វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1981 នាក់
ម្សិលមិញ 3717 នាក់
សរុប 14150314 នាក់
ភ្នំពេញ៖នៅម៉ោង១១៖៣០នាទីរាត្រីថ្ងៃទី៦ ខែមីនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានដឹកនាំគណៈប្រតិភូជាន់ខ្ពស់ធ្វើដំណើរមកដល់ប្រទេសកម្ពុជាវិញប្រកបដោយសុខសុវត្ថិភាពហើយ បន្ទាប់ពីបញ្ចប់កម្មវិធីទស្សនកិច្ចនៅប្រទេសអូស្ត្រាលី។ក្នុងកម្មវិធីនៅប្រទេសអូស្ត្រាលីនាពេលនេះ ក្រៅតែពីការចូលរួមកម្មវិធីផ្លូវការនៃកិច្ចប្រជុំកំពូលពិសេសអាស៊ាន និងអូស្ត្រាលីហើយនោះ សម្តេចធិបតី បានជួបមេដឹកនាំប្រទេសជាមិត្ត ជួបជាមួយប្រធានក្រុមហ៊ុនធំៗរបស់អូស្ត្រាលី ដែលកម្មវិធីទាំងអស់សរុបជាង២០កម្មវិធី។
មេដឹកនាំប្រទេសជាមិត្តចំនួន៦រូប ត្រូវបានសម្តេចនាយករដ្ឋមន្ត្រី ឆ្លៀតជួបទ្វេភាគីជាបន្តបន្ទាប់ ដើម្បីបន្តពង្រឹងពង្រីកទំនាក់ទំនង និងកិច្ចសហប្រតិបត្តិការទាំងឡាយឱ្យកាន់តែល្អប្រសើរ សម្តៅឆ្ពោះទៅពង្រីកការធ្វើធុរកិច្ចនាំប្រយោជន៍ផ្នែកសេដ្ឋកិច្ចសម្រាប់ជាតិ និងប្រជាជន។ មេដឹកនាំប្រទេសជាមិត្តដែលសម្តេចធិបតី បានជួបរួមមាន៖ លោក Ferdinand Romualdez Marcos Jr. ប្រធានាធិបតីហ្វីលីពីន, លោក ចូកូ វីដូដូ ប្រធានាធិបតីឥណ្ឌូនេស៊ី, លោក លី សៀន ឡុង (Lee Hsien Loong) នាយករដ្ឋមន្ត្រីសឹង្ហបុរី, លោក អេនថូនី អាល់បានីស៊ី (Anthony Albanese) នាយករដ្ឋមន្ត្រីអូស្ត្រាលី, លោក Christopher Luxon នាយករដ្ឋមន្ត្រីណូវែលហ្សេឡង់ និងលោក ផាម មិញជិញ នាយករដ្ឋមន្ត្រីរបស់វៀតណាម។
នៅក្នុងសន្និសីទសារព័ត៌មាននៅព្រលានយន្តហោះអន្តរជាតិភ្នំពេញ ជុំវិញលទ្ធផលនៃការអញ្ជើញចូលរួមរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងកិច្ចប្រជុំកំពូលពិសេសអាស៊ាន-អូស្ត្រាលី លោក តាន ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី បានបង្ហាញសមិទ្ធផលសំខាន់ៗ នៅក្នុងជំនួបទ្វេភាគីរវាងសម្តេចធិបតី ជាមួយមេដឹកនាំប្រទេសជាមិត្ត នៅក្នុងកិច្ចប្រជុំកំពូលពិសេសអាស៊ាន-អូស្ត្រាលី ជាច្រើនផងដែរ។លោក តាន ហ្សង់ហ្វ្រង់ស័រ បានបញ្ជាក់ឱ្យដឹងថា អូស្ត្រាលីនឹងចាប់ផ្តើមដាក់ចេញនូវយុទ្ធសាស្ត្រសេដ្ឋកិច្ចអូស្ត្រាលីមួយច្បាស់លាស់ សម្រាប់អាស៊ីអាគ្នេយ៍ ហើយនៅក្នុងក្របខណ្ឌនៃការអនុវត្តយុទ្ធសាស្ត្រនេះ អូស្ត្រាលីគ្រោងនឹងសហការគ្នាជាមួយកម្ពុជា នៅលើវិស័យមួយចំនួនជា៖ វិស័យកសិកម្ម វិស័យអប់រំ និងវិស័យទេសចរណ៍, ទាក់ទងនឹងវិស័យទេសចរណ៍នេះដែរ កម្ពុជា- អូស្ត្រាលី បានចុះកិច្ចព្រមព្រៀងស្តីពី សេវាកម្មដឹកជញ្ជូនតាមផ្លូវអាកាស ក្នុងគោលដៅជម្រុញការទំនាក់ទំនងនៅលើវិស័យទេសចរណ៍មួយនេះ។
លោក តាន ហ្សង់ហ្វ្រង់ស័រ បានបន្ថែមថា វិស័យទេសចរណ៍នេះក៏ជាប្រធានបទធំមួយនៃកិច្ចពិភាក្សាទ្វេភាគីរវាងសម្តេចធិបតី ហ៊ុន ម៉ាណែត និងមេដឹកនាំកំពូលៗចំនួន៥ទៀតផងដែរ ដែលជាលទ្ធផលជាក់ស្តែងមានដូចជា៖* កម្ពុជា-វៀតណាម៖ បានជំរុញឱ្យអនុវត្តគំនិតផ្តួចផ្តើមប្រទេស៣ គោលដៅ១ ដែលជាការសហប្រតិបត្តិការលើវិស័យទេសចរណ៍ កម្ពុជា-វៀតណាម+ប្រទេសមួយទៀតក្នុងតំបន។
* កម្ពុជា-សឹង្ហបុរី៖ បានលើកទឹកចិត្តឱ្យវិស័យឯកជនបង្កើតកញ្ចប់ទេសចរណ៍រួម ដើម្បីឱ្យភ្ញៀវទេសចរក្នុងប្រទេសទាំង២ងើបឡើងវិញឱ្យបានចាប់រហ័ស បន្ទាប់ពីវិបត្តិកូវីដ១៩។
* កម្ពុជា-ឥណ្ឌូនេស៊ី៖ លើកទឹកចិត្តឱ្យស្ថាប័នជំនាញ និងវិស័យឯកជនសិក្សាពីលទ្ធភាពនៃការតភ្ជាប់ពីតំបន់ទេសចរណ៍រវាងប្រទេសទាំង២។
កម្ពុជា-ហ្វីលីពីន៖ បានបង្ហាញបំណងចង់ឃើញវិស័យឯកជននៃប្រទេសទាំង២ សហការគ្នាដើម្បីជម្រុញលំហូរទេសចរណ៍ និងពិនិត្យមើលលទ្ធភាពនៃការបង្កើនជើងយន្តហោះ ហៅហើរត្រង់តភ្ជាប់តំបន់ទេសចរណ៍សំខាន់ៗនៃប្រទេសទាំង២។លោក តាន ហ្សង់ហ្វ្រង់ស័រ បានបញ្ជាក់ទៀតថា សម្រាប់វិស័យពាណិជ្ជកម្មវិញក៏ជាប្រធានបទមួយសំខាន់នៃជំនួបទ្វេភាគីរវាងសម្តេចធិបតី ហ៊ុន ម៉ាណែត និងមេដឹកនាំកំពូលៗផងដែរ ដែលជាក់ស្តែងមានដូចជា៖ កម្ពុជា- ហ្វីលីពីន សម្រេចបង្កើនពាណិជ្ជកម្មទ្វេភាគី ជាពិសេសការទិញលក់អង្ករ និងផលិតផលកសិកម្មផ្សេងៗទៀត, កម្ពុជា- វៀតណាម ប្តេជ្ញាសម្រេចឱ្យបាននូវការបង្កើនទំហំពាណិជ្ជកម្មទ្វេភាគីរហូតទៅដល់ ២០ប៊ីលាន នាពេលអនាគត់ដ៏ខ្លីខាងមុខនេះ។
លោកបានបន្ថែមទៀតថា ទាក់ទងនឹងពាណិជ្ជកម្មនេះដែរ កម្ពុជា-ឥណ្ឌូនេស៊ី បានឯកភាពគ្នាលើកទឹកចិត្តដល់ស្ថាប័នពាក់ព័ន្ធឱ្យអនុវត្តប្រកបដោយប្រសិទ្ធភាពខ្ពស់ លើការពង្រីកពាណិជ្ជកម្មអង្កររវាងប្រទេសទាំង២, ដោយឡែកក្នុងជំនួបទ្វេភាគីរវាងសម្តេចធិបតី ហ៊ុន ម៉ាណែត និងមេដឹកនាំកំពូលទាំង ៦រូប ក៏បានជម្រុញផងដែរលើកិច្ចសហប្រតិបត្តិការក្នុងវិស័យផ្សេងៗទៀតដូចជា៖នយោបាយ ការពារជាតិ សន្តិសុខ និងផ្សេងៗទៀតផងដែរ៕
ដោយឡេកឯកឧត្តម អេនថូនី អាល់បានីស៊ី (Anthony Albanese) នាយករដ្ឋមន្ត្រីអូស្ត្រាលីវិញ បានវាយតម្លៃខ្ពស់ចំពោះប្រទេសកម្ពុជា និងបានចាត់ទុកកម្ពុជាជាប្រទេសមួយដ៏អស្ចារ្យ និងមានភាពរឹងមាំ ទោះបីជាឆ្លងកាត់ការលំបាកក្នុងរបបប្រល័យពូជសាសន៍ក៏ដោយ។ ការវាយតម្លៃនេះត្រូវបានធ្វើឡើងក្នុងឱកាសសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង ឯកឧត្តម អេនថូនី អាល់បានីស៊ី (Anthony Albanese) នាយករដ្ឋមន្ត្រីអូស្ត្រាលី បានជួបពិភាក្សាការងារទ្វេភាគី ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្ត្រាលី នៅទីក្រុងម៉ែលប៊ន ប្រទេសអូស្ត្រាលី នារសៀលថ្ងៃទី៥ ខែមីនា ឆ្នាំ២០២៤នេះ។
ឯកឧត្តមនាយករដ្ឋមន្ត្រី ក៏បានវាយតម្លៃខ្ពស់ចំពោះប្រទេសកម្ពុជា ដែលលោកបានមានប្រសាសន៍ថា៖ “កម្ពុជាគឺជាប្រទេសមួយដ៏អស្ចារ្យ និងមានភាពរឹងមាំ ទោះបីជាឆ្លងកាត់នូវការលំបាកក្នុងរបបប្រល័យពូជសាសន៍ក៏ដោយ ក៏កម្ពុជានៅតែអស្ចារ្យ និងបន្តដំណើរទៅមុខទៀត”។សម្ដេចធិបតីក៏បានថ្លែងអំណរគុណ និងបានជម្រាបជូន ឯកឧត្តម អេនថូនី អាល់បានីស៊ី ថា៖ “កម្ពុជាសូមថ្លែងអំណរគុណដល់ប្រជាជន និងរដ្ឋាភិបាលអូស្ត្រាលី ដែលបានជួយគាំទ្រដល់កម្ពុជា ជាពិសេសនៅក្នុងអំឡុងពេលនៃការស្វែងរកសន្តិភាពជូនកម្ពុជានៅក្នុងទសវត្សរ៍ឆ្នាំ ១៩៩០ ហើយការអភិវឌ្ឍសង្គម-សេដ្ឋកិច្ចរបស់កម្ពុជាមិនអាចកើតឡើងបានឡើយ បើមិនមានការគាំទ្រ និងការយកចិត្តទុកដាក់ និងការផ្តល់ជំនួយលើវិស័យគន្លឹះ ដែលរួមមាន៖ វិស័យកសិកម្ម សុខាភិបាល ការបោសសម្អាតមីន សន្តិសុខ ការពារសន្តិសុខ និងវិស័យផ្សេងៗទៀត”។
ក្នុងក្របខ័ណ្ឌនៃការបន្តពង្រឹង និងពង្រីកកិច្ចសហប្រតិបត្តិការ សម្តេចធិបតី បានជម្រាបជូន ឯកឧត្តមនាយករដ្ឋមន្ត្រី អំពីវិស័យសំខាន់ៗសម្រាប់កិច្ចសហប្រតិបត្តិការ ដែលរួមមាន ដូចជា៖ វិស័យពាណិជ្ជកម្ម និងសេដ្ឋកិច្ច, ការអប់រំ និងការងារ និងផ្នែកការពារជាតិ។ សម្តេចធិបតី ក៏បានបញ្ជាក់ថា សម្តេចបានបង្ហាញអំពីការទាក់ទាញការវិនិយោគពីធុរជនអូស្ត្រាលី នៅក្នុងវេទិកាធុរកិច្ចកម្ពុជា-អូស្ត្រាលីកាលពីព្រឹក និងបានស្វាគមន៍ចំពោះការចុះកិច្ចព្រមព្រៀងស្តីពីសេវាកម្មដឹកជញ្ជូនតាមផ្លូវអាកាស ដែលជាកត្តាជំរុញដល់វិស័យទេសចរណ៍រវាងប្រទេសទាំងពីរ។ ជាកិច្ចបញ្ចប់សម្តេចធិបតីបានអញ្ជេីញឯកឧត្តមនាយករដ្ឋមន្ត្រីអូស្ត្រាលីដេីម្បីធ្វើទស្សនកិច្ចផ្លូវការនៅប្រទេសកម្ពុជាក្នុងពេលវេលាសមស្របណាមួយនាពេលអនាគត។