ប្រធានាធិបតីឥណ្ឌូណេស៊ីសុំឲ្យអាមេរិកអន្តរាគមបង្កើតការឈប់បាញ់នៅហ្កាហ្សាតែអាមេរិកមិនឆ្លើយ
02-November-2023 / ព័ត៌មានអន្តរជាតិ
អាមេរិក៖ឥណ្ឌូណេស៊ីបានអំពាវនាវ ឲ្យសហរដ្ឋអាមេរិក ត្រូវតែប្រឹងប្រែងឲ្យបានច្រើនលើសនេះ ដើម្បីបញ្ឈប់សង្គ្រាមនៅតំបន់ហ្កាហ្សាដោយចាត់ទុក ការឈប់បាញ់នៅពេលនេះ គឺជារឿងមួយសំខាន់ខ្លាំង សម្រាប់មនុស្សជាតិយើង។ នេះគឺជាពាក្យថ្លែងអំពាវនាវ របស់លោក ប្រធានាធិបតីឥណ្ឌូណេស៊ី ចូកូ វីដូដូដែលលោកបានប្រាប់ថានាំសារដោយផ្ទាល់មាត់ ពីលោកម៉ាសមូដ អាបាស ប្រមុខដឹកនាំប៉ាឡេស្ទីន ផ្ញើមកប្រាប់លោក ចូបៃដិន។
បើទោះបីជាអំពាវនាវឲ្យមានការឈប់បាញ់ តែរដ្ឋបាលលោកចូ បៃដិន បានប្រកាសគោលជំហរយ៉ាងច្បាស់ថា អ៊ីស្រាអែលមានសិទ្ធិការពារខ្លួន។ កាលពីថ្ងៃអាទិត្យ មន្ត្រីសេតវិមានម្នាក់បានប្រាប់អ្នកកាសែតថា វាជារឿងសំខាន់ដែលសហរដ្ឋអាមេរិកត្រូវតែស្តាប់ យោបល់ និងការយល់ឃើញរបស់ឥណ្ឌូណេស៊ី។ មន្ត្រីម្នាក់នេះលើកឡើងថា លោកប្រធានាធិបតីចូ បៃដិន នឹងព្យាយាមរកមធ្យោបាយ ឲ្យឥណ្ឌូណេស៊ីដើរតួនាទីសំខាន់ នៅក្នុងការឈានទៅដោះស្រាយវិបត្តិដែលកំពុងតែកើតឡើង។
សម្រាបជំនួបជាមួយលោកវីដូដូ នៅសេតវិមាន គេសង្កេតឃើញថា លោកចូ បៃដិន បានព្យាយាមផ្តោតការជជែកគ្នា តែទៅលើការពង្រឹងសហប្រតិបត្តិការយុទ្ធសាស្ត្ររួម ជាមួយឥណ្ឌូណេស៊ី។ ជាការសហការ ដែលលោកចូ បៃដិន បានផ្តល់អាទិភាពដើម្បីប្រជែងជាមួយឥទ្ធិពលចិន ក្នុងតំបន់អាស៊ីប៉ាស៊ីហ្វិក។ កាលពីសប្តាហ៍កន្លងទៅ លោក ចូកូ វីដូដូ បានទៅចូលរួមជំនួបកំពូលពិសេស នៅទីក្រុងរីយ៉ាត ជាមួយបណ្តាប្រទេសអារ៉ាប់ និងប្រទេសអ៊ីស្លាមផ្សេងទៀត ដើម្បីជជែកគ្នាអំពីបញ្ហាសង្គ្រាមនៅហ្កាហ្សា។ នៅក្នុងជំនួបកំពូលនោះដែរ លោកប្រធានាធិបតីឥណ្ឌូណេស៊ី បានច្រានចោលការចោទប្រកាន់របស់អ៊ីស្រាអែល ដែលថាមន្ទីរមួយកន្លែងក្នុងតំបន់ហ្កាហ្សា សាងសង់ឡើងដោយជំនួយថវិកាឥណ្ឌូណេស៊ីនោះ គឺជាកន្លែងលាក់ខ្លួនរបស់ពួកហាម៉ាស។កិច្ចប្រជុំកំពូលនោះមានមានប្រទេសមូស្លីមសំខាន់ៗចំនួន៧៥ប្រទេសចូលរួម ដែលរួមមានសម្ព័ន្ធអារ៉ាប់ផងដែរ។ សេចក្តីប្រកាសរួមនៃកិច្ចប្រជុំកំពូលនោះ បានទាត់ចោលហេតុផលរបស់អ៊ីស្រាអែលដែលធ្វើសកម្មភាពយោធាក្នុងតំបន់ហ្កាហ្សាថាជាការការពារខ្លួននោះ និងបានទាមទារឱ្យបញ្ចប់សង្គ្រាមជាបន្ទាន់។ សេចក្តីប្រកាសរួមនេះក៏បានអំពាវនាវឱ្យផ្អាកការលក់អាវុធទៅឱ្យអ៊ីស្រាអែល និងបង្កើនការផ្តល់ជំនួយមនុស្សធម៌ផងដែរ។
គួរបញ្ជាក់ថា ជំនួបរវាងលោកប្រធានាធិបតីឥណ្ឌូណេស៊ី និងលោកចូ បៃដិន នៅសេតវិមាននេះ ត្រូវបានរៀបចំឡើង ក្នុងកម្មវត្ថុដើមដំបូង គឺពង្រឹងសម្ព័ន្ធភាពរវាងអាមេរិកនិងឥណ្ឌូណេស៊ី មុនពេលដែលលោក ចូ បៃដិន ត្រូវជួបលោកស៊ី ជីនពីង នៅជំនួបកំពូល APEC ។ ក៏ប៉ុន្តែ បរិបទសង្គ្រាមនៅតំបន់ហ្កាហ្សា បានធ្វើឲ្យជំនួបរវាងលោក ចូកូ វីដូដូ និងលោក ចូ បៃដិន ត្រូវផ្លាស់ប្តូរខ្លឹមសារ។លោកប្រធានាធិបតីឥណ្ឌូណេស៊ី Joko Widodo ស្ថិតក្នុងរដ្ឋធានីវ៉ាស៊ីនតោន ដើម្បីបង្កើនកម្រិតចំណងការទូតជាមួយសហរដ្ឋអាមេរិ ដល់កម្រិត«ភាពជាដៃគូយុទ្ធសាស្ត្រគ្រប់ជ្រុងជ្រោយ» ដែលជាកម្រិតចំណងទាក់ទងការទូតខ្ពស់បំផុតរបស់ឥណ្ឌូណេស៊ី។
ឥណ្ឌូណេស៊ីមិនមែនជាតួអង្គសំខាន់ជុំវិញសង្គ្រាមក្នុងតំបន់ហ្កាហ្សា ដូចជាប្រទេសអេហ្ស៊ីប ហ្ស៊កដានី និងប្រទេសកាតា ដែលមានតួនាទីសំខាន់នៅក្នុងគោលដៅជាបន្ទាន់របស់រដ្ឋាភិបាលអាមេរិកនៅពេលនេះឡើយ ដូចជាការជួយធ្វើឱ្យមានការដោះលែងចំណាប់ខ្មាំង និងបង្កើតច្រករបៀងមនុស្សធម៌ក្នុងតំបន់ហ្កាហ្សាជាដើម។សម្រាប់ការប្រយុទ្ធគ្នាវិញនៅក្នុងថ្ងៃទី៤០នៃសង្គ្រាមកម្ទេចពួកហាម៉ាសនៅហ្កាហ្សា ទាហានអ៊ីស្រាអែលបានបើកប្រតិបត្តិការស៊ីបដៅលើពួកហាម៉ាស ត្រង់មន្ទីរពេទ្យអាល់ជីហ្វា ដ៏ធំជាងគេដែលស្ថិតនៅភាគខាងជើងតំបន់ហ្កាហ្សា។ នេះបើតាមសេចក្តីថ្លែងការណ៍របស់អ៊ីស្រាអែល។
បន្ទាប់ពីរងការឡោមព័ទ្ធ និងប្រយុទ្ធតតាំងជាមួយក្រុមប្រដាប់អាវុធហាម៉ាសនៅសង្កាត់ជុំវិញមន្ទីរពេទ្យ អស់ជាច្រើនថ្ងៃមក នៅថ្ងៃពុធទី១៥វិច្ឆិកា ទាហាននិងកងកម្មង់ដូអ៊ីស្រាអែលរាប់សិបនាក់បានសម្រុកចូលទៅដល់ក្នុងមន្ទីរពេទ្យអាល់ជីហ្វាតែម្តង និងបានបញ្ជាឱ្យជនប៉ាឡេស្ទីនព្រមចុះចូល។ ក្មេងចាស់ប្រុសស្រីចាប់ពីអាយុ១៦ឆ្នាំឡើងទៅទាំងអស់ ត្រូវដើរចេញពីកន្លែងលាក់ខ្លួនទៅទីធ្លាខាងក្នុងរបស់មន្ទីរពេទ្យ ដោយលើកដៃឡើងលើ ជាសញ្ញាសុំចុះចាញ់។ ដោយបាញ់ឡើងលើ ទាហានអ៊ីស្រាអែលខ្លះពាក់មួកបាំងមុខសល់តែប្រលោះភ្នែក បានរុករុលក្នុងមន្ទីរពេទ្យ ពីបន្ទប់មួយទៅបន្ទប់មួយ ពីផ្នែកមួយទៅផ្នែកមួយ ចោទសួរបុគ្គលិកពេទ្យ អ្នកជំងឺ និងគ្រូពេទ្យ ព្រមទាំងឆែកឆេរលើខ្លួនស្ត្រីនិងកុមារ ទំនងដើម្បីស្វែងរកពួកហាម៉ាសបង្កប់ខ្លួន។នៅខាងក្រៅ កងរថក្រោះនិងរថពាសដែកអ៊ីស្រាអែលដែលឡោមព័ទ្ធមន្ទីរពេទ្យតាំងពីពីរបីថ្ងៃមកហើយនោះ បានចូលទៅដល់ផ្នែកខាងក្នុងនៃមន្ទីរពេទ្យ រួចចតនៅគ្រប់ច្រកចូលកន្លែងសង្គ្រោះបន្ទាន់ និងនៅផ្នែកផ្សេងៗទៀត។សេតវិមានក៏បានអះអាងដូចគ្នាកាលពីថ្ងៃអង្គារថាពួកហាម៉ាសនិងជីហាតអ៊ីស្លាមជាសម្ព័ន្ធមិត្ត មានទីបញ្ជាការនិងទីចាត់ការ នៅមន្ទីរពេទ្យអាល់ជីហ្វានេះ។
ចលនាអ៊ីស្លាមជ្រុលនិយមហាម៉ាសនិងក្រសួងសុខាភិបាលនៅហ្កាហ្សាបានបដិសេធជាផ្លូវការពាក្យចោទរបស់អ៊ីស្រាអែលនិងទាមទារឱ្យមានគណៈកម្មការអង្កេតអន្តរជាតិចុះមកពិនិត្យផ្ទាល់។ អង្គការសហប្រជាជាតិ និងសហគមន៍អន្តរជាតិត្រូវតែធ្វើអន្តរាគមន៍ភ្លាមដើម្បីបញ្ចប់ប្រតិបត្តិការយោធាអ៊ីស្រាអែលក្នុងមន្ទីរពេទ្យ។ នេះជាសម្រែករបស់រដ្ឋមន្ត្រីក្រសួងសុខាភិបាលនៅហ្កាហ្សាដោយបញ្ជាក់បន្ថែមថាមានសពយ៉ាងហោចណាស់១៧៩នាក់ត្រូវបានកប់ក្នុងផ្នូររួម។ បើតាមអង្គការសហប្រជាជាតិ មានមនុស្សប្រមាណ២៣០០នាក់ ជាអ្នកជំងឺ ជាគ្រូពេទ្យនិងអ្នកភៀសខ្លួនសង្គ្រាមកំពុងជ្រកកោនក្នុងមន្ទីរពេទ្យក្នុងលក្ខខណ្ឌដ៏លំបាកលំបិនបំផុត គ្មានទឹកគ្មានភ្លើង៕
