វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5705 នាក់
ម្សិលមិញ 5378 នាក់
សរុប 14084998 នាក់
ភ្នំពេញ ៖ លោកស្រី Tina Redshaw ឯកអគ្គរាជទូត វិសាមញ្ញនិងពេញសមត្ថភាពនៃចក្រភពអង់គ្លេសនិងអៀឡង់ខាងជើងក្នុងជំនួបពិភាក្សាការងារជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៅថ្ងៃទី១៦ ខែធ្នូ ឆ្នាំ២០២០បានឲ្យដឹងថា ចាប់ពីថ្ងៃទី០១ ខែមករា ឆ្នាំ២០២១ តទៅ ចក្រភពអង់គ្លេស(ដែលចេញផុតពីសហគមន៍អឺរ៉ុបទៅមានឬគ្មានកិច្ចព្រមព្រៀង)នឹងអនុវត្តនូវគោលនយោបាយពាណិជ្ជកម្មឯករាជ្យ។
អង់គ្លេសបានសំរេចថានឹងមិនបន្តអនុវត្តការព្យួរមួយផ្នែកនៃប្រពន្ធ័អនុគ្រោះពន្ធរបស់ សហភាពអឺរ៉ុបក្នុងក្របខ័ណ្ឌប្រព័ន្ធអនុគ្រោះពន្ធលើគ្រប់មុខទំនិញទាំងអស់លើកលែងតែសព្វាវុធ មកលើកម្ពុជាទៀតទេ លោកស្រីទូត បានមានប្រសាសន៍ថា ចក្រភពអង់គ្លេសកំពុងរិះរកវិធី ដើម្បីបង្កើតកិច្ចសន្ទនាទៀងទាត់ជាមួយអាជ្ញាធរមានសមត្ថកិច្ចកម្ពុជាលើបញ្ហាផ្សេងៗពាក់ព័ន្ធនិងវិស័យសិទ្ធិមនុស្ស និងសេរីភាព ផ្សេងៗទៀត។
លោកឧបនាយករដ្ឋមន្ត្រី ប្រាក់ សុខុន បានសម្តែងការកោតសរសើរយ៉ាងខ្លាំង ចំពោះការសំរេចចិត្តរបស់ចក្រភពអង់គ្លេសនេះ ដោយបានចាត់ទុកការសំរេចចិត្តនេះថា ជាការជំរុញ និងលើកទឹកចិត្តដល់រាជរដ្ឋាភិបាលកម្ពុជា ហើយថា ការសំរេចចិត្តនេះគឺពិតជាដំណឹងល្អសំរាប់កម្មករកម្ពុជានៅពេលដែលពួកគេកំពុងទទួលរងផលប៉ះពាល់ពីមហន្តរាយនៃជំងឺកូវីដ-១៩។
ដោយឡែកសហរដ្ឋអាមេរិកសម័យលោកដូណាល់ត្រាំដែលលើកទឹកចិត្តឲ្យចក្រភពអង់គ្លេសដើរចេញពីអឺរ៉ុប កាលពីថ្ងៃពុធទី១៦ ខែធ្នូឆ្នាំ២០២០ បានចុះហត្ថលេខាលើកិច្ចព្រមព្រៀងគយដែលបានកំណត់ដើម្បីភ្ជាប់ជាមួយការចាកចេញរបស់ចក្រភពអង់គ្លេសពីសហភាពអឺរ៉ុបនៅដំណាច់ឆ្នាំនេះ។ សេចក្តីថ្លែងការណ៍មួយ នៅលើគេហទំព័ររដ្ឋាភិបាលចក្រភពអង់គ្លេស បានបញ្ជាក់ថា កិច្ចព្រមព្រៀងជំនួយគយទ្វេភាគីនេះត្រូវបានចុះហត្ថលេខាដោយរដ្ឋមន្ត្រីហិរញ្ញវត្ថុ រតនាគារ លោក Jesse Norman និងឯកអគ្គរដ្ឋទូតសហរដ្ឋអាមេរិក លោក Robert Wood Johnson នៅឯពិធីចុះហត្ថលេខានៅឯស្ថានទូតសហរដ្ឋអាមេរិកនៅទីក្រុងឡុងដ៏។«នេះ គឺជាកិច្ចព្រមព្រៀងដ៏សំខាន់មួយដែលធានានូវការបន្តចាកចេញពីសហភាពអឺរ៉ុប និងបង្ហាញអំពីភាពខ្លាំងនៃទំនាក់ទំនងគយរវាងសហរដ្ឋអាមេរិក និងចក្រភពអង់គ្លេស»។
សូមជម្រាបថា កិច្ចព្រមព្រៀងនេះ នឹងអនុញ្ញាតឱ្យមានការផ្លាស់ប្តូរយ៉ាងរលូននូវទំនាក់ទំនងពាណិជ្ជកម្មគយ ដែលមានស្រាប់ រួមទាំងការចែករំលែកទិន្នន័យ ដើម្បីដោះស្រាយការក្លែងបន្លំពន្ធគយដែលភាគីទាំងពីរបានរក្សាក្នុងក្របខ័ណ្ឌសហភាពអ៊ឺរ៉ុបពីមុន។គួរបញ្ជាក់ថា កិច្ចព្រមព្រៀងនេះ ត្រូវបានធ្វើឡើងដាច់ដោយឡែកពីកិច្ចព្រមព្រៀងពាណិជ្ជកម្មសេរីខ្ពស់ក្រោមកិច្ចចរចារវាងភាគីទាំងពីរដែលត្រូវបានគេរំពឹងថាជាចំណុចកណ្តាលនៃបរិយាកាសសេដ្ឋកិច្ចក្រោយ Brexit របស់ចក្រភពអង់គ្លេស៕