សម្តេចសខេងណែនាំឲ្យអាជ្ញាធរពង្រឹងនិងត្រួតពិនិត្យកត្តាដែលបង្កគ្រោះថ្នាក់ចរាចរ
26-February-2023 / ផ្សេងៗ
ភ្នំពេញ៖អាជ្ញាធរ ដែលមានសមត្ថកិច្ច ត្រូវយកចិត្តទុកដាក់ ដោយត្រូវចាត់វិធានការឱ្យបានម៉ឺងម៉ាត់ និងគ្មានការលើកលែង លើអ្នកបើកបរដែលស្ថិតក្រោមឥទ្ធិពលនៃគ្រឿងញៀន និងគ្រឿងស្រវឹងត្រួតពិនិត្យយានដ្ឋានជួសជុលដែលគ្មានគុណភាពគ្មានច្បាប់និងគុណភាពផ្លូវ។
ថ្លែងក្នុងឱកាសដែលសម្តេចអញ្ជើញជាអធិបតីដ៏ខ្ពង់ខ្ពស់ក្នុងពិធីបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆ្នាំ២០២២ និងលើកទិសដៅការងារងា ឆ្នាំ២០២៣ នៅស្ដីការក្រសួងសាធារណការ និងដឹកជញ្ជូន នាថ្ងៃទី៣០ ខែមករា ឆ្នាំ២០២៣សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) មានប្រសាសន៍ថា «ទន្ទឹមនឹងការរៀបចំច្បាប់ ស្តីពីចរាចរណ៍ផ្លូវគោកថ្មី យើងត្រូវបន្តអនុវត្តច្បាប់ ដែលនៅជាធរមាន។ បន្តដឹកនាំរឹតបន្តឹងការអនុវត្តច្បាប់ឱ្យកាន់តែមានប្រសិទ្ធភាព និងនិរន្តភាព ស្របតាមតំបន់ភូមិសាស្ត្រ កន្លែងដែលកើតមានគ្រោះថ្នាក់ច្រើន ជាមួយគ្នានេះត្រូវយកចិត្តទុកលើអ្នកបើកបរយានយន្តស្ថិតក្រោមឥទ្ធិពលនៃគ្រឿងញៀន និងគ្រឿងស្រវឹង ដោយត្រូវចាត់វិធានឱ្យបានម៉ឺងម៉ាត់ លើការពិន័យ ឬបញ្ចូនទៅតុលាការ ដោយគ្មានការលើកលែង»។
សម្ដេចក្រឡាហោម ស ខេង បានបញ្ជាក់បន្ងែមថា អង្គភាពជំនាញ ត្រូវសិក្សា កសាងផែនការ និងមានវិធានការឱ្យបានច្បាស់លាស់ តាមដំណាក់កាលនីមួយៗ ដើម្បីកសាងផ្លូវថ្មី ពង្រីក ឬជួសជុលកែលម្អផ្លូវថ្នល់ដែលមានស្រាប់ បង្កើតចំណត ឱ្យបានច្រើន និងចាត់វិធានការគ្រប់គ្រងដីចំណីផ្លូវឱ្យបានគត់មុត។សម្ដេចក្រឡាហោម បន្ដថា ជាមួយនេះ ត្រូវ គិតគូអំពីការបំពាក់បរិក្ខាផ្លូវថ្នល់ឱ្យបានគ្រប់គ្រាន់សមស្របតាមស្ថានភាពផ្លូវ បន្តគាំទ្រដល់ការបំពាក់កាមេរ៉ាអចល័តនៅតាមផ្លូវនានា និងត្រូវបែងចែកសមត្ថកិច្ច គ្រប់គ្រងថែទាំផ្លូវថ្នល់ឱ្យបានច្បាស់លាស់ រវាងថ្នាក់ជាតិ និងថ្នាក់ក្រោមជាតិ។ក្រៅពីនេះអាជ្ញាធរពាក់ព័ន្ធពិនិត្យយានដ្ឋានជួសជុលរថយន្តដែលគ្មានច្បាប់អនុញ្ញាត និងបិទជាបន្ទាន់រាល់យាន្តដ្ឋានគ្មានវិជ្ជាជីវៈ គ្មានសមត្ថភាព និងគ្មានជំនាញពិតប្រាកដ ដែលជាហេតុនាំឱ្យការជួសជុលរថយន្តមានបញ្ហាគ្រោះថ្នាក់នៅពេលបើកបរនៅលើដងផ្លូវ ដូចជា របូតកង់ជាដើម។
សម្តេចក៏បានប្រាប់ឱ្យស្នងការនគរបាលរាជធានី-ខេត្ត តាមរយៈនាយឧត្តមសេនីយ៍ នេត សាវឿន អគ្គស្នងការនគរបាលជាតិ ត្រូវចាប់ផ្តើមធ្វើការត្រួតពិនិត្យយាន្តយន្តដែលមិនទាន់បានទៅធ្វើការពិនិត្យលក្ខណៈបច្ចេកទេសយាន្តយន្ត(ឆៀក) ដើម្បីធ្វើការផាកពិន័យតាមច្បាប់។ ប៉ុន្តែកុំដាក់កម្លាំងសមត្ថកិច្ចឆ្មក់ត្រួតពិនិត្យឆៀកបច្ចេកទេសរថយន្តនៅតាមដងផ្លូវក្លាយទៅជាកុងត្រូលជជុះ។សម្ដេចក្រឡាហោម ស ខេង ក៏បានលើកឡើងថា ដើម្បីឆ្លើយតបនឹងការរីកចម្រើននូវប្រព័ន្ធបច្ចេកវិទ្យា មន្ត្រីអនុវត្តច្បាប់ទាំងអស់ និងមន្ត្រីពាក់ព័ន្ធ ត្រូវបង្កើនការកសាងសមត្ថភាព ចំណេះដឹងអំពីច្បាប់ ជំនាញ បច្ចេកទេសប្រតិបត្តិការរបស់ខ្លួន ស្របជាមួយនឹងក្រមសីលធម៌ វិន័យ អាកប្បកិរិយាល្អចំពោះប្រជាពលរដ្ឋផងដែរ។
សូមបញ្ជាក់ថា ការដាក់បញ្ជាឱ្យកម្លាំងសមត្ថកិច្ចគ្រប់រាជធានី-ខេត្ត ត្រួតពិនិត្យរថយន្តដែលមិនទាន់បានទៅធ្វើការពិនិត្យលក្ខណៈបច្ចេកទេសយាន្តយន្ត(ឆៀក) ក្រោយរបាយការណ៍របស់ក្រសួងសាធារណការ និងដឹកជញ្ជូន បានបង្ហាញថា នៅមានរថយន្តប្រមាណជាង ១៧ម៉ឺនគ្រឿង ដែលធ្វើចរាចរណ៍នៅតាមដងផ្លូវហួសសុពលភាព និងមិនទាន់បានធ្វើការពិនិត្យលក្ខណៈបច្ចេកទេសយាន្តយន្ត(ឆៀក) នៅឡើយទេ។
គណៈកម្មាធិការជាតិសុវត្ថិភាពចរាចរណ៍ផ្លូវគោក បានឱ្យដឹងថា ឆ្នាំ២០២២ គ្រោះថ្នាក់ចរាចរណ៍ផ្លូវគោកបានកើតឡើងចំនួន ២៩៧៦ករណី បណ្ដាលឲ្យស្លាប់ចំនួន ១៧០៩នាក់ និងរងរបួសជាង ៤ពាន់នាក់។ អ្នកស្លាប់ភាគច្រើននៅរាជធានីភ្នំពេញ ខេត្តកណ្ដាល និងខេត្តកំពង់ចាម។ ចំពោះមូលហេតុបណ្ដាលឲ្យមានគ្រោះថ្នាក់ចរាចរណ៍ គឺការបើកបរដោយលើសល្បឿនកំណត់ មិនគោរពសិទ្ធិ មិនប្រកាន់ស្ដាំ វ៉ាជែង បត់ ស្រវឹង កត្តាយានយន្ត និងងងុយ.។
ទាក់ទងបញ្ហាគ្រោះថ្នាក់ចរាចរនេះសម្ដេចក្រឡាហោម ស ខេង ឧបនាយករដ្ឋមន្ដ្រីបានថ្លែងប្រាប់អ្នកសារព័ត៌មាន នៅព្រឹកថ្ងៃទី៣០ ខែមករា ឆ្នាំ២០២៣នេះ ក្រោយចប់កិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ឆ្នាំ២០២២ និងលើកទិសដៅបន្ដឆ្នាំ២០២៣ ថា«ច្បាប់ថ្មីនេះបានឆ្លងគណៈកម្មាធិការជាតិសុវត្ថិភាពចរាចរណ៍ផ្លូវគោករួចរាល់ហើយ យើងកំពុងបញ្ជូនទៅក្រុមអក្សរសាស្ដ្រដើម្បីជួយមើលអក្ខរាវិរុទ្ធឲ្យបានច្បាស់លាស់ [...] ខ្ញុំសង្ឃឹមថានឹងជួយកាត់បន្ថយគ្រោះថ្នាក់ចរាចរណ៍ ព្រោះដោយសារច្បាប់ចាស់មានចំណុចមួយចំនួនអត់ស្រប ដូច្នេះខ្ញុំគិតថាអាចជួយបានច្រើន (ជួយកាត់បន្ថយគ្រោះថ្នាក់ចរាចរណ៍)»។
