កម្ពុជា-ម៉ាឡេស៊ី អាចចាប់ផ្តើមទូទាត់ប្រាក់រវាងប្រទេសទាំងពីរ តាមរយៈ QR Codeបន្ទាប់ពីទស្សនកិច្ចនាយករដ្ឋមន្ត្រី
03-April-2024 / សេដ្ឋកិច្ច
ម៉ាឡេស៊ី៖ កម្ពុជា-ម៉ាឡេស៊ី នឹងចាប់ផ្តើមទូទាត់ប្រាក់រវាងប្រទេសទាំងពីរ តាមរយៈ ឃ្យូអរកូដ (QR Code) ពោលគឺប្រជាពលរដ្ឋម៉ាឡេស៊ីអាចទូទាត់ប្រាក់ដោយស្កេន QR Code នៅកម្ពុជា ហើយប្រជាពលរដ្ឋកម្ពុជាក៏អាចធ្វើការទូទាត់ដោយស្កេន QR Code នៅក្នុងប្រទេសម៉ាឡេស៊ីវិញផងដែរ។ការបើកផ្លូវឱ្យប្រទេសកម្ពុជា-ម៉ាឡេស៉ី អាចទូទាត់ប្រាក់តាមរយៈ QR Code បន្ទាប់ពីធនាគារកណ្តាលនៃប្រទេសទាំងពីរ នាថ្ងៃទី២៧ ខែកុម្ភៈ ឆ្នាំ២០២៤នេះ បានចុះអនុស្សារណៈយល់យោគគ្នា ស្តីពីកិច្ចសហប្រតិបត្តិការជំរុញនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់ ដើម្បីជំរុញកិច្ចសហប្រតិបត្តិការឱ្យកាន់តែជិតស្និទ្ធ ព្រមទាំងលើកកម្ពស់នវានុវត្តន៍ហិរញ្ញវត្ថុ និងការទូទាត់ឆ្លងដែនប្រកបដោយប្រសិទ្ធភាព និងសុវត្ថិភាពបន្ថែមទៀត ដើម្បីផ្ដល់ជាប្រយោជន៍ដល់ប្រជាពលរដ្ឋ និងធុរជនរបស់ប្រទេសទាំងពីរ។
លោក Arwar Ibrahim នាយករដ្ឋមន្ត្រីនៃប្រទេសម៉ាឡេស៊ី និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងដំណើរទស្សនកិច្ចផ្លូវការរបស់សម្ដេចនៅប្រទេសម៉ាឡេស៊ីធ្វើជាអធិបតីក្នុងពិធីនេះ។យោងតាមសេចក្តីប្រកាសព័ត៌មានរបស់ធនាគារជាតិបានគូសបញ្ជាក់ថា «ការណ៍នេះនឹងផ្តល់នូវភាពងាយស្រួលដល់ប្រជាពលរដ្ឋម៉ាឡេស៊ី អាចធ្វើការទូទាត់ដោយស្កេន QR Code នៅក្នុងប្រទេសកម្ពុជា ហើយប្រជាពលរដ្ឋកម្ពុជាក៏អាចធ្វើការទូទាត់ដោយស្កេន QR Code នៅក្នុងប្រទេសម៉ាឡេស៊ីទៅវិញទៅមកផងដែរ ដោយប្រើប្រាស់រូបិយវត្ថុក្នុងស្រុកសម្រាប់ការទូទាត់ ព្រមទាំងបានជួយគាំទ្រដល់យន្តការកិច្ចសហការត្រួតពិនិត្យការទូទាត់ឆ្លងដែន ដើម្បីឱ្យកាន់តែមានប្រសិទ្ធភាព និងសុវត្ថិភាព។ អនុស្សរណៈយោគយល់នេះ នឹងជួយសម្រួលដល់សកម្មភាពពាណិជ្ជកម្ម និងវិស័យទេសចរណ៍របស់ប្រទេសទាំងពីរ ព្រមទាំងជួយទ្រទ្រង់ដល់កំណើនសេដ្ឋកិច្ចក្នុងតំបន់»។
ពាណិជ្ជករទូទាត់រាយនៃប្រទេសទាំងពីរ ដែលទទួលយកការទូទាត់តាម QR Code ប្រមាណ៥ លានទីតាំង រាប់បញ្ចូលទាំងអាជីវកម្មខ្នាតតូចផងដែរ នឹងទទួលបាននូវអត្ថប្រយោជន៍ពីកិច្ចសហប្រតិបត្តិការនេះ។
អនុស្សារណៈយល់យោគគ្នានេះ ជាជំហានថ្មីមួយក្នុងគំនិតផ្តួចផ្តើមតភ្ជាប់ប្រព័ន្ធទូទាត់ក្នុងតំបន់អាស៊ាន ដែលស្របទៅនឹងទិសដៅយុទ្ធសាស្ត្ររបស់ប្រទេស G20 ក្នុងការលើកកម្ពស់ប្រសិទ្ធភាពនៃការទូទាត់ឆ្លងដែន។
សូមបញ្ជាក់ថាក្នុងដំណើរទស្សនកិច្ចជាផ្លូវការនៅប្រទេសម៉ាឡេស៊ីនៅថ្ងៃទី២៧ ខែកុម្ភៈ ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក អាន់វ៉ា អ៉ីប្រាហ៉ីម នាយករដ្ឋមន្ត្រីម៉ាឡេស៊ី បានធ្វើសេចក្តីថ្លែងការណ៍រួមគ្នា បង្ហាញពីជំហរនយោបាយនៃការធ្វើទំនាក់ទំនង កិច្ចសហប្រតិបត្តិការផ្នែកនយោបាយ និងសេដ្ឋកិច្ចរវាងប្រទេសទាំងពីរ។
សម្តេចធិបតី ហ៊ុន ម៉ាណែត បានគូសរំលេចថា ឆ្នាំនេះគឺជាខួបលើកទី៦៧ នៃទំនាក់ទំនងរវាងប្រទេសទាំងពីរ ហើយក្នុងរយៈពេលប៉ុន្មានឆ្នាំមកនេះ ទំនាក់ទំនងនេះបានកើនឡើងដល់កម្រិតថ្មីនៅក្នុងលក្ខខណ្ឌនៃទំនាក់ទំនងសេដ្ឋកិច្ច អន្តរកម្មកម្រិតខ្ពស់ ការផ្លាស់ប្តូររវាងប្រជាជន និងប្រជាជន និងការពង្រឹងទំនាក់ទំនងលើវិស័យការពារជាតិ។សម្តេចធិបតី បានសម្តែងការដឹងគុណយ៉ាងជ្រាលជ្រៅចំពោះប្រទេសម៉ាឡេស៊ី សម្រាប់ការគាំទ្រ និងការចូលរួមនៅក្នុងវិស័យចម្រុះ ព្រមទាំងការយកចិត្តទុកដាក់ និងការសម្របសម្រួលដ៏ល្អ ជូនពលករកម្ពុជារស់នៅក្នុងប្រទេសម៉ាឡេស៊ី។
សម្តេចធិបតី បានសង្កត់ធ្ងន់ថា កម្ពុជាតែងតែរក្សាក្នុងក្រអៅបេះដូងនូវការរួមចំណែកដ៏មានតម្លៃរបស់កងរក្សាសន្តិភាពម៉ាឡេស៊ី ចំពោះប្រទេសកម្ពុជា ក្នុងអំឡុងដំណើរការសន្តិភាពរបស់នៅដើមទសវត្សរ៍ឆ្នាំ១៩៩០។ សម្តេចនាយករដ្ឋមន្ត្រី បានលើកឡើងដែរថា ដំណើរទស្សនកិច្ចផ្លូវការរបស់លោក អាន់វ៉ា ទៅប្រទេសកម្ពុជាកាលពីខែមីនា ឆ្នាំ២០២៣ ហើយដំណើរទស្សនកិច្ចរបស់សម្តេចនៅថ្ងៃនេះ បង្ហាញពីកិច្ចសហប្រតិបត្តិការជិតស្និទ្ធរវាងប្រទេសយើងទាំងពីរ។សម្តេចធិបតី ហ៊ុន ម៉ាណែត បានគូសបញ្ជាក់ថា តាមរយៈដំណើរទស្សនកិច្ច និងជំនួបពិភាក្សានេះ បានដាក់ចេញនូវយុទ្ធសាស្ត្រថ្មី ដើម្បីពង្រឹងទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ លើវិស័យចាំបាច់ដូចខាងក្រោម៖
ទី១៖ លើផ្នែកនយោបាយ៖ សម្តេចធិបតី បានធានាចំពោះមុខលោកនាយករដ្ឋមន្ត្រី អាន់វ៉ា នូវការបន្តវិធីសាស្ត្រវិជ្ជមាន និងបរិយាបន្នរបស់កម្ពុជា ចំពោះសហគមន៍ឥស្លាម។ កម្ពុជាស្វាគមន៍ចំពោះការសម្រេចចិត្តរបស់ម៉ាឡេស៊ីក្នុងការធ្វើជាម្ចាស់ផ្ទះ និងចាប់ផ្តើមការពិភាក្សាលើគណៈកម្មាការរួមរបស់ប្រទេសទាំងពីរសម្រាប់កិច្ចសហប្រតិបត្តិការទ្វេភាគី ដែលសង្ឃឹមថានឹងប្រព្រឹត្តទៅក្នុងពេលឆាប់ៗនេះមុនពាក់កណ្តាលឆ្នាំនេះ ដើម្បីចាប់ផ្តើមដំណើរការនៃការចូលរួមក្នុងវិស័យផ្សេងទៀត។ទី២៖ លើផ្នែកសេដ្ឋកិច្ច៖ សម្តេចធិបតី បានបញ្ជាក់ថា ពាណិជ្ជកម្មទ្វេភាគី ប្រទេសទាំងពីរ បានបង្ហាញឱ្យឃើញនូវនិន្នាការកើនឡើង ហើយនៅតែមានសក្ដានុពលដែលមិនទាន់បានប្រើប្រាស់ ក្នុងការពង្រឹងភាពជាដៃគូសេដ្ឋកិច្ចបន្ថែមទៀត។ សម្តេចធិបតី បានលើកឡើងផងដែរថា សម្តេច និងលោកនាយករដ្ឋមន្ត្រីម៉ាឡេស៊ី បានគូសបញ្ជាក់ពីតួនាទីដ៏សំខាន់របស់វិស័យឯកជនប្រទេសទាំងពីរ ក្នុងការជំរុញកិច្ចសហប្រតិបត្តិការសេដ្ឋកិច្ច និងគំនិតផ្តួចផ្តើមអភិវឌ្ឍន៍ថ្មីៗបន្ថែមទៀត។ សម្តេច និងលោកនាយករដ្ឋមន្ត្រី បានពិភាក្សាអំពីលទ្ធភាពនៃកិច្ចសហប្រតិបត្តិការបន្ថែមទៀតលើវិស័យទេសចរណ៍ និងការសម្រួលការហោះហើរត្រង់បន្ថែម ដូចដែលលោកនាយករដ្ឋមន្ត្រី អាន់វ៉ា បានលើកឡើងមុននេះ ជាពិសេសសម្រាប់គោលដៅបន្ថែមទៀតរវាងប្រទេសទាំងពីរ ដើម្បីសម្រួលដល់ការធ្វើដំណើររវាងប្រជាជនទាំងពីរ ក៏ដូចជាភ្ញៀវទេសចរមកពីប្រទេសទីបី មកកម្សាន្តនៅប្រទេសទាំងពីរ។
កិច្ចសហប្រតិបត្តិការលើវិស័យការពារជាតិ និងសន្តិសុខ៖ បញ្ហានេះ សម្តេច និងលោកនាយករដ្ឋមន្ត្រីម៉ាឡេស៊ី បានបញ្ជាក់ឡើងវិញនូវការប្តេជ្ញាចិត្តក្នុងការពង្រឹងកិច្ចសហប្រតិបត្តិការយោធា និងរក្សាកិច្ចសហការប្រកបដោយនិរន្តរភាព រួមទាំងការផ្លាស់ប្តូរព័ត៌មាន និងដោះស្រាយបញ្ហាប្រឈមក្នុងតំបន់ដែលបង្កឡើងដោយការបោកប្រាស់តាមអ៊ីនធឺណិត។ ចំពោះវិស័យថាមពល កម្ពុជាបានកោតសរសើរចំពោះគោលការណ៍របស់ម៉ាឡេស៊ីចំពោះការជួយសម្រួលដល់ឡាវ-កម្ពុជា-សិង្ហបុរី លើថាមពលក្រោមសមុទ្រ គម្រោងខ្សែបញ្ជូនឆ្លងកាត់តំបន់ឆ្នេរ។ លើសពីនេះ កម្ពុជាបានស្នើម៉ាឡេស៊ីឱ្យពិចារណាលើការចូលរួមក្នុងគម្រោងខ្សែបញ្ជូនថាមពលអគ្គិសនីលើសមុទ្រ និងក្រោមសមុទ្រ រវាងកម្ពុជា ម៉ាឡេស៊ី និងសិង្ហបុរី សម្រាប់សន្តិសុខថាមពលក្នុងតំបន់។
