វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2609 នាក់
ម្សិលមិញ 8227 នាក់
សរុប 14129490 នាក់
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី២០ ខែមេសា ឆ្នាំ២០២២នេះ បានថ្លែងអំណរគុណចំពោះប្រទេសជប៉ុន ក្នុងការរួមចំណែកកសាងសន្តិភាព និងបញ្ចប់សង្គ្រាមនៅកម្ពុជា។
សេចក្តីថ្លែងរបស់សម្តេចតេជោធ្វើឡើងក្នុងឱកាស អញ្ជើញសម្ពោធសមិទ្ធផលនានា ក្នុងគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤។
សម្តេចតេជោ ហ៊ុន សែន ថ្លែងថា «ការរួមចំណែករបស់ជប៉ុនតាមរយៈ នៃការចូលរួមរក្សាសន្តិភាព ដែលក្នុងនោះជប៉ុនបានផ្តល់វេទិកា សម្រាប់ការជួបជុំរវាងភាគីកម្ពុជា ដើម្បីចុះហត្ថលេខាលើកិច្ចព្រមព្រៀង ពាក់ព័ន្ធនឹងការបង្កើតក្រុមប្រឹក្សាជាតិជាន់ខ្ពស់ នៅឯទីក្រុងតូក្យូ ជំនាន់អតីតនាយករដ្ឋមន្ត្រី ខៃហ្វូ ដែលគាត់ទើបទទួលមរណភាព នៅប៉ុន្មានខែមុននេះ។ បន្ទាប់ទៅជប៉ុនក៏បានចូលរួមចំណែកអនុវត្តន៍ នូវកិច្ចព្រមព្រៀងទីក្រុងប៉ារីស តាមរយៈការបញ្ជូនកងទ័ពរបស់ជប៉ុនមកកាន់កម្ពុជា [...] បន្ទាប់ទៀតជប៉ុនបានដើរតួនាទីជាសហប្រធានអាយគក (បារាំង និងជប៉ុន) សម្រាប់ការផ្តល់ជំនួយ ដែលពេលខ្លះប្រជុំនៅតូក្យូ និងប្រជុំនឹងប៉ារីស បន្ទាប់មកទៀតជប៉ុនបានផ្តល់ជំនួយដល់កម្ពុជាបន្តបន្ទាប់ នៅពេលកម្ពុជាជួបការលំបាក»។សម្តេតេជោបានថ្លែងទៀតថា នៅឆ្នាំ២០២៣ គឺជាឆ្នាំទី៧០ នៃទំនាក់ទំនងការទូតរវាងកម្ពុជា-ជប៉ុន ខណៈនៅឆ្នាំ២០២២នេះ កម្ពុជា-ជប៉ុន បានប្រារព្ធពិធីអបអរខួបលើទី៣០ នៃការបញ្ជូនកងស្វ័យការពារជប៉ុន មកបំពេញបេសកកម្មរក្សាសន្តិភាព របស់អង្គការសហប្រជាជាតិនៃប្រទេសកម្ពុជាផងដែរ។
គម្រោងការពារទឹកជំនន់ និងកែលំអប្រព័ន្ធប្រឡាយលូក្នុងរាជធានីភ្នំពេញ ជំហានទី៤នេះ ចំណាយថវិកាទឹកប្រាក់សរុបប្រមាណ៣០លានដុល្លាអាមេរិក ជាជំនួយឥតសំណងរបស់រដ្ឋាភិបាលរដ្ឋាភិបាលជប៉ុន។ គម្រោងនេះរួមមាន៖ ដាក់បណ្តាញលូមេ នៅក្នុងភូមិសាស្ត្រខណ្ឌទួលគោក ប្រវែង ៨.២គីឡូម៉ែត្រ, ដាក់បណ្តាញលូមេ នៅក្នុងភូមិសាស្ត្រខណ្ឌដូនពេញប្រវែង ៤.៤គីឡូម៉ែត្រ, សាងសង់អាងស្តុកទឹកក្រោមដី និងសាងសង់ស្ថានីយ៍បូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC, ដំឡើងរបាមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយបូមទឹកចតុមុខព្រះគន្លង់១ ព្រះគន្លង់២ និងផ្សារចាស់ និងផ្តល់រថយន្តបូមទឹកចល័តចំនួន ២គ្រឿង។គម្រោងនេះ ត្រូវបានសម្តេចតេជោ ហ៊ុន សែន អញ្ជើញជាអធិបតីភាពបើកការដ្ឋានសាងសង់កាលពីថ្ងៃទី០៤ ខេមីនា ឆ្នាំ២០១៩កន្លងទៅ។ គម្រោងនេះ ប្រើរយៈពេលសាងសង់ប្រមាណជា ៣៦ខែ ដោយចាប់ផ្តើមគម្រោងពីថ្ងៃទី០១ ខែធ្នូ ឆ្នាំ២០១៨ បញ្ចប់នៅថ្ងៃទី៣១ ខែតុលា ឆ្នាំ២០២១។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអះអាងថា នៅថ្ងៃទី២២ ខែមេសា ឆ្នាំ២០២២ ខានស្អែកនេះ សម្តេចនឹងដឹកនាំគណៈប្រតិភូជាន់ខ្ពស់កម្ពុជា ទៅបំពេញទស្សនកិច្ចនៅប្រទេសជប៉ុន រយៈពេល២ថ្ងៃ និងចូលរួមក្នុងវេទិកាទឹកពិភពលោក។សម្តេចតេជោ ហ៊ុន សែន បានបញ្ជាក់ថា ក្នុងអំឡុងទស្សនកិច្ចនៅប្រទេសជប៉ុននេះ សម្តេចក៏នឹងជួបពិភាក្សាជាមួយ លោក គីស៊ីដា ហ្វូមីអូ នាយករដ្ឋមន្ត្រីជប៉ុន ព្រមទាំងមានចុះហត្ថលេខាលើឯកសារមួយផងដែរ។ បន្ទាប់ពីបញ្ចប់ទស្សនកិច្ចនេះ សម្តេចតេជោ នឹងអញ្ជើញត្រឡប់មកកម្ពុជាវិញនៅថ្ងៃទី២៤ ខែមេសា ឆ្នាំ២០២២។ ក្រោយមកដល់កម្ពុជា សម្តេចក៏ទទួលជួប មេប្រតិបត្តិការរបស់អ៊ុនតាក់ ដែលបំពេញបេសកកម្មនៅកម្ពុជា កាលពីទសវត្សរ៍៩០ ផងដែរ។កម្ពុជា និងប្រទេសជប៉ុន បានភ្ជាប់ទំនាក់ទំនងការទូតជាផ្លូវការនៅថ្ងៃទី០៩ ខែមករា ឆ្នាំ១៩៥៣។ ទំនាក់ទំនងនេះ នឹងមានអាយុកាលគម្រប់ ៧០ឆ្នាំ នៅឆ្នាំ២០២៣ ខាងមុខនេះ។ ជប៉ុនក៏ជាប្រទេសដែលផ្តល់ជំនួយយ៉ាងច្រើនដល់ប្រទេសកម្ពុជាផងដែរ