សម្តេចធិបតីហ៊ុនម៉ាណែតសម្តែងការដឹងគុណព្រះមហាវិរៈក្សត្រក្នុងទិវាបុណ្យឯករាជ្យជាតិខួប៧០ឆ្នាំ
ភ្នំពេញ៖ ថ្ងៃទី៩ ខែវិច្ឆិកា ឆ្នាំ២០២៣ ជាខួបលើកទី៧០(៩ វិច្ឆិកា ១៩៥៣ - ៩ វិច្ឆិកា ២០២៣) នៃទិវាបុណ្យឯករាជ្យជាតិ ដែលប្រជាជាតិកម្ពុជាទាំងមូលបានរំដោះខ្លួនទាំងស្រុងពីអាណានិគមនិយមបារាំង ដែលបានដាក់នឹមអាណានិគមមកលើកម្ពុជា អស់រយៈពេល ៩០ឆ្នាំ (១៨៦៣-១៩៥៣)។ពិធីអបអរសាទររំលឹកខួបលើកទី៧០ នៃទិវាបុណ្យឯករាជ្យជាតិ ៩ វិច្ឆិកា ត្រូវបានប្រារព្ធឡើងយ៉ាងកងរំពងក្រោមព្រះរាជាធិបតីភាព ព្រះមហាក្សត្រខ្មែរ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី បុត្រាព្រះបរមរតនកោដ្ឋ នរោត្តម សីហនុ ព្រះបិតាឯករាជ្យជាតិខ្មែរ។ ពិធីនេះក៏មានការអញ្ជើញចូលរួមអបអរសាទរពីថ្នាក់ដឹកនាំជាន់ខ្ពស់នៃរាជរដ្ឋាភិបាល មន្ត្រីរាជការ សិស្សានុសិស្ស យុវជន និងប្រជាពលរដ្ឋជាច្រើនរូបទៀត។
ព្រះមហាក្សត្រខ្មែរ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះអង្គមានព្រះរាជបន្ទូលថា៖ ខ្ញុំ មានហឫទ័យរីករាយអបអរសាទរយ៉ាងជ្រាលជ្រៅបំផុត ដោយបានចូលរួមប្រារព្ធពិធី មីទ្ទិញដ៏មហោឡារិក ដើម្បីរំលឹកខួបអនុស្សាវរីយ៍លើកទី៧០ ទិវាបុណ្យឯករាជ្យជាតិ ៩វិច្ឆិកា និងទិវាកំណើតនៃកងយោធពលខេមរភូមិន្ទ ដែលជាទិវាប្រវត្តិសាស្ត្រដ៏មានតម្លៃបំផុត នៃមាតុ ភូមិកម្ពុជាយើងដែលបានទទួលនូវឯករាជ្យបរិបូណ៍ និងសិទ្ធិសេរីភាពដ៏ពិសិដ្ឋពីអាណានិគម និយមបារាំង ក្រោមព្រះរាជបូជនីយកិច្ចដ៏ឧត្តមរបស់ ព្រះមហាវីរក្សត្រ ព្រះនរោត្តម សីហនុ ព្រះវររាជបិតា ឯករាជ្យជាតិ ជាទីគោរពសក្ការៈដ៏ខ្ពង់ខ្ពស់បំផុត ។
បុណ្យឯករាជ្យជាតិដ៏ឧត្តុង្គឧត្តម ដែលកំពុងប្រព្រឹត្តទៅយ៉ាងមហោឡារិកនេះ ជាទិវារំលឹក ពីឧត្តមគុណបំណាច់នៃការទាមទារឯករាជ្យពីសាធារណរដ្ឋបារាំង ក្រោមព្រះរាជកិច្ចដឹកនាំដ៏ ឈ្លាសវៃរបស់ ព្រះករុណាព្រះមហាវីរក្សត្រ ព្រះនរោត្តម សីហនុ ព្រះវររាជបិតាជាតិខ្មែរ “ព្រះករុណាព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ដែលយើងទាំងអស់គា្ននៅ ចងចាំបានថាជាចលនាមហាសាមគ្គីជាតិ ដែលបានចាប់ផ្ដើមនៅក្នុងឆ្នាំ១៩៥២ ជាព្រះរាជបូជ នីយកិច្ចដើម្បីឯករាជ្យពេញទីនៃកម្ពុជា។
ព្រះអង្គបានមានព្រះរាជបន្ទុលឲ្យដឹងថា៖ឥស្សរជន និងជំនាញការសំខាន់ៗបារាំង និងខ្មែរ បានខិតខំធ្វើការដ៏ត្រឹមត្រូវនៅរាជធានី ភ្នំពេញរហូតដល់ថ្ងៃទី៩ ខែវិច្ឆិកា ឆ្នាំ១៩៥៣ ទើបបានលទ្ធផលដែលជាទីពេញចិត្តនៃភាគីខ្មែរ ដែលនៅថ្ងៃនោះ លោកអគ្គមេបញ្ជាការ សេនាធិការ ព្រមទាំងកងទ័ពបារាំងជើងគោក ជើងអាកាស ជើងទឹក និងសហភាពបារាំង បានថ្វាយបង្គំលា ព្រះករុណាព្រះមហាវីរក្សត – ព្រះនរោត្តម សីហនុ ព្រះវររាជបិតាជាតិខ្មែរ “ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ ខ្ពស់បំផុត ហើយចាកចេញជាដាច់ខាត ដោយមិនវិលត្រឡប់មកព្រះរាជាណាចក្រកម្ពុជា វិញ ឡើយ ។ ដូច្នេះចាប់ពីថ្ងៃទី៩ ខែវិច្ឆិកា ឆ្នាំ១៩៥៣ ព្រះរាជាណាចក្រកម្ពុជាយើង មានឋានៈស្មើ នឹងសាធារណរដ្ឋបារាំង គឺមានឋានៈជារដ្ឋឯករាជ្យពេញបរិបូណ៌ ។
សម្រាប់មហាមិទ្ទីងនេះដែរសម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា កូនចៅជំនាន់ក្រោយចងចាំជានិច្ចនូវគំរូវីរភាពរបស់សម្ដេចព្រះបាទ នរោត្តម សីហនុ ព្រះហាវីរក្សត្រ ព្រះរាជបិតាឯករាជ្យ ដែលព្រះអង្គបានទាមទារដោយជោគជ័យ និងអហិង្សានូវឯករាជ្យជាតិពេញបរិបូរណ៍ពីអាណានិមគមបារាំងនៅឆ្នាំ ១៩៥៣។សម្ដេចធិបតី បានលើកឡើងថា «ឯករាជ្យ និងសន្តិភាព» ពុំមែនកើតឡើងដោយឯកឯងនោះទេ ទាំងការទទួលបានឯករាជ្យ និងសន្តិភាពសុទ្ធតែកើតចេញពីការផ្ចុងផ្ដើមដោយ«ខ្មែរគ្នាឯង»។«ក្នុងនាមជាកុលបុត្រខ្មែរ អ្នកដឹកនាំជំនាន់ក្រោយ និងប្រជាជនខ្មែរទាំងមូល ទូលព្រះបង្គំយើងខ្ញុំទាំងអស់គ្នា ប្ដេជ្ញាយកអស់កម្លាំងកាយចិត្តដង្ហែតាមស្នាមព្រះហស្ដប្រវត្តិសាស្ត្រ និងគំរូវីរភាពរបស់ព្រះមហាវីរក្សត្រ និងរួមគ្នាជាធ្លុងមួយក្រោមព្រះរាជកិច្ចដឹកនាំរបស់ព្រះករុណា ព្រះបាទ នរោត្តម សីហមុនី ព្រះមហាក្សត្រកម្ពុជា» នេះជាប្រសាសន៍របស់សម្ដេចនាយករដ្ឋមន្ដ្រី ហ៊ុន ម៉ាណែត។
សម្ដេចធិបតី បានបន្ដថា «ទូលព្រះបង្គំខ្ញុំជាកូន ចៅ ចៅទូតទូទាំងប្រទេស ចងចាំជានិច្ចនូវព្រះគុណូបការ និងគំរូវីរភាពដ៏អង់អាចក្លាហានរបស់ព្រះករុណាព្រះបាទសម្ដេចព្រះ នរោត្តម សីហនុ ព្រះមរមរតនកោដ្ឋ ដែលព្រះអង្គបានបូជាព្រះកាយពល និងព្រះបញ្ញាញាណដ៏ឈ្លាសវៃ តស៊ូផ្ដូរផ្ដាច់ដណ្ដើមឯករាជ្យជូនជាតិទាំងមូល និងបានធ្វើឲ្យពិភពលោកស្គាល់កម្ពុជាឡើងវិញនៅក្នុងឋានជាប្រជាជាតិឯករាជ្យដែលឈរស្មើមុខ ស្មើសិទ្ធិជាមួយជាតិសាសន៍ដទៃ»។សម្ដេចធិបតី ថ្លែងគូសបញ្ជាក់ថា ព្រះអង្គក៏ជាតួអង្គដ៏សំខាន់ក្នុងការជំរុញសាមគ្គីភាពអន្តរជាតិរវាងប្រទេសទើបទទួលបានឯករាជ្យថ្មីៗ ក្នុងនាមជាបិតាស្ថាបនិកមួយរូប និងចលនាមិនចូលបក្សសម្ព័ន្ធដើម្បីលើកស្ទួយសិទ្ធិស្វ័យសម្រេចរបស់ប្រជាជាតិលើពិភពលោកក្នុងការកំណត់នូវជោគវាសនា អនាគត មាគ៌ាដឹកនាំរបស់ប្រជាជាតិនីមួយៗ។
សូមបញ្ជាក់ថាដើម្បីជាការចងចាំនូវព្រះរាជស្នាព្រះហស្តដ៏ឧត្តុង្គឧត្តម នៃការទាមទារឯករាជ្យពីអាណានិគមនិយមបារាំង វិមានឯករាជ្យ ត្រូវបានកសាង និងសម្ពោធដាក់ឲ្យប្រើប្រាស់នៅឆ្នាំ១៩៥៨ ក្នុងព្រះរាជព្រះបាទ នរោត្តម សុរាម្រិត ដែលជាព្រះវររាជបិតារបស់សម្តេចព្រះ នរោត្តម សីហនុ។ វិមានឯករាជ្យ ជានិមិត្តរូបបញ្ជាក់ថា ប្រទេសកម្ពុជា បានទទួលឯករាជ្យពីប្រទេសបារាំង នៅថ្ងៃទី៩ ខែវិច្ឆិកា ឆ្នាំ១៩៥៣។
កម្ពុជា តែងតែប្រារព្ធទិវាបុណ្យឯករាជ្យជាតិនេះ ដោយមានរៀបចំពិធីប្រទានភ្លើងទានជ័យ រម្លឹកគុណដល់អ្នកស្នេហាជាតិដែលបានពលីជីវិត ដើម្បីទាមទារឯករាជ្យពីពួកអាណានិគមបារាំង ហើយពិធីបូជានេះ ក៏ត្រូវបានធ្វើឡើងជារៀងរាល់ឆ្នាំ នៅថ្ងៃទី៩ ខែវិច្ឆិកា និងបញ្ចប់នៅថ្ងៃទី១១ ខែវិច្ឆិកា គឺមានរយៈពេល ៣ថ្ងៃ៕
