រឿងប្រឡងស្រីស្អាតពូកែទាស់ពេកលើកក្រោយប្រាកដជាស្លៀកក្បិនពាក់អាវបំពង់ទទូក្បាលហើយ!
24-April-2024 / សិល្បះនិងបែ្លកៗ
ភ្នំពេញ៖នៅព្រឹកថ្ងៃទី១ ខែកញ្ញា ឆ្នាំ២០២២ ក្រសួងវប្បធម៌ និងវិចិត្រសិល្បៈ បានរៀបចំកិច្ចប្រជុំអន្តរក្រសួង ដែលមានក្រសួងកិច្ចការនារី ក្រសួងព័ត៌មាន ព្រមទាំង លោក អ៊ិន សុភិន អគ្គនាយកផលិតកម្ម មហាហង្ស ដែលជាអ្នករៀបចំកម្មវិធី កញ្ញាឯកដ៏អស្ចារ្យនៃកម្ពុជាឆ្នាំ២០២២(Miss Grand Cambodia 2022) និងអ្នកពាក់ព័ន្ធមួយចំនួនទៀតដើម្បីជជែករឿងប្រកួតស្រីស្អាតស្លៀកស៊ិចស៊ី ។
ក្នុងកិច្ចប្រជុំនេះ តបការស្រែករបស់សម្តេចនាយករដ្ឋមន្ត្រីកាលពីព្រឹកថ្ងៃទី៣១សីហាស្ថាប័នពាក់ព័ន្ធ ណែនាំដល់លោកអ៊ិនភិនអគ្គនាយកផលិតកម្មមហាហង្ស ឲ្យស្វែងយល់គ្រប់ជ្រុងជ្រោយបន្ថែមទៀតពី វប្បធម៌ ទំនៀមទម្លាប់ ប្រពៃណី អត្តសញ្ញាណ ព្រមទាំងគុណតម្លៃនៃស្ត្រីខ្មែរ ហើយសហការឲ្យបានស៊ីជម្រៅជាមួយស្ថាប័នពាក់ព័ន្ធ ដើម្បីចៀសវាងនូវកំហុសឆ្គងដោយចេតនា ឬអចេតនាណាមួយដែលនាំទៅដល់ការប៉ះពាល់ និងធ្វើឲ្យអាប់ឱននូវវប្បធម៌ជាតិ និងគុណតម្លៃរបស់ស្ត្រីខ្មែរ។
សេចក្តីប្រកាសព័ត៌មានរបស់ក្រសួងវប្បធម៌ និងវិចិត្រសីល្បៈ បានឱ្យដឹងថា តាមរយៈកិច្ចប្រជុំនេះ ម្ចាស់ផលិតកម្មមហាហង្សក៏បានធ្វើការសូមអភ័យទោស ចំពោះសាធារណជនទាំងអស់នូវកំហុសឆ្គងទាំងឡាយដែលបានកើតឡើងដោយអចេតនា ក្នុងដំណើរកម្មវិធីប្រកួតកញ្ញាឯក Miss Grand Cambodia 2022 និងបានសន្យាថា នឹងបង្កើនកិច្ចសហការជាមួយស្ថាប័នពាក់ព័ន្ធ ក្នុងការរៀបចំព្រឹត្តិការណ៍វប្បធម៌នានា នាពេលអនាគត ចៀសវាងនូវរាល់កំហុសឆ្គងនានាជាយថាហេតុ ដែលបានកើតឡើងក្នុងឆ្នាំនេះ ក្នុងស្មារតីបន្តរួមចំណែកលើកតម្លៃនូវកិត្យានុភាពជាតិ និងគុណតម្លៃស្ត្រីខ្មែរឲ្យបានខ្ពង់ខ្ពស់។
ម្ចាស់ផលិតកម្ម មហាហង្ស លោក អ៊ិន សុភិន ប្រាប់ថា លោកមានបំណងផ្សព្វផ្សាយអ្វីដែលល្អៗ សម្រាប់ប្រយោជន៍សង្គមជាតិទាំងមូល ប៉ុន្តែអ្វីដែលក្រុមការងាររបស់លោកគិត បែរជាមានភាពខុសឆ្គងទៅវិញ។ ជាក់ស្តែងរឿងយកល្បែងតំណាងឲ្យក្រុងបាវិត ខេត្តស្វាយរៀង និងក្រុងប៉ោយប៉ែត ខេត្តបន្ទាយមានជ័យ ចង់បង្ហាញសក្តានុពលនៃខេត្តតែប៉ុណ្ណោះ។ចំពោះការ ស្លៀកពាក់ស៊ិចស៊ីជ្រុលលហួសហេតុរបស់បេក្ខនារី តំណាងឲ្យខេត្តស្ទឹងត្រែង លោកថា មិនមានបំណងឲ្យបវរកញ្ញាស្លៀកបង្ហាញកេរ្តិ៍ភេទអ្វីទេ។ ឈុតរាត្រីសមោសរនោះ មានលក្ខណៈបិទបាំងត្រឹមត្រូវ ប៉ុន្តែដោយសារតែពេលបវរកញ្ញាដើរ គួបផ្សំនឹងការថតពីក្រោយ ធ្វើឲ្យមានលក្ខណៈមិនសមរម្យទៅវិញ។ លោកសន្យាថា ការរៀបចំកម្មវិធីប្រកួតបវរកញ្ញាកម្ពុជា នៅឆ្នាំក្រោយ នឹងឲ្យមានកំហុសបែបនេះទៀតទេ។
សូមបញ្ជាក់ដែរថាអារឿងប្រកួតរកស្រីស្អាតដែលយុវជនខ្មែរកំពុងនិយមនេះក្រសួងកិច្ចការនារី នៅថ្ងៃទី៣១ ខែសីហា ឆ្នាំ២០២២នេះ បានចេញសេចក្ដីប្រកាសព័ត៌មាន ដោយបានសំដែងនូវការសោកស្តាយ និងថ្កោលទោសយ៉ាងធ្ងន់ធ្ងរ ចំពោះកម្មវិធីប្រកួតប្រជែងបវរកញ្ញា ក្នុងរូបភាពស៊ិចស៊ីជ្រុលហួសហេតុ បង្ហាញលក្ខណៈស្រើបស្រាល លេចលើលេចក្រោម ធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងតម្លៃរបស់ស្ត្រីខ្មែរក្រសួងកិច្ចការនារីដែលទើបស្ទុះស្ទាក្រោយពីនាយករដ្ឋមន្ត្រីប្រតិកម្មបានថ្កោលទោសយ៉ាងនិងចាត់ទុកសកម្មភាពបែបនេះ ថាមិនត្រឹមតែពុំបានរួមចំណែកលើកស្ទួយវប្បធម៌ ប្រពៃណី និងអត្តសញ្ញាណជាតិប៉ុណ្ណោះទេ ផ្ទុយទៅវិញទង្វើទាំងនោះ បានធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងតម្លៃរបស់ស្ត្រីខ្មែរ។
រឿងស្រីស្អាតស្លៀកស៊ិចស៊ីទាស់ចិត្តពួកអភិរក្សនិយមនេះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី៣១ ខែសីហា ឆ្នាំ២០២២នេះ បានបញ្ជាឲ្យលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ពិនិត្យឡើងវិញលើកម្មវិធីប្រកួតបវរកញ្ញា Miss Grand Cambodia បន្ទាប់ពីរងការរិះគន់ផ្ទួនពីមហាជន រឿងយកល្បែងតំណាងឲ្យក្រុងបាវិត និងក្រុងប៉ោយប៉ែត និងករណីស្លៀកស៉ិចស៊ីជ្រុលហួសហេតុ របស់បេក្ខនារី តំណាងឲ្យខេត្តស្ទឹងត្រែង។ទោះបីយ៉ាងណាសម្តេចតេជោ ហ៊ុន សែន បានថ្លែងបែបសម្របសម្រួលថា «ខ្ញុំក៏សុំឲ្យលោកជំទាវ ភឿង សកុណា ពិនិត្យឡើងវិញអំពីអាកម្មវិធីបវរកញ្ញាស្អីគេនៀក [Miss Grand Cambodia] ដោយសារតែរឿងវាច្រើនពេក ឃើញគេបង្ហោះចុះបង្ហោះឡើង មើលសុំហៅគ្នាមកធ្វើការមើល រឿងហ្នឹងវាយ៉ាងម៉េចបានទៅចឹង តំណាងបាវិត តំណាងប៉ោយប៉ែត សុទ្ធតែល្បែង អាហ្នឹងគ្នាក៏លុបចោលហើយ ប៉ុន្តែតំណាងស្ទឹងត្រែង គេទាត់ចោល រួចហើយអ្វីដែលសំខាន់ គឺស្រែក អាឡេអាឡូ ពេញទឹកពេញដី នេះជាភារកិច្ចរបស់ក្រសួងវប្បធម៌ ធ្វើការភ្លាមៗ។ សុំថ្ងៃក្រោយ មើលបញ្ហានេះឡើងវិញ ខ្ញុំមិនថាខុសត្រូវយ៉ាងម៉េចទេ ក៏ប៉ុន្តែមតិមហាជន គឺបង្ហាញនូវការសោកស្តាយ យើងត្រូវស្តាប់នូវសំឡេងនេះផង ហើយធ្វើការកែតម្រូវ»។
ការប្រកួតកញ្ញាឯកដ៏អស្ចារ្យនៃកម្ពុជា ឆ្នាំ២០២២ ឬ Miss Grand Cambodia 2022 ត្រូវបានគេដឹងថា រៀបចឡើងដោយផលិតកម្មមហាហង្ស ដែលមានលោក អ៉ិន សុភិន ជាអគ្គនាយកផលិតកម្ម។ កម្មវិធីនេះធ្លាប់បានរៀបចំប៉ុន្មានលើកមកហើយ។សម្តេចតេជោ ហ៊ុន សែន បានថ្លែងថា បេក្ខនារីដែលចូលរួមសម្តែង ក្នុងការប្រកួតប្រជែងកម្មវិធីបវរកញ្ញា Miss Grand Cambodia 2022 គ្មានកំហុតទេ ព្រោះពួកគេសម្តែង និងស្លៀកពាក់ទៅតាមអ្នករៀបចំកំណត់ បើមិនពួកគេមិនធ្វើតាម អ្នករៀបចំថា មិនត្រូវស្តង់ដារប្រកួតប្រជែង។មានការកត់សម្គាល់ថា កម្មវិធី Miss Grand Cambodia 2022 ឆ្នាំនេះ បានជួបព្យុះជួបភ្លៀង ក្លាយជាផ្ទាំងស៊ីបរិះគន់យ៉ាងខ្លាំង ពីសំណាក់មហាជនគ្រប់លំដាប់ថ្នាក់ ពោលគឺចាប់តាំងពីវគ្គដំបូង រហូតដល់វគ្គបញ្ចប់ ។
តែយ៉ាងណាមិញរឿងរិះគន់ជ្រុលនិយម នេះក៏មានស្រីស្អាតមានគណនីហ្វេសប៊ុកឈ្មោះថា Julie Hoeung ដែលត្រូវបានគេស្គាល់ជាម្ចាស់ប្រេនស៊ាបូមួយ ដែលទទួលរងការរិះគន់យ៉ាងខ្លាំង ពីសំណាក់ទស្សនិកជន បានប្រកាសដាក់ពាក្យប្តឹងទៅកាន់អ្នកផលិតកម្មវិធីដ៏ល្បីឈ្មោះ លោក គួច ខេវិន បន្ទាប់ពីលោកបានប្រើពាក្យ «សោភិនី ឬនារីពេស្យា» ដែលធ្វើឱ្យអ្នកឡើងបំពាក់មកុដ និងជាម្ចាស់ឧបត្ថម្ភដ៏ធំ សម្រាប់កម្មវិធី Miss Grand រូបនេះទទួលយកមិនបាន។
ក្រោយពីស្រីស្អាតរូបនេះ ស្លៀកលីអូគ្របរូបស្បៃឡើងមកបំពាក់ម្កុដ បានធ្វើឲ្យលោក គួច ខេវិនដែលជាអ្នករៀបចំកម្មវិធីសិល្បៈមួយដែរ បានរិះគន់ចំអកចំៗថា៖ «ការប្រឡងជ្រើសរើសស្រីសោភិនី ឬ នារីពេស្យាចារ 2022 ត្រូវបានបញ្ចប់! 2022 លេចប៉ុណ្ណឹង ឆ្នាំក្រោយលេចជាងហ្នឹងទៅទៀត រឺ អាក្រាតផងបាទ»។ លោក គួច ខេវិន បានដាក់បន្ថែមយ៉ាងចាក់ដោតថា៖ «រស់នៅក្នុងសង្គមប្រជាធិបតេយ្យ ពិតជាមានសេរីភាពយ៉ាងពេញបរិបូរណ៍ រហូតពេលខ្លះវាហូរហៀរទៅជាអនាធិបតេយ្យទៅវិញ ក៏មិនដឹង?
តួយ៉ាងដូចជាការប្រជែងរើស Miss Grand (សុភាពនារីថ្លៃថ្នូរប្រកបដោយកិត្តិគុណ) តែវាទៅជាវង្វេងវង្វាន់ដូចជាការជ្រើសរើសស្រី សោភិនី ឬនារីពេស្យាចារទៅវិញ??? ព្រោះវាមើលទៅដូចជាអាសអាភាស និងអាណាចាហួសហេតុពេកកន្លង ឃើញហើយវាក្តៅសាច់ រត់ទៅជុះអាចម៌៣ដង នៅតែមិនទាន់បាត់ខ្ពើម ឃ្លៀកគគ្រិច គ្រលៀនកាន់ស្នឹមរបស់មីនាងៗហ្នឹង លែងចង់ស៊ីបាយម៉ាអាទិត្យ? តើកូនចៅអ្នកណា ខ្ញុំសែនអនិច្ចា ជីដូនជីតានាងៗណាស់ មិនគួរយកកេរ្តិ៍យកខ្មាស មកឲ្យពួកនាងៗជាន់បន្ថោកបែបនេះសោះ? ចូរនាងទាំងហងអើយ គិតផងចុះថាមានសុភាពនារីខ្មែរច្រើនអនេក ដែលស្អាតទាំងរូប ល្អទាំងចរិយា ជាបញ្ចពិតកណ្យាណី តែគេមិនមកចូលប្រជែងជាមួយពួកនាងទេ ព្រោះគេមិនឲ្យប្រឡាក់កិត្តិស័ព្ទរបស់នារីខ្មែរ ជាមួយនឹងពួកនាងៗ! យល់???»។
សូមបញ្ជាក់ថាកាលពីរាត្រីថ្ងៃទី២៧ ខែសីហា ឆ្នាំ ២០២២ វេលាម៉ោង៧ដល់ម៉ោង១១យប់ដែលជាថ្ងៃផ្តាប់ព្រត្រ័រកម្ចាស់ជ័យលាភីជើងឯក បវរកញ្ញា Miss Grand Cambodia 2022 សម្រាប់ការប្រកួតអន្តរជាតិខាងមុខនេះបានទៅលើ ពេជ្រ វត្តីសារ៉ាវឌ្ឍី ដែលមកពីក្រុងព្រះសីហនុ ក្លាយជាកញ្ញាឯកដ៏អស្ចារ្យបំផុតក្នុងឆ្នាំ២០២២ (Miss Grand Cambodia) មានតួនាទីតំណាងអោយកម្ពុជាលើឆាកអន្តរជាតិនៃកម្មវិធី Miss Grand International ក្នុងប្រទេសឥណ្ឌូនេស៊ី នាពេលខាងមុខ។
ក្រោយទទួលបានជ័យលាភី ជាបវរកញ្ញាឯកដ៏អស្ចារ្យ Miss Grand Cambodia 2022 ដើម្បីទៅប្រកួតប្រជែងលើឆាកអន្តរជាតិនៃកម្មវិធី Miss Grand International ក្នុងប្រទេសឥណ្ឌូនេស៊ី នាពេលខាងមុខ ស្រាប់តែកញ្ញា ពេជ្រ វត្តីសារ៉ាវឌ្ឍី បានសន្យាទៅកាន់មហាជនថា ខ្លួននឹងខិតខំប្រឹងប្រែងអោយអស់ពីសមត្ថភាព ប្រព្រឹត្តិខ្លួនអោយបានល្អបំផុត គោរពតួនាទីអោយសាកសមជា Miss Grand Cambodia និងដុះខាត់សមត្ថភាពបន្ថែមទៀត សម្រាប់ការប្រកួតលើឆាកអន្តរជាតិខាងមុខនេះ ដើម្បីលើកមុខមាត់ជូនប្រទេសកម្ពុជា។ការពិតកម្មវិធីនេះមានផលប្រយោជន៍ខ្លាំងសម្រាប់វិស័យទេសចរណ៍ដែលជាប្រភពចំណូលខ្លាំងក្នុងផលទុនជាតិ។តែដោយសារខ្មែរយើងសម្បូរណ៍អ្នកអភិរក្សនិយមពេកទើបធ្វើឲ្យនាយករដ្ឋមន្ត្រិចាំបាច់ស្រែកម៉ាម៉ាត់ពីរទៅកុំឲ្យគេរិះគន់លោក.។
