វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 533 នាក់
ម្សិលមិញ 5378 នាក់
សរុប 14079826 នាក់
ថៃ៖ កាលពីថ្ងៃពុធ ទី២៤មិថុនា ក្រុមសកម្មជនប្រជាធិបតេយ្យមួយក្រុម ប្រមាណជាង១០០នាក់ បានជួបជុំគ្នានៅក្បែរវិមានរដ្ឋសភាថៃ ដើម្បីរំលឹកខួបនៃការដួលរលំ របបរាជានិយមផ្តាច់ការថៃ ថ្ងៃទី២៤ មិថុនា ឆ្នាំ១៩៣២។ មនុស្ស បានមកជួបជុំគ្នា នៅទីលានមួយក្បែរវិមានរដ្ឋសភាថៃ អ្នកខ្លះមានកាន់បដា ដែលមានសរសេរថា “ត្រូវតែរំលាយរដ្ឋធម្មនុញ្ញដែលការពាររបបយោធា”។
បដាខ្លះសរសេរថា “ប្រទេសនេះ ជារបស់ប្រជាពលរដ្ឋថៃទាំងអស់”។ ចំណែកនៅព្រឹកព្រលឹមស្រាងៗ មានសកម្មជនប្រជាធិបតេយ្យមួយក្រុមទៀត បានជួបជុំគ្នា នៅក្បែរវិមានប្រជាធិបតេយ្យថៃ ដែលស្ថិតនៅមិនឆ្ងាយប៉ុន្មាន ពីទីតាំងស្តូបនិម្មិតរូប រំលឹកការដួលរលំនូវរបបរាជានិយមផ្តាច់ការ។
សកម្មជនម្នាក់ឈ្មោះ Pachanee Kamnak បានថ្លែងប្រាប់អ្នកកាសែតថា៖ "រដ្ឋាភិបាលបច្ចុប្បន្ននេះ កំពុងតែព្យាយាមកាត់បន្ថយសិទ្ធិអំណាចរបស់ប្រជាពលរដ្ឋ"។
ស្ត្រីសកម្មជនម្នាក់ បានលើកឡើងថា៖ "រដ្ឋធម្មនុញ្ញ ត្រូវតែត្រូវបានតាក់តែងឡើងដោយប្រជាពលរដ្ឋ និងដើម្បីបំរើប្រយោជន៍ប្រជាពលរដ្ឋ មិនមែនដើម្បីការពារអំណាច របស់ក្រុមបក្សពួកណាមួយឡើយ"។ សំដីរបស់ស្ត្រីរូបនេះ គឺបានសំដៅទៅដល់ ការធ្វើកំណែទម្រង់រដ្ឋធម្មនុញ្ញ នៅឆ្នាំ២០១៧ ធ្វើឡើងដោយរបបសិកថៃ ដឹកនាំដោយលោក ប្រាយុទ្ធ ចានអូចា។
គួរកត់សំគាល់ថា ថ្វីបើថៃមានរបបរាជានិយមអាស្រ័យរដ្ឋធម្មនុញ្ញមែន ក៏ប៉ុន្តែស្ថាប័នព្រះមហាក្សត្រថៃ នៅតែរក្សាអានុភាពអំណាចដ៏ធំ នៅក្នុងវិស័យនយោបាយ និងកងទ័ព។ ជាងនេះទៀត កងទ័ពថៃ ក្រោមការដឹកនាំរបស់បក្សពួក លោកប្រាយុទ្ធ ចាន់អូចា បានបង្កើនឥទ្ធិពលកាន់តែខ្លាំង ក្នុងការក្តោបក្តាប់អំណាច និងការពាររាជបាល្ល័ង្គ។
នៅថៃ ទោសប្រមាថព្រះជេស្តា ព្រះមហាក្សត្រ និងគ្រួសាររាជវង្ស អាចប្រឈមនឹងទោសជាប់ពន្ធនាគារ រយៈពេល១៥ឆ្នាំ។ តែលោកប្រាយុទ្ធ ចាន់អូចា បានអះអាងថា ព្រះមហាក្សត្រថ្មី បានសំណូមពរ ឲ្យរដ្ឋាភិបាលឈប់អនុវត្តច្បាប់នេះ ទៅលើប្រជាពលរដ្ឋ។ ក៏ប៉ុន្តែក្រុមសកម្មជនសិទ្ធិមនុស្សនៅថៃ បានលើកឡើងថា ថ្វីបើគេឈប់ប្រើច្បាប់នេះមែន តែគេបានបង្កើតច្បាប់ថ្មី គឺច្បាប់គ្រប់គ្រងបទល្មើសតាមបណ្តាញអ៊ីនធ័រណិត។