វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1990 នាក់
ម្សិលមិញ 6677 នាក់
សរុប 14149566 នាក់
ប៉ាគីស្ថាន៖ក្រុមអ្នកតវ៉ាបានមកប្រមូលផ្តុំគ្នាដោយនាំគ្នាអង្គុយនៅឯទីកន្លែងជួបជុំមួយកន្លែងនៅក្នុងទីប្រជុំជនខេតា (Quetta) ខេត្តបាឡូជីស្តង់ (Balochistan) នាថ្ងៃពុធទី១៤កុម្ភៈ ដើម្បីប្រឆាំងនឹងលទ្ធផលបោះឆ្នោត ។ទាំងបុគ្គលិកកម្មករ និងអ្នកគាំទ្រគណបក្សនយោបាយផ្សេងៗគ្នាបានបិទផ្លូវជាតិសំខាន់ៗទាំងអស់ដែលតភ្ជាប់ទៅកាន់ទីក្រុងបាឡូជីស្តង់ ជាមួយបណ្តាខេត្តផ្សេងៗទៀត ដើម្បីតវ៉ាជុំវិញអ្វីដែលពលរដ្ឋទាំងនោះនិយាយថា ជាការក្លែងបន្លំសន្លឹកឆ្នោត។
សមាជិកមួយចំនួនមកពីគណបក្សជាតិនិយមនៃអំបូរភាគតិចបាឡុច (Baloch), ប៉ាស្ធុន (Pashtun) និងហាហ្សារ៉ា (Hazara) នៅក្នុងខេត្តខាងលើ បាននាំគ្នាចេញមកតវ៉ានៅមុខការិយាល័យរបស់មន្ត្រីរៀបចំការបោះឆ្នោតថ្នាក់ស្រុក។នៅថ្ងៃអង្គារទី១៣កុម្ភៈ នៅតាមបណ្តាហាង និងសេវាដឹកជញ្ជូនសាធារណៈនានានៅក្នុងទីប្រជុំជនខេតា (Quetta) បានផ្អាកដំណើរការជាបណ្តោះអាសន្ន បន្ទាប់ពីគណបក្សនយោបាយក្នុងស្រុកអំពាវនាវឱ្យបិទទីក្រុងមួយរយៈពេល ។ ប្រទេសប៉ាគីស្ថានបានរៀបចំការបោះឆ្នោតថ្នាក់ជាតិ និងថ្នាក់ខេត្តកាលពីថ្ងៃទី ៨ ខែកុម្ភៈ ប៉ុន្តែការបោះឆ្នោតនេះ ត្រូវរំខានដោយការចោទប្រកាន់ថាមានការបោកប្រាស់ក្លែងបន្លំ ដើម្បីបំផ្លាញបេក្ខជនឯករាជ្យដែលគាំទ្រដោយអតីតនាយករដ្ឋមន្ត្រី លោក អ៊ីមរ៉ាន ខាន់ (Imran Khan) ដែលកំពុងជាប់ពន្ធនាគារ។
តែ រដ្ឋាភិបាលចាំផ្ទះ និងគណៈកម្មាធិការរៀបចំការបោះឆ្នោតប៉ាគីស្ថាន បានច្រានចោលការចោទប្រកាន់នេះ ហើយនៅតែអះអាងថា ប៉ាគីស្ថានមានច្បាប់ទម្លាប់ និងប្រព័ន្ធត្រឹមត្រូវ ដើម្បីស៊ើបអង្កេតការតវ៉ាដែលចំគោលដៅ ។ដោយឡែកអ្នកគាំទ្រគណបក្សតំបន់អំបូរភាគតិច មូថាហ៊ីដា ក្វាមី មូវមិន (Muttahida Qaumi Movement) ហៅកាត់ថា MQM ក្នុងប្រទេសប៉ាគីស្ថានបានចូលរួមពិធីអបអរសាទរ កាលពីដើមសប្តាហ៍នេះ បន្ទាប់ពីគណបក្សទទួលបានអាសនៈនៅក្នុងការបោះឆ្នោតជាតិកាលពីសប្តាហ៍មុន ។សមាជិកប្រហែល ២០០ នាក់មកពីគណបក្ស MQM បាននាំគ្នាគ្រវីទង់ជាតិ និងអបអរសាទរអំឡុងថ្នាក់មេដឹកនាំរបស់ពួកគេថ្លែងសុន្ទរកថានៅក្នុងទីក្រុងការ៉ាជី។
លទ្ធផលចុងក្រោយបំផុតនៃការបោះឆ្នោតជាតិរបស់ប្រទេសប៉ាគីស្ថាន ធ្វើឱ្យបេក្ខភាពឯករាជ្យគាំទ្រដោយអតីតនាយករដ្ឋមន្ត្រីកំពុងជាប់ពន្ធនាគារ លោក អ៊ីមរ៉ាន ខាន់ (Imran Khan) បាននាំមុខជាមួយនឹងអាសនៈចំនួន ៩៣ នៅក្នុងចំណោម ២៦៤ អាសនៈ។ឯគណបក្សរបស់អតីតនាយករដ្ឋមន្ត្រីមួយរូបផ្សេងទៀត គឺលោក ណាវ៉ាស សារីហ្វ (Nawaz Sharif) ស្ថិតនៅលំដាប់ទីពីរដោយទទួលបាន ៧៥ អាសនៈ បន្ទាប់ពីការបោះឆ្នោតជាតិកាលពីថ្ងៃព្រហស្បតិ៍សប្តាហ៍មុន ប៉ុន្តែនៅខ្វះសំឡេងភាគច្រើន ខណៈគណបក្សរបស់លោកសារីហ្វ ជាគណបក្សតែមួយដ៏ធំបំផុតនៅក្នុងសភា ស្របពេលបេក្ខភាពឯករាជ្យគាំទ្រដោយលោកខាន់ ស្ថិតនៅក្នុងសភាជាទម្រង់បុគ្គល ។
រហូតមកដល់ពេលនេះ កិច្ចពិភាក្សាសម្ព័ន្ធភាពចម្រុះកំពុងតែប្រព្រឹត្តិទៅ ប៉ុន្តែគេនៅមិនដឹងច្បាស់នោះទេ ថាតើនរណាជាអ្នកបង្កើតរដ្ឋាភិបាល ។ ក្នុងពេលដំណាលគ្នានេះ អ្នកនាំពាក្យរបស់គណបក្សលោកសារីហ្វ (Sharif) បាននិយាយថា បានជួបគ្នាជាមួយតំណាងរបស់គណបក្ស MQM ហើយពួកគេបានយល់ព្រមគ្នា "ជាគោលការណ៍ធ្វើការរួមគ្នាដើម្បីផលប្រយោជន៍របស់ប្រទេសជាតិជាធំ" ។ទោះបីយ៉ាងណា គណបក្សសម្ព័ន្ធមូស្លីម-ណាវ៉ាស (PML-N) និងគណបក្សប្រជាជនប៉ាគីស្ថាន (PPP) កាលពីថ្ងៃទី 11 ខែកុម្ភៈ បានចាប់ផ្តើមការពិភាក្សាជាផ្លូវការដើម្បីបង្កើតរដ្ឋាភិបាលដោយមានការគាំទ្រពីសម្ព័ន្ធមិត្ត។ នៅក្នុងបរិបទនៃការសន្ទនាដែលកំពុងបន្តជាមួយ PPP ប្រធានគណបក្ស PML-N លោក Shehbaz Sharif បានទាក់ទងប្រធានគណបក្ស Jamiat Ulema-e-Islam-F (JUI-F) Maulana Fazlur Rehman ដើម្បីជូនដំណឹងអំពីកិច្ចប្រជុំជាមួយ PPP ក្នុងពេលជាមួយគ្នានោះគាត់បានអំពាវនាវឱ្យមានការគាំទ្រការបង្កើតរដ្ឋាភិបាលចម្រុះ។
គណបក្សPML-N ក៏បានរៀបចំកិច្ចប្រជុំជាមួយគណបក្ស Muttahida Qaumi Movement (MQM) នៅក្នុងទីក្រុង Lahore និងកិច្ចប្រជុំជាមួយគណបក្ស PML-Q នៅថ្ងៃទី 12 ខែកុម្ភៈ នៅក្នុងរដ្ឋធានី Islamabad។សកម្មភាពជាបន្តបន្ទាប់ខាងលើបានធ្វើឡើងបន្ទាប់ពីលទ្ធផលបោះឆ្នោតត្រូវបានប្រកាសបង្ហាញថា បេក្ខជនឯករាជ្យទទួលបាន ១០១ អាសនៈ គណបក្ស PML-N របស់អតីតនាយករដ្ឋមន្ត្រី Nawaz Sharif មាន ៧៥ អាសនៈ និងគណបក្ស PPP របស់អតីតរដ្ឋមន្ត្រីការបរទេស Bilawal Bhutto មាន ៧៥ អាសនៈ Zardari កាន់កាប់ ៥៤ អាសនៈ។ គណបក្ស MQM គ្រប់គ្រង ១៧ អាសនៈ គណបក្ស JUI-F ទទួលបាន ៤ អាសនៈ៕(អតីតនាយករដ្ឋមន្ត្រីលោក អ៊ីមរ៉ាន ខាន់ (Imran Khan) ដែលត្រុវបានសផាបោះឆ្នោតទម្លាក់និងកំពុងត្រូវឃុំខ្លន)