វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 6032 នាក់
ម្សិលមិញ 5378 នាក់
សរុប 14085325 នាក់
បេឡារុស្ស៖ តុលាការប្រទេសបេឡារុស្សក្រោមរបបដឹកនាំរបស់លោកអាឡិចសានឌឺលូកាស៊ិនកូ( Alexander Lukashenko )បានចាប់ផ្ដើមដំណើរការជំនុំជម្រះក្តីដោយកំបាំងមុខទៅលើចុងចោទដែលជាមេដឹកនាំគណបក្សប្រឆាំងដ៏លេចធ្លោចំនួន ២រូប គឺលោកស្រីស្វៀឡាណាត្ស៊ីខានូស្កាយ៉ា( Sviatlana Tsikhanouskaya )ដែលបច្ចុប្បន្នកំពុងរស់នៅនិរទេសខ្លួននៅឯប្រទេសលីទុយអានី ខណៈលោកប៉ាវែលឡាទូស្កា( Pavel Latushka)កំពុងរស់នៅក្នុងប្រទេសប៉ូឡូញ។
អ្នកនយោបាយបក្សប្រឆាំងបេឡារុស្សទាំងពីររូបនេះ សុទ្ធសឹងតែជាអ្នកដែលធ្លាប់បានដឹកនាំការប្រឆាំងជាលក្ខណៈទ្រង់ទ្រាយធំមួយទៅលើរបបដឹកនាំបែបផ្ដាច់ការរបស់លោកប្រធានាធិបតី Lukashenko នៅក្រោយការបោះឆ្នោតជាតិកាលពីឆ្នាំ ២០២០ និងបន្ទាប់ពីរកឃើញថាមានការលួចបន្លំសន្លឹកឆ្នោតជាច្រើនដើម្បីឱ្យមេដឹកនាំដ៏ចាស់វស្សារូបនេះអាចបន្ដកាន់អំណាចទៅថ្ងៃមុខបាន។តុលាការរបស់ប្រទេសបេឡារុស្សបានចោទប្រកាន់មេដឹកនាំបក្សប្រឆាំងទាំងពីររូបថាបានព្យាយាមដណ្ដើមអំណាចដោយខុសច្បាប់ គួបផ្សំនឹងបណ្ដឹងមួយចំនួនផ្សេងទៀតដែលពាក់ព័ន្ធនឹងអំពើក្បត់ជាតិ ស្របពេលសហគមន៍អន្តរជាតិភាគច្រើនមើលឃើញថាជាហេតុផលនយោបាយ។
សូមបញ្ជាក់ថា រដ្ឋាភិបាលបេឡារុស្សគ្រប់គ្រងដោយប្រធានធិបតី Lukashenko បានបង្កើនការធើ្វទុក្ខបុកម្នេញយ៉ាងខ្លាំងទៅលើក្រុមអ្នកនយោបាយមកពីបក្សប្រឆាំងក្នុងប្រទេសបេឡារុស្សក្រោយពីមានបាតុកម្មតវ៉ាលក្ខណៈទ្រង់ទ្រាយធំជាច្រើនសារបន្ទាប់ពីការបោះឆ្នោតជាតិ ។ បច្ចុប្បន្ន ក្រុមអ្នកទោសនយោបាយសរុបក្នុងប្រទេសបេឡារុស្សមានចំនួនជាង ១៥,០០០នាក់ ដែលរដ្ឋាភិបាលបេឡារុស្សចាប់ឃុំខ្លួន រហូតបង្កឱ្យមានការរិះគន់ខ្លាំងៗពីអន្តរជាតិចំពោះការធ្លាក់ចុះលទ្ធិប្រជាធិបតេយ្យធ្ងន់ធ្ងរនៅក្នុងប្រទេសដែលមេដឹកនាំជាសម្ព័ន្ធមិត្តចាក់ទឹកមិនលិចរបស់ប្រធានាធិបតីសហព័ន្ធរុស្ស៊ីលោកវ្លាឌីមៀពូទីន ៕