ចាំអ៊ុតមើលតើក្រុមការងាររចុះមូលដ្ឋានអាណត្តិថ្មី តើមន្ត្រីរូបណាត្រូវចុះទៅខេត្តណាខ្លះ?ក្មេងប៉ុន្មានចាស់ប៉ុន្មាន?
ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កំពុងរៀបចំសេចក្ដីព្រាង ក្រុមការងាររាជរដ្ឋាភិបាលចុះមូលដ្ឋានអាណត្តិថ្មី ថាតើមន្ត្រីរូបណា ត្រូវចុះទៅខេត្តណាខ្លះ នៅក្រោយការបោះឆ្នោតជ្រើសតាំង តំណាងរាស្ដ្រ នីតិកាលទី ៧?។នាល្ងាចថ្ងៃទី ១៩ ខែមិថុនា ឆ្នាំ ២០២៣នេះក្នុងកិច្ចប្រជុំបូកសរុបសកម្មភាព និងលទ្ធផលការងាររបស់ ក្រុមការងាររាជរដ្ឋាភិបាលចុះមូលដ្ឋានរាជធានី-ខេត្ត ក្នុងអាណត្តិរាជរដ្ឋាភិបាល សម្រាប់នីតិកាលទី ៦ នៃរដ្ឋសភា និងទិសដៅបន្ត ។សម្ដេចតេជោ ហ៊ុន សែន ថ្លែងថា «ក្នុងចំណុចនេះ កំពុងតែព្រាងដាក់ថា តើអ្នកណានឹងចុះទៅខេត្តណា ក្រោយការបោះឆ្នោតនឹងត្រូវរៀបចំឡើងវិញ ព្រោះអ្នកខ្លះនឹងបន្ត អ្នកខ្លះមិនបន្ត ហើយបើទោះបីជារដ្ឋាភិបាលនៅក្នុងក្រុមធីមចាស់បន្ត ក៏ត្រូវរៀបចំក្រុមធីមថ្មីក៏ត្រូវរៀបចំៗ ដើម្បីធ្វើម៉េចឲ្យមានសមាជិករដ្ឋាភិបាលចុះជួយតាមខេត្តនានាបន្តទៀត ដែលជាការផ្សារភ្ជាប់ខ្លួនជាមួយនឹងដំណើរការទាំងមូលរបស់ជាតិ ហើយជាពិសេសផ្សារភ្ជាប់ខ្លួនជាមួយនឹងមូលដ្ឋាន ដើម្បីជំរុញអនុវត្ត»។
ក្រៅពីការរៀបចំសមាសភាពថ្មីខ្លះសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានណែនាំឱ្យមន្ត្រីឱ្យបន្តចុះមូលដ្ឋានជាបន្តទៀត ក្រោយការបោះឆ្នោតរួចហើយ រហូតដល់រាជរដ្ឋាភិបាលថ្មីស្បថចូលកាន់តំណែងហើយ។សម្តេចតេជោ «ចំណុចនេះខ្ញុំសុំបញ្ជាក់ទុកឱ្យហើយ ពីនេះទៅដល់ការបោះឆ្នោតត្រូវតែធ្វើសកម្មភាព ពេលបោះឆ្នោតយើងត្រូវធ្វើដំណើរការគោរពតាមវិធាននៃការបោះឆ្នោត បន្ទាប់ពីការបោះឆ្នោតទៅហើយត្រូវចាំរាជរដ្ឋាភិបាលនេះអស់តំណែងនៅពេលដែលរាជរដ្ឋាភិបាលថ្មីស្បថចូលកាន់តំណែងថ្មីហើយ យើងអស់ហើយចឹងត្រូវចាំកន្លែងនឹង»។
សម្តេចតេជោ ហ៊ុន សែន ក៏បានប្រកាសដែរថា ពីពេលនេះដល់ថ្ងៃយុទ្ធនាការបោះឆ្នោតសម្តេចនឹងធ្វើសកម្មភាពរហូត និងផ្អាកតែថ្ងៃចាប់ផ្តើមបើកយុទ្ធនាការរហូតដល់ថ្ងៃបោះឆ្នោត ថ្ងៃទី២៣ ខែកក្កដា ឆ្នាំ២០២៣ ប៉ុន្តែចាប់ពីថ្ងៃទី២៧ ខែកក្កដាទៅ សម្តេចនឹងបន្តចុះជួបជាកម្មករចំនួន១០លើកបន្ថែមទៀត ព្រោះកិច្ចការនេះវាត្រូវដើរទៅពិនិត្យនូវអ្វីដែលរាជរដ្ឋាភិបាលសម្រេចបាន។សម្តេចតេជោ ហ៊ុន សែន ក៏បានបន្ថែមដែរថា ក្រុមការងារចុះមូលដ្ឋានទាំងអស់ គឺដាច់ខាតមិនត្រូវបោះបង់តួនាទីរបស់ខ្លួននៅក្នុងអណត្តិដែលខ្លួនមាននោះទេ ហើយសមាជិករដ្ឋសភាក៏ដូចគ្នាដែរ នៅក្នុងរដ្ឋធម្មន្នុញ បានចែងច្បាស់សភាមានអណត្តិ ៥ឆ្នាំ ហើយសភាមិនរំលាយមុនអណត្តិរបស់ខ្លួនបាននោះទេ លើកលែងតែសភា រំលាយរដ្ឋាភិបាល២ដង ហើយសភានឹងអស់អំណាចនៅពេលដែលសភាថ្មីចូលកាន់តំណែង ដូចនេះហើយត្រូវកំណត់ពីតួនាទីរបស់យើងឱ្យបានច្បាស់ ដើម្បីយើងធ្វើសកម្មភាពបន្តទៅទៀត។
សម្តេចតេជោ ហ៊ុន សែន បានថ្លែងបន្ថែមថា បន្ទាប់ពីចូលកាន់តំណែងរាជរដ្ឋាភិបាលនីតិកាលទី៧ នៃរដ្ឋសភា នឹងពិនិត្យរៀបចំកែរសម្រួលសមាសភាពក្នុងក្រុមការងាររាជរដ្ឋាភិបាល ចុះមូលរដ្ឋារាជធានី-ខេត្ត ឱ្យបានសមស្រប និងបន្តដាក់ចេញនូវគោលការណ៍ និងវិធានការនានា ដើម្បីបន្តពង្រឹងនិងលើកកម្ពស់ប្រសិទ្ធភាពក្រុមការងារចុះមូលដ្ឋានបន្តទៀត តាមរយៈការត្រួតពិនិត្យនិងគាំទ្រការអនុវត្តន៍កម្មវិធីនយោបាយ នឹងយុទ្ធសាស្ត្ររាជរដ្ឋាភិបាលទី៧នៃរដ្ឋសភា សំដៅឆ្ពោះទៅសម្រេចបាននូវចក្ខុវិស័យកម្ពុជាក្លាយជាប្រទេសមានចំណូលមធ្យមកម្រិតខ្ពស់ និងចក្ខុវិស័យឆ្នាំ២០៣០ ក្លាយជាប្រទេសដែលមានចំណូលខ្ពស់។
សម្តេចតេជោ បានគូសបញ្ជាក់យ៉ាងដូច្នេះថា៖ «នាពេលខាងមុខនេះ យុទ្ធសាស្ត្រចតុកោណដែលបានអនុវត្ត៤ដំណាក់កាលហើយ នឹងត្រូវបានផ្លាស់ប្តូរទៅជាយុទ្ធសាស្ត្របច្ចកោណ គឺមានមុំ៥ មិនមែនមុំ៤ទេ។ យើងបានចាប់ផ្តើមអនុវត្ត ក្នុងរយៈមួយអាណត្តិនូវយុទ្ធសាស្ត្រត្រីកោណ បន្ទាប់ទៅយើងអនុវត្តយុទ្ធសាស្ត្រចតុកោណទី១ ទី២ ទី៣ និងទី៤»។ក្រោយការបោះឆ្នោតជ្រើសរើសតំណាងរាស្ត្រនិតិកាលទី៧ បន្ទាប់ពីចូលកាន់ដំណែង រដ្ឋាភិបាលនឹងពិនិត្យរៀបចំកែសម្រួលសមាសភាព ក្នុងក្រុមការងាររាជរដ្ឋាភិបាលចុះមូលដ្ឋានរាជធានីខេត្តឱ្យបានសមស្រប និងបន្តដាក់ចេញនូវ គោលការណ៍និងវិធានការណ៍នានា ដើម្បីបន្តពង្រឹង និងលើកកម្ពស់ប្រសិទ្ធភាពក្រុមការងារចុះមូលដ្ឋានបន្តទៀតតាមរយៈការត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្ររាជរដ្ឋាភិបាល និតិកាលទី៧ នៃរដ្ឋសភាសំដៅឆ្ពោះទៅសម្រេចបាននូវចក្ខុវិស័យកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់ និងចក្ខុវិស័យឆ្នាំ២០៣០ ក្លាយជាប្រទេសដែលមានចំណូលខ្ពស់៕
សម្តេចក្រឡាហោម ស ខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ មានប្រសាសន៍ឲ្យដឹងថា «ក្រុមការងាររាជរដ្ឋាភិបាល ចុះមូលដ្ឋានគ្រប់លំដាប់ថ្នាក់ បានខិតខំបំពេញបេសកកម្ម ចុះមូលដ្ឋានដល់ភូមិ ឃុំ សង្កាត់ ចុះតាមខ្នងផ្ទះប្រជាពលរដ្ឋ និង រៀបចំវេទិកាសាធារណៈ ទៅតាមមូលដ្ឋានានា សំដៅធ្វើការស្វែងយល់ ជាក់ស្ដែងនូវបញ្ហាប្រឈមនានា របស់មូលដ្ឋាន និងក្ដីកង្វល់ សំណើ សំណូមពរ របស់ប្រជាពលរដ្ឋ»។សម្ដេច បន្ដថា ពិសេស ដើម្បីសម្របសម្រួលជំរុញដល់ក្រសួង-ស្ថាប័ន មន្ទីរអង្គភាព និងអាជ្ញាធរមូលដ្ឋានពាក់ព័ន្ធ ដើម្បីធ្វើការដោះស្រាយ ឆ្លើយតបនឹងតម្រូវការរបស់ប្រជាពលរដ្ឋ ការចូលរួមជំរុញការអភិវឌ្ឍន៍មូលដ្ឋាន ដូចជាការចូលរួមជំរុញល្បឿននៃកំណែទម្រង់នានារបស់រាជរដ្ឋាភិបាល សំដៅធ្វើការអភិវឌ្ឍន៍សេដ្ឋកិច្ច សង្គម និងកាត់បន្ថយភាពក្រីក្ររបស់ប្រជាពលរដ្ឋ»។
សម្ដេច ស ខេង ក៏បានសម្ដែងការកោតសរសើរ និងវាយតម្លៃខ្ពស់ចំពោះ ជាសមាជិក សមាជិការ នៃរាជរដ្ឋាភិបាល និងអ្នកពាក់ព័ន្ធទាំងអស់ បានធ្វើការប្ដេជ្ញាចិត្តគាំទ្រ និងចូលរួមយ៉ាងសកម្ម ក្នុងសកម្មភាពក្រុមការងារចុះមូលដ្ឋានានា នៅទូទាំងប្រទេសដែលបានរួមគ្នាថែរក្សា ពង្រឹងសន្ដិភាព ស្ថិរភាពនយោបាយ សន្ដិសុខ សណ្ដាប់ធ្នាប់សាធារណៈ និងអភិវឌ្ឍសង្គមលើគ្រប់វិស័យ សំដៅឈានឆ្ពោះទៅសម្រេចបានជោគជ័យ នៅកម្មវិធីនយោបាយ និងយុទ្ធសាស្ដ្រចតុកោណ ដំណាក់កាលទី៤ របស់រាជរដ្ឋាភិបាល សម្រាប់នីតិកាលទី៦ នៃរដ្ឋសភា។សូមបញ្ជាក់ថាសមិទ្ធិផលដែលរាជរដ្ឋាភិបាលអាណត្តិទី៦សម្រេចបានរួមមាន៖
១.រាជរដ្ឋាភិបាល រក្សាបានយ៉ាងរឹងមាំ នូវសុខសន្តិភាព ស្ថេរភាពនយោបាយ សណ្តាប់ធ្នាប់សាធារណៈទូទាំងប្រទេស ជាពិសេសរក្សាបាននូវស្ថេរភាពម៉ាក្រូសេដ្ឋកិច្ច ក្នុងស្ថានភាពដែល សភាពការណ៍ក្នុងតំបន់ និងពិភពលោក កំពុងមានការវិវត្តន៍ប្រែប្រួល យ៉ាងឆាប់រហ័ស និងប្រកបដោយគ្រោះថ្នាក់ ជាពិសេសសង្គ្រាមរុស្ស៊ីនិងអ៊ុយក្រែន រួមជាមួយនឹងការផ្ទុះឡើង នៃជំងឺកូវីដ១៩ ការប្រែប្រួលអាកាសធាតុដែលបង្ករមានផលវិបាក នៃការលូតលាស់សេដ្ឋកិច្ច ក្នុងតំបន់ និងពិភពលោក ។
២.រាជរដ្ឋាភិបាល បានជំរុញឲ្យអនុវត្តន៍ជាប្រចាំនូវកម្មវិធីកែទម្រង់អភិបាលកិច្ច ដែលជាស្នូលនៃយុទ្ធសាស្ត្រចតុកោណ មានភាពប្រទាក់ក្រឡាគ្នា សម្រេចបាននូវសមិទ្ធផល តាមការគ្រោងទុកទាំងការកែទម្រង់រដ្ឋបាលសាធារណៈ, ការកែទម្រង់ការគ្រប់គ្រងហិរញ្ញវត្ថុសាធារណៈ, ការកែទម្រង់វិមជ្ឈការ និងសហវិមជ្ឈការ, ការកែទម្រង់ច្បាប់ និងប្រព័ន្ធយុត្តិធម៌, ការកែទម្រង់កងកម្លាំងប្រដាប់អាវុធនិងកម្មវិធីកែទម្រង់តាមវិស័យនានា ដើម្បីធានាការលើកកំពស់ ក្នុងវិស័យសាធារណៈ និងការអភិវឌ្ឍន៍សង្គមសេដ្ឋកិច្ច ប្រកបដោយចីរភាពនិងសមធម៌។
៣.រាជរដ្ឋាភិបាល បានចាត់វិធានការមុត្រស្រួចក្នុងការគ្រប់គ្រងប្រកបដោយប្រសិទ្ធភាព និងទាន់ពេលវេលា នូវការឆ្លងរាលដាលនៃជំងឺកូវីដ១៩ ជាមួយនឹងវិធានការស្ដារ និងជំរុញកំ ណើនសេដ្ឋកិច្ច ដែលទទួលរងផលប៉ះពាល់ពីវិបត្តិជំងឺកូវីដ ១៩ ព្រមទាំងពង្រឹងប្រព័ន្ធគាំពារសង្គម ជំនួយសង្គម ដើម្បីជួយគាំពារដល់គ្រួសារក្រីក្រ និងជនងាយរងគ្រោះ ដែលងាយទទួលរងផលប៉ះពាល់ធ្ងន់ធ្ងរ ដោយវិបត្តិជំងឺកូវីដ១៩, គ្រួសាតក្រីក្ររងហានិភ័យ ក្នុងពេលមានសម្ពាធអតិផរណា និងគ្រួសារងាយរងហានិភ័យ ដែលរងផលប៉ះពាល់ធ្ងន់ធ្ងរពីគ្រោះ ទឹកជំនន់ ក្នុងរដូវវស្សា និងកម្មវិធីជំនួយសង្គមមួយចំនួនទៀត សម្រាប់ជាប្រយោជន៍ដល់គ្រួសារក្រីក្រ និងងាយរងគ្រោះទូទាំងប្រទេស។ ផ្អែកលើគោលនយោបាយ និងយុទ្ធសាស្ត្រដ៏ ត្រឹមត្រូវ និងកិច្ចខិតខំប្រឹងប្រែង ខាងលើនេះរាជរដ្ឋាភិបាល បានទប់លំនឹងសេដ្ឋកិច្ចសង្គម និង ជីវភាពប្រជាជន ឲ្យមានភាពប្រសើរឡើងតាមរយៈការស្ដារ និងជំរុញសេដ្ឋកិច្ចជាតិ ឲ្យមានកំណើនឡើងវិញ យ៉ាងឆាប់រហ័ស ។
៤.ចំពោះការអនុវត្តគោលនយោបាយការបរទេស ដែលក្នុងស្ថានភាពពិភពលោកកំពុងមានការវិវត្តប្រែប្រួល យ៉ាងឆាប់រហ័សរាជរដ្ឋាភិបាល បានអនុវត្តនូវគោលនយោបាយការបរទេស ឯករាជ្យ ផ្អែកលើច្បាប់ប្រកបដោយភាពបត់បែន ទៅនឹងការប្រែប្រួល និងសម្ពាធភូមិសាស្ត្រនយោបាយ ដោយធានាបាននូវឯករាជ្យ ការពារបាននូវឯករាជ្យ អធិបតេយ្យជាតិ សុខសន្តិភាព ស្ថេរភាព ដើម្បីផលប្រយោជន៍ជាតិ និងប្រជាជនកម្ពុជា។ ក្នុងក្របខណ្ឌតំបន់កម្ពុជា សម្រេចបានជោគជ័យយ៉ាងត្រចះត្រចង់ និងជាប្រវត្តិសាស្ត្រក្នុងតួនាទីជាប្រធានប្តូរវេន អាស៊ានឆ្នាំ ២០២២ និងការរៀបចំប្រកបដោយជោគជ័យ និងជាទីមោទនភាពជាតិដ៏ឧត្តុង្គឧត្តម នៅព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេមលើកទី១២ ដែលបានបញ្ចប់កាលពីពេលថ្មីៗនេះ កម្ពុជាក៏បានកំពុងចូលរួមដើរតួនាទីយ៉ាងសកម្មដោយសមភាព ជាមួយបណ្ដាប្រទេសក្នុងតំបន់ជាច្រើន ក្នុងសាកលលោក។
