សម្តេចតេជោបង្ហើបពីមូលហេតុនៃការត្រូវផ្ទេអំណាចឲ្យលោកបណ្ឌឹតហ៊ុនម៉ាណែត
31-October-2023 / ផ្សេងៗ
ខេត្តកណ្តាល៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា ពិធីសម្ពោធដាក់ឲ្យប្រើប្រាស់ផ្លូវក្រវ៉ាត់ក្រុងទី៣ នៅថ្ងៃទី៣ ខែសីហាឆ្នាំ២០២៣នៅថ្ងៃនេះអាចជាវេទិកាសាធារណៈចុងក្រោយរបស់សម្ដេចក្នុងនាមជានាយករដ្ឋមន្ត្រីកម្ពុជា។សម្ដេចថា៖«ថ្ងៃនេះអាចចាត់ទុកថាជាពេលវេលាចុងក្រោយដែលខ្ញុំនិយាយក្នុងនាមជានាយករដ្ឋមន្ត្រី»។តែសម្ដេចតេជោបានលើកឡើងថា៖បើទោះបីជាសម្ដេចលែងជានាយករដ្ឋមន្ត្រីរបស់ប្រទេសកម្ពុជាក៏ដោយក៏សម្ដេចទៅកាន់កាន់តួនាទីថ្មីផងដែរ។
សម្ដេចតេជោហ៊ុនសែននឹងផ្ទេរអំណាចនាយករដ្ឋមន្ត្រីទៅកាន់នាយករដ្ឋមន្ត្រីថ្មីនៅថ្ងៃទី២២ ខែសីហា ខាងមុខ។សម្ដេចនាយក ហ៊ុន សែន នាយករដ្ឋមន្ត្រី នៃកម្ពុជាបច្ចុប្បន្ន បានលើកឡើងពីមូលហេតុចំនួន៤ ដែលធ្វើឲ្យសម្ដេចសម្រេចចិត្តលាលែងពីតំណែងនាយករដ្ឋមន្ត្រី នៅថ្ងៃទី២២ ខែសីហា ឆ្នាំ២០២៣ ខាងមុខ។ មូលហេតុ៤នោះរួមមាន ដើម្បីស្ថេរភាព មនុស្សជំនាន់ក្រោយមានសមត្ថភាពរឹងមាំ មនុស្សជំនាន់ចាស់នៅមានលទ្ធភាពតាមដានបន្ត និងត្រូវពេលដែលត្រូវផ្ទេរ។សម្ដេចតេជោ ហ៊ុន សែន បានលើកឡើងថា ការលាលែងពីតំណែងជានាយករដ្ឋមន្ត្រីរបស់សម្ដេចនៅពេលនេះ គឺដើម្បីស្ថេរភាព សន្តិសុខ និងការបន្តអភិវឌ្ឍរបស់ប្រទេស ខណៈសម្ដេចលើកឡើងថាប្រសិនជាមានរឿងអ្វីកើតឡើងនៅក្នុងពេលដែលសម្ដេចគ្រប់គ្រងដឹកនាំហើយត្រូវការរើសនាយករដ្ឋមន្ត្រីថ្មីភ្លាមៗនោះគឺវានឹងធ្វើឲ្យប្រទេសបាត់បង់ស្ថេរភាព ដោយសារតែអាចមានការប្រកួតប្រជែងដណ្ដើមអំណាចជានាយករដ្ឋមន្ត្រី។
សម្ដេចតេជោ ហ៊ុនសែន បន្តថា, សម្ដេចធ្វើបែបនេះគឺដោយមើលឃើញពីគំរូវីរភាពរបស់សម្ដេចព្រះបរមរតនកោដ្ឋក្នុងការដាក់រាជ្យនិងផ្ទេររាជ្យទៅដល់ព្រះមហាក្សត្របច្ចុប្បន្ន។សម្ដេចតេជោបានលើកឡើងថា, នៅពេលនេះគឺលោក ហ៊ុន ម៉ាណែត មានអាយុ ៤៦ឆ្នាំ ដែលសមល្មមនឹងមានលទ្ធភាពដឹកនាំរាជរដ្ឋាភិបាល។ សម្ដេចថ្លែងថាសមាជិករដ្ឋាភិបាលអាណត្តិថ្មីគឺសុទ្ធតែជាអ្នកមានសមត្ថភាពនិងមានអាយុក្រោម ៥០ឆ្នាំទាំងអស់។សម្ដេចតេជោបានផ្ដាំទៅដល់គណៈរដ្ឋមន្ត្រីបច្ចុប្បន្នឲ្យត្រៀមខ្លួនក្នុងការលាលែងពីតំណែង។
សម្ដេចថា៖ «សុំឱ្យបងប្អូននៅក្នុងគណៈរដ្ឋមន្ត្រីយើងទាំងអស់លះបង់។ តាមពិតអ្នកដែលលះបង់ធំជាងគេនោះគឺខ្ញុំឯណោះទេអំណាចជានាយករដ្ឋមន្ត្រី។ ខ្ញុំសុខចិត្តលះបង់នូវអំណាចនេះដើម្បីសេចក្ដីសុខរយៈពេលវែងទៅដល់ប្រជាជនកម្ពុជាក្នុងនោះរួមទាំងយើងផងដែរ»។សម្ដេចតេជោ ហ៊ុនសែន បន្ថែមថា , ការលាលែងពីតំណែងជានាយករដ្ឋមន្ត្រីរបស់សម្ដេចក៏សម្ដេចនៅមានតួនាទីនៅក្នុងសភាហើយនៅដើមឆ្នាំក្រោយសម្ដេចក៏នឹងធ្វើជាប្រធានព្រឹទ្ធសភាផងដែរ ដែលសម្ដេចមិនទាន់ចេញទៅណាឆ្ងាយពីឆាកនយោបាយនៅក្នុងប្រទេសនោះទេ។ ជាមួយគ្នានោះសម្ដេចក៏បានប្រកាសបញ្ជាក់ថាទោះបីជាសម្ដេចមានឥទ្ធិពលនៅក្នុងឆាកនយោបាយក្ដីក៏សម្ដេចមិនលូកលាន់កិច្ចការនយោបាយរបស់នាយករដ្ឋមន្ត្រីដែរ។
ឆ្លងតាមការបោះឆ្នោតជ្រើសតាំងតំណាងរាស្ត្រនីតិកាលទី៧ ថ្ងៃទី២៣ ខែកក្កដា ឆ្នាំ២០២៣ គណបក្សប្រជាជនកម្ពុជាទទួលលទ្ធផលបានការគាំទ្រពីប្រជាពលរដ្ឋជាច្រើនដែលតាមការប៉ាន់ប្រមាណគឺគណបក្សនេះអាចគ្រប់គ្រងអាសនៈនៅក្នុងសភាបាន ១២០អាសនៈ។ចំពោះមូលហេតុចុងក្រោយ គឺសម្ដេចថាពេលនេះគឺជាពេលដែលត្រូវឱ្យសម្ដេចក្នុងការផ្ទេរអំណាចទៅកាន់នាយករដ្ឋមន្ត្រីថ្មីហើយ ដោយសារតែសន្ទុះក្នុងការគាំទ្រគណបក្សប្រជាជនពីសំណាក់អ្នកបោះឆ្នោតគឺមានកាន់តែច្រើនឡើងលើសពីការបោះឆ្នោតអាណត្តិមុនទៀត។
សម្ដេចថា៖ «បើជាសន្លឹកឆ្នោតទាបជាងឆ្នាំ២០១៨ គឺខ្ញុំអត់ទាន់ចាកចេញទេ! ខ្ញុំនឹងនៅកែលម្អស្ថានការណ៍ ហោចណាស់ក៏បានពាក់កណ្ដាលឬរហូតដល់ចប់អាណត្តិទី៧ តែម្ដង។ តែដោយសារតែសន្លឹកឆ្នោតនេះអនាគតបានប្រកាសរួចស្រេចទៅហើយ។ បើប្រជាជាតិមិនសប្បាយចិត្តជាមួយនឹងតួអង្គបន្តវេនទេគឺច្បាស់ជាសំឡេងឆ្នោតចុះ»។នៅថ្ងៃទី៧ ខែសីហា ខាងមុខប្រធានគណបក្សប្រជាជនសម្ដេចតេជោ ហ៊ុន សែន និងធ្វើលិខិតឧទ្ទេសនាមស្នើទៅកាន់ព្រះមហាក្សត្រដើម្បីតែងតាំងលោក ហ៊ុន ម៉ាណែត ធ្វើជានាយករដ្ឋមន្ត្រីថ្មីនៃព្រះរាជាណាចក្រកម្ពុជា។ នាយករដ្ឋមន្ត្រីថ្មីនិងធ្វើការរៀបចំគណៈរដ្ឋមន្ត្រីដើម្បីស្នើសុំសេចក្ដីទុកចិត្តពីសភានៅថ្ងៃទី២១ ខែសីហា និងចូលកាន់តំណែងពេញសិទ្ធិនៅថ្ងៃទី២២ ខែសីហា ខាងមុខ។
សម្តេចបានចោទសួរថា តើមាននាយករដ្ឋមន្ត្រីប៉ុន្មាននាក់ ដែលធ្លាប់បានលះបង់អំណាចដូចសម្តេច ក្នុងពេលដែលខ្លួនមានលទ្ធភាព ធ្វើនាយករដ្ឋមន្ត្រីបាន ៥ ទៅ១០ឆ្នាំទៀត ប៉ុន្តែមិនមែនវាជារឿងល្អទេ នៅពេលដែលកាន់តំណែងរហូតដល់ចាស់ស្លាប់។កាលពីឆ្នាំ២០១៥ មានការចោទជាសំណួរដោយ លោក ស៊ិនស៊ូ អាបេ អតីតនាយករដ្ឋមន្ត្រីជប៉ុនថា «ក្រោយហ៊ុនសែន ជានរណា?» ដែលសំណួរនេះ ធ្វើឱ្យសម្តេចមានការចាប់អារម្មណ៍យ៉ាងខ្លាំង។
សម្តេចបានរំលឹកថា បញ្ហាមិនតូចទេ ក្រោយហ៊ុនសែន ជានរណា? វាជាបញ្ហាដ៏ធំ។ សម្តេចបានដាក់ចេញជាសំណួរថា ប្រសិនបើស្លាប់ថ្ងៃនេះ ឬថ្ងៃស្អែក តើនឹងមានរឿងអ្វីកើតឡើង បើយើងមិនបានត្រៀមរៀបចំអ្នកបន្តវេន។ សម្តេចគោរពយ៉ាងជ្រាលជ្រៅចំពោះព្រះរាជតម្រិះ ព្រះមហាវីរក្សត្រ ដែលព្រះអង្គបានដាក់រាជ្យពេលនោះ ហើយរៀបចំឱ្យព្រះរាជបុត្ររបស់ព្រះអង្គបច្ចុប្បន្ន គ្រងរាជ្យ គឺ៨ឆ្នាំមុនពេលព្រះអង្គសោទិវង្គត។ នេះជាព្រះរាជតម្រិះដ៏អស្ចារ្យរបស់ព្រះវររាជបិតាជាតិយើង។
ម្ដេចតេជោ ហ៊ុន សែន នាយករដ្ឋមន្ត្រីរបស់កម្ពុជា បានកាន់តំណែងជានាយករដ្ឋមន្ត្រីពីថ្ងៃទី១៤ ខែមករា ឆ្នាំ១៩៨៥ គិតរហូតមកដល់ថ្ងៃទី២២ ខែសីហា ខាងមុខមានចំនួន ៣៨ឆ្នាំ ៧ខែ និង៨ថ្ងៃ គឺជានាយករដ្ឋមន្ត្រីដែលកាន់តំណែងយូរជាងគេបង្អស់មួយនៅលើពិភពលោក៕
