មេគយកម្ពុជាចេញមុខការពារការអនុញ្ញាតឲ្យនាំចូលសាច់បង្កកមកកម្ពុជា
03-April-2024 / ព័ត៌មានជាតិ
ភ្នំពេញ៖ លោក គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នៅក្នុងសន្និសីទកាសែតថ្ងៃទី២៥ ខែធ្នូ ឆ្នាំ២០២៣នៅសាលាជាតិគយ បានថ្លែងថា រាជរដ្ឋាភិបាលកំពុងរៀបចំកែសម្រួលលក្ខខណ្ឌមួយចំនួន ក្នុងការអនុញ្ញាតឲ្យនាំចូលសាច់បង្កក ដើម្បីពង្រឹងអំពីគុណភាពសាច់ និងជៀសវាងអ្នកណាក៏អាចសុំនាំចូលសាច់បង្កកបាន!។ 
ក្នុងសន្និសីទសារព័ត៌មាន ក្រោយបញ្ចប់វេទិកាផ្សព្វផ្សាយវិធានការ សម្រួលពាណិជ្ជកម្មក្រោមដែនសមត្ថកិច្ចគយ។ បណ្ឌិត គុណ ញឹម បានបញ្ជាក់យ៉ាងដូច្នេះថា «សម្រាប់វិធានការចំពោះមុខ អគ្គនាយកដ្ឋានគយ និងកម្ពុជា នឹងបន្ដធ្វើការងារនៅក្នុងការបង្ក្រាប ការនាំចូលសាច់ ដែលខូចគុណភាព និងខុសច្បាប់ [...] យើងស្នើទៅរាជរដ្ឋាភិបាល ក្នុងការកំណត់ អ្នកដែលអាចមានសិទ្ធិនាំចូលសាច់បង្កក ត្រូវតែមានឃ្លាំងត្រជាក់, អាជីវកម្មច្បាស់លាស់ ដើម្បីជៀសវាងអ្នកណា ក៏អាចសុំនាំចូលសាច់បង្កកបាន»។
លោកអគ្គនាយកគយដែលមានអាយុចូលនីវត្តន៍តែត្រូវបានរាជរដ្ឋាភិបាលអាណត្តិទី៧រក្សាទុកតាមកាណែនាំរបស់អតីតនាយករដ្ឋមន្ត្រីអាណត្តិទី៦បានបានឲ្យដឹងថាស្ថាបន័គយជាអ្នកអនុញ្ញាតឲ្យនាំចូលសាច់បង្កក។លោកគុណញឹមឡើងថា ក្នុងរយៈពេលចុងក្រោយនេះ មានសកម្មភាពផ្សព្វផ្សាយ នៅក្នុងបណ្ដាញសង្គមជាច្រើន ពាក់ព័ន្ធនឹងការចុះទៅត្រួតពិនិត្យឃ្លាំងសាច់បង្កក។លោកថា អនុក្រឹត្យ១៧ បច្ចុប្បន្នដែលនៅជាធរមាននេះ ការនាំចេញចូលសាច់បង្កក មិនតម្រូវឲ្យសុំលិខិតអនុញ្ញាត ពីក្រសួងកសិកម្ម រុក្ខាប្រមាញ់ និងនេសាទទេ។ អនុក្រឹត្យ១៧ ចែងច្បាស់ថា សាច់បង្កក់នាំចូល គឺតម្រូវឲ្យមានវិញ្ញាបនបត្រសុខភាពសត្វ ដែលចេញឲ្យដោយប្រទេសនាំចេញ។ ដូច្នេះនៅពេលខាងមុខ អ្នកនាំចូលសាច់បង្កក ត្រូវតែមានលិខិតអនុញ្ញាត ចេញដោយក្រសួងកសិកម្ម ហើយច្រកអន្តរជាតិដែលនាំចូលសាច់បង្កក ក៏ត្រូវកំណត់ឱ្យបានច្បាស់លាស់ផងដែរ។
ពាក់ព័ន្ធនឹងការនាំចូលសាច់បង្កកនេះ លោកបណ្ឌិត គុណ ញឹម បានពន្យល់ថា អ្នកចិញ្ចឹមសាច់ គិតគូរអំពីអាជីវកម្មរបស់គាត់ ប៉ុន្ដែរាជរដ្ឋាភិបាលគិតគូរ មិនមែនតែអ្នកចិញ្ចឹមសាច់នោះទេ រាជរដ្ឋាភិបាល ត្រូវគិតគូរពីអ្នកហូបសាច់ផងដែរ?។ បើចិញ្ចឹមសត្វមិនគ្រប់ វាត្រូវតែនាំចូលដើម្បីមកបង្គ្រប់ទីផ្សារ កុំឲ្យអតិផរណាសាច់ ឬសាច់ឡើងថ្លៃ។បើតាមប្រសាសន៍លោកគុណញឹមមានន័យថាអ្នកចិញ្ចឹមសត្វក្នុងស្រុកគ្មានលទ្ធភាពនិងសមត្តភាពសម្រាប់ផ្គត់ផ្គង់ទីផ្សារសាច់ក្នុងស្រុកខ្មែរទេ?.។
ទាក់ទងការម្រេចឲ្យនាំចូលសាច់ដោយខាងក្រសួងពាណិជ្ចកម្មនិងកសិកម្មមិនចាំបាច់ដឹងដោយផ្អែកាតមអុនុក្រឹត្យលេខ១៧លោកគុណញឹមគូសបញ្ជាក់ថា ការធ្វើពាណិជ្ជកម្មអន្ដរជាតិ គឺវាស្ថិតនូវក្នុងវិធានដែលមានចែង នៅក្នុងអង្គការពាណិជ្ជកម្មពិភពលោក ដូច្នេះអ្នកនាំចូលសាច់ បើគោរពអនុលោមភាព គឺមានសិទ្ធិនាំចូល មកចែកចាយ។លោកបន្ដទៀតថា ការនាំចូលសាច់បង្កក គឺមានការនាំចូលពីប្រទេសអូស្ដ្រាលី, អាមេរិក, រុស្សី, ប្រេស៊ីល, ជប៉ុន ជាពិសេសប្រទេសឥណ្ឌា។ កម្ពុជា មិនមែនមានតែផ្សារនោះទេ គឺមានសណ្ឋាគារផ្កាយ ៥, ភោជនីយដ្ឋានលំដាប់ខ្ពស់ ដែលត្រូវផ្គត់ផ្គង់សាច់គុណភាពកម្ពស់ខ្ពស់ដល់ភ្ញៀវ។ ដូច្នេះវិធានការពាក់ព័ន្ធនឹងសាច់បង្កក ត្រូវគិតគូរសាជាថ្មី ពីព្រោះថា ត្រូវពង្រឹងការគ្រប់គ្រង ហើយសម្រាប់អគ្គនាយកដ្ឋានគយ និងរដ្ឋាករកម្ពុជា កន្លងមកបានបង្ក្រាប ការនាំចូលសាច់បង្កកខូចគុណភាពជាច្រើនករណី ព្រោះមានជនខិលខូច នាំចូលសាច់បង្កកតាមច្រករបៀង។
សូមបញ្ជាក់ថាសាច់គោបង្កកខូចគុណភាព១,៥០០គីឡូក្រាម សាច់ក្របី និងគ្រឿងក្នុង ពុំមានឯកសារបញ្ជាក់អំពីប្រភពច្បាស់លាស់ចំនួន១២,៦០០គីឡូក្រាម ត្រូវបានមន្ត្រីអគ្គនាយកដ្ឋាន ក.ប.ប រកឃើញបន្ទាប់ពីចុះត្រួតពិនិត្យទីតាំងស្តុកសាច់បង្កកចំនួន២ទីតាំង ស្ថិតក្នុងខណ្ឌឬស្សីកែវ រាជធានីភ្នំពេញ កាលពីថ្ងៃទី២១ ខែវិច្ឆិកា ឆ្នាំ២០២៣ សរុបប្រមាណ៧៦តោន ដែលសាច់ខ្លះនាំចូលពីប្រទេសឥណ្ឌា ។
ផលិតផលខាងលើនេះ ត្រូវបានមន្ត្រីជំនាញអនុវត្តនីតិវិធីកិបសៀល លើទូរបង្កកសាច់ទាំងនោះ ជាបណ្តោះអាសន្ន ដោយទុករយៈពេល១សប្ហាហ៍ ឱ្យម្ចាស់ទីតាំងរកឯកសារមកបញ្ជាក់ចំពោះមន្ត្រីជំនាញ ។
ដោយឡែកមួយករណីយ៍ទៀតដោយមានការសម្របសម្រួលនីតិវិធី ពីលោក ម៉ុត ដារ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានសហការជាមួយការិយាល័យផលិតកម្ម និងបសុព្យាបាលរាជធានីភ្នំពេញ ចុះត្រួតពិនិត្យទីតាំងស្តុកសាច់សត្វបង្កកមួយកន្លែងនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ និងរកឃើញសាច់បង្កក នាំចូលពីបរទេសដោយគ្មានច្បាប់ដ៏ច្រើនសម្បើម គឺជិត ៤០០ តោន។
ការចុះត្រួតពិនិត្យ បានកើតឡើងកាលពីថ្ងៃទី០៤ ខែធ្នូ ឆ្នាំ២០២៣ ហើយជាលទ្ធផល ក្រុមការងារបានរកឃើញ សាច់បង្កក គ្មានឯកសារច្បាប់ ក្នុងនោះមាន គ្រឿងមាន់ សាច់មាន់ សាច់ជ្រូក និងក្របី សរុបទ ២ ម៉ឺន ៤ ពាន់ ៤២៤ កេះ ស្មើ ៣ សែន ៧ ម៉ឺន និង ៧៨៧ គីឡូក្រាម ពោលគឺជិត ៤០០ តោន ដែលត្រូវបាននាំចូលពីបរទេស មកស្តុកទុកនៅក្នុងឃ្លាំង ដោយពុំទាន់មានឯកសារ ហើយក្រុមការងារ បានស្នើសុំព្រះរាជអាជ្ញា បិទឃ្លាំងបង្កកសាច់សត្វខាងលនេះ ជាបណ្ដោះអាសន្ន ដោយតម្រូវឱ្យម្ចាស់ទីតាំងរកឯកសារពាក់ព័ន្ធទៅបំភ្លឺនៅអគ្គនាយកដ្ឋានសុខភាពសត្វ និងផលិតកម្មសត្វ ។ នេះបើតាមលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុខព្យាបាល ដែលជាអ្នកដឹកនាំដោយផ្ទាល់នូវប្រតិបត្តិការឆែកឆេរខាងលើ ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានសាទរយ៉ាងក្លៀវក្លាចំពោះលទ្ធផលដ៏ច្រើនសម្បើមនេះ ដោយលើកឡើងថា « សមាគមអ្នកចិញ្ចឹមសត្វកម្ពុជា តំណាងឱ្យកសិករចិញ្ចឹមសត្វទាំងអស់ ក៏ដូចជាប្រជាពលរដ្ឋទូទាំងប្រទេស សូមថ្លែងអំណរគុណ និងកោតសរសើរចំពោះ អគ្គនាយកដ្ឋានសុខភាពសត្វ និងផលិតកម្មសត្វ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងស្ថាប័នពាក់ព័ន្ធទាំងអស់ ជាពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចបានណែនាំឱ្យឆែកឆេររកផលិតផលណាដែលមានផ្ទុកសារធាតុអាចទទួលយកបាន និងត្រូវកម្ទេចចោល ដែលនេះគឺជាការជួយសង្គ្រោះអាយុជីវិតវិស័យចិញ្ចឹមសត្វក្នុងស្រុកដែលកំពុងត្រដរខ្យល់ជាយូរមកហើយ ក៏ដូចជាសុខភាពសាធារណៈ » ។
លោក ស្រ៊ុន ពៅ លើកឡើងថា ប្រមាណជាជិត ២ ឆ្នាំចុងក្រោយនេះ សាច់បង្កកខុសច្បាប់ ដែលជាសាច់ខូចគុណភាព ហួសកាលរបរិច្ឆឆេទបរិភោគ ឬជាសាច់សត្វដែលគេរកឃើញមានជំងឺដែលត្រូវគេកម្ទេចចោល បែរជាត្រូវបានជនមិនសុច្ចរិតប៉ុន្មាននាក់លួចលាក់នាំចូលយ៉ាងច្រើនសម្បើមធ្វើចរាចរយ៉ាងគគ្រឹកគគ្រេងនៅទូទាំងប្រទេសកម្ពុជា លក់ក្នុងតម្លៃថោកជាងថ្លៃដើមផលិតយ៉ាងឆ្ងាយ ធ្វើឱ្យវិស័យចិញ្ចឹមសត្វក្នុងស្រុកដួលរលំជាបន្តបន្ទាប់ ហើយក៏ត្រូវបានគេគិត និងបារម្ភដែរថា វាកំពុងគំរាមកំហែងយ៉ាងខ្លាំងចំពោះសុខភាពសាធារណៈ ។
តាមពិតទៅការចាប់សត្វរស់ សាច់សត្វ ស៊ុតសត្វ និងផលិតផលធ្វើពីសាច់សត្វ រួមទាំងសាច់បង្កកខុសច្បាប់ សាច់បង្កកខូចគុណភាព និងសាច់មានឆ្លងរោគជដើមនោះ ក្រុមការងារ អគ្គនាយកដ្ឋានសុខភាពសត្វ និងផលិតកម្មសត្វ សហការជាមួយស្ថាប័នពាក់ព័ន្ធ ក៏ដូចជាអគ្គនាយកដ្ឋាន ក.ប.ប នៃក្រសួងពាណិជ្ជកម្ម បង្ក្រាបបានជាបន្តបន្ទាប់ ។
