មានមនុស្សជាង៤លាននាក់បានដើរលេងតាមបណ្តាខេត្តនានាក្នុងឱកាសចូលឆ្នាំខ្មែរ៣ថ្ងៃ
03-April-2024 / ទេសចរណ៏និងវប្បធម៌
ភ្នំពេញ៖ឱកាសពិធីបុណ្យចូលឆ្នាំប្រពៃណីជាតិខ្មែររយៈពេល៣ថ្ងៃ ចាប់ពីថ្ងៃទី១៤-១៦ ខែមេសា ឆ្នាំ២០២២ នៅទូទាំងប្រទេសទទួលបានភ្ញៀវទេសចរសរុបចំនួន៤,៥៩០,៣២៦នាក់ ក្នុងនោះភ្ញៀវជាតិ៤,៥៦១,៤៧៧នាក់ និងភ្ញៀវបរទេសផ្ទៃក្នុង២៨,៨៤៩នាក់.។នេះបើតាមលោកថោងខុនរដ្ឋមន្ត្រីក្រសួងទេសចរណ៍ឲ្យកាសែតដឹង។
ក្នុងនោះតួលេខ សម្រាប់គោលដៅទេសចរណ៍សំខាន់ៗរយៈពេល៣ថ្ងៃនៃពីធិបុណ្យចូលឆ្នាំ រួមមាន៖ខេត្តបាត់ដំបងមាន ៥៦៥,៦១៨នាក់។* ខេត្តកំពង់ចាម ៥១៤,៤៤៧នាក់។* ខេត្តសៀមរាប ៤០០,៥៩១នាក់។* ខេត្តបន្ទាយមានជ័យ ៣៨៨,២៧៣នាក់។* ខេត្តព្រៃវែង ៣៨២,៨៦៧នាក់។* ខេត្តកំពង់ស្ពឺ ៣៣១,៨០៩នាក់។* ខេត្តពោធិ៍សាត់ ២៩៨,០៣៧នាក់។* ខេត្តកំពង់ឆ្នាំង ២៧៥,៤០០នាក់។ខេត្តកំពត ២៥៤,២៧០នាក់។* ខេត្តព្រះសីហនុ ២៣២,២៦៤នាក់។* រាជធានីភ្នំពេញ ២២២,២២០នាក់។
លោករដ្ឋមន្ត្រី ក្រសួងទេសចរណ៍បញ្ជាក់ថា ចរន្តភ្ញៀវនាថ្ងៃចូលឆ្នាំប្រពៃណីជាតិថ្ងៃទី៣នេះនៅបន្តមានភាពផុសផល និងកុះករកាន់តែច្រើនធៀបនឹងថ្ងៃទី២ម្សិលម៉ិញ។ ជាក់ស្តែង តួលេខថ្ងៃទី៣នេះបន្តកើនឡើងរហូតដល់ប្រមាណ ៣៦.០២% ធៀបនឹងថ្ងៃទី២។
សរុបថ្ងៃទី១ និងទី២ ចរន្តភ្ញៀវនាពេលចូលឆ្នាំនេះមានចំនួនច្រើនជាងឆ្នាំ២០១៩ដែលមិនទាន់មានជំងឺកូវីដ ប៉ុន្តែសម្រាប់ថ្ងៃទី៣នេះ ដោយសារមានភ្លៀងធ្លាក់ពីតិចទៅច្រើននៅគ្រប់ខេត្តធ្វើឲ្យភ្ញៀវមានចំនួនតិចជាងឆ្នាំ២០១៩។ ដូច្នេះសរុបរយៈពេល៣ថ្ងៃនៃថ្ងៃចូលឆ្នាំប្រពៃណីជាតិ ឆ្នាំខាល ពុទ្ធសករាជ២៥៦៥ ( ជិតឈានចូល២៥៦៦) មហាសករាជ១៩៤៤ ចុល្លសករាជ១៣៨៤នេះ មានភ្ញៀវប្រហាក់ប្រហែលនឹង៣ថ្ងៃនៃថ្ងៃចូលឆ្នាំប្រពៃណីជាតិខ្មែរកាលពីឆ្នាំ២០១៩ (ដែលមានចំនួនប្រមាណ៤,៧២៦,៦០២នាក់)។
បើតាមលោកថោង ខុន តួលេខខាងលើមិនបានរាប់បញ្ចូលប្រជាពលរដ្ឋដែលទៅជួបជុំទទួលអាហារជាលក្ខណៈក្រុមគ្រួសារនៅតាមអាហារដ្ឋាន និងកន្លែងដែលមានរៀបចំជាខ្យុស (Kiosque) អង្គុយលេងញ៉ាំអាហារ និងចំនួនប្រជាពលរដ្ឋជាច្រើនផ្សេងទៀត ដែលបានរៀបចំជាកម្មវិធីជួបជុំនៅរាំលេងកម្សាន្ត ជះទឹក លាបម្សៅតាមគេហដ្ឋាន និងតាមភូមិស្រុកផងដែរ។
ទោះបីចរន្តភ្ញៀវមានភាពកកកុញយ៉ាងណាក៏ដោយ ប៉ុន្តែកម្លាំងមានសមត្ថកិច្ចទាំងនៅថ្នាក់ជាតិ និងគណៈបញ្ជាការឯកភាពរាជធានីខេត្ត រួមជាមួយកម្លាំងប្រជាការពារនៅតាមភូមិឃុំបានខិតខំប្រឹងប្រែងមិនខ្លាចនឿយហត់ក្នុងការធានាសន្តិសុខ សុវត្ថិភាព សណ្តាប់ធា្នប់ និងចរាចរណ៍ទាំងនៅតាមផ្លូវជាតិ ទីប្រជុំជនក្នុងទីរួមខេត្ត កន្លែងប្រារព្ធកម្មវិធីសង្ក្រាន្ត រួមទាំងគោលដៅទេសចរណ៍នានា ទោះបីប្រឈមនឹងអាកាសធាតុក្តៅ និងហាលភ្លៀងពេលខ្លះក៏ដោយ។
ក្នុងពេលអភិសេករូបសំណាកតំណាងឲ្យការកកើតទឹកដីកម្ពុជា «ព្រះថោងនាងនាគ» នៅក្នុងខេត្តព្រះសីហនុ នៅថ្ងៃទី១៦ ខែមេសា ឆ្នាំ២០២២សម្ដេចតេជោ ហ៊ុន សែននាយករដ្ឋមន្ត្រីនៃកម្ពុជា បានបញ្ជាទៅអាជ្ញាធរឲ្យផ្អាកច្បាប់គ្រប់គ្រងកូវីដ-១៩ ក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ ដោយសម្ដេចថាឲ្យពលរដ្ឋទទួលបានការសប្បាយរីករាយក្នុងអំឡុងពេលនេះ និងថាអាចអនុវត្តន៍បានតែកន្លែងណាមានហានិភ័យនៃជំងឺប៉ុណ្ណោះ។ទោះជាយ៉ាងណាសម្ដេចបានស្នើឲ្យពលរដ្ឋអនុវត្តន៍វិធានការសុខាភិបាល ៣កុំ ៣ការពារ ត្រូវចេញទៅទទួលវ៉ាក់សាំងដូសជំរុញឲ្យបានគ្រប់គ្នា ដើម្បីធានាថាកម្ពុជាមានសុវត្ថិភាពគ្រប់គ្រាន់។
មន្ទីរទេសចរណ៍សហការជាមួយមន្ទីរជំនាញនៃរដ្ឋបាលរាជធានីខេត្តបានចាត់តាំងក្រុមការងារចុះប្រចាំការនៅតាមគោលដៅទេសចរណ៍សំខាន់ៗ ដើម្បីគ្រប់គ្រងចរន្តភ្ញៀវ ការពង្រឹងការអនុវត្តវិធានសុវត្ថិភាព និង SOP ក្នុងការទប់ស្កាត់ការរាលដាលជំងឺកូវីដ-១៩ និងបញ្ចៀសការលក់ឡើងថ្លៃហួសហេតុ និងបញ្ហាបរិស្ថានអនាម័យជាដើម ដែលក្នុងរយៈពេល៣ថ្ងៃនេះហាក់មិនមានបាតុភាពធំដុំណាមួយកើតឡើងទេ។
