នាយករដ្ឋមន្ត្រីចេញបញ្ជាឲ្យបង្ក្រាបក្មេងទំនើងទូទាំងប្រទេសនិងដាក់វិធានថ្មីក្នុងសាលា
ភ្នំពេញ៖ សម្ដេចមហាបរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃទី២៣ ខែឧសភា ឆ្នាំ២០២៤ បានចេញបញ្ជាឲ្យគណៈអភិបាលរាជធានីខេត្តទាំងអស់ ត្រូវពង្រឹងវិធានការទៅលើក្រុមក្មេងទំនើង ជាពិសេសក្រុមដាវសុំាម៉ូរ៉ៃ ដែលបានបំផ្លាញនូវទ្រព្យសម្បត្តិ និងបង្កឲ្យមានភាពភ័យខ្លាចដល់ប្រជាពលរដ្ឋ។
សម្ដេចធិបតីបញ្ជាក់ថាត្រូវអនុវត្តឱ្យបានម៉ឺងមាត់ ចំពោះក្រុមក្មេងទំនើង ទាំងវិធានការរដ្ឋបាល និងវិធានការអនុវត្តច្បាប់ ដោយគ្មានការបន្ធូរបន្ថយ និងលើកលែងដើម្បីការពារសណ្ដាប់ធ្នាប់សារធារណៈ សន្តិសុខសង្គម។សម្តេចមហាបវរធិបតី ហ៊ុន ម៉ាណែត បានប្រសាសន៍បែបនេះ នៅថ្ងៃទី២៣ ខែឧសភា ឆ្នាំ២០២៤នេះ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ ប្រកាសដាក់ឱ្យអនុវត្តជាផ្លូវការ “ផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកល នៅកម្ពុជា ឆ្នាំ២០២៤-២០៣៥ ”។សម្តេចធិបតី បានបន្ថែមថា សម្តេចកំពុងឱ្យខាងច្បាប់និងក្រសួងយុត្តិធម៌ ពិនិត្យមើលរឿងដាក់ដាវសុំាម៉ូរ៉ៃតាមខ្លួន ដោយកុំឱ្យមានទាំងអស់គ្នាទើបប្រសើរ។
សម្តេច ហ៊ុន ម៉ាណែត បានអំពាវនាវស្ថាប័នអយ្យការនិងស្ថាប័នតុលាការ មានវិធានការអនុវត្តច្បាប់ ឲ្យបានម៊ឺងម៉ាត់ចំពោះការចាត់ការលើសំណុំរឿងក្មេងទំនើងប្រកបដោយយកចិត្តទុកដាក់ និងការទទួលខុសត្រូវខ្ពស់ ដើម្បីលើកកម្ពស់ការអនុវត្តច្បាប់របស់កម្ពុជា។ជាមួយគ្នានោះ សម្តេចបានអំពាវនាវឲ្យមាតាបិតាអាណាព្យាបាលអប់រំកូនៗឱ្យបានល្អ និងសូមឱ្យក្មួយៗទាំងអស់ ប្រកាន់ភ្ជាប់នូវសេចក្តីថ្លៃថ្នូរ និងសូមជៀសវាងនូវសកម្មភាពអន្តរាយដល់ខ្លួន គ្រួសារនិងសង្គមជាតិ។
សម្តេចធិបតី មានប្រសាសន៍ថា សូមកុំចោទថារាជរដ្ឋបាល រឹតបន្តឹងធ្វើបាបក្មេងៗ ប៉ុន្តែនេះគឺជាការជួយការពារទ្រព្យសម្បត្តិ អាយុជីវិតរបស់ក្មួយៗ និងការពារក្រុមគ្រួសារ កុំឲ្យមានកូនជាប់គុក និងមានគ្រោះថ្នាក់ដូចជារបួសដៃជើងជាដើម។សម្តេចបានបញ្ជាក់ដែរថា ឥឡូវនេះ រាជរដ្ឋាភិបាលកំពុងតែរៀបចំអនុវត្តសាកល្បង លើជាង៤០សាលារៀន ដើម្បីរុញម៉ោងសិក្សាបន្ថែម កុំឲ្យសិស្សទំនេរពេក ដោយរៀននៅក្នុងសាលាចាប់ផ្ដើមពីថ្នាក់បឋម។ សម្តេចថា គម្រោងនេះ ចំណេញពីរយ៉ាងទី១.ការរៀនបន្ថែមពីរម៉ោង គឺដើម្បីកុំឲ្យសិស្សទំនេរចេញទៅធ្វើអី្វមិនមានប្រយោជន៍ ជាពិសេសគឺក្មេងៗទំនើង និងទី២.គឺជួយបំប៉នបន្ថែមផងដែរ ជៀសវាងការលំបាកនៅក្នុងការរៀនគួរបន្ថែម។
ទាក់ទងនិងរឿងក្មេងទំណើងនេះដែរកាលពីរសៀលថ្ងៃទី២២ ខែឧសភា ឆ្នាំ២០២៤ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដឹកនាំកិច្ចប្រជុំការពង្រឹងត្រូតពិនិត្យអនុវត្តវិធានការបង្ការទប់ស្កាត់ និងបង្ក្រាបក្មេងទំនើងក្នុងរាជធានីភ្នំពេញ។ក្នុងឱកាសនោះ ឧត្តមសេនីយ៍ឯក ជួន ណារិន្ទបានដាក់ចេញនូវបទបញ្ជាឲ្យលោកអធិការនគរបាលខណ្ឌទាំង១៤ ត្រូវសហការគ្នាឲ្យបានម៉ឺងម៉ាត់ដើម្បីបង្ក្រាបក្មេងទំនើងឱ្យមានប្រសិទ្ធខ្ពស់ ខណៈដែលក្នុងរយៈពេលចុងក្រោយនេះសកម្មភាពក្មេងទំនើងដេញវាយគ្នាតាមផ្លូវសាធារណៈហាក់បីដូចជាកម្រើកឡើងវិញបង្កឲ្យប៉ះពាល់សន្តិសុខសណ្តាប់ធ្នាប់សាធារណៈ។
លោកស្នងការ ក៏បានលើកឡើង ជំរុញដល់លោកអធិការនគរបាលខណ្ឌទាំង១៤ និងការិយាល័យជំនាញ ត្រូវបង្កើនការគ្រប់គ្រងមុខសញ្ញាក្មេងទំនើង ទាំងមុខសញ្ញាចាស់និងមុខសញ្ញាថ្មីឲ្យបានច្បាស់លាស់ដើម្បីងាយស្រួលដល់សមត្ថកិច្ច ចាត់វិធានការបង្ការបង្ក្រាប ទាន់ពេលវេលា បើក្នុងករណីក្មេងទំនើងដែលសមត្ថកិច្ចយើងបានគ្រប់គ្រងមុខសញ្ញានោះរួចហើយ បើពួកគេធ្វើសកម្មភាពប្រព្រឹត្តបទល្មើសព្រហ្មទណ្ឌជាដើមនោះ។
