មីយ៉ាន់ម៉ាចូលដល់របត់រកគេជួយដោះស្រាយហើយ!
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី និងប្រធានព្រឹទ្ធសភា នៃព្រះរាជាណាចក្រកម្ពុជា នៅព្រឹកថ្ងៃទី៨ ខែមេសានេះ បានអនុញ្ញាតឱ្យលោក Kyaw Soe Min ឯកអគ្គរដ្ឋទូត សាធារណរដ្ឋសហភាពមីយ៉ាន់ម៉ា ប្រចាំព្រះរាជាណាចក្រកម្ពុជា និងប្រតិភូ ចូលជួបសម្ដែងការគួរសម និងពិភាក្សាការងារ នៅវិមានព្រឹទ្ធសភា។
ក្នុងជំនួបនោះលោកឯកអគ្គរដ្ឋទូតមីយ៉ានម៉ាបានស្នើសុំអនុសាសន៍របស់ សម្ដេចតេជោ ទៅលើដំណោះស្រាយរបស់មីយ៉ាន់ម៉ាបន្ទាប់ពីលលោកទូតបានបញ្ជាក់អំពីស្ថានភាពមីយ៉ាចុងក្រោយជូន សម្ដេចតេជោថា ដោយសារមានក្រុមភេរវករធ្វើការបះបោរ ទោះបីជារដ្ឋាភិបាលមីយ៉ាន់ម៉ា បានខិតខំធានាឲ្យមានសន្តិភាព សន្តិសុខនៅក្នុងប្រទេសយ៉ាងណាក៏ដោយ។ មីយ៉ាន់ម៉ាក៏ទទួលរងគ្រោះពីការដាក់ទណ្ឌកម្មពីប្រទេសខាងក្រៅផងដែរ។ ឱ្យលោក Kyaw Soe Min ឯកអគ្គរដ្ឋទូត សាធារណរដ្ឋសហភាពមីយ៉ាន់ម៉ា ក៏បានលើកឡើងអំពីការជួយពីខាងក្រៅដល់ក្រុមភេរវករ ក្រុមជួញដូរគ្រឿងញៀន ការរត់ពន្ធមនុស្ស ដែលធ្វើប្រទេសខាងក្រៅ បានដាក់សម្ពាធទៅមីយ៉ាន់ម៉ា ថែមទៀត ធ្វើឱ្យមីយ៉ាន់ម៉ាកាន់តែជួបការលំបាក។
ឱ្យលោក Kyaw Soe Min ក៏បានបង្ហាញអំពីការយកចិត្តទុកដាក់របស់ រដ្ឋាភិបាលមីយ៉ាន់ម៉ា ក្នុងការរៀបចំអនុវត្តគោលការណ៍៥ចំណុច សម្រាប់ការឈានឆ្ពោះទៅរកការបោះឆ្នោត ដោយភាពត្រឹមត្រូវនិងយុត្តិធម៌ ខាងមុខនេះ ដោយក្នុងនោះមានគណបក្សចំនួន ៤៥ នឹងចូលរួម ។ ហើយរដ្ឋាភិបាលក៏បាននិងកំពុងខិតខំដើម្បីរក្សានូវសន្តិភាព ដើម្បីឱ្យវិលត្រឡប់មកវិញនូវលទ្ធិប្រជាធិបតេយ្យ និងប្រក្រតីភាពមកវិញ។
ក្នុងជំនួប លោកឯកអគ្គរដ្ឋទូត បានកើតសរសើរ និងថ្លែងអំណរគុណចំពោះ សម្ដេចតេជោ ដែលបានទទួលជួបលោក និងប្រតិភូនាពេលនេះ និងអបអរសាទរចំពោះ សម្ដេច និងគណបក្សប្រជាជនកម្ពុជា ដែលការបោះឆ្នោតព្រឹទ្ធសភាកន្លងទៅ ទទួលបានជោគជ័យ និងជាងនេះទៅទៀតគឺ សម្ដេចតេជោ ត្រូវបានជ្រើសតាំងជាប្រធានព្រឹទ្ធសភានៃព្រះរាជាណាចក្រកម្ពុជា។
ចាប់តាំងពីទំនាក់ទំនងការទូតឆ្នាំ១៩៩៥ មក គឺ ប្រទេសទាំងពីរ បានខិតខំរក្សាទំនាក់ទំនងនេះហើយជួយគ្នាទៅវិញទៅមកក្នុងគ្រាលំបាក ហើយប្រទេសទាំងពីរ ក៏ជាប្រទេសជាសមាជិកអាស៊ានដូចគ្នា ហើយតែងតែជួយគ្នាក្នុងនាមជាមិត្តជិតស្និទ្ធ។នៅពេលដែលកម្ពុជាធ្វើជាប្រធានអាស៊ាននៅឆ្នាំ ២០២២ កន្លងទៅនេះ លោក ឯកអគ្គរដ្ឋទូត ក៏បានកោតសរសើរ សម្ដេចតេជោ ក្នុងនាមជាប្រធានអាស៊ានដែលបានខិតខំប្រឹងប្រែង ជាពិសេសគឺការចូលរួមគាំទ្រ និងការពារមីយ៉ាន់ម៉ា រហូតសម្ដេចតេជោ អញ្ជើញបំពេញទស្សនកិច្ចការងារផ្ទាល់នៅប្រទេសមីយ៉ាន់ម៉ា គោលបំណងដើម្បីស្វែងរកដំណោះស្រាយសន្តិភាពនៅមីយ៉ាន់ម៉ា។
ជាមួយគ្នានេះដែរ នៅពេលមីយ៉ាន់ម៉ា ជួបក្នុងពេលវិបត្តិកូវីដ សម្ដេចតេជោ ក៏ដូចជា រាជរដ្ឋាភិបាលកម្ពុជា បានផ្ដល់ការជួយគាំទ្រដល់មីយ៉ាន់ម៉ា មានដូចជាថ្នាំពេទ្យ និងសម្ភារៈចាំបាច់ដើម្បីប្រយុទ្ធប្រឆាំងនឹងកូវីដ19។
លោកឯកអគ្គរដ្ឋទូត ក៏បានប្ដេជ្ញាថាក្នុងនាមជា ឯកអគ្គរដ្ឋទូតរបស់មីយ៉ាន់ម៉ា នឹងខិតខំពង្រឹងទំនាក់ទំនងកិច្ចសហប្រតិបត្តិការទ្វេភាគី ក៏ដូចជាពហុភាគី ក្នុងក្របខណ្ឌអាស៊ាន ក្របខណ្ឌតំបន់ និងពិភពលោក ឱ្យកាន់តែល្អប្រសើរនិងរឹងមាំថែមទៀត។សម្ដេចតេជោ បានបញ្ជាក់ថាឆ្នាំក្រោយនេះ គឺជាខួបលើកទី៧០នៃការបង្កើតទំនាក់ទំនងការទូតនៃប្រទេសយើងទាំងពីរ ហើយដែលមានចំណាស់ស្មើទៅនឹងអាយុរបស់សម្ដេចផងដែរ។ ប្រទេសទាំងពីរគឺមានទំនាក់ទំនង ទំនៀមទម្លាប់ វប្បធម៌ និងសាសនា ជាពិសេសគឺឥទ្ធិពលនៃសាសនា ដែលប៉ុន្មានថ្ងៃខាងមុខនេះប្រទេសទាំង ៤នៅតាមដងទន្លេមេគង្គមាន កម្ពុជា ឡាវ ថៃ និង មីយ៉ាន់ម៉ានឹងប្រារព្ធពិធី ចូលឆ្នាំថ្មី ឬហៅថាសង្ក្រាន្តដូចគ្នា។
សម្តេចតេជោ បានលើកឡើងថា កន្លងទៅ គឺយើងបានបង្កើត អាកម៉ិច នៅបាកាន ប្រទេសមីយ៉ាន់ម៉ាដែលមានប្រទេសឡាវ ថៃ កម្ពុជា មីយ៉ាន់ម៉ា ចូលររួម ហើយយើងក៏មានកិច្ចសហប្រតិបត្តិការជាច្រើន ដូច្នេះយើងត្រូវជំរុញកិច្ចសហប្រតិបត្តិការលើវិស័យទាំងនេះ។ពាក់ព័ន្ធនឹងស្ថានភាព មីយ៉ាន់ម៉ា សម្ដេចតេជោ ក្នុងនាមសម្ដេចជាប្រធានព្រឹទ្ធសភា បានលើកជាសំណូមពរមួយ ដោយសម្ដេចមានបំណងចង់ជួបនាយឧត្ដមសេនីយ៍ជាន់ខ្ពស់ មីន អោងឡាំង ប្រធានក្រុមប្រឹក្សារដ្ឋបាលរដ្ឋ តាមរយៈវីដេអូ conference អាចមុនសង្ក្រាន្ត ឬក៏ក្រោយសង្ក្រាន្តដើម្បីសួរសុខទុក្ខគ្នាផង ក៏ដូចជាពិគ្រោះពិភាក្សាប្ដូរយោបល់ ស្វែងរកដំណោះស្រាយវិបត្តិនៅមីយ៉ាន់ម៉ា ។
ទាក់ទងនិងវិបត្តិនៅក្នុងប្រទេសមីយ៉ានម៉ានេះដែរនៅប្រទេសថៃវិញនាយករដ្ឋមន្ត្រីថៃ លោក Srettha Thavisin បាននិយាយថា ឥឡូវគឺជាពេលវេលាល្អមួយ ដើម្បីបើកកិច្ចពិភាក្សាជាមួយប្រទេសមីយ៉ាន់ម៉ា ខណៈរបបដឹកនាំយោធា ដែលបានធ្វើរដ្ឋប្រហារដណ្តើមអំណាច កាលពីឆ្នាំ២០២១ នាពេលនេះ កំពុងចុះទន់ខ្សោយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី៨ ខែមេសា ឆ្នាំ២០២៤។ថ្លែងក្នុងបទសម្ភាសមួយជាមួយ ទីភ្នាក់ងារព័ត៌មាន Reuters កាលពីថ្ងៃអាទិត្យចុងសប្តាហ៍មុននេះ លោកនាយករដ្ឋមន្ត្រីថៃ បានលើកឡើងដូច្នេះថា «របបដឹកនាំបច្ចុប្បន្ន នៅប្រទេសមីយ៉ាន់ម៉ា កំពុងចាប់ផ្តើមបាត់បង់កម្លាំងរបស់ខ្លួន ជាបណ្តើរៗហើយ។ យ៉ាងណាមិញ ទោះបីជាពួកគេ កំពុងចុះទន់ខ្សោយក៏ដោយ ពួកគេនៅតែមានអំណាច... នៅតែមានសព្វាវុធ។ ប៉ុន្តែប្រហែលជាគួរដល់ពេលហើយ ដែលត្រូវបោះដៃទៅរកពួកគេ ហើយស្វែងរកការសម្រេចឱ្យបាន នូវកិច្ចព្រមព្រៀងមួយ»។
គួរបញ្ជាក់ថា រយៈពេលជាច្រើនខែមកនេះ រដ្ឋាភិបាលយោធាមីយ៉ាន់ម៉ា បាននិងកំពុងស្ថិតក្នុងសមរភូមិដ៏តានតឹងជាមួយ ក្រុមចលនាតស៊ូ ដែលគាំទ្រដោយរដ្ឋាភិបាលស្រមោល នៅប៉ែកជាច្រើននៃផ្ទៃប្រទេស ហើយបានបាត់បង់មូលដ្ឋានទ័ព និងក្រុងសំខាន់ៗជាបន្តបន្ទាប់ ក្នុងនោះរួមមានទាំងក្រុងមួយ នៅជាប់ព្រំប្រទល់ប្រទេសថៃ កាលពីចុងសប្តាហ៍ កន្លងទៅនេះ។ វាគឺជាបញ្ហាប្រឈមធំបំផុតសម្រាប់របបសឹកមីយ៉ាន់ម៉ា គិតចាប់តាំងពីការធ្វើរដ្ឋប្រហារយោធា ទម្លាក់រដ្ឋាភិបាលស៉ីវិល របស់លោកស្រី អោងសាន ស៊ូជី កាលពីខែកុម្ភៈ ឆ្នាំ២០២១ មកទល់នឹងពេលនេះ។
រដ្ឋាភិបាលយោធាមីយ៉ាន់ម៉ាបានស្នើសុំដល់ភាគីថៃអនុញ្ញាតឲ្យយន្តហោះយោធារបស់ខ្លួនចុះចតនៅអាកាសយានដ្ឋានក្នុងខេត្ត Tak ដើម្បីចូលយកមន្ត្រីយោធាជាន់ខ្ពស់ បន្ទាប់រត់គេចខ្លួនចេញពីខេត្ត Myawaddy ដែលត្រូវបានវាយដណ្ដើមកាន់កាប់ដោយក្រុមប្រឆាំងកាលពីយប់ថ្ងៃអាទិត្យកន្លងទៅ ។ នេះបើយោងតាមការចេញផ្សាយដោយសារព័ត៌មាន Thai PBS នៅថ្ងៃទី៨ ខែមេសានេះ ។
ការស្នើសុំដើម្បីចុះចតយន្តហោះរហូតដល់ថ្ងៃទី៩ ខែមេសា ត្រូវបានធ្វើឡើងតាមរយៈក្រសួងការបរទេសថៃ ខណៈសំណើនេះកើតមានឡើង បន្ទាប់ពីសម្ព័ន្ធក្រុមប្រដាប់អាវុធជនជាតិភាគតិចវាយដណ្ដើមបានបន្ទាយទ័ពចំនួន ៧ និងទីបញ្ជាការរដ្ឋាភិបាលយោធាមួយកន្លែងក្នុងខេត្ត Myawaddy ដែលមានព្រំប្រទល់ជាប់ស្រុក Mae Sot នៃប្រទេសថៃ ក្រោយការបាញ់បោះដាក់គ្នាយ៉ាងខ្លាំងក្លាអស់រយៈពេល ៤ ថ្ងៃ ។
ប្រសិនបើសំណើនេះត្រូវបានរដ្ឋាភិបាលថៃអនុញ្ញាតនោះ ជនជាតិមីយ៉ាន់ម៉ាចំនួន ៦១៧ នាក់ រួមទាំងមន្ត្រីយោធាចំនួន ៦៧ នាក់ មន្ត្រីមិនជាប់កិច្ចសន្យាចំនួន ៤១០ នាក់ និងសមាជិកគ្រួសារចំនួន ៨១ នាក់ នឹងឡើងជិះយន្តហោះត្រឡប់ទៅរដ្ឋធានីមីយ៉ាន់ម៉ាវិញ ស្របពេលដែលក្រុមនេះកំពុងនៅស្ពានមិត្តភាព ថៃ-មីយ៉ាន់ម៉ា រង់ចាំការអនុញ្ញាតចូលខេត្ត Tak ។
