាប់ដែរ ឱ្យបាតុករនិស្សិតទាំងអស់ បញ្ឈប់សកម្មភាពនិងត្រលប់ចូលសិក្សាវិញ។
បង់ក្លាដែស គ្មានលទ្ធផលផ្តល់ការងារសមរម្យដល់ប្រជាពលរដ្ឋដែលមានចំនួនសរុបជាង១៧០លាននាក់ទេ។ ប្រព័ន្ធកូតាខាងលើជាប្រភពដ៏ចម្បងមួយ ក្នុងគំនិតយុវនិស្សិតមានសញ្ញាប័ត្រនាំឱ្យមានវិបត្តិការងារធ្ងន់ធ្ងរ និងផ្តល់ប្រយោជន៍ដល់តែកូនចៅនៃគ្រួសារស្និទ្ធនិងគាំទ្រនាយករដ្ឋមន្ត្រីបច្ចុប្បន្ន លោកស្រី ឆេក ហាសាណា។ បាតុករបានថែមទាំងចោទរដ្ឋាភិបាលរបស់លោកស្រីហាសាណា ថាបានបំពត់អំណាចតុលាការឱ្យនៅក្រោមបង្គាប់ខ្លួនទៀតផង។ ហេតុដូច្នេះហើយបានបាតុករខ្លះទាមទារឱ្យលោកស្រីនាយករដ្ឋមន្ត្រីលាលែងចេញពីតំណែងតែម្តង និងប្រកាសបន្តធ្វើបាតុកម្មប្រឆាំងនឹងរដ្ឋាភិបាលទៀត ទោះបីជាតុលាការព្រមកែសម្រួលប្រព័ន្ធកូតាជ្រើសរើសបុគ្គលិករដ្ឋក៏ដោយ។
ឈ្នះឆ្នោតកាន់អំណាច អាណត្តិទី៤ លោកស្រីនាយករដ្ឋមន្ត្រីបង់ក្លាដែស បានក្តោបក្តាប់អំណាចស្រុកទេស អស់ ១៥ឆ្នាំរួចមកហើយ។ ក្រុមបាតុករ និងសង្គមស៊ីវិល បានរិះគន់លោកស្រីថាបានប្រើអំណាចផ្តាច់ការ រំលោភសេរីភាពបញ្ចេញមិត្ត បំបិទសំឡេងអ្នកប្រឆាំង ដោយផ្លូវតុលាការ។ ជាក់ស្តែង ថ្មីនេះ ថ្នាក់ដឹកនាំបក្សប្រឆាំងដ៏លេចធ្លោម្នាក់ លោក Ruhul Kabir Rizvi Ahmed ត្រូវប៉ូលិសចាប់ឃុំខ្លួន។ប្រភព៖ Reuters/ CAN/AFP
.jpg&h=97&w=146)
.jpg&h=97&w=146)
