ព្រះរាជសារព្ហរះមហាក្សត្រ រាជរដ្ឋាភិបាលរំលឹកខួបលើកទី១៨ នៃការដាក់ប្រាសាទព្រះវិហារ ក្នុងបញ្ជីបេតិកភណ្ឌពិភពលោក

ភ្នំពេញ, ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជានៅថ្ងៃទី៦ ខែកក្កដា ឆ្នាំ២០២៦  បានផ្ញើព្រះរាជសារអបអរសាទរយ៉ាងកក់ក្តៅបំផុតជូនចំពោះប្រជារាស្ត្រខ្មែរ ក្នុងឱកាសខួបលើកទី១៨ នៃការចុះប្រាសាទព្រះវិហារ ចូលក្នុងបញ្ជីបេតិកភណ្ឌពិភពលោកនៃអង្គការយូណេស្កូ ដោយព្រះអង្គបានចាត់ទុកថា នេះជាព្រឹត្តិការណ៍ប្រវត្តិសាស្ត្រដ៏សំខាន់ ក្នុងការការពារបេតិកភណ្ឌវប្បធម៌របស់ព្រះរាជាណាចក្រ។ 

ក្នុងព្រះរាជសារ អបអរសាទរខួបនៃការចុះបញ្ជីប្រាសាទកាលពីថ្ងៃទី៧ ខែកក្កដា ឆ្នាំ២០០៨ ព្រះករុណាជាអម្ចាស់ជីវិតលើត្បូង បានសម្តែងនូវព្រះរាជហឫទ័យសោមនស្សរីករាយជាអនេក និងបានចូលរួមជាមួយប្រជាជាតិក្នុងការប្រារព្ធពិធីនេះ រួមជាមួយសម្តេចព្រះសង្ឃរាជ ព្រះសង្ឃ ថ្នាក់ដឹកនាំជាតិ និងប្រជារាស្ត្រខ្មែរគ្រប់រូប។

ព្រះករុណា ព្រះបាទសម្តេចព្រះបរមនាថ នរោត្តម សីហមុនី បានសរសើរចំពោះការចុះបញ្ជីប្រាសាទព្រះវិហារថា ជាទ្រព្យសម្បត្តិវប្បធម៌ជាតិផង និងជាតំបន់បេតិកភណ្ឌពិភពលោកផង ដោយបានកត់សម្គាល់ថា ការទទួលស្គាល់ពីអង្គការយូណេស្កូ បានរួមចំណែកដល់ការថែរក្សា និងការអភិរក្សប្រាសាទសម្រាប់កូនចៅជំនាន់ក្រោយនៅលើទឹកដីកម្ពុជា។

ព្រះករុណា ព្រះបាទសម្តេចព្រះបរមនាថ នរោត្តម សីហមុនី បានថ្លែងអំណរគុណដល់រាជរដ្ឋាភិបាល ក្រសួងវប្បធម៌ និងវិចិត្រសិល្បៈ អាជ្ញាធរជាតិព្រះវិហារ និងគណៈកម្មាធិការសម្របសម្រួលអន្តរជាតិសម្រាប់ការការពារ និងការអភិវឌ្ឍតំបន់ប្រវត្តិសាស្ត្រនៃប្រាសាទព្រះវិហារ (ICC-Preah Vihear) ដែលមានឥណ្ឌា និងចិន ជាសហប្រធាន ព្រមទាំងដៃគូជាតិ និងអន្តរជាតិ ចំពោះការប្តេជ្ញាចិត្តជាបន្តបន្ទាប់ក្នុងការអភិរក្ស និងអភិវឌ្ឍតំបន់ប្រវត្តិសាស្ត្រនេះ។

អាជ្ញាធរជាតិព្រះវិហារ បានឲ្យដឹងថា នៅថ្ងៃទី៥ ខែកក្កដា ឆ្នាំ២០២៦ អាជ្ញាធរជាតិព្រះវិហារ បានរៀបចំពិធីអបអរសាទរខួប១៨ឆ្នាំ នៃការចុះប្រាសាទព្រះវិហារក្នុងបញ្ជី បេតិកភណ្ឌពិភពលោក របស់អង្គការយូណេស្កូ (៧ កក្កដា ២០០៨ - ៧ កក្កដា ២០២៦) ក្រោមប្រធានបទ “ការអភិរក្ស វិនាសកម្ម និងការស្តារឡើងវិញ”។

ពិធីដែលតែងតែប្រារព្ធនៅលើប្រាសាទព្រះវិហារ បានប្តូរមកធ្វើនៅបរិវេណសារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ។ ពិធីក៏បានរម្លឹកអំពីវិនាសកម្មដ៏ធ្ងន់ធ្ងរដែលបានបង្កឡើងកាលពីឆ្នាំ២០២៥កន្លងទៅ ចំពោះបេតិកភណ្ឌពិភពលោក ដោយបានបំផ្លាញអស់ទាំងស្រុងនូវលទ្ធផលការងារកន្លងមក ហើយបន្សល់ទុកនូវការខូចខាតធ្ងន់ធ្ងរដល់ប្រាសាទព្រះវិហារសរុបចំនួន៥៦២កន្លែង។ ក្រៅពីនេះ បានបង្ខំប្រជាជនប្រមាណ១៦,០០០នាក់ ភៀសខ្លួនចេញពីលំនៅដ្ឋានក្នុងតំបន់បេតិកភណ្ឌពិភពលោក ខូចខាតផ្ទះសម្បែង សាលារៀន មណ្ឌលសុខភាព វត្ដអារាម និងហេដ្ឋារចនាសម្ព័ន្ធសាធារណៈជាច្រើន។

អាជ្ញាធរជាតិព្រះវិហារក៏បានលើកឡើងពីការអនុវត្ដផែនការសង្គ្រោះបន្ទាន់ប្រាសាទព្រះវិហារស្របតាមអនុសាសន៍របស់អ្នកជំនាញអង្គការយូណេស្កូ និងអាយស៊ីស៊ី-ព្រះវិហារ/ICC-Preah Vihear រួមមាន៖ ១. ការបោសសម្អាតអាវុធយុទ្ធភណ្ឌមិនទាន់ផ្ទុះនិងគ្រាប់បែកចង្កោម, ២. ការទល់ទ្រសង្គ្រោះរចនាសម្ព័ន្ធប្រាសាទពីការដួលរលំបន្ដទៀត, ៣. ការប្រមូលបំណែកថ្ម និងចម្លាក់រក្សាទុកសម្រាប់អភិរក្សនិងជួសជុល, ៤. ការថតឯកសារ 3D ប្រាសាទទាំងមូល និង៥. ការស្ដារប្រព័ន្ធផ្លូវទឹកបុរាណ។

រដ្ឋមន្ត្រីក្រសួងវប្បធម៌និង វិចិត្រសិល្បៈ អជ្ញាធរខេត្តព្រះវិហារ ព្រមទាំង លោក Flavio BONETTI ប្រធានការិយាល័យអង្គការ យូណេស្កូប្រចាំកម្ពុជា តំណាងទូតនៃបណ្តាប្រទេសជាសមាជិកគណៈកម្មាធិការ ICC-Preah Vihear អាជ្ញាធរជាតិព្រះវិហារ កងកម្លាំង គ្រូ សិស្ស និងប្រជាពលរដ្ឋក្នុងមូលដ្ឋានសរុបប្រមាណ៥០០នាក់ បានចូលរួមក្នុងថ្ងៃនេះ។រដ្ឋមន្រ្តីវប្បធម៌ ភឿង សកុណា បានបញ្ជាក់ពីការបន្តកិច្ចការអភិរក្ស ជួសជុលប្រាសាទព្រះវិហារឱ្យបានគង់វង្សសម្រាប់កូនចៅជំនាន់ក្រោយៗទៀត៕