មានបទល្មើសមិនបង្ក្រាបបែជាប៉ូលិសក្អមសំណរចាប់អ្នកកាសែតដែលថតនិងរាយការណ៍ពីបទល្មើសទៅវិញ
27-October-2025 / ព័ត៌មានជាតិ
ខេត្តកណ្តាល៖មេប៉ុស្តិ៍ប៉ូលិសប្រចាំច្រកទ្វារអន្តរជាតិព្រំដែនកម្ពុជារៀតណាមក្អមសំណ ស្រុកលើកដែក ខេត្តកណ្តាល លោក រឹម លឹមសេង បានលើកឡើងនៅមុខអ្នកសារព័ត៌មាន ថា បើប្រជាពលរដ្ឋ និងអ្នកសារព័ត៌មានរូបណា ហ៊ានថតផ្តិតរូបភាពបទល្មើសដែលមាននៅក្នុងដែនសមត្ថកិច្ចរបស់លោក និងត្រូវធ្វើការនាំខ្លួនយកមកប៉ុស្តិ៍នគរបាលច្រកទ្វារព្រំដែនអន្តរជាតិក្អមសំណ ដើម្បីធ្វើកិច្ចសន្យា។
កាលលើកឡើងនេះ ធ្វើបន្ទាប់ពីក្រុមការងារ សមាគមសម្ព័ន្ធយុវជនសារព័ត៌មានដើម្បីសន្តិភាព ធ្វើលិខិតស្នើសុំការបំភ្លឺជាផ្លូវការ ជុំវិញទៅលើករណីកម្លាំងសមត្ថកិច្ចអន្តោប្រវេសន៍ ឃាត់ខ្លួនអ្នកសារព័ត៌មាន និងបង្ខំឲ្យផ្តិតមេដៃ លើលិខិតកិច្ចសន្យា ដើម្បីជាថ្នូរមិនឲ្យបញ្ចេញនូវរូបភាព ថែមទាំងបង្កឲ្យខូចខាតទ្រព្យសម្បត្តិ បែកទូរស័ព្ទ កាលពីថ្ងៃទី២៨ ខែមករា ឆ្នាំ២០២៣ កន្លងទៅថ្មីៗនេះ។ លោក រឹម លឹមសេង តួនាទីជាមេប៉ុស្តិ៍នគរបាលច្រកទ្វារព្រំដែនអន្តរជាតិក្អមសំណ បានបញ្ជាក់ប្រាប់អ្នកសារព័ត៌មាន នៅក្នុងថ្ងៃទី២០ ខែកុម្ភៈ តាមលិខិតសុំការបំភ្លឺនេះថា ករណីនេះ គឺលោកជាអ្នកចេញបទបញ្ជាផ្ទាល់ទៅកម្លាំងក្រោមឱវាទឲ្យចុះធ្វើការរឿងនេះ។
លោក រឹម លឹមសេង មេប៉ុស្តិ៍រូបនេះ ក៏បានឆ្លើយបដិសេធ ដែរថា ករណីខាងលើនេះគឺមិនមែនជាការចាប់ខ្លួនឬឃាត់ខ្លួននោះទេ គឺជាការអញ្ជើញ គឺអញ្ជើញយកមកសួរនាំ និងធ្វើកិច្ចសន្យា ព្រោះតែអ្នកសារព័ត៌មានរូបនោះហ៊ានមកថតរូបភាពក្រុមបទល្មើសក្នុងដែនសមត្ថកិច្ចរបស់លោក ដោយមិនបានសុំសិទ្ធិអនុញ្ញាតពីលោកជាមុន ទើបលោកចេញបទបញ្ជាឲ្យកូនចៅធ្វើការអញ្ជើញ អ្នកសារព័ត៌មានរូបនោះ មកស្នាក់ការប៉ុស្តិ៍ (ពោលគឺអញ្ជើញដោយមិនចាំបាច់ធ្វើលិខិតអញ្ជើញ ព្រោះតែអ្នកសារព័ត៌មានរូបនោះមិនមែនជាថ្នាក់ប្រតិភូអីនោះទេ ទោះសាមីខ្លួនមិនព្រមមកក៏ត្រូវតែអញ្ជើញមកឲ្យបាន)?។
អ្នកសារព័ត៌មានដែលរង់នៅហេតុការណ៍ខាងលើនេះ អះអាងថាខ្លួនពិតជាត្រូវបានកម្លាំងសមត្ថកិច្ចអន្តោប្រវេសន៍ មានគ្នាប្រមាណ១១នាក់ ព័ទ្ធចាប់ខ្លួនដោយប្រើកម្លាំងបាយស្ទាក់ចាប់ដកសោរម៉ូតូ និងបង្គាប់ឲ្យទៅប៉ុស្តិ៍បង្ខំឲ្យធ្វើការផ្តិតមេដៃលើលិខិតកិច្ចសន្យាពិតប្រាកដមែន បើទោះបីជាពេលនោះលោកបានបដិសេធថាមិនព្រមទៅ និងសួររកហេតុផលជុំវិញការឃាត់ខ្លួនរបស់លោកជាអ្នកសារព័ត៌មាន តើខ្ញុំបានខុសអីបានជាមកឃាត់ខ្ញុំ តែកម្លាំងសមត្ថកិច្ចអន្តោប្រវេសន៍ទាំងនោះនៅតែចាប់បង្ខំឲ្យទៅទាំងកំរោល ដោយមិនបានប្រាប់ហេតុផល។
សូមបញ្ជាក់ថា៖ កាលពីថ្ងៃទី២៨ ខែមករា ឆ្នាំ២០២៣ មានករណីអ្នកសារព័ត៌មាន ម្នាក់ បានថតជាប់រូបភាព និងសកម្មភាពក្រុមឈ្មួញដឹកជញ្ជូនទំនិញបារីគេចពន្ធតាមម៉ូតូ និងបានរាយការណ៍ជូនមន្ត្រីគយប្រចាំតំបន់ដើម្បីឲ្យមានវិធានការទប់ស្កាត់ តែពេលនោះមិនឃើញមានវិធានការទប់ស្កាត់ចំពោះឈ្មួញដែលដឹកជញ្ជូនបារីនោះទេ ស្រាប់តែមួយសន្ទុះបែរជាមានកម្លាំងសមត្ថកិច្ចនគរបាលច្រកទ្វារព្រំដែនអន្តរជាតិក្អមសំណ មានគ្នាជាង១០នាក់មកធ្វើការឃាត់ខ្លួនអ្នកសារព័ត៌មានរូបនោះទៅកាន់ស្នាក់ការប៉ុស្តិ៍ និងបានបង្ខំឲ្យផ្តិតមេដៃ ថែមទាំងឲ្យមានការខូចខាតទ្រព្យសម្បត្តិ បែកទូរស័ព្ទដៃ១គ្រឿង។
