គ្រាន់តែក្រសួងមហាផ្ទៃ ចេញសេចក្តីណែនាំភ្លាម ធ្វើឲ្យដំណើរការដេញថ្លៃផ្លូវមួយខ្សែមានតម្លាភាពជាងមុន
06-June-2026 / សេដ្ឋកិច្ច
ខេត្តត្បូងឃ្មុំ: ក្នុងលិខិតចុះថ្ងៃទី១៦ កក្កដា លោក ស សុខា រដ្ឋមន្ត្រីក្រសួងមហាផ្ទៃបានប្រាប់ឱ្យអភិបាលរាជធានី ខេត្តទាំងអស់ត្រូវពង្រឹងការរៀបចំ និងអនុវត្តគម្រោងមូលនិធិឃុំ សង្កាត់នៅតាមមូលដ្ឋានរបស់ខ្លួនឡើងវិញ។ លោកស សុខាបានបញ្ជាក់ថាកន្លងមក ក្រសួងមហាផ្ទៃបានសង្កេតឃើញមានការកើតឡើងនូវភាពមិនប្រក្រតីគួរឱ្យកត់សម្គាល់ពាក់ព័ន្ធនឹងការអនុវត្តគម្រោងមូលនិធិឃុំ សង្កាត់ដែលបណ្តាលមកពីការមិនយកចិត្តទុកដាក់ និងភាពទន់ខ្សោយនៃការគ្រប់គ្រងចាត់ចែងក្នុងកិច្ចដំណើរការអនុវត្តគម្រោងនោះ។
ក្រសួងមហាផ្ទៃក៏បានអះអាងពីការទទួលបានបណ្តឹងសុំអន្តរាគមន៍ជាញឹកញាប់អំពីភាពមិនប្រក្រតីពាក់ព័ន្ធនឹងគម្រោងមូលនិធិឃុំ សង្កាត់ដូចជាការរៀបចំបញ្ជីឈ្មោះអ្នកទទួលម៉ៅការប្រចាំឆ្នាំគ្មានតម្លាភាព ការដេញថ្លៃដោយមិនបានប្រកាសដំណឹងជាសាធារណៈ ការចុះអនុវត្តគម្រោងមុនការដេញថ្លៃ ការពន្យារការដេញថ្លៃដោយមិនបានកំណត់កាលបរិច្ឆេទ និងពេលវេលាច្បាស់លាស់នៃការដេញថ្លៃបន្ទាប់ ឬមួយក៏ការអនុវត្តគម្រោងរបស់អ្នកទទួលម៉ៅការមិនស្របតាមបទដ្ឋានបច្ចេកទេសជាដើម។
ចំពោះលោក ស សុខា បាតុភាពអវិជ្ជមានទាំងនេះពុំគួរកើតមានតទៅទៀតឡើយ និងបានប្រាប់ឱ្យថ្នាក់ដឹកនាំរាជធានី-ខេត្តទាំងអស់ពីភាពចាំបាច់ត្រូវតែពិនិត្យមើលការអនុវត្តការងាររបស់ទីចាត់ការផែនការវិនិយោគ និងរដ្ឋបាលឃុំ សង្កាត់ដូចជា ការប្រកាសជាសាធារណៈនូវការដេញថ្លៃគម្រោង ការពង្រឹងការរៀបចំទុកដាក់សំណើគម្រោង និងឯកសារកិច្ចសន្យាគម្រោង និងការពង្រឹងការងារតាមដានគុណភាពគម្រោងជាប់ជាប្រចាំ។ល។
នៅក្នុងលិខិតដដែល រដ្ឋមន្ត្រីក្រសួងមហាផ្ទៃរូបនេះមិនភ្លេចបញ្ជាក់ដោយព្រមានថា ប្រសិនបើរកឃើញមន្ត្រីរដ្ឋ សមាជិកក្រុមប្រឹក្សា និងស្មៀនឃុំ សង្កាត់ទាំងឡាយណាបានប្រព្រឹត្តកំហុសឆ្គង បំពានក្រមសីលធម៌វិជ្ជាជីវៈ ឬមានជាប់ពាក់ព័ន្ធនឹងភាពមិនប្រក្រតី ការឃុបឃិត ការក្លែងបន្លំ ការបង្ខិតបង្ខំ ឬប្រព្រឹត្តអំពើពុករលួយផ្សេងៗក្នុងការដេញថ្លៃគម្រោងមូលនិធិឃុំ សង្កាត់ បុគ្គលនោះនឹងត្រូវទទួលការដាក់វិន័យ ឬទណ្ឌកម្ម និងទោសទណ្ឌដោយគ្មានការយោគយល់ឡើយ។
បន្ទាប់ពីមានលិខិតនេះគេបានឃើញសកម្មភាពដាក់ឲ្យដេញថ្លៃផ្លូវក្រាលគ្រួសក្រហមមួយខ្សែដោយធ្វើឡើងនៅសាលាឃុំជីរោទ៏ទី២ ស្រុកត្បូងឃ្មុំ នាព្រឹកថ្ងៃទី១៧កក្កដាឆ្នាំ២០២៤ មិនមានកម្លាំងនគរបាលឬអាវុធហត្ថជួយសម្រួលនោះទេ។ តែការដេញថ្លៃត្រូវបានគេមើលឃើញមានរបៀបរៀបរយល្អមិនមានអ្នកចាប់ទាញដៃទាញជើង ដែលធ្វើឲ្យបាត់បង់សណ្ដាប់ធ្នាប់ ឬភាពរញ៉េរញ៉ៃណាមួយកើតឡើងឡើយ។ ដោយក្រុមហ៊ុននីមួយៗ បានយកប៊ីតទៅដាក់ក្នុងប្រអប់សំបុត្រតាមលំដាប់លំដោយទៀតផង។
លោកជា ប៊ុនពៅ ប្រធានលទ្ធកម្មឃុំជីរោទ៏ទី២ មានប្រសាសន៍ឲ្យដឹងថា:ផ្លូវក្រាលគ្រួសក្រហមមួយខ្សែដែលត្រូវដាក់ដំណើរការដេញថ្លៃមានប្រវែង៨០០ ម៉ែត្រនិងលូកាត់ទទឹងផ្លូវ២កន្លែងតម្លៃដាក់ឲ្យដេញថ្លៃជាង១០៥លានរៀល ក្នុងនោះមានក្រុមហ៊ុនចំនួន៧ ចូលរួមប្រកួតប្រជែងបានទៅលើក្រុមហ៊ុនលីឈួនតម្លៃជាង២៣លានរៀល គឺមានការបញ្ចុះរហូតដល់ជាង៧០% ឯណោះកត្តានេះធ្វើឲ្យអាជ្ញាធរមូលដ្ឋានអាចព្រួយរឿងគុណភាពផ្លូវផងដែរ។ប្រធានលទ្ធកម្មឃុំរូបនេះមានប្រសាសន៍បន្តថា ដើម្បីឲ្យដំណើរការដេញថ្លៃបានប្រព្រឹត្តទៅដោយយុត្តិធម៌ ត្រូវធ្វើយ៉ាងណារក្សានៅវិន័យកុំឲ្យមានភាពរញ៉េរញ៉ៃហើយតាមលក្ខខណ្ឌដេញថ្លៃគឺក្រុមហ៊ុនណាដែលដេញចុះជាងគេ គឺក្រុមហ៊ុននោះជាអ្នកឈ្នះ។ គួររំលឹកថានៅក្នុងអាណត្តិរបស់លោកជាមេឃុំភាពរញ៉េរញ៉ៃបានកើតឡើងតែម្ដងគត់។ ដោយមានបទពិសោធន៍នោះហើយទើបយើងកែតម្រូវឲ្យមានភាពត្រឹមត្រូវឡើងវិញ។
លោកជា ប៊ុនពៅ ប្រធានលទ្ធកម្មឃុំបញ្ជាក់ថា នៅក្នុងឃុំរបស់លោកគឺមានចំនួន១២ភូមិ ចំពោះផ្លូវដីដែលលំបាកធ្វើដំណើរក្នុងភូមិត្រូវបានអភិវឌ្ឍន៍ទៅជាផ្លូវក្រាលគ្រួសក្រហមទាំងអស់។ ហើយនៅព្រឹកថ្ងៃទី១២កក្កដា នេះគឺដេញថ្លៃផ្លូវមួយខ្សែប្រវែង៨០០ម៉ែត្រ ស្ថិតនៅភូមិស្រែសៀម ចំពោះថវិកាដែលថ្នាក់ជាតិទម្លាក់ចុះមកក៏មានសរុបរហូតដល់ជាង ៤០០លានរៀល។ ដូច្នេះថវិកានៅសល់ប្រមាណ៣០០លានរៀល គឺនឹងរៀបចំដាក់ឲ្យដេញថ្លៃផ្លូវបេតុងមួយខ្សែចាប់ពីពេលនេះតទៅផ្លូវក្រាលគ្រោះក្រហមលែងមានទៀតហើយ។ គឺអាជ្ញាធរមានការអភិវឌ្ឍន៍ទៅជាផ្លូវបេតុងទាំងអស់ ទោះជាប្រវែងខ្លីក៏ពិតមែនតែប្រើប្រាស់បានយូរអង្វែង ដើម្បីបម្រើប្រយោជន៍សាធារណៈដល់ពលរដ្ឋទូទៅទាំងអ្នកនៅក្នុងតំបន់និងក្រៅតំបន់៕
