មុនបោះឆ្នោតដើរប្រាប់ឲ្យប្រជាពលរដ្ឋហ្វូតូអត្តសញ្ញាណប័ណ្ណហើយផ្តិតមេដៃនិងបង់លុយ ដើម្បីយកទៅឲ្យក្រុមនិស្សិតចុះមកវាស់ដីធ្វើប្លង់ឲ្យ តែចុងក្រោយទឹកភ្នែក!?
10-November-2024 / ព័ត៌មានជាតិ
ខេត្តក្រចេះ៖ប្រជាពលរដ្ឋប្រមាណ១១៣គ្រួសារ រស់នៅភូមិព្រះគន្លង.ភូមិព្រែកកូវ.ភូមិបុសលាវ.ភូមិព្រែកតាថឹង.ភូមិពោធិនិងភូមិតាលូសស្ថិតក្នុងឃុំបុសលាវ ស្រុក ចិត្របុរី ខេត្តក្រចេះ បានធ្វើលិខិតពឹងពាក់មកបងប្អូនអ្នកសារពត៌មានប្រចាំនៅខេត្តក្រចេះក៍ដូចជានៅទូទាំងព្រះរាជាណាចក្រកម្ពុជា ដើម្បីឲ្យចុះមកយកពត៌មាននិងជួយផ្សព្វផ្សាយពត៌មានពាក់ព័ន្ធជាមួយអាជ្ញាធរខេត្តក្រចេះដែលបានចេញលិខិតលេខ៣០៦/២៣ សជណចុះថ្ងៃទី២១ខែកញ្ញាឆ្នាំ២០២៣ដែលមានខ្លឹមសារថា៖
រដ្ឋបាលខេត្តក្រចេះសូមជូនដំណឹងដល់សាធារណៈជន មន្ទីរ អង្គភាព អាជ្ញាធរស្រុកចិត្របុរីនិងឃុំបុសលាវ ពិសេសបងប្អូនប្រជាពលរដ្ឋដែលកំពុងទន្ទ្រានកាន់កាប់និងដាំដុះនៅលើទីតាំងដីទួលសុវត្ថិភាពទួលតាឃីម(ទួលថ្មដា.ទួលជំរំគោ.និងទួលទ្រងើទា)ក្នុងឃុំបុសលាវ ស្រុកចិត្របុរី ខេត្តក្រចេះជ្រាបថា៖ ដីទួលសុវត្ថិភាពទួលតាឃីនគឺជាដីរបស់រដ្ឋដែលរក្សារទុកសម្រាប់ប្រជាពលរដ្ឋក្នុងឃុំបុសលាវប្រើប្រាស់ជាសាធារណៈក្នុងពេលមានទឹកជំនន់ដើម្បីស្នាក់នៅជាបណ្តោះអាសន្ន។ ជម្លៀសសត្វពាហនៈ គោក្របីនិងសម្ភារះផ្សេងៗ ដោយមិនអនុញាត្តិឲ្យមានការកាន់កាប់ជាកម្មសុិទ្ធិបានឡើយ។
-ករណីបងប្អូនប្រជាពលរដ្ឋបានកាន់កាប់អាស្រ័យផលយូឆ្នាំរស់នៅជាអចិន្ត្រៃយ៍និងកាន់កាប់អាស្រ័យផលតាមបណ្តោយផ្លូវក្នុងភូមិព្រែកកូវ ចាប់ពីចំណីផ្លូវទៅក្រោយ50ម៉ែត្រនិងមានការបញ្ជាក់ច្បាស់លាស់ពីអាជ្ញាធរមូលដ្ឋាន ក្រុមការងាររដ្ឋបាលខេត្តឲ្យបន្តការអាស្រ័យផលនិងរស់នៅជាបណ្តោះអាសន្ន។ដូច្នេះដើម្បីការពារគ្រប់គ្រងនិងថែរក្សាដីទួលសុវត្ថិភាពសម្រាប់ជាប្រយោជន៍បងប្អូនប្រជាពល់រដ្ឋនិងសមូហភាពរដ្ឋបាលខេត្តក្រចេះសូមធ្វើការណែនាំដូចខាងក្រោម។
-បងប្អូប្រជាពលរដ្ឋដែលកំពុងទន្ទ្រានកាន់កាប់និងរស់នៅលើទួលសុវត្ថិភាពទួលតាឃីនត្រូវបញ្ឈប់ការចូលទន្ទ្រានកាន់កាប់ ដាំដុះបន្ថែមនិងរុះរើខ្ទមរបង ពូជដំណាំនិងសម្ភារះផ្សេងៗរួចចាកចេញពីទីតាំងដីទួលសុវត្ថិភាចាប់ពីថ្ងៃជូនដំណឹងនេះរហូតដល់ថ្ងៃទី30ខែកញ្ញាឆ្នាំ2023ជាកំហិត។ផុតកាលបរិច្ឆេតនេះក្រុមការងារខេត្តនឹងដាក់គ្រឿងចក្រចូលសម្អាតនិងកាយក្រវាត់ព្រុំដីទួលសុវត្ថិភាពខាងលើ។_ករណីមិនសហការនិងអនុវត្តតាមសេចក្តីជូនដំណឹងនេះគណះកម្មការគ្រប់គ្រងដីរដ្ឋថ្នាក់ខេត្តនិងអនុវត្តតាមនីតិវិធីច្បាប់ដោយគ្មានលក្ខខណ្ឌ។
ករណីនេះបើតាមការរៀបរាប់របស់ប្រជាពលរដ្ឋប្រមាណជា100គ្រួសារបានឲ្យដឹងថា៖ ដីនេះ(ដីទួលសុវត្ថិភាពទួលតាឃីន)ពួកគាត់បានចូលមកកាន់កាប់អាស្រ័យផលជាយូរឆ្នាំមកហើយ ។មានអ្នកខ្លះតាំងពីឆ្នាំ1979អ្នកខ្លះតាំងពីឆ្នាំ1993និងឆ្នាំ2000មកម្លេះ។ដោយគ្រួសារនីមួយៗកាន់កាប់ច្រើនឬតិចទៅតាមកម្លាំងសមាជិកគ្រួសារ។ អ្នកខ្លះទៅសមាជិកតិចកាប់គាស់បានតិចកន្លះហិកតាទៅ70អារអីទៅអ្នកខ្លះសមាជិកច្រើនកាប់គាស់បាន3ហិកតាអីអញ្ចឹងទៅ។
ប្រជាពលរដ្ឋដដែលបន្តថា នៅឆ្នាំ2000សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញមកចែកអំណោយដល់បងប្អូនប្រជាពលរដ្ឋដែលរងគ្រោះដោយទឹកជំនន់ សម្តេចលោកបានមានប្រសាសន៍ថា បើបងប្អូនប្រជាពលរដ្ឋអាចរស់នៅលើទីតាំងដីនេះបាន អាជ្ញាធរខេត្តត្រូវរៀបចំចាត់ចែងវាស់វែងឲ្យពួកគាត់រស់នៅឲ្យបានស្របច្បាប់ទៅ។ផ្ទុយមកវិញអាជ្ញាធរខេត្តក្រចេះបែរជាបោកបញ្ឆោតឲ្យពួកខ្ញុំរស់នៅកាប់គាស់កាយដីអាស្រ័យផលលើដីនេះរាប់សិបឆ្នាំដោយមិនចេញប័ណ្ណកម្មសុិទ្ធិឲ្យពួកយើងខ្ញុំហើយ ថែមទាំងឲ្យមេភូមិមកឆរបោកយកលុយពួកខ្ញុំអស់ជាច្រើនគ្រួសារទៀត។
ជាក់ស្តែងកាលពីពេលមុនឃោសនាបោះឆ្នោតឆ្នាំ2023កន្លងទៅថ្មីៗនេះ លោក ពុំ ធីប្រធានភូមិព្រែកតាអាំបានឲ្យប្រជាពលរដ្ឋហ្វូតូអត្តសញ្ញាណប័ណ្ណរួចហើយឲ្យផ្តិតមេដៃលើអត្តសញ្ញាណប័ណ្ណហ្វូតូនោះ រួចប្រគល់ឲ្យលោក ពុំ ធី ហើយលោកពុំ ធី ក៏បានឲ្យប្រជាពលរដ្ឋបង់លុយក្នុងមួយគ្រួសារចាប់ពី350000រៀលទៅ600000រៀលតាមអ្នកកាន់កាប់ដីច្រើនដីតិចថាដើម្បីយកទៅឲ្យក្រុមនិស្សិតចុះមកវាស់វែងធ្វើប្លង់ដីឲ្យ។ប៉ុន្តែផ្ទុយទៅវិញក្រោយបោះឆ្នោតរួច បែរជាអាជ្ញាធរខេត្តក្រចេះចេញលិខិតយកដីនិងបណ្តេញពួកយើងខ្ញុំឲ្យចាកចេញពីលំនៅដ្ឋាន ផ្ទះសម្បែងរបស់ខ្លួនយ៉ាងតក់ក្រហល់បែបនេះទៅវិញ?។
ដូច្នេះហើយទើបពួកខ្ញុំសំណូមពរដល់បងប្អូនអ្នកសារពត៌មានឲ្យជួយផ្សព្វផ្សាយពត៌មាននេះដើម្បីឲ្យបានដឹងដល់សម្តេចប្រមុខថ្នាក់ដឹកនាំប្រទេសដើម្បីឲ្យគាត់ជួយរកយុត្តិធម៌ដល់ពួកខ្ញុំផង។ដោយឡែកលោកពុំ ធី មេភូមិព្រែកតាអាំអ្នកសារពត៌មានយើងមិនអាចសុំការបកស្រាយពីគាត់បានទេដោយមិនស្គាល់លេខទូរស័ព្ទ?។សង្ឃឹមថានឹងមានការបកស្រាយបញ្ហានេះជូនប្រជាពលរដ្ឋជាមិនខាន៕
