វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 142 នាក់
ម្សិលមិញ 5378 នាក់
សរុប 14079435 នាក់
ស្វីស៖ អង្គការសុខភាពពិភព( WHO )បានសម្រេចអនុម័តដាក់ឱ្យប្រើប្រាស់វ៉ាក់សាំងកូវីដ១៩ ជាបន្ទាន់របស់ក្រុមហ៊ុន BioNTech-Pfizer ដែលធ្វើឲ្យវ៉ាក់សាំង BioNTech-Pfizer ក្លាយជាវ៉ាក់សាំងដំបូងគេដែលទទួលបានការយល់ព្រមពី WHO ។
លោកវេជ្ជបណ្ឌិត Mariangela Simaoជំនួយការអគ្គនាយកអង្គការ WHO បានមានប្រសាសន៍ក្នុងសេចក្តីថ្លែងការណ៍ថា៖ ការអនុម័តនេះ គឺជាជំហានវិជ្ជមានមួយដែលធានាឱ្យប្រទេសទាំងអស់ទទួលយកវ៉ាក់សាំងកូវីដ១៩ នេះមកប្រើប្រាស់។ ក្នុងនោះ ខ្ញុំចង់សង្កត់ធ្ងន់ជាពិសេសទៅលើតម្រូវការក្នុងការទទួលបានវ៉ាក់សាំងមួយ ដែលមានប្រសិទ្ធភាពឱ្យបានទូលំទូលាយ និងមានការផ្គត់ផ្គង់វ៉ាក់សាំងគ្រប់គ្រាន់សម្រាប់ឆ្លើយតបទៅនឹងតម្រូវការរបស់ប្រជាជនដែលងាយរងគ្រោះគ្រប់ទិសទី។
លោកវេជ្ជបណ្ឌិត Mariangela Simaoបន្តថា៖ WHO និងដៃគូការងាររបស់យើង កំពុងធ្វើការទាំងយប់ទាំងថ្ងៃ ដើម្បីវាយតម្លៃប្រសិទ្ធភាពវ៉ាក់សាំងដទៃទៀតមុននឹងសម្រេចអនុម័ត ដែលឥឡូវនេះវ៉ាក់សាំងមួយចំនួនបានឈានដល់កម្រិតអាចធានាសុវត្ថិភាព និងប្រសិទ្ធភាពបានហើយ។ យើងលើកទឹកចិត្តឱ្យក្រុមហ៊ុនអភិវឌ្ឍវ៉ាក់សាំងទាំងអស់ដាក់របាយការណ៍ស្តីពីវ៉ាក់សាំងរបស់ខ្លួនស្នើមកកាន់ពួកយើង ដើម្បីពិនិត្យ និងវាយតំលៃបន្ត ពីព្រោះវាចាំបាច់ណាស់ដែលយើងត្រូវការធានាវ៉ាក់សាំងមួយដែលមានប្រសិទ្ធភាពជាចាំបាច់ ដើម្បីបម្រើប្រទេសទាំងអស់ជុំវិញពិភពលោក ក៏ដូចជាទប់ស្កាត់ការរាតត្បាតនៃជំងឺនេះផងដែរ។
ក្រៅពីការអនុម័តរបស់ WHO ទីភ្នាក់ងារ UN ក៏ធ្លាប់បញ្ជាក់កាលពីពេលកន្លងទៅផងដែរថា៖ វ៉ាក់សាំងរបស់ក្រុមហ៊ុន BioNTech-Pfizer បានបំពេញតាមលក្ខណៈវិនិច្ឆ័យកំណត់ដោយ WHO ត្រឹមត្រូវដែលអាចធានាបាននូវសុវត្ថិភាព និងប្រសិទ្ធភាពរបស់វា ហើយអត្រាហានិភ័យដែលអាចនឹងកើតមានក្នុងការប្រើប្រាស់វ៉ាក់សាំងនេះក៏តិចដែរ។
គួរបញ្ជាក់ថា WHO បានចូលរួមជាចំណែកមួយក្នុងកិច្ចខិតខំប្រឹងប្រែងជាសកលក្នុងការធានានូវសុវត្ថិភាពរបស់វ៉ាក់សាំង ក៏ដូចជាចែកចាយវ៉ាក់សាំងជូនដល់ប្រទេសក្រីក្រផងដែរ។ ក្នុងនោះគំនិតផ្តួចផ្តើមនៃគម្រោងដែលមានឈ្មោះថា COVAX របស់ WHO មានគោលបំណងផ្តល់នូវវ៉ាក់សាំងជិត ២ ពាន់លានដូស ជូនប្រទេសក្រីក្រនៅដើមឆ្នាំ ២០២១ នេះ៕