វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1938 នាក់
ម្សិលមិញ 3528 នាក់
សរុប 14188323 នាក់
ខេត្តកំពង់ស្ពឺ ៖ បុរសពីរនាក់ជាម្ចាស់គោយន្តកន្ត្រៃយ៍ដឹកបង្គោលរបងត្រូវបានក្រុមទាហាន រថក្រោះ បាញ់បណ្តាលឲ្យរងរបួសម្នាក់ ព្រមទាំងខូចខាតគោយន្តមួយគ្រឿងនៅត្រង់ចំណុចស្រែមួយស្ថិតក្នុងភូមិពោធិ៍មាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ កាលពីរសៀលថ្ងៃទី១១ខែមេសាឆ្នាំ២០២២។
ប្រភពពីសមត្តកិច្ចមូលដ្ឋានបានឲ្យដឹងថាជនរងគ្រោះមានចំនួនពីរនាក់១.មានឈ្មោះ ស៊ីម ចំប៉ា ភេទ ប្រុស ២២ ឆ្នាំ រស់នៅភូមិ ពោធិ៍មាស ឃុំ ត្រពាំងជោ ស្រុកឱរ៉ាល់ ជាអ្នកបើកបរគោយន្ត បានរងរបួស ចំ ក និង ដាច់ត្រចៀកខាងស្តាំ ។២.ឈ្មោះ ខឿន គា ភេទ ប្រុស អាយុ ២៤ ឆ្នាំរស់នៅភូមិឃុំជាមួយគ្នា មិនរងរបួស ដែលជាអ្នករួមដំណើរជាមួយ រងការខូចខាតគោយន្តទាំងស្រុង ។ជនបង្កបានយកកាំភ្លើង បាញ់បំបែកកង់ខាងក្រោយ កាត់ខ្សែពាន និង យកដីខ្សាច់ដាក់ក្នុងម៉ាស៊ីនគោយន្តបណ្តាលឱ្យរងការខួចខាតគោរយន្តទាំងស្រុង។
ប្រភពបានបន្តទៀតថាក្រោយកម្លាំងនគរបាលប៉ុស្តិ៍ត្រពាំងជោសហការជាមួយអនុភូមិ ពោធិ៍មាស និង ប្រជាការពារ បានរកឃើញ វត្ថុតាង សំបកគ្រាប់ ដែលបានបាញ់រួច ចំនួន ៣ គ្រាប់ នៅក្បែរ កន្លែងកើតហេតុ ។ប្រជាសហគមន៍មួយនៅស្រុកឱរ៉ាល់ ខេត្តកំពង់ស្ពឺ បាននិយាយទាហ៊ាន ថាបានបាញ់ជាច្រើនគ្រាប់ និងប្រើអំពើហិង្សាលើសមាជិកសហគមន៍ ២នាក់ ខណៈសមាជិកសហគមន៍ទាំង២នាក់នោះ បើកគោយន្តដឹកបង្គោលរបងកាត់តំបន់ពួកគេយាមកាម។
ករណីយ៍បាញ់នេះដែរ កាលពីថ្ងៃទី១១ ខែមេសានេះ រូបលោក និងប្អូនប្រុសឈ្មោះ ស៊ីម ចំប៉ា ត្រូវទាហានង៧០បាញ់ជាច្រើនគ្រាប់ និងប្រើហិង្សាលើប្អូនប្រុសរបស់លោកឱ្យរងរបួសធ្ងន់។
លោកបន្តថា នៅថ្ងៃនោះ រូបលោក និងប្អូនប្រុស បានបើកគោយន្តដឹកបង្គោលរបងតាមផ្លូវមកពីខេត្តពោធិ៍សាត់ កាត់តាមកន្លែងយាមក្រុមទាហាននៃបញ្ជាការដ្ឋានរថក្រោះកងទ័ពជើងគោក ត្រង់ចំណុចភូមិពោធិ៍មាស ហើយពេលនោះក៏ស្រាប់តែទាហានចំនួន ៦នាក់ ចេញមកបាញ់ជាច្រើនគ្រាប់សំដៅទៅលើពួកគាត់ បណ្តាលឱ្យបែកកង់គោយន្ត និងចាប់វាយប្អូនរបស់លោកថែមទៀត។
ក្រោយពីវាយប្អូនប្រុសរបស់លោកឱ្យរងរបួសធ្ងន់ហើយនោះ ក្រុមទាហានក៏បានវាយកម្ចេចគោយន្តទាំង២គ្រឿងរបស់លោកឱ្យខូចខាតទាំងស្រុងថែមទៀត។ លោកថា ពេលលោករត់ទៅរកអាជ្ញាធរឃុំ និងពលរដ្ឋឱ្យជួយ ទើបទាហានទាំងនោះគេចខ្លួនចូលកន្លែងពួកគេយាមវិញ។លោក ឃឿន គា បានចាត់ទុកសកម្មភាពទាហានបាញ់ និងប្រើហិង្សាលើប្អូនរបស់លោកនេះថា ជាទង្វើមនុស្សឃាត ហើយលោកបានប្តឹងករណីនេះទៅប៉ុស្តិ៍នគរបាលឃុំត្រពាំងជោរដែរ ប៉ុន្តែមន្ត្រីនគរបាលប៉ុស្តិ៍នេះមិនទទួលយកបណ្តឹងពួកគាត់ឡើយ ដោយបង្វែរឱ្យប្តឹងទៅតុលាការដោយខ្លួនឯងវិញ។ លោកថា លោកកំពុងរៀបចំបណ្តឹងដើម្បីប្តឹងករណីនេះទៅតុលាការ។
សមាជិកសហគមន៍ឧត្ដមស្រែខ្ពស់ម្នាក់ទៀត លោក ខន សារិទ្ធ មានប្រសាសន៍ថា នេះមិនមែនជាលើកទី១ទេ ដែលក្រុមទាហានទាំងនោះ បានប្រើហិង្សាលើពលរដ្ឋក្នុងសហគមន៍ ខណៈពលរដ្ឋធ្វើដំណើរ ឬបើកគោយន្តឆ្លងកាត់តំបន់ពួកគេយាម។ លោក ខន សារិទ្ធ បន្តថា រូបលោក និងពលរដ្ឋផ្សេងទៀត ដែលសកម្មចេញតវ៉ាប្រឆាំងក្រុមទាហានមិនឱ្យឈូសឆាយ និងកាប់បំផ្លាញព្រៃសហគមន៍នោះ ក៏កំពុងបារម្ភពីសុវត្ថិភាព ខណៈទាហានទាំងនោះ កំពុងបង្កការគំរាមកំហែង និងបង្កការភ័យខ្លាចដល់ពលរដ្ឋក្នុងសហគមន៍។
អនុភូមិពោធិ៍មាសលោក ម៉ុន អ៊ី និងមេឃុំត្រពាំងជោរលោក ទេព ណែម ព្រមទាំងមេប៉ុស្តិ៍ត្រពាំងជោរលោក នៅ ណន សុំមិនឆ្លើយករណីនេះជាមួយកាសែតឡើយ។កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង ២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន ៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ក្រោយរដ្ឋាភិបាលចេញអនុក្រឹត្យកាត់ដីនេះ ក្រុមទាហានបានដាក់គ្រឿងចក្រឈូសឆាយ និងប្រើកម្លាំងកម្មករឱ្យទៅកាប់បំផ្លាញព្រៃនៅតំបន់នោះ ប៉ុន្តែត្រូវបានរារាំងជាបន្តបន្ទាប់ដោយអ្នកភូមិរាប់រយនាក់ ដោយអ្នកភូមិអះអាងថា ដីដែលក្រុមទាហានកំពុងធ្វើសកម្មភាពឈូសឆាយនោះ ជាដីព្រៃសហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ» ជាព្រៃដែលពួកគេបានការពារជាង២០ឆ្នាំទៅហើយ។