រដ្ឋមន្ត្រីការបរទេសកាតារ ទៅរុស្ស៊ី ពិភាក្សាពី ការរកដំណោះស្រាយក្នុងពេលមន្ត្រីជាន់ខ្ពស់អាមេរិក-ចិនជួបពិភាក្សាគ្នាស្តីពីស្ថានភាពអ៊ុយក្រែនដែរ
08-July-2026 / ព័ត៌មានអន្តរជាតិ
អ៊ុយក្រែន៖អាមេរិកនិងចិនបានសម្រេចរៀបចំជំនួបពិភាក្សាគ្នាដោយផ្ទាល់ជាលើកដំបូងចាប់តាំងពីសង្គ្រាមវាយប្រហាររបស់រុស្ស៊ីទៅលើប្រទេសអ៊ុយក្រែន នាថ្ងៃទី២៤ខែកុម្ភៈមក។ សេតវិមានបានឲ្យដឹងថា ទីប្រឹក្សាសន្តិសុខជាតិអាមេរិក លោកជែកស៊ូលីវ៉ាន( Jake Sullivan) នឹងជួបពិភាក្សាជាមួយមន្ត្រីការបរទេសចិន និងជាគណៈកម្មការនយោបាយលោកយ៉ាងជែកជី( Yang Jiechi) នៅទីក្រុងរ៉ូម ប្រទេសអ៊ីតាលីនាថ្ងៃទី១៤ខែមីនា ។
ប្រធានបទនៃកិច្ចពិភាក្សា គឺការជះឥទ្ធិពលនៅលើពិភពលោក ដោយសារសង្គ្រាមរុស្ស៊ី-អ៊ុយក្រែន។ តែការប្រកាសរបស់ក្រសួងការបរទេសចិនវិញបញ្ជាក់ថា កិច្ចពិភាក្សាផ្តោតសំខាន់ទៅលើបញ្ហាពិភពលោកដែលប្រទេសទាំងពីរយកចិត្តទុកដាក់ ដោយមិនភ្ជាប់បញ្ហាអ៊ុយក្រែននោះឡើយ។
កាសែតដ៍ធំ របស់អាមេរិក The New York Times បានចុះផ្សាយនៅថ្ងៃអាទិត្យ ដោយអះអាងថា យោងតាមប្រភពពីមន្ត្រីអាមេរិក ដោយសុំមិនបញ្ចេញឈ្មោះ គឺរុស្ស៊ី បានសុំជំនួយពីចិន ទាំងផ្នែកសម្ភារៈយោធា គ្រឿងសព្វាវុធ និង ផ្នែកសេដ្ឋកិច្ច ដើម្បីសម្រាលបន្ទុកខ្លះ ព្រោះថាសេដ្ឋកិច្ចរុស្ស៊ីលំបាកសម្បើមណាស់ ដោយសារតែទណ្ឌកម្ម។ តែយ៉ាងណា ប្រភពដដែលនេះ មិនបានលំអិតទេ ថារុស្ស៊ីបានសុំអ្វីខ្លះពីចិន។ក្រោយដំណឹងនេះភ្លាមៗ លោក ចាវ លីជាន អ្នកនាំពាក្យក្រសួងការបរទេសចិន បានបដិសេធចោលទាំងស្រុង ថានេះគឺជាដំណឹងមិនពិតទេ។ ចិន អះអាងថា អាមេរិកកំពុងតែបំផុសបំផុលព័ត៌មានក្លែងក្លាយ ដើម្បីចោទប្រកានចិន។
ដោយឡែក ភាគីអាមេរិកវិញ លោក ជែក ស៊ូលីវ៉ាន ទីប្រឹក្សាផ្នែកសន្តិសុខរបស់សេតវិមាន បានប្រាប់ទូរទស្សន៍ CNN ថា អាមេរិកនឹងបន្តតាមដានយ៉ាងជាប់ស្អិត ទាក់ទិននឹងជំនួយដែលចិន អាចជួយទៅរុស្ស៊ី។ មិនថាជំនួយ ក្រោមរូបភាពណាមួយនោះទេ គឺអាមេរិក នឹងមិនឈរឲ្យដៃ បណ្តោយឲ្យចិនធ្វើ ដោយគ្មានផលវិបាកបានឡើយ។
រដ្ឋមន្ត្រីការបរទេសកាតារលោក Mohammed bin Abdulrahman Al-Thani កាលពីថ្ងៃទី១៣ ខែមីនា បានបំពេញទស្សនកិច្ចទៅកាន់ទីក្រុងមូស្គូ ដើម្បីជួបពិភាក្សាជាមួយសមភាគីរុស្ស៊ី លោកសែហ្គេឡាវរ៉ូស( Sergey Lavrov) ស្តីពីស្ថានភាពនៅក្នុងប្រទេសអ៊ុយក្រែន។នៅក្នុងជំនួបពិភាក្សារដ្ឋមន្ត្រីការបរទេសប្រទេសទាំងពីរបានពិភាក្សាគ្នាទៅលើស្ថានភាពនៅក្នុងប្រទេសអ៊ុយក្រែន ។
រដ្ឋមន្ត្រីការបរទេសកាតារ បានបញ្ជាក់ថា ដំណោះស្រាយសន្តិភាពគឺជាវិធីសាស្ត្រតែមួយគត់សម្រាប់ដោះស្រាយវិវាទទៅក្នុងប្រទេសអ៊ុយក្រែននាពេលនេះ។ នៅមុនពេលជួបពិភាក្សាជាមួយរដ្ឋមន្ត្រីការបរទេសរុស្ស៊ី រដ្ឋមន្ត្រីការបរទេសកាតារ ក៏បានជួបពិភាក្សាតាមទូរស័ព្ទជាមួយសមភាគីអ៊ុយក្រែន លោក Dmitry Kuleba ផ្តោតសំខាន់ទៅលើការបញ្ចៀសរាល់សកម្មភាពដែលធ្វើឱ្យតានតឹងកាន់តែខ្លាំង។
ក្នុងថ្ងៃជាមួយគ្នានេះដែរ ទីប្រឹក្សាសន្តិសុខអ៊ុយក្រែន លោក Mikhail Podolyak បានបញ្ជាក់ថា ប្រទេសនេះរក្សាទំនាក់ទំនងជាមួយអ៊ីស្រាអែល និងតួកគី ដោយសង្ឃឹមថាប្រទេសទាំងពីរនឹងធ្វើជាអាជ្ញាកណ្តាល ក៏ដូចជារៀបចំជំនួបពិភាក្សាផ្ទាល់រវាងប្រមុខដឹកនាំរុស្ស៊ីនិងអ៊ុយក្រែននាពេលខាងមុខ។
សម្រាប់រុស្ស៊ីវគ្មាននរណាអាចអះអាងបានថា រុស្ស៊ីបានសុំជំនួយពីចិន ពិតមែននោះទេ។ តែ បើនិយាយពីកាលៈទេសៈនេះ គឺរុស្ស៊ីអាចមានការលំបាកក្នុងការថ្វើសង្គ្រាមនៅអ៊ុយក្រេន។ ទោះរុស្ស៊ីបន្តវាយប្រហារទម្លាក់គ្រាប់ តែធាតុពិតទៅ កងទ័ពរុស្ស៊ី រុលទៅមុខយឺតណាស់។ ការយឺតយ៉ាវនេះ វាអាចបណ្តាលមកពីហេតុផល កង្វះសម្ភារៈដែរ។ បើនិយាយពីបញ្ហាសេដ្ឋកិច្ចវិញ រុស្ស៊ីកំពុងតែជួបបញ្ហា គ្មានលទ្ធភាពសងបំណុលសាធារណៈ បើទោះភាគីរុស្ស៊ីខ្លួនឯង ប្រកែកថាមិនពិតក៏ដោយ។ដូច្នេះ ចិនអាចជាច្រកមួយសម្រាប់រុស្ស៊ីដែរ ព្រោះមានតែចិនទេ ដែលអាចមានលទ្ធភាពជួយ ហើយដែលមានគោលជំហរកាន់ជើងរុស្ស៊ីខ្លះ។
តែបើ យោងតាមការវិភាគ របស់លោក Richard Haass អ្នកវិភាគនៅ Council on Foreign Relations គឺថាបើចិនហ៊ានតែជួយរុស្ស៊ីមែន នោះគឺមិនខុសពីយកជ័រព្នៅមកត្បៀតឃ្លៀកទេ។ ចិននឹងរងទណ្ឌកម្មពីក្រុមប្រទេសលោកខាងលិច។ ទណ្ឌកម្មសេដ្ឋកិច្ចដែលចិនមិនអាចប្រងើយបានទេព្រោះ រវាងរុស្ស៊ី និងអឺរ៉ុប-អាមេរិក គីជញ្ជីងពាណិជ្ជកម្មចិន ផ្អៀងទៅខាងអឺរ៉ុប-អាមេរិក ខ្លាំងជាង៕
