អាមេរិកសន្យាជួយហ្វីលីពីនតែចិនថាគ្មានបញ្ហា!
21-September-2026 / ព័ត៌មានអន្តរជាតិ
ចិនហ្វីលីពីន៖អនុប្រធានាធិបតីអាមេរិកលោកស្រីHarrisបាននិយាយថាទីក្រុងវ៉ាស៊ីនតោនប្តេជ្ញាចិត្តរបស់ខ្លួនចំពោះការការពារគ្នាទៅវិញទៅមកប្រសិនបើកងកម្លាំងហ្វីលីពីនត្រូវបានវាយប្រហារនៅសមុទ្រចិនខាងត្បូង។
ក្នុងអំឡុងកិច្ចប្រជុំជាមួយប្រធានាធិបតីហ្វីលីពីនFerdinand Marcos នៅវិមានប្រធានាធិបតីក្នុងទីក្រុងម៉ានីលលោកស្រីអនុប្រធានាធិបតីអាមេរិក Kamala Harris ថា”យើងឈរជាមួយអ្នកដើម្បីការពារច្បាប់ និងបទដ្ឋានអន្តរជាតិពាក់ព័ន្ធនៅក្នុងសមុទ្រចិនខាងត្បូង”។លោកស្រី Harris គឺជាមន្ត្រីជាន់ខ្ពស់របស់សហរដ្ឋអាមេរិកដែលមកបំពេញទស្សនកិច្ចនៅទីក្រុងម៉ានីល ចាប់តាំងពីលោក Marcos បានឡើងកាន់តំណែងកាលពីខែមិថុនា ដែលជាសញ្ញាបង្ហាញពីទំនាក់ទំនងកាន់តែក្តៅគគុករវាងសម្ព័ន្ធមិត្តទាំង២បន្ទាប់ពីមានភាពត្រជាក់អស់រយៈពេលជាច្រើនឆ្នាំក្រោមការដឹកនាំរបស់អតីតប្រធានាធិបតីរ៉ូដ្រីហ្គោឌុយតាតេ( Rodrigo Duterte)។
លោកប្រធានាធិបតីម៉ាកូស( Marcos )បាននិយាយថា ទំនាក់ទំនងរវាងហ្វីលីពីននិងអាមេរិកនឹងមានភាពជិតស្និទ្ធជានិច្ចនៅពេលអនាគត។នៅក្រោមសន្ធិសញ្ញាការពារគ្នាទៅវិញទៅមកឆ្នាំ១៩៥១សហរដ្ឋអាមេរិក និងហ្វីលីពីនបានប្តេជ្ញាចិត្តប្រទេសនីមួយៗក្នុងការទទួលខុសត្រូវការពារគ្នាទៅវិញទៅមក ក្នុងករណីដែលតំបន់ទីប្រជុំជនរបស់ខ្លួនឬទឹកដីប៉ាស៊ីហ្វិកត្រូវបានវាយប្រហារដោយកងកម្លាំងបរទេស។លោក Delfin Lorenzana រដ្ឋមន្ត្រីការពារជាតិហ្វីលីពីនក្រោមការដឹកនាំរបស់លោក Duterteធ្លាប់បានស្នើឱ្យកែសម្រួលសន្ធិសញ្ញាជាមួយនឹងការប្តេជ្ញាចិត្តជាក់លាក់មួយដែលអាមេរិកត្រូវតែធ្វើអន្តរាគមន៍ដើម្បីការពារហ្វីលីពីនក្នុងករណីមានជម្លោះនៅសមុទ្រចិនខាងត្បូង។
នៅក្នុងការហៅទូរស័ព្ទក្រោយមក លោក Blinken បានធានាដល់រដ្ឋមន្ត្រីការបរទេសហ្វីលីពីនថា សមុទ្រចិនខាងត្បូងស្ថិតនៅក្នុងវិសាលភាពនៃសន្ធិសញ្ញាឆ្នាំ១៩៥១ ។លោកស្រី Harris ក៏បានជួបសមភាគីហ្វីលីពីនលោកស្រី Sara Duterte កូនស្រីរបស់លោក Duterte ផងដែរ។ នៅថ្ងៃទី២២ខែវិច្ឆិកា លោកស្រីនឹងទៅទស្សនាខេត្តកោះ Palawan របស់ហ្វីលីពីន ដោយជួបជាមួយសមាជិកឆ្មាំសមុទ្រហ្វីលីពីននៅលើទូកល្បាតដ៏ធំបំផុត BRP Teresa Magbanua នៅក្នុងប្រទេស។ ដំណើរទស្សនកិច្ចរបស់លោកស្រី Harris ទៅកាន់ប្រទេសហ្វីលីពីនក៏ជាផ្នែកនៃកិច្ចខិតខំប្រឹងប្រែងរបស់សហរដ្ឋអាមេរិកដើម្បីលុបបំបាត់ការសង្ស័យណាមួយអំពីការប្តេជ្ញាចិត្តរបស់ខ្លួនចំពោះតំបន់អាស៊ីប៉ាស៊ីហ្វិកខណៈដែលប្រទេសចិនពង្រីកឥទ្ធិពលរបស់ខ្លួននៅក្នុងតំបន់។
ស្របពេលអនុប្រធានាធិបតីអាម៉េរិក លោកស្រី Kamala Harris កំពុងធើ្វដំណើរមកបំពេញទស្សនកិច្ចរយៈពេល ៣ថ្ងៃ នៅដែនកោះ Palawan របស់ប្រទេសហ្វីលីពីន ដែលស្ថិតនៅជិតបង្កើយទៅនឹងតំបន់ជម្លោះនៃដែនសមុទ្រចិនខាងត្បូងនោះ អ្នកនាំពាក្យរបស់ក្រសួងការបរទេសចិន លោកស្រី Mao Ning បានលើកឡើងបញ្ជាក់ថា រដ្ឋាភិបាលចិននឹងមិនមានបញ្ហាចំពោះដំណើរទស្សនកិច្ចរបស់មន្ត្រីជាន់ខ្ពស់អាម៉េរិកសម្រាប់កិច្ចពង្រឹងសហប្រតិបត្តិការរបស់ខ្លួនជាមួយនឹងបណ្ដាប្រទេសក្បែរតំបន់សមុទ្រចិនខាងត្បូងនោះឡើយ ពីព្រោះវាគឺជារឿងដ៏ល្អមួយទៅវិញដែលនឹងនាំមកនូវការអភិវឌ្ឍនិងស្ថេរភាពនៅក្នុងតំបន់។
ដោយឡែក សម្រាប់ដំណើរទស្សនកិច្ចរបស់លោកស្រីអនុប្រធានាធិបតីអាម៉េរិក Kamala Harris មកកាន់ប្រទេសហ្វីលីពីនក្នុងពេលនេះដែរ គឺធើ្វឡើងដើម្បីជាការពង្រឹងកិច្ចទំនាក់ទំងទ្វេភាគី ក៏ដូចជាសម្រាប់ជាការធានាផ្នែកសន្ដិសុខជាថ្មីម្តងទៀតទៅដល់ក្រុមប្រទេសសម្ព័ន្ធមិត្តនៅក្នុងតំបន់ ចំពោះគោលជំហររបស់រដ្ឋាភិបាលអាម៉េរិកលើបញ្ហាជម្លោះដែនសមុទ្រចិនខាងត្បូង ហើយនិងការគាំទ្ររបស់ខ្លួនទៅលើសេចក្ដីសម្រេចរបស់សាលាជំនុំជម្រះក្ដីអន្តរជាតិដែលបានបដិសេដការទាមទារសិទ្ធិផ្ដាច់មុខរបស់ប្រទេសចិនលើដែនសមុទ្រមួយនេះ។
ពាក់ព័ន្ធទៅនឹងបញ្ហាដែនសមុទ្រចិនខាងត្បូងខាងលើនេះដែរ ក៏នៅមានភាគីជម្លោះសំខាន់ៗដទៃទៀតដូចជា ប្រទេសវៀតណាម ម៉ាឡេស៊ី ប្រ៊ុយណេ ហើយនិងតៃវ៉ាន់ជាដើម ដែលសុទ្ធសឹងជាប្រទេសធ្លាប់បានចូលរួមដណ្ដើមទាមទារសិទ្ធិសម្រាប់ការអាស្រ័យផលនៅក្នុងដែនសមុទ្រមួយនេះ៕ យោងតាមAFPនិងប្រភព៖ Reuters Connect
