ស្នងការាជធានីឲ្យស្រាវជ្រាវចាប់ខ្លួនអ្នកបង្កគ្រោះថ្នាក់ចរាចរស្លាប់មនុស្សហើយគេចខ្លួន
21-September-2026 / សន្តិសុខសង្គម
ភ្នំពេញ៖លោក ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញបានបញ្ជាសមត្ថកិច្ចនគរបាលទាំង១៤ខណ្ឌ ស្រាវជ្រាវស្វែងរកចាប់ខ្លួនអ្នកបើករថយន្ត HUMMER ដែលគេចខ្លួនក្រោយបង្កគ្រោះថ្នា.ក់ចរាចរណ៍បុក អ្នកជិះម៉ូតូ១គ្រឿង បណ្តាលឱ្យមានបួសនិងស្លា.ប់ ស្ថិតក្នុងសង្កាត់ស្រះចក ខណ្ឌដូនពេញ ដើម្បីយកមកអនុវត្តច្បាប់ ។
សូមបញ្ជាក់ផងដែរថា ប្តីប្រពន្ធ និងកូនជិះម៉ូតូឌុបគ្នាចេញពីហូបស៊ុប ជួបគ្រោះអកុសល ត្រូវរថយន្តម៉ាក HUMMER ១គ្រឿង បើកបុ.កយ៉ាងពេញទំហឹង បណ្តាលឲ្យស្លា.ប់ប្រពន្ធ នៅកន្លែងកើតហេតុ រីឯប្តីនិងកូនរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យ តែដោយសាររបួសធ្ងន់ធ្ងរពេក ក៏បានស្លា.ប់បាត់បង់ជីវិតទាំង២នាក់ទៀត កាលពីវេលាម៉ោង១២និង១២នាទីរំលងអធ្រាត្រឈានចូលថ្ងៃទី២៥ ខែធ្នូ ឆ្នាំ២០២៣ នៅទល់មុខអាផាតមិន១កន្លែង ស្ថិតនៅលើកំណាត់វិថីព្រះស៊ីសុវត្ថិ សង្កាត់ស្រះចក ខណ្ឌដូនពេញ រាជធានីភ្នំពេញ ។
ដោយឡែកមានករណីគ្រោះថ្នាក់ចរាចរផ្សេងទៀតបង្កឲ្យមានបុរសជាឪពុកបានធ្លាក់ចូលទៅក្នុងប្រឡាយទឹកស្លាប់ភ្លាមៗ ចំណែកម្តាយ និងកូនតូចប្រុសស្រី៣នាក់ ទៀតបានរងរបួសធ្ងន់ស្រាល ខណៈប្តីឈប់ចតម៉ូតូកង់បីនៅលើចិញ្ចើមផ្លូវ ត្រូវរថយន្ត១គ្រឿង បុកពីក្រោយពេញទំហឹង ប៉ើងទៅបោកផ្ទប់នឹងបង្គោលភ្លើងបំភ្លឺផ្លូវបាក់មួយដើមកាលពីវេលាម៉ោង ៤:៣០នាទីព្រឹក ថ្ងៃទី២៥ ខែធ្នូ ឆ្នាំ២០២៣ នៅលើផ្លូវជាតិលេខ៤ ភូមិត្រពាំងទួល សង្កាត់កំបូល ខណ្ឌកំបូល រាជធានីភ្នំពេញ។ ជនរងគ្រោះមានឈ្មោះ មាស សុភ័ណ្ឌ អាយុ៣៥ឆ្នាំ ភេទប្រុស (ជាឪពុកស្លាប់) រស់នៅតាហេវក្រោម ឃុំកោងកាង ស្រុកពញ្ញាក្រែក ខេត្តត្បូងឃ្មុំ, ឈ្មោះ សុំ ស៊ីសារ៉ា អាយុ ៣៧ឆ្នាំ ភេទស្រី រស់នៅភូមិឃុំខាងលើ(ម្តាយរបួសស្រាល), ឈ្មោះ មាស សុភត្រា អាយុ ១១ឆ្នាំ ភេទប្រុស (របួសធ្ងន់), ឈ្មោះ មាស សុភក្រ័និត្យ អាយុ៣ខួប ភេទប្រុស(របួសស្រាល), ឈ្មោះ មាស សុភក្រ័ណានិមល អាយុ ១១ខែ ភេទស្រី(របួសស្រាល)។
មុនកើតហេតុក្រុមគ្រួសារជនរងគ្រោះ បានបើកម៉ូតូកង់បីមួយគ្រឿង មិនមានស្លាកលេខ មកឈប់ចតនៅលើចិញ្ចើមផ្លូវជាតិលេខ៤ ដោយនាំគ្នា១គ្រួសារ នៅក្នុងកង់បីនេះទាំងអស់។ រថយន្តម៉ាកស្តារិច ពណ៌សមួយគ្រឿង ពាក់ផ្លាកលេខ ភ្នំពេញ 2AA-1815 បើកដោយបុរសម្នាក់ តាមបណ្តោយផ្លូវជាតិលេខ៤ ទិសដៅពីកើតមកលិច ក្នុងល្បឿនយ៉ាងលឿន រេចង្កូតទៅខាងស្ដាំដៃ ជ្រុលទៅបុកពីក្រោយកង់បីនេះយ៉ាងពេញទំហឹង ប្លោងទៅមុខជាច្រើនម៉ែត្របោកផ្ទប់នឹងបង្គោលភ្លើងបាក់មួយដើម ។
លោកឧត្តមសេនីយ៍ឯក ជួន ណារិន្ទ ក៏បានកត់សម្គាល់ឃើញថា ប៉ុន្មានថ្ងៃនេះ កើតឡើងករណីគ្រោះថ្នាក់ចរាចរណ៍ បណ្ដាលឱ្យរបួស និងស្លាប់ បានកើតឡើងជាបន្តបន្ទាប់។ក្នុងករណីបើមានគ្រោះថ្នាក់ខាងលើនេះកើតឡើង បើមានអ្នកបង្កព្យាយាមរត់គេច មន្ត្រីជំនាញត្រូវស្រាវជ្រាវតាមឃាត់ចាប់យកមកអនុវត្តច្បាប់ឱ្យបានតឹងរឹងបំផុត ហើយក្នុងរយៈពេលចុងក្រោយនេះ សមត្ថកិច្ចជំនាញក៏បានអនុវត្តវិធានការណ៍តាមផ្លូវច្បាប់ចំពោះអ្នកបើកបររថយន្តបង្កឱ្យមានមនុស្សស្លាប់ ហើយរត់គេចខ្លួន ត្រូវបានសមត្ថកិច្ចជំនាញស្រាវជ្រាវចាប់ឃាត់ខ្លួនយកមកអនុវត្តច្បាប់ជាបន្តបន្ទាប់រួចមកហើយ។
សូមបញ្ជាក់ថាកាលពីថ្ងៃទី២៤ធ្នូតុលាការសម្រេចឃុំខ្លួន អ្នកបើករថយន្ដ Jeep ឈ្មោះ ព្រហ្ម វិចិត្រសុសក្ដា ដែលបើករថយន្តបុកជនរងគ្រោះណ្តាលឲ្យស្លាប់ នៅខណ្ឌទួលគោក។ នេះបើតាមដីកាបង្គាប់ឱ្យឃុំខ្លួនចេញដោយចៅក្រមស៉ើបសួរសាលាដំបូងរាជធានីភ្នំពេញ ហុង ម៉ារីណិច ។ជននេះត្រូវដាក់ឲ្យស្ថិតនៅក្រោមការពិនិត្យពីបទ៖ បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ច ដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្តាលឲ្ហស្លាប់អ្នកដទៃ និងបទរត់គេចខ្លួនប្រព្រឹត្តនៅចំណុចផ្លូវលេខ៣១៧ ប្រសព្វផ្លូវលេខ៥៦៦ សង្កាត់បឹងកក់ទី២ ខណ្ឌទួលគោក រាជធានីភ្នំពេញ កាលពីថ្ងៃទី១៤ ខែធ្នូ ឆ្នាំ២០២៣ តាមមាត្រា៨៥ នៃច្បាប់ស្តីពីចរាចរណ៍ផ្លូវគោក និងមាត្រា ៥៤៣ នៃក្រមព្រហ្មទណ្ឌ។
ករណីគ្រោះថ្នាក់ចរាចរណ៍ រវាងថយន្ដ Jeep បុកម៉ូតូបណ្តាលឱ្យបុរសម្នាក់ ស្លាប់ ក្នុងខណ្ឌទួលគោក កាលពីថ្ងៃទី១៤ ខែធ្នូ ឆ្នាំ២០២៣កន្លងទៅ អាណាព្យាបាលបាននាំកូនដែលជាជនសង្ស័យ ចូលសារភាព និងទទួលស្គាល់កំហុសរបស់ខ្លួននៅស្នងការដ្ឋាននគរបាលរាជធានីភ្នំពេញ នាថ្ងៃទី២៣ ខែធ្នូ ឆ្នាំ២០២៣ វេលាម៉ោង១១:០០ព្រឹក ដើម្បីទទួលខុសត្រូវចំពោះមុខច្បាប់នូវរាល់កំហុសរបស់ខ្លួន។ចំពោះករណីគ្រោះថ្នាក់ចរាចរណ៍នេះ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានណែនាំឲ្យព្រះរាជអាជ្ញារាជធានីភ្នំពេញ ធ្វើការពិនិត្យស្រាវជ្រាវ និងធ្វើការដោះស្រាយឲ្យបានត្រឹមត្រូវ និងម៉ឹងម៉ាត់តាមផ្លូវច្បាប់។សូមរំលឹកថា ករណីគ្រោះថ្នាក់ចរាចរណ៍នេះ បានកើតឡើងកាលពីថ្ងៃទី១៤ ខែធ្នូ ឆ្នាំ២០២៣ រវាងរថយន្ត Jeep ពណ៌ខ្មៅ ពាក់ផ្លាកលេខភ្នំពេញ2CB-9963 និងម៉ូតូ ត្រង់ចំណុចផ្លូវប្រសព្វ លើផ្លូវលេខ៣១៧ ប្រសព្វផ្លូវលេខ៥៦៦ ភូមិ៦ សង្កាត់បឹងកក់២ ខណ្ឌទួលគោក រាជធានីភ្នំពេញ។ ហេតុការណ៍នេះ បានបណ្ដាលឲ្យអ្នកបើកបរម៉ូតូស្លាប់ភ្លាមៗនៅនឹងកន្លែង ខណៈអ្នកបើករថយន្ដគេចខ្លួនបាត់៕
