រាជរដ្ឋាភិបាលរៀបចំច្បាប់វិនិយោគថ្មី និងច្បាប់ស្ដីពីតំបន់សេដ្ឋកិច្ចពិសេសដើម្បីលើកទឹកចិត្តនិងទាក់ទាញ
28-December-2025 / សេដ្ឋកិច្ច
ភ្នំពេញ៖ រាជរដ្ឋាភិបាល បាននិងកំពុងរៀបចំច្បាប់វិនិយោគថ្មី និងច្បាប់ស្ដីពីតំបន់សេដ្ឋកិច្ចពិសេស ក្នុងគោលបំណងបង្កើតនូវក្របខ័ណ្ឌគតិយុត្ត ដែលបើកចំហរមានតម្លាភាព និងប្រសិទ្ធភាពសម្រាប់ការវិនិយោគ។នេះជាការប្រកាសរបស់ សម្ដេចតេជោ ហ៊ុន សែននាយករដ្ឋមនត្រី នៅរសៀលថ្ងៃទី១៥ ខែធ្នូ ឆ្នាំ២០១៩នេះក្នុងឱកាសអញ្ជើញជាអធិបតីបើកបើកពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជា។
«រាជដ្ឋាភិបាល បាននិងកំពុងរៀបចំច្បាប់វិនិយោគថ្មី និងច្បាប់ស្តីពីតំបន់សេដ្ឋកិច្ចពិសេស ក្នុងគោលបំណងបង្កើតនូវក្របខ័ណ្ខគតិយុត្ត ដែលបើកចំហ មានតម្លាភាព អាចប៉ាន់ប្រមាណបានប្រកបដោយភាពអំណោយផល និងប្រសិទ្ធភាព សម្រាប់ការវិនិយោគការធ្វើទំនើបកម្ម និងការបង្កើនផលិតភាព ឧស្សាហកម្មក្នុងស្រុក ជាមួយនឹងការពង្រឹង ការតភ្ជាប់ទៅក្នុងខ្សែច្រវាក់ផ្គត់ផ្គងក្នុងតំបន់ និងសកលលោក តាមរយៈការជំរុញកំណើនលំហូរចូលមូលធន និងការផ្ទេរបច្ចេកវិទ្យា ចំណេះដឹង និងចំណេះធ្វើ។
សម្ដេចតេជោ ហ៊ុន សែន អះអាងថា ក្របខណ្ឌច្បាប់ដែលបានចែងខាងលើ គឺជាការលើកទឹកចិត្តការវិនិយោគប្រកបដោយតម្លាភាព គ្មានការរើសអើង ហើយមានលក្ខណៈប្រកួតប្រជែងស្មើភាព ផ្តល់ការការពារនូវសិទ្ធិ និងផលប្រយោជន៍ស្របច្បាប់របស់ វិនិយោគិននៅកម្ពុជា ដើម្បីបង្កើតនូវក្របខ័ណ្ណគតិយុត្ត ដែលមានលក្ខណៈគ្រប់ជ្រុងជ្រោយ និងមានតុល្យភាព ស្របទៅនឹងលក្ខខណ្ឌ នៃការវិនិយោគជាមួយ នឹងផលប្រយោជន៍របស់ប្រទេសជាតិ។
សម្ដេចតេជោ បញ្ជាក់ថា បច្ចុប្បន្នក៏ដូចជាបញ្ហាឆ្នាំកន្លងទៅ ការលើកកម្ពស់ការអភិវឌ្ឍន៍សហគ្រាសធុនតូច និងមធ្យម គឺជាគោលដៅ អាទិភាពរបស់រាជរដ្ឋាភិបាល ដែលតែងតែផ្តោតការយកចិត្តទុកដាក់ខ្ពស់ស្របតាមការកំណត់ នៃអនុក្រឹត្យស្តីពីការលើកទឹកចិត្ត ផ្នែកពន្ធដារ សម្រាប់សហគ្រាស ធុនតូច និងមធ្យម តាមរយៈការលើកលែងពន្ធលើប្រាក់ចំណូលរហូតដល់៥ឆ្នាំ។
លើសពីនេះ ការលើកលែងការបង់ប្រាក់រំដោះពន្ធលើប្រាក់ចំណូល និងពន្ធអប្បបរមា ក្នុងរយៈពេលលើកលែងពន្ធលើប្រាក់ចំណូល រួមទាំងការលើកទឹកចិត្ត ចំណាយដែលអាចកាត់កងបានដើម្បីបង្កើតការងារ និងបង្កើនសមត្ថភាពផលិតកម្ម ក្នុងស្រុករបស់កម្ពុជា លើវិស័យអាទិភាព រួមមានវិស័យកសិកម្ម កសិ-ឧស្សាហកម្ម ការផលិត និងកែច្នៃម្ហូបអាហារ ការស្រាវជ្រាវ និងអភិវឌ្ឍបច្ចេកវិទ្យាព័ត៌មាន ដែលវិស័យទាំងអស់នេះស្ថិតក្នុងតំបន់ប្រមូលផ្ដុំ នៃសហគ្រាសធុនតូច និងមធ្យម។
សម្តេចក៏បានថ្លែងឲ្យដឹងថា តាមរយៈសុខសន្តិភាព ជាមួយនឹងកំណើនសេដ្ឋកិច្ចប្រកបដោយចីរភាព វិស័យពាណិជ្ជកម្មនេះ ក៏បាននាំចូលមកវិញនូវទំនិញ និងសេវាបំពេញតម្រូវការសេដ្ឋកិច្ចពីប្រទេសចំនួន ១៣៥ ដែលធ្វើឱ្យទំហំពាណិជ្ជកម្មអន្តរជាតិ កើនឡើងរហូតដល់ជាង ៣០ ប៊ីលានដុល្លារក្នុងឆ្នាំ ២០១៨ កន្លងមក។កម្ពុជាបានធ្វើពិពិធកម្មជាបន្តបន្ទាប់ពីការនាំចេញផលិតផលឧស្សាហកម្មសម្លៀកបំពាក់ (កាត់ដេរ ស្បែកជើង កាបូបធ្វើដំណើរ) ទៅកាន់ផលិតផលឧស្សាហកម្ម (មិនមែនវាយនភ័ណ្ឌ និងផលិតផលផ្សេងៗទៀត ជាមួយនឹងគោលដៅនាំចេញសំខាន់ៗរបស់កម្ពុជា គឺទីផ្សារសហរដ្ឋអាមេរិក សហភាពអឺរ៉ុប ជប៉ុន ចិន កូរ៉េបញ្ហាប្រទេសក្នុងតំបន់អាស៊ាន និងប្រទេសដទៃទៀត។
កម្ពុជាសម្រេចបានកំណើនសេដ្ឋកិច្ចជាមធ្យមប្រចាំឆ្នាំក្នុងរង្វង់ ៧,៧% ក្នុងរយៈពេលជាង ២ ទសវត្សរ៍ ចុងក្រោយនេះ ព្រមទាំងសម្រេចបាននូវ បង្គោលចរជាប្រវត្តិសាស្ត្រ គឺឆ្លងពីឋានៈជាប្រទេសដែលមានចំណូលទាប ទៅជាប្រទេសមានចំណូលមធ្យម កម្រិតទាបជាផ្លូវការ កាលពីឆ្នាំ ២០១៥ ជាមួយនឹងការខិតខំប្រឹងប្រែងបន្តទៀត ដើម្បីក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ ២០៥០។ កាលពីឆ្នាំ ២០១៨ កន្លងមក អត្រាកំណើនសេដ្ឋកិច្ចកម្ពុជា សម្រេចបាន ៧,៥% ជាមួយនឹងការព្យាករណ៍អាចបន្តរក្សាកំណើនក្នុងរង្វង់ ៧% ក្នុងមួយឆ្នាំ សម្រាប់រយៈពេលមធ្យមទៅមុខ។
លោកប៉ាន សូរស័ក្តិ រដ្ឋមន្ត្រីពាណិជ្ជ កម្មឲ្យដឹងថា៖ ពិព័រណ៍ផលិតផលខ្មែរនេះ រៀបចំឡើងដោយមានការគាំទ្រ និងការចូលរួម ពីប្រទេស ប្រទេសចិន ជប៉ុន ឥណ្ឌូនេស៊ី ថៃ ម៉ាឡេស៊ី មីយ៉ាន់ម៉ា វៀតណាម និងប្រទេសឡាវព្រមទាំងមន្ទីរពាណិជ្ជកម្មទាំង២៥ រាជធានី-ខេត្ត សភាពាណិជ្ជកម្មកម្ពុជា សហព័ន្ធស្រូវអង្ករ អង្គការ សមាគមអាជីវកម្ម ក្រុមហ៊ុនក្នុងស្រុក និងក្រុមហ៊ុនបរទេសដែលកំពុងធ្វើប្រតិបត្តិការអាជីវកម្មនៅកម្ពុជា។ ពិព័រណ៍នេះមានស្ដង់សរុបចំនួន ៣៧២ស្ដង់ ដោយមានទំនិញ និងសេវាជាច្រើន ប្រភេទផងដែរ៕
