នាយឧត្តមសេនីយ៍ វង្ស ពិសេន ប្រាប់គណៈប្រតិភូបញ្ជាការដ្ឋានការពាររដ្ឋធានីហាណូយថាមិត្តភាពកម្ពុជាវៀតណាមគ្មានអ្នកណាបំបែកបាន!
21-September-2026 / ផ្សេងៗ
ភ្នំពេញ៖ នាព្រឹកថ្ងៃទី១៥ ខែឧសភា ឆ្នាំ២០២៤ លោក នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានអនុញ្ញាតឱ្យ លោក ឧត្តមសេនីយ៍ទោ ង្វៀន គួកហ្ស៊ាត (NGUYEN QUOC DUYET) មេបញ្ជាការ បញ្ជាការដ្ឋានការពាររដ្ឋធានីហាណូយ នៃសាធារណរដ្ឋសង្គមនិយមវៀតណាម និងគណៈប្រតិភូចូលជួបសម្តែងការគួរសម នៅអគ្គបញ្ជាការដ្ឋាន។
លោក នាយឧត្តមសេនីយ៍ វង្ស ពិសេន បានស្វាគមន៍ដល់គណៈប្រតិភូ និងបានបញ្ជាក់ជូនអំពីសភាពការណ៍មួយចំនួននៅកម្ពុជា ក្រោមម្លប់សន្តិភាពរយៈពេល២៦ឆ្នាំ នៃនយោបាយឈ្នះ ឈ្នះ ដែលដាក់ចេញដោយសម្ដេចអគ្គមហាសេនាបតីតេជោ ហ៊ុន សែន នាំឱ្យកម្ពុជាមានសន្តិភាព ការឯកភាពជាតិ និងការអភិវឌ្ឍន៍លើគ្រប់វិស័យ។លោក នាយឧត្តមសេនីយ៍ អគ្គមេបញ្ជាការ បានបញ្ជាក់ថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ដែលមានសមាសភាពបន្តវេនវ័យក្មេង បាននិងកំពុងបន្តធ្វើដំណើរយ៉ាងលឿនរហ័ស ប្រកបដោយថាមពល ជាមួយនឹងលំនឹងសន្តិភាព ស្ថិរភាពសង្គម និងឈានទៅរកប្រទេសអភិវឌ្ឍមានចំណូលខ្ពស់នាឆ្នាំ២០៥០។
លើទំនាក់ទំនងកិច្ចសហប្រតិបត្តិការប្រទេសទាំងពីរលោកនាយឧត្តមសេនីយ៍ វង្ស ពិសេន បានលើកឡើងថា ប្រទេសទាំងពីរមានទំនាក់ទំនងជាប្រពៃណីជាយូរលង់ណាស់មកហើយក្នុងអំឡុងសតវត្សទី១៥ ហើយរហូតមកដល់បច្ចុប្បន្ននេះ ក្រោមការដឹកនាំដ៏ឈ្លាសវៃរបស់ប្រមុខរដ្ឋាភិបាលប្រទេសទាំងពីរ បានបន្តពូនជ្រុំចំណងសាមគ្គីភាព មិត្តភាព កិច្ចសហប្រតិបត្តិការ មានការរីកចម្រើនរឹងមាំជាលំដាប់ គ្មានកម្លាំងអមិត្តណាមកបំបែកបំបាក់បានឡើយ។លោកអគ្គមេបញ្ជាការ បានថ្លែងអំណរគុណដល់បក្ស រដ្ឋ និងកងទ័ពប្រជាជនវៀតណាម ដែលបានជួយរំដោះកម្ពុជាពីរបបប្រល័យពូជសាសន៍ និងបានឧបត្ថម្ភគាំទ្រទាំងស្មារតី ថវិកា សម្ភារៈ ការកសាងហេដ្ឋារចនាសម្ព័ន្ធជាច្រើន ក៏ដូចជាបណ្តាកងឯកភាពនៃកងយោធពលខេមរភូមិន្ទ ជាពិសេសការជួយបណ្តុះបណ្តាលធនធានមនុស្សជាច្រើនជំនាញក្នុងមួយឆ្នាំៗ រួមចំណែកក្នុងការកសាងកងយោធពលខេមរភូមិន្ទឱ្យមានភាពរីកចម្រើន។
លោក ឧត្តមសេនីយ៍ទោ ង្វៀន គួកហ្ស៊ាត បានថ្លែងអំណរគុណចំពោះឯកឧត្តម នាយឧត្តមសេនីយ៍ អគ្គមេបញ្ជាការ ដែលបានសហការអនុវត្តកិច្ចសហប្រតិបត្តិការឆ្នាំ២០២៤ រវាងក្រសួងការពារជាតិនៃប្រទេសទាំងពីរ (និយាយជារួម) និងនិយាយដោយឡែក រវាងបញ្ជាការដ្ឋានការពាររដ្ឋធានីហាណូយ ជាមួយបញ្ជាការដ្ឋានកងទ័ពជើងគោកកម្ពុជា ជាពិសេសការរៀបចំឲ្យគណៈប្រតិភូបានផ្លាស់ប្ដូរទស្សនកិច្ចពីគ្នាទៅវិញទៅមក។ឧត្តមសេនីយ៍ទោ ង្វៀន គួកហ្ស៊ាត បានឧទ្ទេសនាមពីប្រវត្តិខ្លះៗនៃការបង្កើតបញ្ជាការដ្ឋានការពាររដ្ឋធានីហាណូយ ដែលមានភារកិច្ចនៅក្នុងកិច្ចសហការជាមួយស្នងការនគរបាល ដើម្បីការពារទីក្រុងហាណូយ ការពារសុវត្ថិភាព និងរាល់ព្រឹត្តិការណ៍សំខាន់ៗដែលកើតឡើង រួមទាំងការប្រឆាំងបទល្មើសផ្សេងៗ ជួយសង្គ្រោះគ្រោះមហន្តរាយ និងការចូលរួមអភិវឌ្ឍន៍សង្គមនៅទីក្រុងហាណូយ។
លោកមេបញ្ជាការវៀតណាម បានរំលឹកឡើងវិញពីចំណងមិត្តភាពរវាងប្រទេសទាំងពីរ កម្ពុជា-វៀតណាម ដែលជាប្រទេសជិតខាង មានទំនាក់ទំនងជាប្រពៃណី ធ្លាប់កៀកស្មើគ្នាជួយគ្នាទៅវិញទៅមក តស៊ូប្រយុទ្ធប្រឆាំងពួកអាណានិគមនិយម ក៏ដូចជាការរួមគ្នាវាយផ្ដួលរំលំរបបប្រល័យពូជសាសន៍ប៉ុលពតនៅឆ្នាំ១៩៧៩។លោក មេបញ្ជាការ បានបញ្ជាក់ថា ក្នុងរយៈកាលកន្លងមកក៏ដូចជាបច្ចុប្បន្ន កិច្ចសហប្រតិបត្តិការលើវិស័យការពារជាតិ សន្តិសុខជាតិ រវាងប្រទេសទាំងពីរ ពីមួយថ្ងៃទៅមួយថ្ងៃត្រូវបានពង្រឹងពង្រីកយ៉ាងទូលំទូលាយ ដោយឈរលើគោលការណ៍គោរពអធិបតេយ្យភាព និងផលប្រយោជន៍របស់ប្រទេសទាំងពីរ។
លោក ឧត្តមសេនីយ៍ទោ ង្វៀន គួកហ្ស៊ាត ក៏បានគូសបញ្ជាក់ពីដំណើរទស្សនកិច្ចរបស់គណៈប្រតិភូពេលនេះ ក្នុងគោលបំណងបន្តកិច្ចពិភាក្សាការងារទ្វេភាគីជាមួយកងពលតូចលេខ៧០ ដើម្បីផ្លាស់ប្ដូរបទពិសោធន៍លើការងារការពារសន្តិសុខ ការពារសុវត្ថិភាព និងប្រតិការណ៍នយោបាយសំខាន់ៗដែលកើតឡើង រួមនឹងការងារហ្វឹកហ្វឺន ការកសាងអង្គភាព ជាពិសេសការចងសម្ព័ន្ធមេត្រីភាពរវាងកងពលធំលេខ៣០១ ជាមួយនឹងកងពលតូចលេខ៧០៕
