រត់បានចម្ងាយផ្លូវជិត៣ពាន់គីឡូម៉ែត្រលោកសាយទទួលបានទឹកប្រាក់ជាង ៤០ម៉ឺនដុល្លារសម្រាប់ជួយសុខភាពកុមារកម្ពុជា
06-June-2026 / សុខភាពនិងកីឡា
សៀមរាប៖ នៅ ក្នុងកម្មវិធី ( រត់ដើម្បីសប្បុរសធម៌ជាមួយសាយ ) ដើម្បីរៃអង្គាសថវិកាជួយដល់មន្ទីរពេទ្យកុមារអង្គរ ដែលកំពុងរងផលប៉ះពាល់ដោយជំងឺ កូវីដ-១៩ លោក អូន បឋមហៅសាយរកបានថវិកាចំនួន ៤០ម៉ឺន៥ពាន់៥៧៩ដុល្លាសហរដ្ឋអាមេរិកហើយពីអ្នកចូលរួម។
ដោយ លោក អូន បឋម ដែលបងប្អូនគ្រួសារខ្មែរយើងស្គាល់ឈ្មោះថា (សាយ) ជាតារាចម្រៀងដ៏មានឈ្មោះបោះសំឡេងនៅកម្ពុជា មកជាមួយសហភាពសហព័ន្ធយុវជនកម្ពុជា បានធ្វើដំណើររត់ជុំវិញព្រះរាជណាចក្រកម្ពុជា ដោយឆ្លងកាត់រាជធានី ខេត្តជាច្រើន ហើយបានមកដល់ក្រុងសៀមរាប ខេត្តសៀមរាប នាព្រឹកថ្ងៃទី ២៣ ខែ វិច្ឆិកា ឆ្នាំ២០២០ ក្រោមវត្តមានទទួលស្វាគមន៍របស់លោក ពៅ ពិសិដ្ឋ អភិបាលរង នៃគណៈអភិបាលខេត្តនិងលោកជំទាវទៀងអេងទៀសីហា តំណាងដ៏ខ្ពង់ខ្ពស់ លោក ទៀ សីហា អភិបាលខេត្ត ដោយមានការចូលរួមពីថ្នាក់ដឹកនាំមន្ទីរ អាជ្ញាធរក្រុង ស្រុក និង សភាពសហព័ន្ធយុវជនកម្ពុជាខេត្ត ក្រុង ស្រុក ដើម្បីចូលរួមលើកទឹកចិត្តចំពោះលោក”សាយ” និងសហការី ដើម្បីសុខភាព ក៏ដូចជាការចូលរួមជាមួយកម្មវិធី «រត់ដើម្បីសប្បុរសធម៌ជាមួយសាយ» ដើម្បីប្រមូលថវិកា ក្នុងការទ្រទ្រង់នូវសកម្មភាពនៃការព្យាបាលកុមារកម្ពុជា ដោយឥតគិតថ្ងៃ របស់មន្ទីរពេទ្យកុមារអង្គរ ។
ក្នុងសកម្មភាព«រត់ដើម្បីសប្បុរសធម៌ជាមួយសាយ»លោកសាយ មកដល់ទឹកដីខេត្តសៀមរាប នៅល្ងាចថ្ងៃទី២១ វិច្ឆិកាដល់ស្រុកក្រឡាញ់ ហើយនៅល្ងាចថ្ងៃទី ២២វិច្ឆិកា បានមកដល់ស្រុកពួក និង នៅព្រឹកថ្ងៃទី២៣ បានបន្តមកដល់ ក្រុងសៀមរាប ដោយមានបងប្អូនប្រជាពលរដ្ឋ សិស្សានុសិស្ស បានទទួលស្វាគមន៍នៅតាមដងផ្លូវ រហូតមកដល់ព្រះរាជដំណាក់សៀមរាប បានចូលធ្វើការបូជាផ្កាភ្ញី ទៀន ធូក ថ្វាយព្រះអង្គចេកព្រះអង្គចម ដើម្បីបួងសួងសុំនូវសេចក្តីសុខជូន ដល់ប្រជាពលរដ្ឋកម្ពុជា សំខាន់កុមារកម្ពុជា ដែលជាធនធានមនុស្សក្នុងការបន្តវេន ក្នុងកិច្ចអភិវឌ្ឍប្រទេសជាតិ ឲ្យបាន ឆ្លងរួចផុតពីជំងឺ ទាំងពួង សំខាន់ជំងឺ កូវិដ១៩ ។
លោក អ៊ួន បឋម ហៅសាយ ដែលជាអ្នកផ្តួចផ្តើមយុទ្ធនាការនេះ បានឲ្យដឹងថា ក្នុងយុទ្ធនាការនេះលោកនឹងរត់ក្នុងរយៈពេល ៩៩ថ្ងៃ ចេញពីរាជធានីភ្នំពេញ ទៅ ២១ខេត្ត-ក្រុង ក្នុងប្រទេសកម្ពុជា ដោយចាប់ផ្ដើមពីថ្ងៃទី០៦ ខែតុលា ដែលជាថ្ងៃកំណើតផ្ទាល់របស់លោក ដោយក្នុងមួយថ្ងៃតម្រូវឲ្យរត់ចម្ងាយប្រមាណ ៤០គីឡូម៉ែត្រ។ រាល់មូលនិធិទាំងអស់ដែលទទួលបានពីសប្បុរសជនដែលគាំទ្រសកម្មភាពនេះ នឹងត្រូវឧបត្ថម្ភដោយផ្ទាល់ជូនទៅមន្ទីរពេទ្យកុមារអង្គរ ហើយយុទ្ធនាការនេះ គ្រោងបញ្ចប់នៅថ្ងៃទី១៣ ខែមករា ឆ្នាំ២០២១ នៅរាជធានីភ្នំពេញ ដោយរំពឹងថា នឹងរកថវិកាបានមួយលានដុល្លារជូនមន្ទីរពេទ្យកុមារអង្គរមួយនេះ។
រយៈពេល ៤៩ថ្ងៃ នៃយុទ្ធនាការ ”រត់ដើម្បីសប្បុរសធម៌ជាមួយសាយ” គិតចាប់ពីថ្ងៃទី០៦ ខែតុលា ឆ្នាំ២០២០ រហូតមកដល់ថ្ងៃទី២៣ ខែវិច្ឆិកានេះមានរយៈពេល៤៩ថ្ងៃ នៃយុទ្ធនាការ “រត់ដើម្បីមនុស្សធម៌ជាមួយសាយ ឬ Run with Sai” ដើម្បីរកមូលនិធិពីសប្បុរសជន សម្រាប់ទ្រទ្រង់មន្ទីរពេទ្យកុមារអង្គរ ដែលបច្ចុប្បន្ននេះពេទ្យសប្បុរសមួយនេះកំពុងប្រឈមនឹងបញ្ហាហិរញ្ញវត្ថុ ដោយសារវិបត្តិជំងឺ កូវីដ១៩ ។ តាមគម្រោងដែលរៀបចំឡើងដោយតារាចម្រៀងសាយ យុទ្ធនាការនេះ នឹង ប្រើពេល៩៩ថ្ងៃ ដើម្បីរត់នៅលើចម្ងាយផ្លូវជិត៣ពាន់គីឡូម៉ែត្រ បានឆ្លងកាត់២១ រាជធានី-ខេត្ត ។
