បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ហាមចលត័កម្លាំងហែរក្បួនធ្វើតាមចៅចាក់ស្មុក?!
ភ្នំពេញ ៖ ប្រធានបញ្ជាការសន្តិសុខអចិន្ត្រៃយ៍ សម្តេចក្រឡាហោម ស ខេង និង ប្រធានគណៈកម្មាធិការជាតិរៀបចំការបោះឆ្នោត លោក ប្រាជ្ញ ចន្ទ នៅរសៀលថ្ងៃទី២ ខែមិថុនា ឆ្នាំ២០២២ បានចេញសេចក្តីណែនាំស្តីពីការពង្រឹងសន្តិសុខ សុវត្ថិភាព សម្រាប់ព្រឹត្តិការណ៍បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២។
សេចក្តីជូនដំណឹងបញ្ជាក់ថាអនុលោមតាមច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ និងបទបញ្ជា និងនីតិវិធីសម្រាប់ ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ក្នុងគោលបំណងធានាឲ្យដំណើរការនៃ ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ប្រព្រឹត្តទៅដោយរលូន ស្ថិតក្នុង បរិយាកាសស្ងប់ស្ងាត់ ធានាបាននូវសន្តិសុខ សណ្តាប់ធ្នាប់សាធារណៈ និងសុវត្ថិភាព គ្មានអំពើហិង្សា គ្មានការ គំរាមកំហែង គណៈកម្មាធិការជាតិរៀបចំការបោះឆ្នោត (គ.ជ.ប) និង គណៈបញ្ជាការសន្តិសុខអចិន្ត្រៃយ៍សម្រាប់ ការបោះឆ្នោត (គ.ស.អ) ធ្វើការណែនាំដូចខាងក្រោម ៖
-គណបក្សនយោបាយ ឬ/និងបេក្ខជន មិនត្រូវធ្វើសកម្មភាពកៀរគរ ប្រមូលកម្លាំងពីរាជធានី ខេត្តណាមួយ ដើម្បីទៅធ្វើសកម្មភាពនៅរាជធានី ឬខេត្តផ្សេង ក្នុងចេតនាបង្កអសន្តិសុខ ធ្វើឲ្យប៉ះពាល់ដល់សណ្តាប់ធ្នាប់សង្គម សំដៅបំផ្លាញយុទ្ធនាការឃោសនាបោះឆ្នោត និងការបោះឆ្នោតនោះឡើយ។-គណបក្សនយោបាយ ឬ/និងបេក្ខជននិងប្រជាពលរដ្ឋ ត្រូវចូលរួមក្នុងកិច្ចការពារថែរក្សាបរិយាកាស សន្តិសុខសម្រាប់យុទ្ធនាការឃោសនាបោះឆ្នោត និងការបោះឆ្នោតឲ្យបានល្អប្រសើរ ដោយមិនត្រូវធ្វើសកម្មភាព ណាមួយដែលផ្ទុយពីគោលការណ៍នៃច្បាប់បោះឆ្នោត បទបញ្ជា និងនីតិវិធីនៃការបោះឆ្នោត ក្រមសីលធម៌សម្រាប់ គណបក្សនយោបាយ និងបេក្ខជនក្នុងដំណើរការបោះឆ្នោត ព្រមទាំងលិខិតបទដ្ឋានគតិយុត្តពាក់ព័ន្ធផ្សេងៗ ជាធរមាន។
គ.ជ.ប និង គ.ស.អ សង្ឃឹមយ៉ាងមុតមាំថា គ្រប់គណបក្សនយោបាយ បេក្ខជន ប្រជាពលរដ្ឋដែលមាន ឈ្មោះបោះឆ្នោត និងសាធារណជនទាំងអស់ អាជ្ញាធរមានសមត្ថកិច្ច និងគណៈកម្មការរៀបចំការបោះឆ្នោតព្រម ទាំងយន្តការ រចនាសម្ព័ន្ធនៃ គ.ស.អ គ្រប់លំដាប់ថ្នាក់ នឹងសហការអនុវត្តតាមសេចក្ដីណែនាំនេះ ប្រកបដោយ ស្មារតីទទួលខុសត្រូវខ្ពស់ ដើម្បីបង្កលក្ខណៈសម្បត្តិធានាបាននូវបរិយាកាសស្ងប់ស្ងាត់ គ្មានអំពើហិង្សា គ្មានការ គំរាមកំហែង និងមានសុវត្ថិភាពទាំងស្រុង សម្រាប់ព្រឹត្តិការណ៍បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ។
មានការកត់សម្គាល់ថាការចេញសេចក្តីនែនាំនេះបានកើតឡើងក្រោយពីសារពត៍មានហ្វ្រេសនីវបានចេញផ្សាយអត្ថមួយសសេរដោយចៅចាក់ស្មុកបកអាក្រាតថានឹងមានផែនការបង្កចល្លារចលដោយក្រុមលោកសមរង្ស៊ីនៅក្រៅប្រទេសអុកឡុកការបោះឆ្នោតតាមរយៈគណបក្សភ្លើងទៀន?។អត្ថបទសសេរភ្ជាប់សកម្មភាពសមរង្ស៊ីនិបក្សពួកជាមួយគណបក្សភ្លើងទៀនថា៖ ទោះបីជាមានការព្រមានពីគណៈកម្មាធិការជាតិរៀបចំការបោះ ឆ្នោតលើការបើកការស៊ើបអង្កេតកាលដែលអតីតថ្នាក់ដឹកនាំអតីតគណបក្សសង្គ្រោះជាតិជាទណ្ឌិត និងខ្លះកំពុងជាប់បំរាមធ្វើនយោបាយ បានយករូបភាពសកម្មភាពយុទ្ធនាការឃោស នារកសំឡេងឆ្នោតរបស់គណបក្សភ្លើងទៀនទៅចែកចាយតាមបណ្តាញសង្គម ហើយដែលអាចនឹងនាំឱ្យគណបក្សភ្លើង ទៀនមានបញ្ហា ឈានដល់ការស៊ើបអង្កេតពាក់ព័ន្ធនឹងទិដ្ឋភាពច្បាប់ផងដែរ ទណ្ឌិត សម រង្ស៊ី និងបក្ខពួកនៅតែបំពានបំរាម និងបានធ្វើសកម្មភាពឃោសនាដោយភ្ជាប់រវាងសម រង្ស៊ី ខ្មោចគណបក្សសង្គ្រោះជាតិ និងគណបក្សភ្លើងទៀនដោយប្រើប្រាស់សារនិងនិមិត្តរូបដែលសំដៅលើគណបក្សភ្លើងទៀន។
គណបក្សភ្លើងទៀនដែលជាអតីតគណបក្ស សម រង្ស៊ី ប្រែឈ្មោះក្រោយច្បាប់ស្តីពីគណបក្សនយោបាយត្រូវបានអនុម័តឱ្យប្រើប្រាស់ ហើយបច្ចុប្បន្ននេះត្រូវបានគេដឹងថាទណ្ឌិត សម រង្ស៊ី និងបក្ខពួកនៅតែបន្តដឹកនាំនិងបញ្ជានៅពីក្រោយខ្នង បើទោះបីជាថ្នាក់ដឹកនាំបក្សនេះ បានចេញសេចក្តីប្រកាសព័ត៌មានថាបក្សភ្លើងទៀនមិនមានការជាប់ពាក់ព័ន្ធនឹង អតីតថ្នាក់ ដឹកនាំគណបក្សសង្គ្រោះជាតិដែលជាប់បំរាមធ្វើ នយោបាយក៏ដោយ។ តែសកម្មភាព សារជាសំឡេង និងសំណេរ ព្រម ទាំងរូបភាពភស្តុតាងបាបបង្ហាញយ៉ាងច្បាស់ថា ទោះពួកគេខិតខំលាក់បាំង និងខិតខំបដិសេធធ្វើជាមិនស្គាល់គ្នា តែការពិត នៅតែជាការពិត គឺទណ្ឌិត សម រង្ស៊ី នៅតែជាម្ចាស់និងជាមេដឹកនាំគណបក្សភ្លើងទៀន និងធ្វើសកម្មភាពដើម្បីគណបក្សភ្លើងទៀន។
ការបំពានច្បាប់ របស់ទណ្ឌិត សម រង្ស៊ី និងបុគ្គលផ្សេងទៀតដោយភ្ជាប់ខ្លួននឹងគណបក្សភ្លើងទៀនជាចំហរបង្ហាញយ៉ាងច្បាស់ថា សម រង្ស៊ី និងបក្ខពួករបស់ខ្លួននៅតែបន្តដឹកនាំគណបក្សភ្លើងទៀន និងប្រើការបញ្ជាពីចម្ងាយតាមរយៈសហសេវិករបស់ខ្លួននៅក្នុងប្រទេសដូចជា ទៀវ វណ្ណុល ស៊ុន ឆ័យ ថាច់ សេដ្ឋាជាដើមដើម្បីធ្វើសកម្មភាព ជំនួសខ្លួន។ សេង ធារី ប្អូនស្រីរបស់ សេង ម៉ារឌី អគ្គហិរញ្ញឹករបស់គណបក្សភ្លើងទៀន ក៏បានបកអាក្រាតថា សម រង្ស៊ី នៅតែជាមេដឹកនាំគណបក្សភ្លើងទៀន និងបានបញ្ជាកិច្ចការពីចម្ងាយ និងប្រើប្រាស់មនុស្សផ្សេងៗដូចជា រ៉ុង ឈុន គង់ រ៉ៃយ៉ា ស៊ិន ពៅចាន់រូហ្សិតជាដើម ដើម្បីបំផ្លែងរូបភាពថាសម រង្ស៊ី និងអ្នកត្រូវបានហាមឃាត់នយោបាយផ្សេងទៀតមិនមាន ការពាក់ព័ន្ធនឹងគណបក្សភ្លើងទៀន។ប៉ុន្តែដំរីស្លាប់មិនអាចយកចង្អេរទៅបាំងជិតឡើយ ហើយការយកសាររូបភាព សំឡេង និងធ្វើសកម្មភាពឃោសនាដោយប្រយោលនៅតាមទីតាំងផ្សេងៗជាភស្តុតាងនៃការបំពានច្បាប់របស់ក្រុមទណ្ឌិត សម រង្ស៊ី យ៉ាងច្បាស់។
អត្ថបទសសេថាក្រុមសម រង្ស៊ី និយមបានឃោសនាថា«បក្សភ្លើងទៀនជាព្រលឹងបក្សសង្គ្រោះជាត» សូម្បីតែលុយដែលរៃអង្គាសបានសម្រាប់ខ្មោចបក្សនេះក៏មានការទាមទារឱ្យយកមកជួយបក្សភ្លើងទៀននេះដែរ។ នេះ ជាយុទ្ធសាស្ត្រលេបយកកម្លាំងអតីតខ្មោចបក្សសង្គ្រោះជាតិ របស់ក្រុម សម រង្ស៊ី គឺលេបដូចពស់លេបកង្កែប។តាមពិត អ្វីដែល សម រង្ស៊ី រួមនឹងបក្ខពួកខ្លួនទាំងក្នុងនិងក្រៅប្រទេសប្រឹងប្រែងធ្វើសកម្មភាពជាមួយ «បក្សភ្លើងទៀន» ទាំងដឹងថាបំពានច្បាប់ក៏ព្រោះដើម្បីកសាងបន្ទាយនយោបាយមួយឡើងវិញ និងបង្កើតកម្លាំងនយោបាយមួយដើម្បីបម្រើផល ប្រយោជន៍របស់ទណ្ឌិត សម រង្ស៊ី។ សម រង្ស៉ី បានប្រកាសក្តែងៗថាខ្លួនគាត់នឹងយកលទ្ធផលបោះឆ្នោតឃុំ-សង្កាត់អាណ្ត្តិទី៥ នេះធ្វើជាឈ្នាន់តថ្លៃនយោបាយជាមួយគណបក្សប្រជាជនកម្ពុជា និងជាមួយសម្តេចតេជោ ហ៊ុន សែន ដើម្បីជាថ្នូរនឹងការអាចវិលត្រឡប់ចូលប្រទេសកម្ពុជាវិញក្រោយការបោះឆ្នោត ក្រុមប្រឹក្សាឃុំសង្កាត់ឆ្នាំ២០២២ នេះ។
ចំណុចនេះ មុត ចន្ថា ដែលជាមនុស្សស្និទ្ធនឹង កឹម សុខា ធ្លាប់ចេញមកប្រតិកម្មតប នឹងកាលដែលក្រុម សម រង្ស៊ី បានឃោសនាថាបក្សភ្លើងទៀន និងអតីតសង្គ្រោះជាតិគឺតែមួយដោយបានលើកឡើងថាជាការ រំលោភច្បាប់។ រំលោភលើច្បាប់វិសោធនកម្ម នៃច្បាប់ ស្តីពីគណបក្សនយោបាយ ច្បាប់បោះឆ្នោត និង បទបញ្ជា និង នីតិវីធី គ.ជ.ប ហើយនិងសាលដីការបស់តុលាការកំពូល។ ម្យ៉ាង ទៀត អ្នកនយោបាយជាទណ្ឌិត ឬជាអ្នកទោសដោយមានសាលក្រមស្ថាពរដូច សម រង្ស៊ី ជួយឃោសនាឱ្យបក្សភ្លើង ទៀន គឺជាអំពើរំលោភបំពានលើមាត្រា ៦-ថ្មី (ពីរ) ចំណុចទី៧ នៃច្បាប់វិសោធនកម្ម នៃច្បាប់ស្តីពីគណបក្សនយោបាយ និងសាលដីការបស់តុលាការកំពូល។
អត្ថបទវាយតម្លៃថា៖ គណបក្សភ្លើងទៀនគឺជាតំណាងឱ្យមហិច្ឆតានយោបាយរបស់ សម រង្ស៊ី និងធ្វើអ្វីៗដើម្បីបម្រើឱ្យបុព្វហេតុទណ្ឌិត សម រង្ស៊ី។ កាលដែលទណ្ឌិត សម រង្ស៊ី និងអ្នកទោសផ្សេងទៀតធ្វើសកម្មភាពជួយគណបក្សភ្លើងទៀន វាអាចជាការនាំគ្រោះដល់គណបក្សភ្លើងទៀនច្រើនជាងការនាំលាភព្រោះអ្នកទាំងនោះដឹងហើយថា យោងតាមច្បាប់ស្តីពីគណបក្សនយោបាយ អាចនាំឱ្យមានការស៊ើបអង្កេត និងការអនុវត្តច្បាប់ប្រឆាំងនឹងគណបក្សភ្លើងទៀនបាន។ ឬក៏ក្រុម សម រង្ស៊ី យល់ថា គណបក្សភ្លើងទៀននឹងមិនអាចដណ្តើមជ័យជម្នះ ក្នុងការបោះឆ្នោតជាមួយគណបក្សប្រជាជនកម្ពុជា ដែលជាគណបក្សដែលធំ មានកម្លាំងគាំទ្រច្រើនលើបលុបពីពលរដ្ឋ និងជាគណបក្សតែមួយដែលបានដើរតួនាទីស្នូលក្នុងការការការ ពារជាតិប្រជាជនឡើយ ដូច្នេះពួកគេត្រូវតែរុញសេណារីយ៉ូឱ្យមានការប្តឹងនិងរំលាយបក្សភ្លើងទៀនមួយទៀត ក្រោយការបោះឆ្នោតដើម្បីពួកគេបន្តអុកឡុកប្រទេសកម្ពុជា បំផ្លាញការបោះឆ្នោត និងធ្វើឱ្យមានភាពមិនរលូនលើការអបអរសាទរជ័យជម្នះគណបក្សប្រជាជនកម្ពុជាក្នុងការបោះឆ្នោត ព្រោះភស្តុតាងមានច្រើនរួចហើយដែលបញ្ជាក់ពីទំនាក់ទំនងរវាងក្រុមអ្នកនយោបាយជាទណ្ឌិត និងបក្សភ្លើងទៀន។ តែទោះជាយ៉ាងណា ប្រសិនបើអ្នកនយោបាយជាទណ្ឌិតដូច សម រង្ស៊ី និងអ្នកផ្សេងទៀតនៅតែបន្តគឃ្លើនរំលោភបំពានច្បាប់ជាធរមាន នោះមានន័យថា ពួកគេបាននិងកំពុងត្រៀមផ្នូរជូនគណបក្សភ្លើងទៀនទៀតហើយ៕ដោយ៖ ចៅចាក់ស្មុករាជធានីភ្នំពេញ, ថ្ងៃទី២ ខែមិថុនា ឆ្នាំ២០២២
