វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3532 នាក់
ម្សិលមិញ 6677 នាក់
សរុប 14151108 នាក់
កំពត៖ ពាក់ព័ន្ធនឹងករណីមានការចាក់ដី និងធ្វើខឿនចូលក្នុងដៃព្រែកត្រពាំងរពៅដែលជាផ្លូវសម្រាប់ចរាចរណ៍ទូកនេសាទចេញចូលរបស់ប្រជានេសាទលោកម៉ៅធនិនអភិបាលខេត្តកំពត បន្ទាប់ពីជួបសំណេះសំណាលជាមួយប្រជាពលរដ្ឋក្រុងបូកគោរួចមក នៅព្រឹកថ្ងៃទី១៧ ខែមិថុនា ឆ្នាំ២០២៣ បានចុះទៅពិនិត្យដល់ទីតាំងជាក់ស្តែង ដោយមានការចូលរួមពីសំណាក់អាជ្ញាធរមូលដ្ឋាន និងមន្ទីរជំនាញពាក់ព័ន្ធ។
តាមការពិនិត្យមើលជាក់ស្តែងឃើញថា ទីតាំងនោះពិតជាមានការចាក់ដីចូលដៃព្រែក ដែលជាផ្លូវសម្រាប់ចរាចរណ៍ទូកនេសាទពិតប្រាកដមែន។ លោកអភិបាលខេត្តក៏បានបញ្ជាឱ្យម្ចាស់ទីតាំងខាងលើកាយចេញជាបន្ទាន់ ដោយធ្វើយ៉ាងណារក្សានូវជម្រៅទឹក និងទំហំទីតាំងតាមលំនាំដើម។ ជាមួយគ្នានេះដែរ លោកអភិបាលខេត្ត ក៏បានឱ្យអាជ្ញាធរមូលដ្ឋាន និងមន្ទីរជំនាញពាក់ព័ន្ធត្រូវចុះត្រួតពិនិត្យដោយផ្ទាល់ជាមួយម្ចាស់ទីតាំង ព្រមទាំងអនុវត្តតាមការណែនាំខាងលើឱ្យបានឆាប់បំផុត។
ទន្ទឹមនឹងនោះដែរ លោកអភិបាលខេត្តក៏បានប្រាប់ទៅកាន់អាជ្ញាធរមូលដ្ឋានចុះត្រួតពិនិត្យឱ្យបានញឹកញាប់ និងណែនាំប្រជាពលរដ្ឋដែលរស់នៅតាមបណ្តោយដៃព្រែកត្រពាំងរពៅនេះ កុំឱ្យមានការចាក់ដីរំលោភយកចំណីព្រែកដែលជាផ្លូវទឹកធម្មជាតិ ដោយរក្សាឱ្យបាននូវទំរង់ដែលមានពីដើមមក។ ប្រសិនបើអ្នកដែលបំពាន មានចរិតរឹងរួស មិនព្រមសហការជាមួយអាជ្ញាធរ និងមន្ត្រីជំនាញ ត្រូវអនុវត្តទៅតាមនីតិវិធីច្បាប់ដោយគ្មានការលើកលែង។សូមបញ្ជាក់ថាអភិបាលខេត្តកំពត លោក ម៉ៅ ធនិន តែងតែលើកឡើងថា អ្នកណាយកដីគេ ឱ្យគេវិញ អ្នកណាយកដីរដ្ឋ ឱ្យរដ្ឋវិញ ហើយប្រព័ន្ធច្បាប់មិនលើកលែងចំពោះអ្នកដែលប្រព្រឹត្តអំពើដែលខុសច្បាប់នោះឡើយ។ អ្នកដែលបានដឹងខ្លួនដែលប្រព្រឹត្តអំពើផ្ទុយពីច្បាប់ ឬរំលោភបំពានដីរដ្ឋសូមប្រគល់ជូនរដ្ឋវិញ។