វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2009 នាក់
ម្សិលមិញ 5456 នាក់
សរុប 12337003 នាក់
ភ្នំពេញ៖ លោក យ៉ង សាំងកុមារ អតីតប្រធាននាយកគណបក្សប្រជាធិបតេយ្យមូលដ្ឋាននិងជាបេក្ខជននាយករដ្ឋមន្ត្រីរបស់គណបក្សក្រោយពីបានមកចុះចូលជាមួយគណបក្សប្រជាជនកម្ពុជា ត្រូវបាន ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រកម្ពុជា ចេញព្រះរាជក្រឹត្យនៅថ្ងៃទី២៩ ខែវិច្ឆិកា ឆ្នាំ២០២២នេះ ត្រាស់បង្គាប់តែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការ ក្រសួងកសិកម្ម ខណៈលោក ឡឹក សុធារ ដែលជាមនុស្សជំនិតមួយរូបរបស់លោក ត្រូវបានតែងតាំងជា អនុរដ្ឋលេខាធិការក្រសួងកសិកម្ម។
កាលពីថ្ងៃទី២៣ ខែវិច្ឆិកា ឆ្នាំ២០២២ លោកបណ្ឌិត យ៉ង សាំង កុមារ និងលោក ឡឹក សុធារដែលជាមនុស្សជំនិតបានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។ ក្រៅពីសុំចូលគណបក្សប្រជាជនកម្ពុជា លោក យ៉ង សាំង កុមារ ក៏បានធ្វើលិខិតគោរពជូន សម្តេចតេជោដាច់ដោយឡែកមួយទៀត ស្នើសុំចូលរួមជាមួយរាជរដ្ឋាភិបាល ក្នុងការអភិវឌ្ឍវិស័យកសិកម្ម ជាពិសេសវិស័យស្រូវអង្ករ។
លោក យ៉ង សាំងកុមាដែលធ្លាប់ត្រូវសម្តេចតេជោរិះគន់ថាបណ្ឌិតផេះ និង លោក ឡឹក សុធារ ត្រូវបានសម្តេចតេជោ ហ៊ុន សែន អនុញ្ញាតឱ្យចូលជួបពិភាក្សាការងារអស់រយៈពេល២ម៉ោង នៅថ្ងៃទី២៨ ខែវិច្ឆិកា ឆ្នាំ២០២២នេះ ដោយក្នុងនោះក៏មានការចូលរួមពី លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទផងដែរ។ លោកបណ្ឌិត យ៉ង សាំងកុមារដែលអះអាងថាមិនដូគោលដៅតែដូតែគណបក្ស បានបង្ហាញចំណាប់អារម្មណ៍របស់លោក បានលើកឡើងថា ភាគីទាំងអស់ មានទស្សនវិស័យដូចគ្នា ទាក់ទងនឹងវិស័យកសិកម្ម ដែលអាចធ្វើការជាមួយគ្នាបាន។«ជាទូទៅយើងមានទស្សនវិស័យដូចគ្នា ទាក់ទងនឹងបញ្ហាប្រឈម និងដំណោះស្រាយក្នុងវិស័យកសិកម្មនៅកម្ពុជា ហើយយើងអាចធ្វើការជាមួយគ្នាបាន»។ នេះជាការបញ្ជាក់របស់លោកបណ្ឌិត នៅលើបណ្តាញសង្គមហ្វេសប៊ុក៕