អាមេរិកថា រុស្ស៉ីប្រព្រឹត្ត«ឧក្រិដ្ឋកម្មប្រឆាំងមនុស្សជាតិ» នៅក្នុងសង្គ្រាមអ៊ុយក្រែន
21-September-2026 / ព័ត៌មានអន្តរជាតិ
រុស្ស៊ី៖សារព័ត៌មាន AFP នៅថ្ងៃអាទិត្យ ទី១៩ ខែកុម្ភៈ ឆ្នាំ២០២៣ បានផ្សាយថា អនុប្រធានាធិបតីអាមេរិក លោកស្រី កាម៉ាឡា ហារីស (Kamala Harris) បាននិយាយថា រដ្ឋបាលលោកប្រធានាធិបតី ចូ បៃដិន បានធ្វើការសន្និដ្ឋានជាផ្លូវការថា រុស្ស៉ីបានប្រព្រឹត្តឧក្រិដ្ឋកម្មប្រឆាំងមនុស្សជាតិ អំឡុងសង្គ្រាមឈ្លានពានរបស់ខ្លួនជិតមួយឆ្នាំមកនេះនៅអ៊ុយក្រែន។
ថ្លែងនៅឯសន្និសីទសន្តិសុខទីក្រុងមុយនិក លោកស្រី ហារីស ដែលធ្លាប់ជាអតីតរដ្ឋអាជ្ញាម្នាក់ផងនោះ បានគូសបញ្ជាក់ដូច្នេះថា «នៅក្នុងករណីនៃសកម្មភាពរបស់រុស្ស៉ីនៅអ៊ុយក្រែន យើងបានធ្វើការត្រួតពិនិត្យលើភស្តុតាង….ហើយគ្មានអ្វីត្រូវសង្ស័យនោះទេ ពោលគឺវាពិតជាមានឧក្រិដ្ឋកម្មប្រឆាំងមនុស្សជាតិ»។ លោកស្រីបន្ថែមថាអ្នកដែលប្រព្រឹត្តឧក្រិដ្ឋកម្មប្រឆាំងមនុស្សជាតិ រួមទាំងថ្នាក់ដឹកនាំកំពូលរបស់ពួកគេដែលបានសមគំនិតក្នុងឧក្រិដ្ឋកម្មបែបនេះ នឹងត្រូវទទួលខុសត្រូវចំពោះមុខច្បាប់។ការសន្និដ្ឋានជាផ្លូវការខាងលើ ធ្វើឡើងបន្ទាប់ពីបញ្ចប់ការវិភាគផ្នែកច្បាប់ និងភស្តុតាងរបស់ក្រសួងការបរទេសអាមេរិក។ ក្រុមអ្នកជំនាញមួយចំនួនបាននិយាយថា ការចោទប្រកាន់លើរុស្ស៉ីនឹងមិនមានឥទ្ធិពលលើសង្គ្រាមសព្វថ្ងៃនោះទេ។ ប៉ុន្តែ ទីក្រុងវ៉ាស៊ីនតោនសង្ឃឹមថាវាអាចនឹងធ្វើឱ្យរុស្ស៉ីកាន់តែឯកោនៅលើឆាកអន្តរជាតិ ហើយនឹងជួយជំរុញកិច្ចខិតខំប្រឹងប្រែងផ្នែកច្បាប់ ដើម្បីនាំខ្លួនមន្ត្រីមួយចំនួនរបស់លោក ពូទីន ទទួលខុសត្រូវតាមរយៈតុលាការអន្តរជាតិ និងទណ្ឌកម្ម។
សូមបញ្ជាក់ថានៅថ្ងៃសៅរ៍ ទី១៨ កុម្ភៈជាថ្ងៃទី២ នៃសន្និសីទស្តីពីសន្តិសុខលើកទី ៥៩ ដែលបានរៀបចំធ្វើនៅក្នុងទីក្រុងម៉ុយនិចប្រទេសអាល្លឺម៉ង់។ ខុសពីឆ្នាំមុនៗ សន្និសីទដែលមានការចូលរួមដោយមានប្រមុខរដ្ឋ ប្រមុខរដ្ឋាភិបាលចំនួន៣០ប្រទេស រួមទាំងប្រមុខការទូតជាង ១០០នាក់មកពីជាង១៥០ប្រទេសក្នុងឆ្នាំនេះបានគ្របដណ្តប់ខ្លាំងដោយសង្គ្រាមអ៊ុយក្រែន។ ថ្លែងនាឱសនោះ ប្រធានាធិបតីបារាំងបានបញ្ជាក់ច្បាស់ៗថា គេត្រូវតែបង្កើនការគាំទ្រ និងប្រឹងប្រែងជួយដល់ការតស៊ូរបស់ប្រជាជន និងកងទ័ពអ៊ុយក្រែន។ លោកម៉ាក្រុងបានទទួលស្គាល់ថា វាមិនទាន់ជាពេលវេលានៃកិច្ចសន្ទនាទេ។ ចំណែកប្រមុខរដ្ឋាភិបាលអាល្លឺម៉ង់លោកអូឡាហ្វ ស្ហុលស៍បានអំពាវនាវឲ្យប្រទេសលោកខាងលិចដែលអាចផ្តល់រថក្រោះឲ្យអ៊ុយក្រែនបានត្រូវធ្វើភ្លាមៗ។ ដោយឡែក ប្រធានាធិបតីអ៊ុយក្រែនលោកហ្សេឡេនស្គីបានចូលរួមតាមវីដេអូដោយបានជំរុញឲ្យថ្នាក់ដឹកនាំពិភពលោកបង្កើនល្បឿនគាំទ្រអ៊ុយក្រែនផ្លូវយោធាឲ្យបានលឿនបំផុត។ តាមលោកហ្សេឡេនស្គី គេគ្មានជម្រើសណាផ្សេងដើម្បីជំនួសឲ្យល្បឿននេះទេ។
ដោយឡែកនៅក្នុងប្រទេសវិញថ្លែងនៅក្នុងសុន្ទរកថាមួយតាមរយៈប្រព័ន្ធវីដេអូទៅកាន់ពលរដ្ឋអ៊ុយក្រែន នៅថ្ងៃព្រហស្បតិ៍សប្តាហ៍នេះ លោកបានលើកឡើងថា ច្បាស់ណាស់ថារុស្ស៊ីនឹងបន្ថែមកម្លាំងទ័ព រួមទាំងគ្រឿងសព្វាវុធជាច្រើនបន្ថែមទៀត ដើម្បីត្រៀមបើកការវាយប្រហារជាលក្ខណៈទ្រង់ទ្រាយធំមកលើអ៊ុយក្រែននៅក្នុងពេលអនាគតដ៏ខ្លីខាងមុខ ស្រដៀងគ្នានឹងការអះអាងដោយភ្នាក់ងារចារកិច្ចអ៊ុយក្រែន និងសម្ព័ន្ធមិត្តលោកខាងលិច នៅស្របពេលប្រតិបត្តិការយោធាពិសេសរបស់រដ្ឋាភិបាលទីក្រុងមូស្គូនឹងឈានចូលរយៈពេល ១ឆ្នាំពេញ នៅថ្ងៃទី២៤ ខែកុម្ភៈ ឆ្នាំ២០២៣។
ជុំវិញស្ថានការណ៍វិវត្តន៍ចុងក្រោយនៃសង្គ្រាមរុស្ស៊ី-អ៊ុយក្រែន យោធាអ៊ុយក្រែនបានអះអាងថា រុស្ស៊ីបានវាយប្រហារតាមផ្លូវអាកាសសរុបចំនួន៣៦លើកទូទាំងប្រទេសអ៊ុយក្រែន ខណៈទីក្រុង Bakhmut កំពុងស្ថិតនៅក្រោមការឡោមព័ទ្ធជាបណ្ដើរៗដោយក្រុមកងកម្លាំងទាហានស៊ីឈ្នួល Wagner Group របស់រុស្ស៊ី ស្របពេលការប្រយុទ្ធគ្នានៅតែបន្ដយ៉ាងខ្លាំងក្លានៅតាមតំបន់សមរភូមិភាគខាងកើត និងខាងត្បូងអ៊ុយក្រែន រួមមានតំបន់ Luhansk និង Donetsk ៕
