សហពន្ធ័កីឡាប្រដាល់គុនខ្មែរមិនមែនហាមមិនឲ្យកីឡាចេញប្រកួតនៅក្រៅប្រទេសទេគ្រាន់តែចង់ឲ្យមកសុំច្បាប់និងចង់ឲ្យនៅក្នុងក្របខណ្ឌ័រដ្ឋ
26-March-2024 / សុខភាពនិងកីឡា
ភ្នំពេញ ៖ កាលពីព្រឹកថ្ងៃទី៤ មករា ឆ្នាំ២០២៣ សហព័ន្ធកីឡាប្រដាល់គុនខ្មែរបានរៀបចំធ្វើសន្និសីទសារព័ត៌មានដើម្បីបកស្រាយនិងពន្យល់សារធារណជន ជុំវិញការរិះគន់ដល់មន្ត្រីសហព័ន្ធរឿងហាមមិនឱ្យកីឡាករធឿន ធារ៉ា ចេញទៅប្រកួតនៅក្នុងក្របខណ្ឌពានរង្វាន់ស្ដេចថៃ ។លោក ហេង សុឃន អគ្គលេខាធិការសហព័ន្ធកីឡាប្រដាល់គុនខ្មែរបានឱ្យដឹងថា សហព័ន្ធមិនបានហាមឃាត់កីឡាករធឿន ធារ៉ា ដែលដឹកនាំដោយលោកអេ ភូថង ចេញទៅប្រកួតនៅប្រទេសថៃនោះទេ ផ្ទុយទៅវិញ សហព័ន្ធមានតែគាំទ្រនិងលើកទឹកចិត្តរាល់ការចេញទៅប្រកួតនៅក្រៅប្រទេសដើម្បីបំផុសនិងផ្សព្វផ្សាយវិស័យកីឡាប្រដាល់គុនខ្មែរនៅលើឆាកអន្តរជាតិឱ្យកាន់តែទូលំទូលាយ ។
មិនតែប៉ុណ្ណោះ សហព័ន្ធកីឡាប្រដាល់គុនខ្មែរកំពុងតែមានផែនការសកម្មភាព និងយុទ្ធសាស្ត្រឱ្យបានទូលំទូលាយ បណ្ដុះបណ្ដាលកីឡាករថ្នាលជាច្រើននាក់ដើម្បីបំពេញសេចក្ដីត្រូវការរបស់ស្ថានីយទូរទស្សន៍ក្នុងស្រុកឱ្យបានគ្រប់គ្រាន់ ។ ម្យ៉ាងវិញទៀតសហព័ន្ធកីឡាប្រដាល់គុនខ្មែរថែមទាំងគិតគូរទៅដល់កីឡាករប្រដាល់គ្រប់ក្របខណ្ឌទាំងក្របខណ្ឌជម្រើសជាតិនិងមិនមែនជម្រើសជាតិ។តែ រាល់កីឡាករដែលចេញទៅប្រកួតនៅក្រៅប្រទេស ត្រូវឆ្លងកាត់ការហ្វឹកហាត់ឱ្យបានត្រឹមត្រូវ ហើយត្រូវគិតពីគុណផលឱ្យបានច្រើន ដោយសហព័ន្ធបានផ្ដល់ទីកន្លែងសម្រាប់ហ្វឹកហាត់ឱ្យបានត្រឹមត្រូវ ចៀសវាងនាំឱ្យមានរឿងមិនល្អកើតឡើងលើកីឡាករយើង ។ ព្រោះ មួយរយៈមកនេះគេសង្កេតឃើញកីឡាករប្រដាល់គុនខ្មែរមួយចំនួនតែងតែធ្វើដំណើរចេញទៅប្រកួតនៅក្រៅប្រទេសដោយចិត្តឯង។
លោកអគ្គលេខាធិការសហព័ន្ធកីឡាប្រដាល់គុនខ្មែរបញ្ជាក់ថា សហព័ន្ធកីឡាប្រដាល់គុនខ្មែរទាមទារឱ្យមានច្បាប់ស្នើមកសហព័ន្ធឱ្យបានមុនយ៉ាងតិចពីរសប្ដាហ៍ ដើម្បីស្នើសុំទៅក្រសួងអប់រំ យុវជន និងកីឡា ជៀសវាងការប្រឈមមុខជាមួយក្រសួងមួយនេះ ។ ការដែលសហព័ន្ធធ្វើបែបនេះគឺគិតពីបញ្ហាបច្ចេកទេសជាមុនសិន បើមានបញ្ហាគ្រោះថ្នាក់ជាយថាហេតុណាមួយកើតឡើងសហព័ន្ធជាអ្នកទទួលបន្ទុកដោះស្រាយទាំងអស់ ។លោកថា បច្ចុប្បន្នឯកឧត្តមតែម ម៉ឺន ប្រធានសហព័ន្ធកីឡាប្រដាល់គុនខ្មែរ បាននិងកំពុងយកចិត្តទុកដាក់យ៉ាងខ្លាំង ។ មិនតែប៉ុណ្ណោះ គ្រប់កីឡាករដែលទទួលបានស្នាដៃដណ្ដើមបានមេដាយ
មាសមកជូនជាតិ សហព័ន្ធតែងផ្ដល់ក្របខណ្ឌដល់ពួកគេគ្រប់គ្នា ។ ជាក់ស្ដែងដូចជាក្រុមគ្រួសារលោក អេ ភូថង ត្រូវបានផ្ដល់ឱកាសឱ្យចូលក្របខណ្ឌកងយោធពលខេមរៈភូមិន្ទស្ទើរតែទាំងអស់រួចទៅហើយ។
ឯកឧត្តមតែម ម៉ឺន ប្រធានសហព័ន្ធកីឡាប្រដាល់គុនខ្មែរបានបង្ហើប្រាប់កាសែតថា កីឡាករធឿន ធារ៉ា ត្រូវបានសហព័ន្ធហៅឱ្យចូលជាកីឡាករជម្រើសជាតិតាំងពីឆ្នាំ២០១៧ និងផ្ដល់ក្របខណ្ឌទៀតផង ។ ប៉ុន្តែត្រូវបានប្រធានក្លិបរារាំងមិនឱ្យចូលឡើយ ព្រោះម្ចាស់ក្លិបតែងតែគិតពីផលប្រយោជន៍ផ្ទាល់ខ្លួនសំខាន់ជាង? ។ និយាយរួម បើកាលណាកីឡាករស្ថិតនៅក្នុងក្របខណ្ឌជម្រើសជាតិ និងក្របខណ្ឌការងារត្រឹមត្រូវគឺស្ថិតនៅក្រោមការគ្រប់គ្រងរបស់ក្រសួងអប់រំយុវជន និងកីឡា ទទួលបានប្រាក់បៀវត្សពីរាជរដ្ឋាភិបាល ដូច្នេះមិនអាចចេញទៅប្រកួតដោយចិត្តឯងបាននោះទេ ។
សូមបញ្ជាក់ថាទាកទងបញ្ហានេះមានមតិពីបងប្អូនអ្នកគាំទ្រគុនខ្មែរ បានលើកជាសំណើរសូមឲ្យសហព័ន្ធកីឡាបញ្ចូលកីឡាករជើងខ្លាំងកម្ពុជាទាំងពីរ មឿន សុខហ៊ុច និង ធឿន ធារ៉ាដែលទទួលខ្សែក្រវ៉ាត់ពីស្រុកថៃ ទទួលបានក្របខណ្ឌរដ្ឋបម្រើជាតិ ដូចកីឡាករជើងខ្លាំងខ្មែរជាច្រើនផ្សេងទៀតផង។បងប្អូនលើកឡើងថា មានកីឡាករខ្មែរជាច្រើននាក់ ដែលទទួលបានក្របខ័ណ្ឌរដ្ឋ បើបន្ថែមគាត់២នាក់ទៀតក៏មិនថ្វីដែរ ព្រោះគាត់បានលើកមុខមាត់ជាតិ លើឆាកអន្តរជាតិ។ កាលពីឆ្នាំ ២០១៦ កីឡាករមឿន សុខហ៊ុច ឈ្នះខ្សែក្រវ៉ាត់ Max Muay Thai ធ្វើឲ្យកក្រើកគុនខ្មែរម្ដងហើយ! ។ថ្មីៗនេះ ឆ្នាំ២០២២ ធឿន ធារ៉ា ក៏បានឈ្នះខ្សែក្រវ៉ាត់ Thai Fight កាន់តែកក្រើកម្ដងទៀតផងដែរ។
ទាក់ទងនិងការបញ្ចូលក្នុងក្របខណ្ឌ័រដ្ឋនេះដែរ កីឡាករ មឿន សុខហ៊ុច បានបង្ហើរតាមហ្វេសប៊ុកថា៖ «មានមុខមាត់ ប៉ុន្តែមិនទាន់មានក្របខ័ណ្ឌកីឡាទេ»។ អ្នកលេងបណ្តាញសង្គមម្នាក់ ក៏បានលើកជាសំណើរថា៖ «សូមខាងសហព័ន្ធជួយពួកគាត់អោយបានចូលបំរើជាតិផង ព្រោះពួកគាត់ជាកូនអ្នកក្រខ្សត់ គ្មានលុយបុកចូលដូចគេទេ មានតែស្នាដៃ និងកិត្តិយសលើកស្ទួយមុខមាត់ជាតិប៉ុណ្ណោះ»៕
