លោកហ្សេឡិនស្គីអះអាងថាអ៊ុយក្រែនធ្វើឲ្យលោកខាងលិចដឹងខ្លួននិងអរគុណដល់ពលរដ្ឋបារាំងចំពោះជំនួយគ្រឿងម៉ាស៊ីនភ្លើង និងសព្វាវុធ
26-March-2024 / ព័ត៌មានអន្តរជាតិ
អ៊ុយក្រែន៖ប្រធានាធិបតីអ៊ុយក្រែនលោកVolodymyrZelenskyបាននិយាយថាអ៊ុយក្រែនបានក្លាយជាមេដឹកនាំពិភពលោកមួយបន្ទាប់ពីសង្គ្រាមរយៈពេល១០ខែជាមួយរុស្ស៊ីនិងបានជួយលោកខាងលិចស្គាល់ខ្លួនឯង។នៅក្នុងសុន្ទរកថាប្រចាំឆ្នាំទៅកាន់សភាអ៊ុយក្រែនលោកប្រធានាធិបតីអ៊ុយក្រែនកាលពីថ្ងៃទី២៨ខែធ្នូបាននិយាយថាកិច្ចខិតខំប្រឹងប្រែងរបស់គៀវដើម្បីទប់ទល់នឹងយុទ្ធនាការយោធារុស្ស៊ីបានពង្រឹងជំនឿលើតម្លៃជុំវិញពិភពលោក។
លោកបានអំពាវនាវឲ្យសមាជិកសភារបស់ប្រទេសនេះរួបរួមគ្នានៅពេលដែលសង្គ្រាមមិនទាន់ចប់ដោយលោកនិយាយថាអ៊ុយក្រែនបានជួយលោកខាងលិចស្គាល់ខ្លួនឯង។”អ៊ុយក្រែនបានក្លាយជាមេដឹកនាំពិភពលោកមួយ។ ក្នុងរយៈពេល១០ខែ (សង្គ្រាមបានផ្ទុះឡើង) យើងបានជួយមនុស្សគ្រប់គ្នា។យើងបានជួយលោកខាងលិចស្គាល់ខ្លួនឯងម្តងទៀត ត្រឡប់ទៅឆាកពិភពលោកវិញ ។ លោកបាននិយាយថាលោកខាងលិចខ្លាចរុស្ស៊ី។
មេដឹកនាំអ៊ុយក្រែនបាននិយាយថាកិច្ចខិតខំប្រឹងប្រែងយោធារបស់ប្រទេសនេះបានជួយពង្រឹង និងបង្រួបបង្រួមសហភាពអឺរ៉ុបក្នុងបរិបទដែលទីក្រុងគៀវនៅឆ្នាំនេះបានដាក់ពាក្យចូលរួមជាមួយសហភាពអឺរ៉ុបនិងអង្គការណាតូ។លោកបាននិយាយថា”អរគុណចំពោះសាមគ្គីភាពយើងសម្រេចបាននូវអ្វីដែលស្ទើរតែគ្មាននរណាម្នាក់ក្នុងពិភពលោកអាចជឿបាន។ស្ទើរតែគ្មាននរណាក្រៅពីយើង។ទង់ជាតិ របស់យើងគឺជានិមិត្តរូបនាពេលបច្ចុប្បន្ននេះ។ ភាពក្លាហានអន្តរជាតិ និងពិភពលោកដែលមិនអាចកាត់ថ្លៃបាន” ។នៅក្នុងសុន្ទរកថារបស់លោក លោក Zelensky បាននិយាយច្រើនអំពីសង្គ្រាមជាង១០ខែជាមួយរុស្ស៊ី ហើយបានលើកឡើងពីគំនិតមួយចំនួនដូចជា វិមជ្ឈការនៃប្រព័ន្ធអគ្គិសនីនិងឆ្ពោះទៅរកថាមពលបៃតងដើម្បីកសាងប្រទេសឡើងវិញ។
បន្ថែមពីលើការថ្លែងអំណរគុណដល់ដៃគូលោកខាងលិចសម្រាប់សព្វាវុធ លោក Zelensky បាននិយាយថាអ៊ុយក្រែននឹងបង្កើតឧស្សាហកម្មការពារជាតិដ៏មានឥទ្ធិពលមួយ ហើយ “នឹងក្លាយជាផ្នែកមួយដ៏រឹងមាំបំផុតនៅអឺរ៉ុបនិងពិភពលោក”។លោកបានបន្ថែមថាប្រទេសអ៊ុយក្រែននឹងបង្កើនចំនួនស្ថានីយសេវាអ៊ីនធឺណិតផ្កាយរណប Starlink ដល់ជាង៣០,០០០។ គ្រឿងបរិក្ខារ SpaceX ដើរតួនាទីយ៉ាងសំខាន់ក្នុងការជួយអ៊ុយក្រែនរក្សាការចូលប្រើអ៊ីនធឺណិត នៅកន្លែងដែលរងគ្រោះខ្លាំងដោយការវាយប្រហារតាមអាកាសរបស់រុស្ស៊ី។
លោកហ្សេឡិស្គីក៏បាននិយាយផងដែរថាវាដល់ពេលហើយដើម្បីចាប់ផ្តើមការចរចាអំពីដំណើរការចូលរួមជាមួយ EU សម្រាប់ប្រទេសអ៊ុយក្រែន។”អ៊ុយក្រែនបានទទួលឋានៈជាបេក្ខជនសហភាពអឺរ៉ុបនៅឆ្នាំនេះ។ ប៉ុន្តែនេះមិនមែនជាសមិទ្ធផលតែមួយគត់របស់យើងទេ។នេះគ្រាន់តែជាផ្នែកនៃកំណត់ត្រារបស់យើង។ អ៊ុយក្រែនសមនឹងទទួលបានឋានៈនេះជាយូរមកហើយ។ សូម្បីតែកាលពី២០ឆ្នាំមុនវាអាចទៅរួច” Zelenskyបាននិយាយ។យោងតាមលោកសមិទ្ធផលដ៏អស្ចារ្យបំផុតក្នុងគោលនយោបាយការបរទេសក្នុងឆ្នាំ២០២២គឺអ៊ុយក្រែនបានជួយសហភាពអឺរ៉ុបនិងពិភពលោកសេរីទាំងមូលរួបរួមគ្នាតាមរយៈការតស៊ូដើម្បីសេរីភាពនិងសន្តិភាព។”យើងបានបញ្ជាក់យ៉ាងច្បាស់ដល់មនុស្សគ្រប់គ្នាថា បើគ្មានអ៊ុយក្រែន គ្មានសម្ព័ន្ធភាពនៅអឺរ៉ុបអាចរឹងមាំបានទេ។នោះហើយជាមូលហេតុដែលប្រជាពលរដ្ឋភាគច្រើននៅក្នុងបណ្តាប្រទេស EU ទាំងអស់គាំទ្រអ៊ុយក្រែន ។
Zelensky បានបញ្ជាក់។មុននេះ រដ្ឋាភិបាលអ៊ុយក្រែនបានប្រកាសថាខ្លួនបានបញ្ចប់គ្រប់ជំហានដែលអាចធ្វើទៅបាន ដើម្បីអនុវត្តតម្រូវការទាំង៧របស់គណៈកម្មការអឺរ៉ុប។ទាំងនេះគឺជាវិធានការចាំបាច់ដើម្បីវាយតម្លៃវឌ្ឍនភាពរបស់ទីក្រុងគៀវឆ្ពោះទៅរកសមាជិកភាពសហភាពអឺរ៉ុប។ តាមសំណើរបស់អ៊ុយក្រែន សហភាពអឺរ៉ុបបានយល់ព្រមពិចារណាលើចំណុចទាំង ៧ ខាងលើដែលរំពឹងទុកនៅរដូវផ្ការីកឆ្នាំ២០២៣។
ក្រៅពីសន្ទរកថានៅសភាប្រធានាធិបតីអ៊ុយក្រែន លោក Volodymyr Zelenskiy បានសម្តែងការកោតសរសើរ និងដឹងគុណយ៉ាងខ្លាំងចំពោះប្រទេសបារាំង ដែលបន្ដគាំទ្រដោយបានផ្តល់ជូនគ្រឿងសព្វាវុធ និងម៉ាស៊ីនភ្លើង ដល់អ៊ុយក្រែនក្នុងកាលៈទេសៈចាំបាច់បំផុត អំឡុងផលលំបាកនៃសង្គ្រាមដែលបន្តអូសបន្លាយអស់រយៈពេលជាង ១០ខែមកនេះ។
ក្នុងកិច្ចប្រជុំជាមួយរដ្ឋមន្ត្រីការពារជាតិបារាំង (លោក Sebastien Lecornu) មេដឹកនាំប្រទេសអ៊ុយក្រែន មានប្រសាសន៍ថា បារាំងបានបន្ដបរិច្ចាគគ្រឿងឧបករណ៍សំខាន់ៗ ក៏ដូចជាជំនួយផ្នែកហិរញ្ញវត្ថុ និងមនុស្សធម៌ផ្សេងៗទៀតដល់អ៊ុយក្រែន បានបង្ហាញពីសន្តានចិត្តដ៏ល្អប្រពៃមួយរបស់ពលរដ្ឋបារាំង ដែលបានចូលរួមចំណែកយ៉ាងសំខាន់ក្នុងការជួយសម្រួលដល់ជីវិតរស់នៅប្រចាំថ្ងៃរបស់ពលរដ្ឋ និងបន្តលទ្ធភាពការពារខ្លួនរបស់អ៊ុយក្រែនពីការឈ្លានពានរបស់ប្រទេសរុស្ស៊ីនាពេលកន្លងមក ។បន្ទាប់ពីការថ្លែងនៅក្នុងសភាដោយលោកប្រធានាធិបតី មន្ត្រីអ៊ុយក្រែនបានអះអាងថា រុស្ស៉ីទើបបើកការវាយប្រហារដោយមីស៊ីលជាង១០០គ្រាប់នៅថ្ងៃទី២៩ខែធ្នូនេះ។
សារព័ត៌មាន AFP នៅថ្ងៃព្រហស្បតិ៍ ទី២៩ ខែធ្នូ ឆ្នាំ២០២២ បានផ្សាយថា សំឡេងប្រកាសអាសន្នអំពីការវាយប្រហារតាមផ្លូវអាកាសត្រូវបានបន្លឺឡើងនៅទូទាំងអ៊ុយក្រែនក្នុងថ្ងៃព្រហស្បតិ៍នេះ ស្របពេលដែលកងកម្លាំងរុស្ស៉ី ទើបតែបើកការវាយប្រហារដោយមីស៉ីលជាង១០០គ្រាប់ទៀត។ទីប្រឹក្សាប្រធានាធិបតីអ៊ុយក្រែន លោក Oleksiy Arestovych បានបង្ហោះសារលើ Facebook ថា រុស្ស៉ីបានបាញ់ស្រោចមីស៊ីលប៉ុន្មានលើកបន្តបន្ទាប់គ្នា ខណៈបើសរុបចំនួនមីស៊ីលដែលរុស្ស៉ីបានប្រើប្រាស់ ក្នុងការវាយប្រហារកាលពីព្រឹកថ្ងៃព្រហស្បតិ៍នេះ គឺប្រហែលជាង ១០០គ្រាប់។អភិបាលទីក្រុងកៀវ បានអះអាងថា ការវាយប្រហារមីស៊ីលរបស់រុស្ស៉ីបានបណ្តាលឱ្យមនុស្សមួយចំនួនទទួលរងរបួស ខណៈអភិបាលនៅទីក្រុងលីវ (Liv) បាននិយាយថា មួយផ្នែកធំនៃទីក្រុងបានបាត់បង់ថាមពលអគ្គិសនី។
ការបាញ់ស្រោចមីស៊ីលថ្មីចុងក្រោយនេះកើតមានឡើង បន្ទាប់ពីវិមានក្រឹមឡាំងបានច្រានចោលផែនការសន្តិភាព១០ចំណុចរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ដែលមានគោលដៅកំណត់ឱ្យរុស្ស៉ីគោរពបូរណភាពទឹកដីរបស់អ៊ុយក្រែន ហើយដកទ័ពចេញទៅវិញទាំងអស់ពីទឹកដីរាប់ទាំងតំបន់គ្រីមៀដែលរុស្ស៊ីកាត់យកតាំងពី២០១៤ផងដែរ។ កាលពីថ្ងៃពុធអ្នកនាំពាក្យវិមានក្រឹមឡាំង ទីក្រុងមូស្គូប្រកាសទាត់ចោលផែនការនេះ ដោយទទូចឱ្យអ៊ុយក្រែនទទួលស្គាល់តំបន់ចំនួន៤ គឺដូណេត និងលូហាន នៅភាគខាងកើត ព្រមទាំងខឺសុននិងហ្សាប៉ូរិចហ្ស៉ីយ៉ា នៅភាគខាងត្បូង ដែលរុស្ស៉ីបានកាត់បញ្ចូលជាឧបសម្ព័ន្ធរបស់ខ្លួនបើទោះបីមិនបានកាន់កាប់ទាំងស្រុងក៏ដោយ៕ យោងតាមReuters
