គ្រួសារគ្រូប្រដាល់អេភូថងនាំគ្នាបួសតែមិនឃើញមានវត្តមានសិស្សសំណព្វធឿនធារ៉ា
19-November-2024 / សុខភាពនិងកីឡា
ភ្នំពេញ ៖ អតីតអ្នកប្រដាល់ជើងខ្លាំងរហស្សនាមកែងឆេះ ជង្គង់ទិព្វ អេ ភូថង និង កូនប្រុស២រូបដែលសុទ្ធតែជាកីឡាករជើងខ្លាំងនៅក្នុងពិភពប្រដាល់នាពេលបច្ចុប្បន្នគឺកីឡាករ ម៉ឺន មេឃា និងអេ អាំម៉ារីនភូថងបាន មកបួសនៅឯវត្តទួលអង្គក្រពើ ស្ថិតក្នុងខណ្ឌព្រែកព្នៅ រាជធានីភ្នំពេញ កាលពីប៉ុន្មានថ្ងៃកន្លងទៅនេះតែមិនមានវត្តមានកីឡាជើងខ្លាំងធឿនធារ៉ាដែលជាសិស្សសំណព្វឡើយ។លោកអេ ភូថង បានបញ្ជាក់ប្រាប់ក្នុងវីដេអូបង្ហោះដោយគណនីហ្វេសប៊ុកឈ្មោះ Seng Moliny Journalist នៅព្រឹកថ្ងៃទី ០២ ខែមិថុនា ឆ្នាំ ២០២៣ ឱ្យដឹងថា គឺក្នុងគោលបំណងបំពេញកតវេទីជាកូនកតញ្ញូ សងគុណលោកឪពុកអ្នកម្ដាយរបស់លោក។
អ្នកស្រី សាំង សុម៉ាលី ភរិយាលោកអេភូថងបានបញ្ជាក់ប្រាប់ពីការសាងផ្នួសរបស់ប្ដីនិងកូនៗថា ម៉ឺន មេឃា បានសុំគាត់បួសតាំងពីអាយុជាង១០ឆ្នាំដើម្បីសងគុណឪពុកម្ដាយ តែពួកគាត់មិនយល់ព្រមចេះតែបង្អាក់ ព្រោះខ្លា.ចកូនបួសហើយមិនព្រមសឹកវិញ ។ លុះក្រោយពីឡើងវាយដណ្ដើមបានខ្សែក្រវាត់ជាលើកទី១នៅសង្វៀនCNC ម៉ឺន មេឃា បានសុំបួសទៀត តែគាត់មិនយល់ព្រមទេ ខណៈកូនប្រុសរូបនេះនៅតែចិញ្ចឹមចិត្តចង់បួសដដែល។អ្នកស្រីសាំង សុម៉ាលី បន្តថា ប្តីរបស់គាត់លោកអេ ភូថង បាននិយាយថា បើកូនៗបួស គាត់ក៏សុំបួសដែរព្រោះកាលម្ដាយគាត់ខូចគាត់ចង់បួសសងគុណតែមិនបានបួស។ ដើម្បីបំពេញបំណងកូនៗនិងស្វាមី អ្នកស្រីក៏យល់ព្រមឱ្យបួសជុំគ្នាតែម្ដងទៅកុំឱ្យខាតបង់ពេលវេលា និងម្ហូបអាហារ ដែលការបួសនោះដោយទាំងកូនប្រសាម្នាក់ទៀតដែលបានសុំគាត់បួសសងគុណឪពុកម្ដាយគេដែរ ។
នៅក្នុងពិធីបំបួសលោកអេ ភូថង និងកូនៗរបស់លោកនេះដែរ តាមប្រភពព័ត៌មានថា គេមិនឃើញវត្តមានកីឡាករធឿន ធារ៉ា ដែលជាកូនសិស្សសំណព្វរបស់លោកអេ ភូថង ចូលរួមទេ ក្នុងពេលព័ត៌មានផ្លាស់ក្លិបរបស់កីឡាកររូបនេះក៏កំពុងផ្ទុះខ្លាំងនៅលើបណ្ដាញសង្គមផងដែរ បន្ទាប់ពីលោកអេ ភូថង បានទម្លាយរឿងនេះ ។ ទោះបីយ៉ាងណា ព័ត៌មានផ្លាស់ក្លិបរបស់កីឡាករធឿន ធារ៉ា ត្រូវបានស្ងប់ស្ងាត់បន្តិចទៅវិញ បន្ទាប់ពីកីឡាកររូបនេះចេញមុខបដិសេធនៅចំពោះមុខអ្នកសារព័ត៌មាននាពេលចុងក្រោយថា រូបគេមិនបានចុះហត្ថលេខាលើកិច្ចសន្យាផ្លាស់ក្លិបជាមួយអ្នកណាទេ។
សូមបញ្ជាក់ថាប៉ុន្មានថ្ងៃមុននេះ ភរិយាលោកគ្រូ អេ ភូថង បានបង្ហើបទាំងអារម្មណ៍ហាក់មិនសប្បាយចិត្តថា៖ «កីឡាករ ធឿន ធារ៉ា អាចនឹងឃ្លាតឆ្ងាយពីសង្វៀន ព្រោះពេលនេះ កំពុងមមាញឹកនឹងការងារសិល្បះ ជាតារាចម្រៀង និងការថតស្ពតអីជាដើម ហើយគេមិនទាន់ចង់ឡើងប្រកួតទាំងមិនបានហាត់ពេញលេញទេ ខ្លាចហ្វេនខកចិត្តម្តងទៀត»។ តែក្រោយភរិយាគ្រូរបស់ខ្លួន បាននិយាយបែបនេះ មិនចាំយូរ កីឡាកររូបនេះ ក៏បានឆ្លើយថា ពេលទំនេរដៃបន្តិច គេនឹងមកហាត់វិញ និងទទួលការប្រកួតធម្មតាវិញផងដែរ។កាលពីយប់ថ្ងៃទី០១ ខែមិថុនា ឆ្នាំ២០២៣) លោកគ្រូ អេ ភូថង បានធ្វើឲ្យមហាជន កាន់តែភ្ញាក់ផ្អើល បន្ទាប់ពីបានចេញមុខនិយាយទាំងអារម្មណ៍មិនសប្បាយចិត្ត និងខកចិត្តយ៉ាងខ្លាំងបែបនេះថា៖ «ថ្ងៃនេះផុសរាងយប់បន្តិចហើយទម្រាំដាច់ចិត្តហ៊ានផុស ព្រោះគេធំ ខ្ញុំ អេ ភូថង មិនដឹងអីផងហេតុអ្វីបានជាទៅស៊ីញ៉េកុងត្រាសិស្សរបស់ខ្ញុំ អោយទៅអ្នកដទៃ ដោយមិនបានសួរខ្ញុំមួយមាត់?
លោកគ្រូ អេ ភូថង ក៏បានសួរទៅកាន់អ្នកដណ្តើមនោះថា «ចុះកាលពេល 5 ទៅ 6 ឆ្នាំមុន សិស្សខ្ញុំមិនទាន់ល្បី ហេតុអីអ្នកមិនដណ្ដើមយកសិស្សខ្ញុំទៅ? ហើយអ្នកដែលទៅចុះកុងត្រាអោយគេនឹងកាលពីសិស្សធ្លាក់ខ្លួនមិនទាន់ល្បីហេតុអ្វីមិនមើលថែគាត់ផង? ដល់ពេលខ្ញុំសាងកេរ្តិ៍ឈ្មោះអោយគាត់បានល្បី ហេតុអ្វីអ្នកឯងទៅស៊ីញ៉េកុងត្រា ដោយមិនបានប្រាប់ខ្ញុំអីមួយមាត់ចឹង ? ឃើញខ្ញុំតូចទាបជាងអ្នក គិតថាខ្ញុំមិនដល់មែនទេឃើញខ្ញុំមិនមាត់កុំថាខ្ញុំភ្លើអោយសោះ ! ខ្ញុំត្រឹមតែអតីតកីឡាករជើងចាស់មួយរូបតែប៉ុណ្ណោះគ្មានខ្សែហ៌ដូចអ្នកទេ តែសូមចេះអោយតម្លៃខ្ញុំផង ! មិនចប់ដោយស្រួលៗនោះទេ ?»។ លោក អេ ភូថង ពុំបានបញ្ចេញឈ្មោះថាជាកូនសិស្សម្នាក់ណានោះទេ តែមហាជនជាច្រើន គិតថាច្បាស់ជា កីឡាករ ធឿន ធារ៉ា តែម្តង ខណៈកីឡាករមួយរូប បានប្រាប់ទៅអ្នកចង់ដឹងថា មិនមែនជា ធារ៉ា នោះទេ។ ហេតុនេះ យើងទាំងអស់គ្នា មានតែរង់ចាំមើល ថាតើកីឡាកររូបណាជាអ្នកក្បត់គ្រូ!!៕
