តេជោ៖លោកកឹមសុខាមិនទាន់ផុតទោសដោះលែងទេគឺគ្រាន់តែដូរកន្លែងឃុំប៉ុណ្ណោះ!តុលារការវាស់ដីឲ្យដើរ
27-March-2024 / ព័ត៌មានជាតិ
កំពង់ស្ពឺ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានអះអាងថា លោក កឹម សុខា មិនទាន់រួចទោសណាមួយទាំងអស់ ពោលគ្រាន់តែប្ដូរកន្លែងឃុំខ្លួនប៉ុណ្ណោះ ដោយក្នុងហេតុផលមនុស្សធម៌។
ថ្លែងនៅព្រឹកថ្ងៃទី១៩ ខែកញ្ញា ឆ្នាំ២០១៨នេះ ក្នុងឱកាសជួបសំណេះសំណាល ជាមួយកម្មករ-កម្មការិនី សរុបប្រមាណ២៧,៤៤៤នាក់ មកពីរោងចក្រ សហគ្រាសចំនួន២៤ នៅភូមិស្វាយទាប ឃុំអង្គពពេល ស្រុកគងពិសី ខេត្តកំពង់ស្ពឺសម្ដេចតេជោ ហ៊ុន សែន មានប្រសាសន៍ ថា «ខ្ញុំនិយាយបន្ដិចដើម្បីឲ្យអ្នកទាំងឡាយភ្លឺភ្នែក ថ្ងៃមុនសម្ដេចក្រឡាហោម ស ខេង បាននិយាយម្ដងហើយ ប៉ុន្ដែថ្ងៃនេះខ្ញុំគាត់តែបញ្ជាក់ អត់ទាន់រួចទោសទាំងអស់ គ្រាន់តែដូរទីតាំងឃុំឃាំងតែប៉ុណ្ណឹងទេ ក្រែងលោវាងាប់ក្នុងគុក វាបង្កើតរឿងដល់រាជរដ្ឋាភិបាល ចឹងក្នុងគោលដៅមនុស្សធម៌ និងរក្សាសុវត្ថិភាពពិរុទ្ធជន»។
សម្ដេចតេជោនាយករដ្ឋមន្ដ្រី បញ្ជាក់ថា នៅក្នុងប្រទេសកម្ពុជា មិនទាន់មានច្បាប់ឃុំខ្លួននៅក្នុងផ្ទះនោះទេ ដូច្នេះតុលាការ គ្រាន់តែកំណត់តំបន់មួយឲ្យអ្នកដែលត្រូវ ជាប់ឃុំនោះស្នាក់នៅ ហើយតុលាការអាចកំណត់ឲ្យនៅក្នុងផ្ទះតែម្ដង។ សូមបញ្ជាក់ថា លោក កឹម សុខា អតីតប្រធានគណបក្សសង្គ្រោះជាតិ ត្រូវបានតុលាការសម្រេចដោះលែង ឲ្យនៅក្រៅឃុំបណ្តោះអាសន្ន ក្រោមការត្រួតពិនិត្យ តាមផ្លូវតុលាការ នៅវេលាទៀបភ្លឺឈានចូលថ្ងៃទី១០ ខែកញ្ញា ឆ្នាំ២០១៨ ដោយសារតែបញ្ហាសុខភាពរបស់លោក បន្ទាប់ពីឃុំខ្លួននៅក្នុងពន្ធនាគារត្រពាំងផ្លុង (ម៣) រយៈពេលជាង១ឆ្នាំ។
បន្ថែមលើនេះនៅថ្ងៃទី១៩ ខែកញ្ញា ឆ្នាំ២០១៨នេះដែរ អ្នកនាំពាក្យអយ្យការអមសាលាដំបូងរាជធានីភ្នំពេញ បានចេញសេចក្តីថ្លែងការណ៍មួយ បញ្ជាក់ថា ករណីលោក កឹម សុខា អតីតប្រធានគណបក្សសង្គ្រោះជាតិ គឺពុំមែនជាករណីឃុំខ្លួននៅផ្ទះនោះទេ«ករណីជនត្រូវចោទឈ្មោះ កឹម សុខា ដែលត្រូវបានដាក់ឱ្យស្ថិតក្រោមការត្រួតពិនិត្យតាមផ្លូវតុលាការខាងលើនេះ ពុំមែនជាករណីនៃការឃុំខ្លួននៅក្នុងផ្ទះនោះទេ។
ការសម្រេចរបស់ចៅក្រមស៊ើបសួរក្នុងការហាមឃាត់ជនត្រូវចោទឈ្មោះ កឹម សុខា មិនឱ្យចាកចេញពីព្រំប្រទល់ដែនដីណាមួយជាកំណត់ គឺជាសិទ្ធិអំណាចរបស់ចៅក្រមស៊ើបសួរ ដែលធ្វើឡើងស្របតាមមាត្រា២២៣ កថាខណ្ឌទី២ ចំណុចទី១ នៃក្រមនីតិវិធីព្រហ្មទណ្ឌ ដោយផ្អែកលើហេតុផលផ្នែកសន្តិសុខសុវត្ថិភាពរបស់ជនត្រូវចោទ និងដើម្បីធានាថា ជនត្រូវចោទនឹងមិនរត់គេចខ្លួនពីនីតិវិធីតុលាការ»។
ការដោះលែងឱ្យនៅក្រៅឃុំបណ្តោះអាសន្ន ក្រោមការត្រួតពិនិត្យតាមផ្លូវតុលាការនេះ បានភ្ជាប់នូវលក្ខខណ្ឌចាំបាច់មួយចំនួនសម្រាប់ មេបក្សអតីតបក្សប្រឆាំងនេះ ដែលរួមមានដូចជា មិនអនុញ្ញាតឱ្យចេញក្រៅពីព្រំប្រទល់នៃដែនដីដែលខណ្ឌដោយផ្លូវលេខ៣១៣ ផ្លូវលេខ៣១១ និងផ្លូវលេខ៦០៨, ត្រូវឆ្លើយតបនឹងការកោះហៅពីគ្រប់បុគ្គលដែលចាត់តាំងដោយចៅក្រមស៊ើបសួរ, មិនត្រូវជួបអតីតថ្នាក់ដឹកនាំគណបក្សសង្គ្រោះជាតិ និងបុគ្គលឬជនបរទេសដែលពាក់ព័ន្ធនឹងសំណុំរឿង និង មិនត្រូវជួបជុំធ្វើសកម្មភាពនយោបាយជាដើម។
សេចក្តីថ្លែងការណ៍ បញ្ជាក់ថា៖ លោក កឹម សុខា ពេលនេះមានសេរីភាពគ្រប់គ្រាន់ក្នុងការចេញពីផ្ទះរបស់ខ្លួន ក្នុងព្រំប្រទល់ដែនដីដែលកំណត់ដោយដីការសម្រេចរបស់ចៅក្រមស៊ើបសួរ និងអាចប្រាស្រ័យទាក់ទងជាមួយបុគ្គលនានាដែលមិនស្ថិតនៅក្នុងក្របខណ្ឌបញ្ជីនៃការហាមឃាត់របស់តុលាការបាន តែមិនអាចជួបបុគ្គលដែលអាចមានការពាក់ព័ន្ធនឹងសំណុំរឿងជាមួយ លោក កឹម សុខា ហើយដែលតុលាការកំពុងមានចំណាត់ការនោះទេ។
អ្នកនាំពាក្យអយ្យការអមសាលាដំបូងរាជធានីភ្នំពេញ បានបញ្ជាក់បន្ថែមទៀតថា ហេតុផលផ្នែកសន្តិសុខ និងសុវត្ថិភាពផ្ទាល់ខ្លួនរបស់លោកកឹម សុខា គឺជារឿងសំខាន់ដែលចាំបាច់ត្រូវមានការចូលរួមសហការជាមុនរវាងសមត្ថកិច្ចតុលាការ និងសមត្ថកិច្ចពាក់ព័ន្ធនានា បូករួមនឹងការចូលរួមរបស់ភាគីជនត្រូវចោទផងដែរ ដើម្បីចៀសវាងយថាភាពអាក្រក់ណាមួយ ផ្នែកសុវត្ថិភាពលើរូបលោកពីតួអង្គខាងក្រៅ។
សូមបញ្ជាក់ថា លោក កឹម សុខា ប្រធានអតីតគណបក្សសង្គ្រោះជាតិ ត្រូវបានតុលាការចោទប្រកាន់ពីបទសន្ទិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ បន្ទាប់ពីធ្លាយចេញនូវវីដេអូមួយ បង្ហាញថា លោកធ្វើតាមការបង្គាប់បញ្ជារបស់បរទេស ដើម្បីផ្តួលរំលំរាជរដ្ឋាភិបាលកម្ពុជា ដោយយកលំនាំតាមប្រទេសស៊ែបី និងយូហ្គោស្លាវី។
រហូតដល់ពេលនេះ សំណុំរឿងរបស់លោក មិនបានបញ្ចប់នោះទេ ពោលតុលាការនៅតែកំពុងបន្តនីតិវិធីរបស់ខ្លួនចំពោះអំពើក្បត់ជាតិរបស់ លោក កឹម សុខា ដដែលបើទោះជាមានសំណើរពីបណ្តាប្រទេសលោកខាងលិចឲ្យទម្លាក់កាចោទនិងដោះលែងលោកក៏ដោយ៕
