ដឹងថាទាហ៊ានយួនចោលឆ្អឹងប៉ុន្មានទេពេលចូលនិងមានវត្តមានក្នុងស្រុកខ្មែរពីឆ្នាំ១៩៧៩ដល់១៩៨៩?
ភ្នំពេញ៖ នៅរសៀលថ្ងៃទី២៨ ខែមិថុនា ឆ្នាំ២០២៣ នៅទីបញ្ជាការតំបន់ប្រតិបត្តិការសឹករងកំពង់ធំ បានរៀបចំប្រារព្វពិធីធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតក្នុងសម័យសង្គ្រាមនៅកម្ពុជា ហើយត្រូវបានជីកគាស់រុករកបានក្នុងជំហានទី២ ដំណាក់កាលទី២២ នារដូវប្រាំងឆ្នាំ២០២២-២០២៣ នៅលើភូមិសាស្ត្រខេត្តកំពង់ធំ ដើម្បីធ្វើមាតុភូមិនិវត្តន៍ទៅកាន់ប្រទេសកំណើតវិញ។
លោកវរសេនីយ៍ឯក ង្វៀន ង៉ុកអាញ់ ប្រធានក្រុមបច្ចេកទេសជីករុករកអដ្ឋិធាតុកងទ័ពស្ម័គ្រចិត្តវៀតណាម K72 ខេត្តប៊ិញភឿក យោធភូមិភាគទី៧ នៃកងទ័ពប្រជាជនវៀតណាម ដែលធ្វើសកម្មភាពនៅខេត្តកំពង់ធំ បានរាយការណ៍ថា អដ្ឋិធាតុដែលបានជីករុករកឃើញនៅក្នុងភូមិសាស្ត្រខេត្តកំពង់ធំ នារដូវប្រាំងឆ្នាំ២០២២-២០២៣ នាពេលកន្លងមក ហើយត្រូវធ្វើមាតុភូមិនិវត្តន៍នៅពេលនេះមានចំនួន៥អដ្ឋិធាតុ។លោកបានបន្តថា សរុបក្នុងរយៈពេល២០ឆ្នាំកន្លងមក ចាប់ពីឆ្នាំ២០០៣ ដល់ឆ្នាំ២០២៣ ក្រុមការងារបច្ចេកទេសK70 និងK72 ជីកគាស់យកបានចំនួន ១.១៥២ អដ្ឋិធាតុ រួចមកហើយ ចំពោះចំនួនអដ្ឋិធាតុ ដែលនៅសេសសល់មួយចំនួនទៀត កំពុងធ្វើការស្រាវជ្រាវដើម្បីជីកគាស់លើកនិងធ្វើមាតុភូមិនិវត្តន៍ជាបន្តទៅទៀតនៅពេលខាងមុខ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាអនុប្រធានអចិន្ត្រៃយ៍គណៈកម្មាធិការជំនាញជីករុករកអដ្ឋិធាតុកងទ័ពស្ម័គ្រចិត្តវៀតណាម នៅលើភូមិសាស្ត្រខេត្តកំពង់ធំ បានថ្លែង ថា «ថ្ងៃនេះជាលើកទី២២ ដែលខេត្តកំពង់ធំបានប្រារព្ធធ្វើពិធីមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាម ដែលជីករុករកឃើញនៅក្នុងភូមិសាស្ត្រខេត្តកំពង់ធំ សរុបចំនួន ១.១៥២ អដ្ឋិធាតុរួចមកហើយ ដើម្បីធ្វើមាតុភូមិនិវត្តន៍វិលត្រឡប់ទៅកាន់មាតុប្រទេសកំណើតវិញ ក្នុងសកម្មភាពមនុស្សធម៌តាមកិច្ចព្រមព្រៀងរវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋសង្គមនិយមវៀតណាម»។
នៅខេត្តកណ្តាលនា រសៀលថ្ងៃទី២៧ ខែមិថុនា ឆ្នាំ២០២៣ ដែរតំបន់ប្រតិបត្តិការសឹករងកណ្ដាល បានរៀបចំពិធីប្រគល់-ទទួល អដ្ឋិធាតុកងទ័ពស្ម័គ្រចិត្តនិងជំនាញការវៀតណាម ជំហានទី២២ រដូវប្រាំងឆ្នាំ២០២២-២០២៣ ក្រោមអធិបតីភាពឯកឧត្ដម ណុប ដារ៉ា អភិបាលរងខេត្តកណ្ដាល និងឯកឧត្តម ឧត្តមសេនីយ៍ត្រី ហូ មិញគឿង ស្នងការរងនយោបាយ និងជាអនុប្រធានគណៈចង្អុលការ៥១៥ យោធភូមិភាគទី៩ នៃកងទ័ពប្រជាជនវៀតណាម។ ឯកឧត្ដម ណុប ដារ៉ា អភិបាលរងខេត្តកណ្ដាល បានអបអរសាទរយ៉ាងខ្លាំងជូនចំពោះលទ្ធផល នៃកិច្ចប្រតិបត្តិការក្នុងការជីកលើកអដ្ឋិធាតុកងទ័ពស្ម័គ្រចិត្តនិងជំនាញការវៀតណាម ជំហានទី២២ រដូវប្រាំងឆ្នាំ២០២២-២០២៣ រវាងអង្គភាពតំបន់ប្រតិបត្តិការសឹករងកណ្តាល និងក្រុម K90 យោធភូមិភាគ៩ នៃកងទ័ពប្រជាជនវៀតណាម។
បើតាមឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ បានឲ្យដឹងនាពេលកន្លងមកថា រាជរដ្ឋាភិបាលកម្ពុជា និងរដ្ឋាភិបាលវៀតណាម បានចុះហត្ថលេខាលើកិច្ចព្រមព្រៀងមួយ កាលពីថ្ងៃទី២៨ ខែសីហា ឆ្នាំ២០០០ កន្លងទៅ ស្តីពីការរុករកការប្រមូលផ្តុំ និងការធ្វើមាតុភូមិនិវត្តន៍អដ្ឋិធាតុរបស់កងទ័ពស្ម័គ្រចិត្តវៀតណាមដែលពលីក្នុងសម័យសង្គ្រាមនៅប្រទេសកម្ពុជា រហូតដល់បច្ចុប្បន្ននេះ ការរុករកអដ្ឋិធាតុ កងទ័ពស្ម័គ្រចិត្តវៀតណាម ដែលពលីនៅកម្ពុជា កំពុងបន្តយ៉ាងសកម្ម ខណៈដែលអដ្ឋិធាតុជាង១៧៨៥០នាក់ ត្រូវបានរកឃើញ និងប្រគល់ជូនភាគីវៀតណាម។តាមរបាយការណ៍របស់គណៈកម្មាធិការពិសេសស្វែងរកអដ្ឋិធាតុ នៅសល់អដ្ឋិធាតុរបស់ជនជាតិវៀតណាមជិត ៤ពាន់នាក់ទៀតនៅកម្ពុជា ដែលមិនទាន់ត្រូវបានរកឃើញ។ កម្ពុជា និងវៀតណាម បានកំណត់គោលដៅបញ្ចប់ការស្វែងរកអដ្ឋិធាតុជនជាតិវៀតណាមនៅកម្ពុជាទាំងអស់ ហើយធ្វើមាតុភូមិនិវត្តន៍វិញឲ្យបានត្រឹមឆ្នាំ២០២០។តែនៅធ្វើមិនទាន់អស់៕
